رواية احببت مجنونة الفصل الثالث والعشرون 23 - بقلم نجمة براقه

بعد 18 سنة. جودي: ياسو، قولي إنك بتهزري معايا. ياسمين: لا مبهزرش، ماله مراد؟ شاب زي الورد. جودي: يعني أنا أعيش طول عمري بوزي في بوزه، ولما أتجوز أتجوزه هو برضه؟ أنا نفسي أغير عتبة. ياسمين: تغيري إيه؟ بت، أنتي بتتكلمي عوجيزي كده ليه؟ اتعدلي. جودي: أغير عتبة يعني أجدد، وبعدين الواد مراد ده إيده تقيلة أوي ومننفعش مع بعض، احنا صحاب وزي الأخوات، ينفع أتجوز أخويا؟ يرضيكي؟ ياسمين: أخوكي إيه؟

هتطيريه من إيدك يا بت الهبلة، ابقي قابليني لو حد بص في وشك. جودي: خليهم يبصوا في قفايا، هاهاها. ياسمين: اتعدلي بقولك، ما تضحكي عدل. جودي: هو يوم مش معدي، بصي يا ستي أنا هريحك، لو مراد اتقدم أنا هوافق. ياسمين: حبيبتي، أيوه كده. جودي: بس خليكي متأكدة إنه مش هيتقدم. ياسمين: ملكيش دعوة أنتي بس. بيت مراد. مراد: ميمو، أنتي بتهزري صح؟ أنا وجودي لا مينفعش. مي: ومينفعش ليه بقى؟ تكونوش راضعين على بعض؟

مراد: لا متربين مع بعض، في المدرسة مع بعض، في النادي مع بعض، لغاية ما كرهتها، ثم جودي صحبتي وبس. مي: مفيش حاجة اسمها صحبتي، هي بنت وأنت ولد، يا ابني الله يهديك، جودي مننا وعلينا ومش هنلاقي زيها، وبعدين هي شكلها كده بتحبك. مراد: بتحبني؟! هههه استني وربنا لأتصل بيها أقولها. مي: لا لا يا مراد، أوعى عيب. مراد: هههه استني بس، دي هتفصل ضحك... ألو أيوه يا بت سمعتي اللي سمعته هههه. جودي: لا مسعتش، قول أنا نفسي أضحك.

مراد: ميمو بتقول إنك بتحبيني. جودي: وأنت صدقتها؟ والله الستات دول ناقصين عقل يا مراد يا أخويا. مراد: سمعتي يا ميمو؟ يا رب نهدى، أنا مش عاوزها ولا هي عاوزاني، ارتاحوا، مش كده يا بت ولا أنتي بتحبيني ومخبية؟ جودي: عاش يا صاحبي، أنا معاك في أي حاجة تقولها.. (وبهمس) ابعد عاوزاك. مراد: استني.. باي يا ميمو أنا خارج. مي: ده إيه العيال دي؟ صحاب إيه؟ هو في صحبية بين ولد وبنت؟ مراد: ارغي.

جودي: أوعى يا مارو تضعف، احنا على العهد. مراد: أضعف؟ لا طبعًا، أنا عاوز حاجة جديدة، أنا حفظت شكلك. جودي: اتفقنا... هتروح النادي؟ مراد: مش عارف لسه. جودي: طيب أنا هروح النهاردة لو فكرت تروح يعني. مراد: تمام ماشي، يلا في داهية. جودي: حبيبي يلا في مصيبة. ويقفلوا مع بعض. بيت هشام. هشام بعصبية: ياسمين! ياسمين: مالك على الصبح؟ هشام: فين الزفت الشراب؟ ياسمين: مش أنا قولتلك تلات آلاف مرة إنه في الدرج المخصص ليهم؟

أنت بتنسى ليه؟ هشام: أي درج في عشر أدراج قدامي. ياسمين: أهو أهو الدرج، افتكره، مش فاضية أدورلك على كل حاجة. هشام: اتغيرتي أوي، كنتي قطة مغمضة، إيه حصلك؟ ياسمين: وبقيت مفتحة يعني، مالك يا هشام؟ هشام: مالي يعني.. أنتي اللي مش بتهتمي بيه خالص وطول الوقت مع بنتك. ياسمين: يا لهوي يا راجل، أنت بتغير منها؟ هشام: بصراحة آه، أنتي بطلتي تدلعيني. ياسمين: هههه أدلعك حاضر، مدلعكش ليه؟ تعالى عاوزاك. هشام: لا أنا زعلان.

