رواية احببت مجنونة الفصل الحادي والثلاثون 31 - بقلم نجمة براقه

بيت هشام الباب بيخبط وبتروح جودي تفتح. جودي بفرحة تترمي في حضنها: موكا عندنا، حبيبتي وحشتيني. ملك: وأنتي كمان يا قلب موكا، كبرتي يا بنت وبقيتي عروسة. جودي: وحشتيني أوي أوي، عاملة إيه وردينا فين مجتش ليه؟ ملك: جاية ورايا بس بتقطعلكم في الورد. جودي: ههههه مجنونة بالورد طول عمرها، تعالي تعالي يا ماما شوفي مين جه. ياسمين بفرحة: ملك حبيبتي حمدلله على السلامة وحشتيني. ملك: قال يعني بتسألي أنتي ولا جوزك!

ياسمين: غصب عننا والله أنتي عارفة، تعالي اتفضلي. ملك: أمال هو فين؟ ياسمين: راح الشغل وهيرجع بسرعة. جودي: طيب أنا هروح أجيب الصفرا اللي هتخلص الورد. ملك: اجري بسرعة وإلا مش هتلاقي فيهم وردة واحدة. ياسمين: هي رودينا جت معاكي؟ ملك: أيوه طبعًا شبطت فيّ، أنتي عارفاها بتحب جودي أوي، المهم أنتو عاملين إيه؟ ياسمين: بخير الحمد لله يا حبيبتي. جودي بتتسحب براحة عشان تخض رودينا اللي عمالة تقطع في الورد. جودي: بوووم، أمسك حرّامي!

رودينا: بسم الله الرحمن الرحيم خضتيني يا جزّمة. جودي: هههه بقا تروحي للورد قبل ما تسلمي عليه يا عرّة بنات العمة. رودينا: أنا غلطانة قولت أدخل عليكي بالورد، ههههه. جودي: حرّامية بس غلبتيني، يلا في حضن أخوك يا فواز. رودينا تحضنها: هههه وربنا وحشتيني أوي ده أنا وحشني الرغي بتاع زمان والسهر مع بعض. جودي: طيب يلا تعالي نروح أوضتي عشان ناخد راحتنا إحنا ونرغي. رودينا: ماشي يلا. جودي: صحيح فين شهاب مش شايفاه معاكم؟

رودينا بغيظ: اسكتي كويس مجاش، واد سليط اللسان وربنا كرّهني في الأخوات بالمرة. جودي: أنتي اللي مفتريّة، هو طيب. رودينا: آه طبعًا هو أنتي جربتي يلسعك قفا أنتي وماشية في الرايحة والجاية، قدامي في نهارك المهبب ده قال طيب قال. جودي: هههه ياساتر أنتي بقيتي عصبية كده ليه؟ رودينا: من كلامك يا أختي، يلا اطرقي خلينا نرغي. جودي: هههه ماشي يلا. في مكتب هشام. هشام بيتكلم على التليفون: كنت متصل أقولك إننا موافقين.

سليم بفرحة: يا سلام على الأخبار الحلوة، طيب بكرة هجيلك أنا وهو عشان نتكلم. هشام: ماشي يا سليم تشرف، في انتظاركم. في الشركة. بيدخل مراد وهو مش طايق نفسه. زينة: صباح الورد يا أستاذ مراد. مراد يمشي من غير ما يرد عليها. وهي تهري في نفسها: بقا كده مبتردش عليه. جني تدخل وتبصلها بقرف: عايزة أدخل لأستاذ مراد يا مدام زينة. زينة: بت أنتي أوعى في حياتك تقولي مدام دي تاني. جني بقرف: طيب ممكن يا طنط تقولي للأستاذ مراد إني هدخل.

زينة: أوووف استني.... أستااااذ مراااد جني عايزة تقابلك تحب أدخلها لحضرتك؟ جني تبصلها بقرف وهي متضايقة من طريقتها. زينة بتقليل منها: روحي. جني: الله يخليكي يا خالتي. زينة لنفسها: البت دي عايزة تربية أما وريتك مبقاش أنا زوزو. جني: صباح الخير. مراد بزهق: صباح النور تعالي. جني: مالك على الصبح؟ مراد: مفيش، كنتي عايزة إيه؟ جني: كنت جايبالك الورق ده تمضيه. مراد: هاتي. بياخد منها الورق ويمضي من غير ما يقرا.

