رواية احببت مشهورا الفصل الحادي والثلاثون 31 - بقلم حنان القوقازية

ذهبت يا أبي .... و ذهب الأمل معك .... في أول لقاء بيننا ذهبت ... لماذا ... أهربت مني ؟ أم لم تكن تريد أن تعيش معي ؟ ..... أم هذا أجلك ؟ .... يا أبي ابنتك لها إيمان قوي بالذي خلقها .... فاللهم اغفر لأبي ذنوبه و اعفو عنه و ارحمه برحمتك الواسعة إنك الرحمن الرحيم ..... اللهم ربي اجعله من عبادك الصالحين..... اللهم أسكنه فسيح جناتك ..... آه يا أبي و كم سأشتاق إليك .... و لكن لما الحزن الذي أنا فيه ....

فيمكن أن الموت راحة لك و أنك في مكان أفضل .... لا أدري كيف سأمضي أيامي من دونك لكن الله معي في كل وقت و مكان كلنا سنموت الحياة الدنيا فانية و الآخرة مستقبلنا. أردفت حورية هذا الكلام و هي تسجد على سجادة الصلاة بعد أن أنهت صلاة العصر بغرفتها بعد شهر و أسبوع من وضع والدها تحت التراب. تنهض على سجادة و تغير ثيابها لتذهب إلى غرفة فردوس أو بالأحرى غرفة العروس فالغد يوم حفل عقد قرانها.

تدخل الغرفة و تجد كل من حبيبة و زينة و أمينة و فردوس و شهد و ابنتها التي طلبت أمينة منهما الحضور قبل الموعد فشهد كابنتها زوجة ابنها الرضاعة "حسان". تهتف أمينة: يا بنات أنا اليوم هعمل لكم تنضيف بشرة و كل الحاجات دي ببلاش مش عشانكم عشان العروسة بس و حبيبة هانم تساعدني. تردف فردوس بحب: تعرفي يا طنط مش عارفة أشكرك إزاي بجد أنت أحلى طنط في الدنيا.

ترد عليها بغيظ: طنط مين يا ختي اسمي أمينة يا حبيبتي لو تقولي طنط مرة تانية هجيبك من شعرك فاهمة. تتصنع الأخرى الخوف: خلاص يا باشا أسفين يا أمينة. تهتف حبيبة: خلونا نبدأ بقى قبل ميعاد العشاء. بدأتا في العمل على وجوه الفتيات بجد و لطف في جو مليء بالضحك و الغناء و الموسيقى و المشاغبة بينهن. في اليوم التالي بهذا المنزل الكبير تم تجهيز المكان لاستقبال الضيوف و تم الاتفاق أن حفلة عقد القِران يكون صباحا.

بغرفة حورية تجلس على السرير و هي حزينة .. ليدخل حليم و يجدها على حالها و يهتف بقلق: _حورية مالك يا حبيبتي؟ تهتف بحزن: مش لاقية فستان ينفع ألبسه. حليم بدهشة: إزاي يعني و إيه اللي انتي لبساه ده؟ حورية بحزن أكثر: مش حلو خالص عليا .. شوف أنا فيه زي الكورة. يكتم ضحكته و يردف: يا حياتي دي هرمونات الحمل عارفة بس بقولك إيه انتي حلوة زي ما انتي بتجنني و خدتي عقلي بجمالك و جمال قلبك. تفرح و تهتف: احلف بربنا.

يردف بفرحة لفرحها: والله ده انتي مواصفات الجمال نفسها تجلت فيكي. احتضنته بشدة و أردفت: ربنا يحفظك ليا و ما يحرمني منك يا رب. يهتف بحب لها: و يحفظك ليا و نقعد طول العمر سوا. بغرفة عز الدين و زينة يهتف هو بضجر: _يوه منك يا زينة ما قلت لك غيري تيابك ما تسمعيش الكلام ليه؟ تهتف هي: يا عز الفستان أهو حلو و بيجنن عليا.