ياسمين: علشان خاطري يا بيبي. هشام: هههه حلوة بيبي، بس مش كبرنا عليها؟ ياسمين: لا أنت وحدك اللي كبرت، أنا لسه 40 سنة. هشام: أحم. ياسمين: ونص. هشام: أحم. ياسمين: يعني 43 كده. هشام: أحم. ياسمين: 44 والله ما هزود شهر تاني. هشام: حلوين، ثم أنتي لسه قمر وأنا بحبك في أي سن. ياسمين: حبيبي يا هشام ربنا يخليك ليا. جودي تدخل رأسها من الباب: يا عيني يا ليلي. هشام: لو مسكتك يا جودي هقطع رقبتك.

ياسمين: تستاهلي، مش عيب تتجسسي علينا؟ جودي: أنا لسه جاية على فكرة، وبعدين أنتوا اللي سايبين الباب مفتوح. هشام: عاوزة إيه؟ خلصي عاوز أبص لوش أمك عشان يومي يحلى. جودي: ههههه استغفر الله العظيم يا رب، في إيه يا اتش؟ ما تقدر إني لسه واقفة. هشام: هههه اخلصي قولي عاوزة إيه. جودي: حبيبي أنا بس جاية أسلم عليك وأشوفك عشان بتوحشني. ياسمين: كدابة متصدقهاش. هشام: ومين قال إني مصدقها؟ عاوزة إيه يا بت؟ جودي: مبلغ بسيط قد كده.

ياسمين: مش قولتلك. هشام: عارفها مصلحجية، عاوزة كام وليه؟ جودي: يعني هما خمس آلاف بس. هشام: ليه؟ جودي: هجيب بيهم شوية حاجات. ياسمين: وحاجات إيه دي إن شاء الله اللي بـ 5000؟ جودي: هجيب جزمه وفستان وشنطة وشوية مكياج يا ماما، الله يخليكي متوقفيش في الموضوع عشان عرفاكي مش هتسكتي غير لما يرفض. هشام: خلاص يا ياسمين سيبيها، ماشي أنا هديلك الفلوس بس لو مشوفتش الحاجات اللي قولتي عليها هنفخك.

جودي: الله يسامحك، يعني أنا هكدب عليك يا اتش؟ هشام: لا مبتكدبيش بصراحة، خلاص تعالى ورايا. ياسمين: هتبوظها بدلعك ده والله. جودي: الحق يا هشام، دي بتعارض كلمتك. هشام: بس يا سوسة، لو اتفتحنا مش هنتسد. ياسمين: بتقول حاجة يا هشام؟ هشام: بقول إنك نعمة ربنا رزقني بيها يا روحي. في النادي. جودي بتجري في النادي بلبس رياضي وحاطة الهاند فري، وفجأة بتخبط في شاب ويقع منها التليفون. جودي: آي! مش تفتح! الشاب يتجاهلها ويكمل جري.

جودي بغيظ تعلي صوتها: أنت حيوان ماشي تنطح في الناس يعني! الشاب بيسمعها ويرجعلها تاني: أفندم. جودي: بقولك أنت حيوان بتنطح، في حاجة؟ الشاب اسمه ياسين: أنتي عارفة لو أنتي مش بنت كنت عملت فيكي إيه؟ جودي: ولا تقدر تعمل حاجة، أنا أدوسك هنا. ياسين: تدوسيني أنا؟! جودي: واللي يتشددلك. ياسين يبصلها بتركيز: بصي كده على العيون دي وافتكريها كويس علشان أنتي بنت مش متربية وأنا هربيكي. جودي بغيظ تضربه بركبتها تحت الحزام وتجري.

ياسين بوجع: آااه، طيب وربنا ما هسيبك، وبعد شوية يجري من نفس الناحية عشان يلحقها بس مبيلاقيهاش. ياسين: هتروحي مني فين؟ مسيرك تيجي تحت إيدي وأنا هخلع راسك عن رقبتك، وبيرجع تاني خطوتين وبعدين بيشوف طرف حد مستخبي ورا الشجرة، بيمشي براحة ناحيته بعد ما عرف إنها هي ويمسكها من قفاها: تعاليلي. جودي بخوف: أأأ أنت لو عملتلي حاجة أنا هموتك على فكرة. ياسين: كمان!