جني: أيييه اللي بتعمله ده؟ مراد بزهق: في أيييه يا جني بمضي الورق اللي طلباه. جني: كده من غير ما تقرا؟ طيب أبقى فكرني المرة الجاية أمضيك على كل اللي حيلتك طالما مبتقراش اللي بتمضي عليه. مراد: هههه ضحكتيني والله، ماشي أنتي صح بس مفتكرش أنك بتغفليني يعني. جني: غيري ممكن يغافلك، الله يخليك ركز. مراد: ماشي هاخد بالي بعد كده. جني: ماشي. على فكرة مستر سليم كلمني وقالي جاي النهاردة بالليل. مراد: يرجع بالسلامة.

جني: وحاجة تاني ممكن أخد إجازة النهاردة؟ مراد: ليه أنتي تعبانة ولا حاجة؟ جني بفرحة طفولية: أصل عقبال عندك الواد يوسف هيخطب قريب وأنا مشفتهوش بقالي مدة، عايزة أروح أغلس عليه شوية. مراد: بجد ألف مبروك وعقبالك أنتي كمان. جني: الله يبارك فيك. مراد: طيب يلا روحي عشان تلحقي توصلي بدري. جني: أوك باي.... وبتمشي. مراد يدور بالكرسي ويفتكر جودي اللي مكلمهاش من يومين: يا ترى عاملة إيه؟

أنا مكنش لازم أقفل دلوقتي، كان لازم أطمن إنها خفت على الآخر تلاقيها دلوقتي زعلانة مني. بس غصب عني والله يا جودي كان لازم أبعد فترة، بس خلاص أنا هروح وأكلمها وكفاية كده. يا ترى أنت فين دلوقتي يا مصطفى، أنا مش عارف أكلمك بأي وش بعد اللي حصل. بيت هشام. جودي ماسكة التليفون وكل شوية تبص عليه ومش مركزة مع رودينا اللي بتكلمها. رودينا: أنتي معايا ولا مركزة في المخروب ده؟ جودي: لا معاكي قولي، وبتبص تاني للتليفون.

رودينا تخطف منها التليفون: ما توريني إيه واخدك مني. جودي: لا هاتي رودينا بطلي رزالة وهاتي التليفون. رودينا: استني لا أضربك.. إيه المحادثة دي بقا؟ جودي تبص للأرض وتسكت. رودينا تقرا شوية من المحادثة: مش ده مراد جاركم بردو؟ جودي بتنهيدة: أيوه هو. رودينا: أنتو زعلانين ولا إيه؟ جودي: لا عادي. رودينا باهتمام: لا إزاي ده أنتي باين عليكي زعلانة أوي كمان، أنتو زعلتوا ليه قوليلي.

جودي بخنقة: تصوري قدر يبعد عني وفي عز تعبي وما كلمنيش من يومين. رودينا: خلاص يغور وبكرة يجيلك سيد سيده زي ما بيقولوا. جودي: أييه سيد سيد مين أنتي فهمتي إيه؟ ده صاحبي وزي أخويا يعني مش اللي في بالك. رودينا: لا يا شيخة بقا دي محادثة أخوات أنتي هتشتغليني يا بت؟ جودي: مش بشتغلك دي الحقيقة. رودينا بحيرة: وأنتي مقتنعة بالموضوع ده يعني بجد شايفاه أخوكي؟ جودي: وإيه الغريب في كده؟

رودينا: يعني مفيش أخوات بيحبوا بعض بشكل ده، عندك أنا مثلًا لو بأيدي كنت رميت شهاب من البلكونة. جودي: هههه طيب أنتو مجانين إحنا لا. رودينا بجدية: جودي حبيبتي والله ده مش حب أخوات، أنتي بس خايفة تعترفي لنفسك عشان طول الوقت بتتعاملوا على أساس أخوات. جودي بتنهيدة: أنا هتخطب يا رودينا. رودينا: نعم لمين إن شاء الله؟ جودي: ابن صاحب بابا. رودينا بحيرة: طيب ومالك مش مبسوطة كده، هو أنتي مغصوبة عليه؟

جودي عنيها تدمع: لا بس أنا زعلانة عشان كنت عايزة آخد رأيه الأول ويساعدني في القرار ده بس هو نسيني خلاص، تصوري نسيني أول ما راح شغله وقابل السكرتيرة... رودينا: ده العريس؟! جودي بانفعال: مراااد مراد، عريس إيه! رودينا تبصلها برفعة حاجب: أخوااات أخوات يعني مفيش كلام، طيب اتوكسي. جودي: بت امشي من أوضتي مش طيقاكي. رودينا: مابلاش أنا لو مشيت من هنا مش هرجع تاني وقال اللي ضيعنا مرة بالقصد مش هيلقينا تاني بالصدفة.

