رواية احببت طفولته الفصل السادس والعشرون 26 - بقلم منار العتال

مريم بحيرة: مشوار إيه ده؟ يوسف: هتعرفي لما نروح هناك يلا بس. مريم راحت معاه وركبت معاه العربية وكان يوسف. مريم بفضول: يوسف إنت رايح فين طيب؟ الطريق شكله غريب أوي. يوسف: هتعرفي دلوقتي ووقف قدام قصر. مريم بصت من شباك العربية واندهشت من جمال القصر. يوسف بص لها بحب: إيه رأيك؟ مريم نزلت من العربية وقالت وعينيها وسعت من الجمال اللي كانت شايفاه: هو معقول فيه جمال كده؟ يوسف بعشق: إذا كان فيه جمال زيك! يبقى أكيد فيه كده.

مريم ابتسمت بخجل. يوسف: مش هتقوليها؟ مريم بتكشرة وعدم فهم: أقول إيه؟ يوسف: بحبك!! مش هتقوليهالي. مريم حطت وشها في الأرض بخجل وقالت: ما أنا كنت قولتهالك قبل كده. يوسف: إمتى ده! لا أنا عايز أسمعها دلوقتي. مريم وشها اتحول لطماطمية. يوسف بضحك: يا دي النيلة رجعنا للطماطم تاني. مريم باستغراب وبصتله: طماطم إيه؟ يوسف بضحك: يلا يا مريم أنا ربنا يصبرني تعالي أفرجك على القصر. مريم دخلت معاه وانبهرت بجمال القصر.

مريم وهي بتجري في كل ركن في القصر وبتضحك بفرحة: هو ده بجد بتاعنا؟! هنعيش فيه؟؟ بجد! يوسف بحب: أيوة ما هي أميرة ذيك في رأيك تعيش فين؟ مريم بحب: يوسف إنت بتكسفني بجد ساعات بحس إن حنية العالم وحب العالم كله اتجمع فيك بحس إنك عوض ربنا ليا بجد على كل اللي شوفته في حياتي. وفجأة دمعت وكملت: كلام يوسف أنا قبلك مكنتش عايشة أنا في اللحظة اللي كنت بتمني الموت إنت كنت السبب اللي عيشت علشانه!

إنت مليت حياتي اللي كانت من غير معنى من غيرك أنا بحبك وكلمة بحبك قليلة عليك بجد ساعات بحس إني مستاهلش واحد ذيك. يوسف قرب منها ومسح دموعها وقال بحنية: لا يا مريم إنتي تستاهلي كل حاجة حلوة في العالم وبعدين مين قالك إن حياتي مكانتش فاضية من غيرك! مريم أنا حياتي مكانش فيها أي لون لحد ما قابلتك وكل حاجة فيا اتغيرت أنا محتاجلك ذي ما إنتي محتاجاني ويمكن أكتر منك كمان.

وكمل بحب وبشكر ربنا إن خالد مفتكركيش وسابك لو كان افتكر كنت هخسر أكتر إنسانة سرقت قلبي وخطفته مني من غير ما أحس! واتنهد وقال: إنتي عملتي فيا إيه يا بت إنتي!! لما مش بشوفك بتجنن خلاص يا مريم أنا بعترف إني وقعت في عشقك وبصراحة مش عاوز أقوم. مريم كانت بصاله في عينيه وقالت: أنا محظوظة بيك أنا عرفت قد إيه ربنا بيحبني! مش عاوزة أعيش غير في حضنك. يوسف حضنها وفضلوا دقايق حاضنين بعض ومحسوش بالوقت.

يوسف بمرح: نستنى المفاجأة اللي عملتلك. مريم: مفاجأة!! هو فيه مفاجأة بعد اللي أنا شايفاه ده!! يوسف بابتسامة: اطلعي كده فوق في أوضة بابها أبيض ادخليها هتلاقي مفاجأة. مريم طلعت بحماس وفضول تعرف إيه المفاجأة دي وطلعت وكان يوسف تحت. مريم فتحت باب الأوضة وشافت فستان لونه أحمر ومنفوش بس كان في غاية الجمال وانبهرت بجماله وشافت ورقة جنب الفستان مكتوب عليها "أميرتي عاوزك تلبسي الفستان ده وتنزلي يلا من غير نقاش".

مريم ابتسمت ولبست الفستان اللي كان مقاسها بالظبط وابتسمت لنفسها في المرايا من جماله وفردت شعرها الطويل على ضهرها وخرجت. يوسف شافها وهي نازلة على السلم وكانت في عينيه نظرة الانبهار بيها ذي كل مرة بيشوفها. يوسف بانبهار: يشيخة منك لله. مريم بتكشرة وصدمة: مني لله!!! يوسف بضحك على شكلها: أصلك طالعة حلوة أوي. مريم ابتسمت بس رجعت كشرت تاني: ومني لله ليه بقى إن شاء الله وبعدين إنت مخليني لابسة الفستان ده ليه؟

أنا مش فاهمة حاجة. يوسف: هنعمل خطوبة اللي مقدرناش نعملها. مريم عينيها وسعت: خطوبة!؟ إزاي ومفيش ناس؟ يوسف بابتسامة: إنتي بالنسبة لي الناس كلها وعاوز الحفلة دي ليا أنا وإنتي وبس. وراح شغل أغنية حلم حياتي ل وائل جسار وقال بغمضة: الأغنية دي ليكي. ومد إيده ليها علشان ترقص معاه. ومريم كانت مبسوطة ومدت إيديها ليه ويقضوا كانت كلمات الأغنية "الدنيا بترتب صدف وكل قلب وإحساسه فجأة الطريق بينا بيقف والحب بيجمع ناسه!

وإحنا اتقابلنا وجه أوانا شوفتك بقلبي اللي اتمنى وريتني أيام الجنة ومليت بحبك أوقاتي حلم حياتي". فضلوا يرقصوا في جو مليان حب. مريم ويوسف كان فاضل على فرحهم أسبوع واحد بس. ........................... خالد كان في المستشفى وريم فصلت قاعدة جنبه لحد ما فاق وقال بتعب: أنا فين؟ ريم بلهفة وفرحة إنه فاق: خالد إنت كويس؟؟ إنت في المستشفى. خالد بص لها بتعب: إنتي كويسة حد عملك حاجة؟

ريم بدموع: قولتلك في داهية أنا المهم إنت تبقى كويس يا خالد. خالد بتعب كمل كلام: إنتي خايفة عليا؟ ريم بدموع: طبعا خايفة عليك أنا بحبك يا خالد. خالد كان مصدوم من كلامها ومش مصدق نفسه بس من التعب نام. ريم فضلت قاعدة جنبه بس من الممرضة تشوفه. الممرضة: لو سمحت اخرجي علشان المريض يرتاح. ريم بتكشرة: لا مش همشي من هنا. الممرضة: يا فندم مينفعش لازم يرتاح لو بتحبيه وخايفة عليه اتفضلي برا.

ريم بصت لها ودمعة نزلت من عينيها وخرجت قعدت على كرسي برا وقاعدة حاطة إيديها على وشها. جت واحدة وخبطتها على كتفها وقالت بزعيق: خالد فين!!!! ريم بزعيق: إنتي مين إنتي؟؟ -أنا مدام يسرا أم خالد إنتي اللي مين؟؟؟ وخالد ابني فين أنا عرفت من المستشفى إن ابني هنا وإنتي إيه علاقتك ب ابني!!