ده أنتي يومك مش فايت، أنا عمري ما بنت اتجرأت وغلطت فيّ، تعالي بقى وبيحاول يضربها بالقلم بس هي بتوطي بسرعة وإيده بتيجي في الشجرة. ياسين بوجع: آاااه وربنا ما هرحمك، ويجي يمسكها تاني بس بيلاقيها بتجري بعيد. بتطلع جودي جري برا النادي فتقابل مراد وهو جاي بالعربية. جودي بتوقف قدامه: مرااد استنى. مراد يوقف بسرعة وينزل: غبية، افرضي كنت دوستك. جودي بخوف: في واحد بيجري ورايا عاوز يضربني. مراد: ناعم؟ هو مين ده؟ تعالي وريهوني.

جودي: لا لا أنا مش هروح بس أنت هتلاقيه طويل كده وليه عضلات وشكله قتال قتلة، أهو هو ده روح اضربه. مراد بيبلع ريقه: بتقولي قتال قتلة؟! جودي: أيوه وكان متعصب، تصدق إيده أكبر مني، كان هيضربني بيها الحيوان شبه الحمار الهمجي، روح اطحنه وعرفه مقامه. مراد: وأنتي فكرك بعد وصفك ده أنا هدخل؟ عادي ما يضربك ولا يقتلك حتى، أنا مش داخل وهو حسابه عند ربه بقى. جودي: أنت جبان يا واد.

مراد: بس ما تقولليش جبان، أنا أقدر أروح أخبطه خبطتين بس مش عاوز حد يقول اتخانقوا بسبب جودي. جودي: شفتي بقى؟ وأنا اللي كنت فكراك جبان طلعت خايف عليّ. مراد: شفتي بقى. جودي بزعيق: أنت هتروح ولا أروح أنا أشوف حد يقدر يضربه؟ مراد: خلاص ده أنتي صداع، مبيجيش من وراكي غير المشاكل، أنا هروح وأجيبهولك متكتف. جودي: جدع، أنا هستناك هنا. بيدخل مراد وبيطلع ومعاه ياسين. جودي باندهاش: يا خربيتك ده طلع راجل ونفذ كلامه...

إيه ده بيضحكوا ليه؟ نهار أسود أنا هستخبى، وبتنزل تستخبى تحت الكرسي. مراد: وحشني والله يا ياسين، فين أيامك؟ ياسين: حبيبي يا مراد، وأنت كمان كنت واحشني والله.. أمال فين البنت اللي قولتلي مستنياك؟ جودي بتسمع الكلام وتعرف إنهم طلعوا صحاب وتفضل تلطم لما سأل عليها. مراد: مش عارف يا أخي، تلاقيها روحت بعد ما الحيوان الهمجي كان عاوز يضربها. ياسين: يضربها؟! مراد: أيوه يا سيدي قابلها جوه واتهجم عليها من غير سبب.

ياسين يبتدي يفهم: لا يا شيخ. مراد: أيوه تصدق بتقول إنه شحط وشبه الحمار الهمجي. ياسين بغيظ: هي قالت كده؟ مراد: أيوه أنا هكدب عليك يعني.. استني أااهي، اطلعي مستخبية ليه؟ ياسين أول ما بيلمحها بيجري يفتح باب العربية ويمسكها من رجلها ويشد. جودي بصراخ: الحقني يا مراد الغبي! مراد باندهاش: في إيه ياسين اهدي. ياسين: اسكت أنت، وربنا ما هسيبك، تعالي بدل ما رجلك تتخلع في إيدي. مراد يشد فيه علشان يسيبها: في إيه فهمني؟

ياسين بغيظ: ما هو أنا الحمار الهمجي اللي قالتلك عليه، تعاالي! جودي بصراخ: مرااد اعمل حاجة، أنا اتحشرت ورجليه اتفصلت، خليه يسيبها. بيت هشام. ياسمين: هي دماغها أنشف منه. مي: أنا مش عارفة إيه العيال دي، إزاي كل السنين دي مع بعض وقلبهم ما مالش؟ ياسمين: علشان مع بعض بس لو بعدوا هيفهموا، دي جودي مبتقدرش تعمل حاجة غير لما بتسأله هو قبلي أنا وهشام. مي: نفس الموضوع بيحصل مع مراد، طيب وبعدين هنعمل إيه؟ ياسمين: أممم نبعدهم.