جودي بنرفزة: اطلعي لا أضربك. رودينا: أنتي حرة بس افتكريها، وبتطلع. جودي: بت متخلفة، حتى أنتي هتعملي زيهم. رودينا تفتح الباب وتدخل راسها: ها حنيتي ولا لسه؟ جودي متقدرش متضحكش: هههه تعالي تعاااالي ده اللي جاية بينه هيكون سواد بسببك. رودينا: يا بنتي أنا محدش يقدر يبعد عني فينتو ثانية. جودي: فينتو إيه؟ رودينا: فينتو ثانية إيه مسمعتيش أحمد حلمي هو وبيقولها؟ جودي: لا معناها إيه دي؟ رودينا: معناها جزء مـ...

معقول الهيافة توصل بيكي إنك تسألي على فينتو الثانية، سيبك سيبك و وريني صور أخوووكي مووووراد. جودي بابتسامة: دقيقة واحدة، أهو إيه رأيك؟ رودينا: أوووو يااااه أوووه بقا موز، خربيته بقولك إيه طالما أنتو أخوات ما تخدميني يرضيكي بقيت 21 سنة ولسه مرتبطتش ارتباطاية واحدة. جودي بتوتر: خديه لو تقدري توقعيه. رودينا: ومقدرش ليه؟ طيب إيه رأيك إن أنا هتخطب معاكي في نفس اليوم أصله مش ممكن يقاوم جمالي مش كده ولا إيه؟

جودي تضحك من غير نفس: هههه. رودينا بخبث: ضحكتي يبقى هتظبطيني معاه. جودي بغيظ: امشي اطلعي من هنا. رودينا: طيب بليز خليني آخد الفون أتفرج في صوره شوية. جودي تاخد منها التليفون: امشي يا بت لا أضربك. بيت مراد. مراد بيفتح تليفونه وأول حاجة بيدخل على شات الواتس بتاع جودي بيلاقي رسايل كتير منها وبيرد عليها. مراد: أم لسان عاملة إيه دلوقتي؟ جودي بتكون قاعدة جنب ملك وياسمين ورودينا وسايبة تليفونها في الأوضة.

مراد: مش بعادة تتأخر في الرد راحت فين دي؟ مي: تتعشى يا حبيبي. مراد: لا متشكر. مي: أنت لسه زعلان؟ مراد: أنتي إيه رأيك؟ مي: طيب أعمل إيه يرضيك؟ مراد: مفيش حاجة تقدري تعمليها دلوقتي، أنا مش مجرّأ أكلم مصطفى بعد اللي حصل إمبارح. مي: طيب أنا ممكن أمشي الليلة وأنت هاته تاني طالما هتكون مبسوط. مراد: لا طبعًا متفكريش كده، أيوه أنا زعلان بس مش لدرجة أسيبك تمشي، وبعدين أنا مبسوط إنك جيتي. مي بفرحة: ربنا يخليك ليا يا حبيبي.

مراد يقوم يحضنها: متزعليش مني أنا عارف إني بتجاوز في الكلام معاكي بس غصب عني. مي بتفهم: أنا فاهمة ومش بزعل منك. مراد: ربنا يخليكي ليا يا غالية. مي: ويخليك ليا يا قلب أمك. مراد: طيب معلش هدخل أرتاح شوية. مي: اتفضل يا حبيبي نوم الهنا. بيدخل مراد أوضته وهي بتقعد تفكر في حاله. مي: طالما أبوه رجع أكيد هيعرف بأي طريقة، أنا مش عارفة لما يعرف هيكون رد فعله إيه. بيت هشام

هشام بفرحة: حمد لله على السلامة، أخيرًا حنّيتي علينا وجيتي. ملك: كنت عاوزة أجي من زمان بس شلبي كان رافض. جودي: مين شلبي ده يا موكا؟ ملك: أقصد جوزي. رودينا تهمس لجودي: هي كده لما بتكون زعلانة منه بتقول عليه شلبي. جودي بهمس: ههههه واضح إنها بتعزه أوي. رودينا: يختي لو تشوفي الهنا والسعادة اللي عايشين فيها. جودي: بتكدبي؟ رودينا: طبعًا بكدب ههههه. ياسمين: اتلميتوا على بعض، بتتوشوشوا في إيه أنتي وهي؟