يهتف بهدوء: عشان هو حلو أوي و ضيق جامد و مفصل جسم*ك تفصيل مش عايزك تلبسيه اهو أنا جايب لك فستان عريض و حلو ماشي يا عمري ادخلي غيري. تبتسم له بحب فقد أخضعها بهدوئه و رومنسيته مما جعله يقنعها دون أن تحس فغيرت الفستان إلى آخر من اللون الأحمر الغامق. لتخرج من الحمام و تردف بإعجاب: واو عز ذوقك بيجنن بجد شوف الفستان تحفة إزاي و مريح. ليحتضنها و يقول: و أنا يهمني إيه غير راحتك يا حبيبتي انت يلا ننزل بقى.

بعد قليل اجتمع الجميع الضيوف و كل في الأماكن المخصصة لهم على الطاولات التي تم وضعها بردهة هذا البيت الكبير. ليحضر المأذون و يجلس على تلك الطاولة المستطيلة تحوم حولها كراسي للعروسين و أخرى لشاهدين. و ها هي تلك الجميلة تنزل بفستان وردي فاتح (نيود) و غطاء رأسها من نفس اللون و زينة الوجه رقيقة تناسبها. و يدها على يد والدها خالد محكمة. لينتظرهم عريسها في أسفل السلم ... يسلمها والدها له و يردف له: خلي بالك منها ...

دي أمانتي عندك. يهتف ضياء العريس: في عيني. يذهب بجانبه و تجلس على تلك الطاولة و يبدأ عقد القران لينتهي المأذون بجملته المشهورة: "بارك الله لهما وبارك عليهما وجمع بينهما في خير". يليقف ضياء من مكانه و يقترب من التي أصبحت زوجته حلاله و يدخلها بين أحضانه و يقبل رأسها قائلا بحب: مبارك لينا يا مراتي. لتهتف بخجل: الله يبارك فيك. ليقترب منهم أولياؤهم و يباركون لهم بحب و يدعون لهم بالخير.

بجانب آخر على إحدى الطاولة و التي تقف عندها حبيبة تتابع بفرح و حب و ابتسامة تزين وجهها و بجانبها شهد و ابنتها يقاطع جلستهم كلمات أحدهم: "حبيبة الجبلاوي .. ممكن أحكي معاك شوية". لتدور له و تردف: أيمن رضوان آل سلطان مش غلطانة. ليهتف لشهد: لو سمحتي ممكن تخلينا نحكي على انفراد. لترد شهد بتفهم و ابتسامة: طبعاً ممكن ... يلا حبيبة هشوفك بعدين. تذهب شهد دون انتظار إجابة تلك التي لا تعلم ما تقوله و لكن تهتف له:

_خير في حاجة مهمة. ليهتف بابتسامة: و مهمة جداً جداً. تعقد حاجبيها و تسأل: إيه هي؟ ينظف حلقه و يهتف: عايز أتجوز. تضحك و تهتف: ما تتجوز أنا مالي في الموضوع. ليهتف: مالك و نص عشان انتي العروسة. حبيبة بصدمة: إيه بتقول إيه انت؟ ليهتف: زي ما سمعتي يا حبيبة أنا بقيت في الثلاثين و كفاية سنجلة عليا فلو موافقة المأذون هنا و خلينا نتجوز و أخوكي كمان عشان ولي أمرك يلا موافقة.

لتهتف بصدمة: موافقة إيه هو انت تعرفني حتى تطلبني للجواز؟ أيمن بحزن مصطنع: يعني مش موافقة يا بنتي هنعرف بعض بعد الجواز تعالي نتجوز بقى. لتردف: مش عارفة أقول إيه انت مجنون رسمي. ليهتف بابتسامة و غمزة: في أحلى من الجنون يلا على عرفت الإجابة انتي موافقة هروح أخبر أمك أنك وافقتي. ليذهب و يتركها في صدمتها و ابتسامة على وجهها. يجد أمينة تقف بجانب زوجها و يردف: اهو بنت وافقت هنكتب الكتاب اليوم.