مي: وده إزاي بقى؟ ياسمين: يعني أنا أحكم عليها إنها متقابلهوش علشان سمعتها وإنه هيوقف حالها. مي بنغزة: يوقف حالها؟ ياسمين: لا لا مش زي ما أنتي فهمتي، والله ما قصدي حاجة. مي: فاهماكي، مفيش داعي تبرري، بس أنا قلبي وجعني عليه قوي. ياسمين: هو لسه بيسأل على أبوه؟ مي بدموع: أيوه، دايماً يسأل ويقوللي هو ملوش صور ليه ومات إزاي؟ وأنا كل اللي بقوله إنه حصل حريق في بيتنا القديم واتحرقت كل حاجة تخصه.

ياسمين: والله حرام عليكي يا مي، مهما كان اللي حصل مينفعش تقوليله كده. مي ببكاء: وينفع اللي هو عمله يعني؟ دا سابه قبل ما يشوفه ومسألش تاني، قلت أكيد هيرجع، مستحيل يقدر يبعد عننا، بس أهو 23 سنة ومفيش أي خبر عنه. ياسمين: هيرجع أنا متأكدة، بس أنتي عارفة هو كان تعبان وغصب عنه. مي بانفعال: كان خدني معاه طيب، كنت وقفت معاه ونسيتله كل حاجة شافها. ياسمين: معلش حاولي تنسي. مي: ياريت أقدر بس إزاي؟

ده ابني مراد على اسمه وشبهه بدرجة كبيرة. ياسمين: ربنا كبير. مي بتنهيدة: ونعم بالله. في مكان آخر: جودي: هو اللي خبط فيه وقعلي فوني، حتى بص اتكسر إزاي. ياسين: أجيبلك عشرة بداله بس مكنش ينفع تغلطي. مراد: خلاص يا جماعة حصل خير. ياسين: أنا هسامحها علشان خاطرك أنت بس. ياسمين بتريق: لا ونبي سامحني الله يخليك، مش هقدر أتنفس لو لسه زعلان. ياسين بانفعال: شوفت قلة الأدب! بت أنتي أنا مش راضي أجيبك من شعرك احترامًا لمراد.

مراد: الله يخليك يا حبيبي والله. ياسين: حبيبي أنت والله يا مراد... شاقطها منين البت دي؟ ياسمين: يشقط مين يا متخلف أنت؟ ياسين: شوفت قلة الأدب! مراد بجدية: اهدوا مش كده، عيب احترموني شوية، ثم إيه شاقطها دي أنت كمان؟ ياسين: أنا آسف بس أنا عارف إنك معندكش أخوات، فأكيد مش أختك يعني. مراد: هي فعلًا أختي، مش لازم تكون من نفس الأهل. ياسمين: شوفت الأدب اتعلم. ياسين: أنا ماشي عشان معملش حاجة تزعلك مني يا مارو.

مراد: ماشي يا غالي كلمني. جودي: تعرفه منين المتخلف ده؟ مراد: دا ياسين كان زميلي في الجامعة أول سنتين وبعدين سافر يكمل بره. جودي: آه، متبقاش تعرفه تاني شكله مش عاجبني. مراد: وأنتي مالك أنتي؟ يلا شوفي رايحة فين. جودي: هروح أشتري هدوم تيجي معايا؟ مراد: لا. جودي: ونبي ونبي يا مارو تعالى معايا عشان تساعدني أختار إيه. مراد: يا بنتي ما تشوفي بنت تروح معاكي، الناس بيفهمونا غلط.

جودي: ما أنت عارف إني مليش صحاب غيرك، بطل ندالة وتعالى معايا. مراد: ماشي اطرقي قدامي، وفجأة يلمح حد لكن بيختفي... جودي: إيه مالك؟ مراد: مش عارف بس زي ما يكون شفت حد بيبص علينا. جودي: فين ده؟ مراد: مش عارف، يلا بينا سيبك.