رودينا: أبدًا يا طنط، أنا بس بقرصها في ركبتها عشان أحصلها في جمعتها ههههه اسكتي يا بت يا ملك، مش جودي هتتخطب؟ ملك: اااخ عليكم ومتقوليليش! هشام: الموضوع لسه في أوله والله يا ملك، النهاردة بس بلغنا بموافقتنا. جودي بحزن مخفي: يعني خلاص قولتلهم؟ هشام: أيوه، وبكره جايين هو وأبوه. ملك: ألف مبروك يا حبيبتي، ربنا يتمم على خير. جودي بابتسامة باهتة: الله يبارك فيكي، طيب عن إذنكم جاية تاني.

رودينا تبص عليها وهي عارفة إنها مش مبسوطة. ياسمين لنفسها: أنا عارفة إنك مش عاوزاه بس أنتي اللي عملتي كده في نفسك. رودينا: هروح وراها عن إذنكم. وتمشي. جودي واقفة قدام المرايا وهي مخنوقة. رودينا بحنية: في إيه؟ جودي: مفيش حاجة. رودينا: إزاي مفيش؟ احكيلي مالك. جودي: مفيش يا رودينا، أنا كويسة. رودينا تمسك تليفونها وتدهولها: كلميه. جودي: هو مين؟ رودينا: مراد.

جودي: قولتلك قافل تليفونه، وحتى لو فاتحه خلاص مبقتش محتاجة آخد رأيه في حاجة. رودينا: طيب خليكي براحتك. وتطلع وتسيبها. وهي تمسك تليفونها وكالعادة تدخل على الواتس تشوف الشات وهي عارفة إن مفيش رسايل منه. لكن بتتفاجئ لما بتلاقيه باعتلها. مراد: أم لسان عاملة إيه؟ جودي تبص شوية وهي مترددة ترد ولا لأ، لكن بتلاقي رسالة تانية وصلت. مراد: كنت مستنيكي. جودي: ومستنيني ليه؟ مراد: وحشتيني مقدرتش مكلمكيش.

جودي ببكاء: بعد إيه لسه فاكر تكلمني؟ مراد: مالك في إيه؟ أنتي لسه تعبانة ولا إيه؟ جودي: طيب كويس إنك عارف إني كنت تعبانة وبرغم كده سبتني وقفلت تليفونك. مراد: غصب عني والله. جودي: مين اللي غصبك؟ عاوزة أعرف، أنت بتتلكك عشان تبعد واحدة واحدة. مراد: طيب اخرسي، مين قالك كده؟ أنا كنت ناوي أقفل أسبوع كامل ومقدرتش، هما يومين وفتحت عشانك أنتي. جودي: بعد إيه بقى خلاص اقفل تاني. مراد: في إيه يا جودي؟ زعلانة من إيه؟

مش معقول يكون الزعل ده كله عشان قفلت التليفون. جودي: معرفش بقى، يلا أنا هقفل، عندنا ناس. وتقفل الداتا وترمي التليفون بانفعال وتطلع من الأوضة. وهو بيبعت تاني لكن مفيش رد وبيلاقيها قفلت ويبعتلها رسالة أخيرة. مراد: جودي طمنيني، أنا قلقت بجد، يا بنتي... وبيفضل سهران طول الليل يبعتلها لكن هي مبتردش. تاني يوم. في الشركة. مراد بيدخل المكتب وبيقابل زينة. مراد: ابعتيلي جني على مكتبي. زينة بعدم رضا: جني؟ ... هي مجتش النهاردة؟

مراد: طيب هاتيلي رقمها. زينة بغيظ لنفسها: هي إيه الحكاية بالظبط؟ جني جني هو مفيش غيرها ولا إيه؟ مراد بجدية: سمعتيني؟ زينة: أيوه يا فندم، حاضر هجبهولك. بعد شوية بتجبهوله. زينة: اتفضل. مراد: متشكر، اتفضلي. ويطلب الرقم بس بيطلع موجود عنده... إيه ده ماهو موجود! الله يسامحك يا جودي لخبطتيني. يتصل بجني. مراد: أيوه يا جني، خير مجتيش ليه النهاردة؟ جني: اعذرني يا مستر بس أنا النهاردة رايحة مع بابا ويوسف للعروسة.