لتهتف أمينة: يا أيمن انت مجنون ولا إيه إزاي أصلاً وافقت؟ ليقول: المهم وافقت هروح أقول لعز. ذهب و أخبر عز الدين الذي هو كذلك كان في صدمة من أمر هذا المجنون الذي سيتزوج أخته و الآن. جلست برفقته في حديقة البيت بعد قليل و بعد أن تم عقد قرانهما و هتف: هنعمل الفرح بعد أسبوعين. لتهتف بصدمة: هو انت عايز تقتلني ولا إيه ... في حد عاقل يعمل عملتك دي؟

ليردف: بلا عقل بلا زفت ده أنا ابن عمي سلطان معاه 3 بنات يعني يرضيك أقعد سنجل و يعايرني؟ حبيبة: و أنا مالي؟ أيمن: إزاي مالك ما انتي مراتي حبيبتي. تجلت الصدمة على وجهها بقوله بعد أن تغيرت نبرته إلى نبرة جادة: حبيبة أنا بعرفك من لما كنت في الجامعة و كنت بشوفك و بسمع عنك كتير في أكثرهم كانوا يفكروا إنك بنت مش كويسة و كل وقتك مع الشباب مكنتش عارف أعمل إيه عشان أنا بجد حبيتك زمانها ...

و ده عشان الولاد اللي كنتي تفضلي معاهم أوليفر و حليم و حسان بردو و في تانيين يمكن معرفهمش فعايز أقولك إن ماضيك مش هيهمني اللي يهمني الحاضر دلوقتي فهماني.

لتهتف بدموع: فهماك بس كلامهم كله غلط. أوليفر عشان كان صديق من أيام طفولتي و لما بلغت بقى بينا حدود مفيش لمس و تعاملنا من بعيد لبعيد و حتى منقعدش في مكان خاص لوحدنا و كمان لما بقيت بزنس اشتغلت معاه و لما بقى يشوف أنه ممكن يغلط معايا أو يفكر في حاجة تانية قرر يتجوزني بس أنا مكنتش عايزة عشان اختلاف الدين غير أنه كان يحب مراته اللي اتجوزها.

و حليم ابن عمي كنت فاكرة آه كنت معجبة فيه و بجماله الصراحة بس لما اتجوز مبقتش أنظر له خالص حتى لما عرفت إنهم مش عيلتي طلعت من البيت و حليم كان يشوفهم بحجابي عشان هو مش محرم ليا. و حسان يبقى أخويا في الرضاعة و هو اللي بعد عني من لما بقى شغله كله قرف. و زين الدين الشيخ: ده كان عندي مشكلة و بخبرته ساعدني أنا بحترمه أوي عشان أخدت منه كتير معلومات في بعض الأعمال و اشتغلت معاه و عملنا كتير شغل مشترك.

و ضياء الدين ده بقى عرفته عن طريق زين الدين و بقى اشتغلنا مع بعض و هو صراحة مكنش كده خالص كان شوي شمال و كمان اشتغلنا و عملنا معرض سيارات مع بعض. أحم ودي تبقى حكايتي مع كل الشباب و محدش فيهم كان يلمسني إلا أخويا و لا حتى يسلموا عليا أو يصافحوني عشان حرام و أنا بعرف ديني و مؤمنة بالإسلام و الحمد لله. أدمعت عيناه و اقترب منها و قبل بنيتيها و هتف: كنت واخد عنك فكرة غلط و كلها كانت من الناس ...

تعرفي تعلمت حاجة إن مهما قالوا الناس على حد مش لازم أحكم عليه أو حتى أعرفه عن طريقهم حتى أتعامل معاه و أحكم. ابتسمت من بين دموعها و اردفت: هنتجوز بعد أسبوعين. ليهتف هو: لا بعد أسبوع. لتنصدم: إزاي؟ ويهتف هو: بعد أسبوعين تعرفي يا حبيبة. بعد أسبوع تم حفل زواج كل من حبيبة و أيمن و فردوس و ضياء الدين.

لكن لازالت المشاكل فحياة الدنيا مبنية على المشاكل و المصائب ليس هناك من تخلت حياته من المصائب فهي امتحان من الله أن نجحنا و صبرنا مصيرنا في الآخرة زاهر فجنات الفردوس مسكننا .. و أن رسبنا و لم نصبر فمصيرنا في الآخرة الجحيم النار فاللهم ارحمنا برحمتك الواسعة و اغفر لنا ذنوبنا وتب علينا إنك أنت التواب الغفور الرحيم.