مراد: آه طيب تمام ولا يهمك، باركي ليوسف بالنيابة عني. جني بفرحة: حاضر يوصل سلام. مراد يقفل معاها ويفتح الواتس عشان يبعت لجودي اللي مبتردش عليه. مراد: طيب وحياة ربنا لو ما رديتي لأكون جاي عندك دلوقتي... لكن مفيش رد بردو. مراد: أنا هتصل بماما يمكن تعرف في إيه. مي: ألو. مراد: ماما متعرفيش أخبار عن جودي؟ مي: لأ، ليه أنت سمعت حاجة؟ مراد: لأ بس بكلمها مبتردش.

مي: طيب يا حبيبي أنا هكلم ياسمين دلوقتي أشوف هي عاملة إيه وأقولك. بيت ياسمين. ياسمين: أيوه يا مي عاملة إيه؟ مي: الحمد لله كويسة، عاملة إيه أنتي وجودي؟ ياسمين: بخير الحمد لله، هتيجي أمته ولا عجبتك القعدة هناك؟ مي: يومين كده وهاجي. ياسمين: تيجي بالسلامة حبيبتي. مي: الله يسلمك، قوليلي أموركم تمام، جودي خفت ولا لسه؟ ياسمين: آه الحمد لله بقت كويسة. مي: طيب تمام حبيبتي أنا حبيت أطمن عليكم بس. ياسمين: تسلميلي.

مي: مع السلامة حبيبتي. بتقفل معاها وتتصل بمراد. مراد: إيه يا ماما طمنيني؟ مي: كلهم كويسين وجودي كمان كويسة. مراد بحيرة: أمال في إيه بس؟ مي: متقلقش هي كويسة بس يمكن مش فاضية ترد. مراد: طيب يا ماما أسيبك ورايا شغل كتير. مي: ماشي حبيبي مع السلامة. مراد يقعد يفكر وبعدين يقوم ويمشي من المكتب من غير ما يقول هو رايح فين. بالليل. جودي قاعدة على السرير وبتبكي. رودينا: يا بنتي هو حد غصبك عليه؟

من ساعة ما مشيوا وأنتي قافلة على نفسك. جودي ببكاء: معرفش بقى. رودينا: طيب تحبي أروح أقول لخالي إنك مش عاوزاه؟ جودي: لأ لأ مينفعش، بعد إيه؟ رودينا: طيب ما تدي لنفسك فرصة، مش يمكن تحبيه؟ جودي: يمكن بقى. رودينا بحب: حبيبتي قوليلي في حد تاني طيب؟ جودي: لأ مفيش. رودينا: ولا حتى مراد؟ جودي تبص بعيد ومتردش. رودينا: أممم طيب أنا هسيبك مع نفسك شوية وبعدين نتكلم. بتمشي وتسيبها وتقفل وراها الباب. جودي لنفسها: أحبه؟ طيب إزاي؟

ده حتى لو حبيته هوري له وشي إزاي؟ هو في أخت تحب أخوها؟ أكيد هما غلطانين أنا مبحبهوش. وفجأة بتلاقيه داخل من الشباك. مراد يقف ويبصلها وهو شايط. جودي: أنت جيت تاني ليه؟ امشي رودينا زمانها جاية. مراد يمسكها من دراعتها بعنف وبانفعال: مقولتليش ليه؟ جودي: مراد الله يخليك امشي دلوقتي ونبي. مراد: مش همشي غير لما تفهميني ده حصل إزاي؟ وإزاي وافقتي من غير ما تقوليلي؟ جودي ببكاء: كلمتك كتير بس أنت مردتش عليا.

مراد بعصبية: يبقى مكونتيش توافقي غير لما تكلميني وأنا أقول توافقي ولا لأ، ولا أنتي خلاص مبقاش ليكي كبير؟ جودي بانفعال: ملكش دعوة ماشي ملكش دعوة! امشي اطلع برا قبل ما حد يجي. مراد: مش همشي وهطلعلهم دلوقتي وأقولهم إنك مش هتتجوزيه، محدش ليه حكم عليكي غيري أنا، أقول تتجوزي أو لأ أنتي فاهمة؟ وفجأة تدخل رودينا وتشوفه في الأوضة. رودينا: إيه اللي بيحصل وإيه جابه هنا ده؟