رواية أحببتك لأنك حلالي الفصل السادس عشر 16 - بقلم أشجان

استيقظت من نومها على رنين هاتفها. وجدت الساعة لم تتجاوز الثالثة ليلاً. وجدته رقمًا غريبًا. تركت الهاتف ونهضت توضأت لقيام الليل، ولكن ما زال الهاتف يرن بهذا الرقم. انتهت من صلاة القيام لتقرأ وردها لحين صلاة الفجر. سمعت طرقات على باب الغرفة. حورية: ادخل. عبدالرحمن: صباحك ورد يا حور، عاملة إيه يا عروسة؟ حورية: الحمد لله يا حبيبي. عبدالرحمن: كنت سهران وسمعت صوت موبايلك كذا مرة.

حورية: مش عارفة والله يا حبيبي، رقم بقاله فترة بيرن وأنا مش هرد، تلاقي معاكسة. عبدالرحمن: طيب هاتي هشوف مين، ولو كدا نعمله بلوك. حورية: الفون على المكتب. أخذ عبدالرحمن الهاتف وفتح الخط: السلام عليكم. مالك: وعليكم السلام ورحمة الله. هو فون حوريتي معاك ليه؟ وبعدين كل ده نوم يا كسول. عبدالرحمن: هههههههههه. هو إنت مالك؟ مالك: أيوه أنا يا أبو نسب.

عبدالرحمن: لا يا أخويا، الفون مش كان معايا ومش كسول ولا حاجة، صاحيين من بدري. مالك: طيب ليه حوريتي مش ردت؟ عبدالرحمن: معاك أهي، اسألها. وبعدين ده ميعاد حد يتصل فيه. مالك: براحتي على فكرة، كلها كام شهر وتكون مراتي إن شاء الرحمن. وبعدين أنا اتصلت عشان تصحى تصلي القيام والفجر. عبدالرحمن: معاك أهي، اتفضلي يا ستي. حورية: مين؟ عبدالرحمن: ردي وانتِ تشوفي. أنا رايح أتوّضأ عشان أنزل المسجد. سلام يا حبيبتي.

حورية: السلام عليكم. مين؟ مالك: وعليكي السلام ورحمة الله وبركاته. ثم تابع بابتسامة: عرفتي مين؟ حورية: صباح الخير. مالك: صباحي أنتِ. أخبارك إيه يا حوريتي؟ حورية بخجل: الحمد لله بخير. أنت أخبارك إيه؟ مالك: الحمد لله بخير طول ما أنتِ بخير. حورية: يارب دايماً بخير. مالك: مش ردتي ليه؟

حورية: مش كنت أعرف رقمك. وأنا في الوقت العادي لما بيتصل رقم غريب بفتح الخط ومش بتكلم. لو صوت بنت برد، ولو صوت ولد بقفل. إنما رقم بيتصل 3 الفجر أكيد حد بيعاكس، مش رديت. مالك بمشاكسة: يعني أعاكس بضمير؟ حورية: لا ما أنت مش هتعملها. مالك بخبث: هههههههه ليه بقى مش أعرف أعاكس ولا إيه؟

حورية بثقة: المسألة مش ليها علاقة هتقدر ولا لأ. المسألة مسألة ثقة. أنت اتفقت معايا إننا هنلتزم وأنا واثقة إنك مش هتخون الاتفاق ولا هتغضب ربنا. مالك بفخر: صراحة مش عارف أقولك إيه. أنتِ أجمل حاجة حصلت لي. يا أحلى بنت شوفتها. حورية بخجل: إحنا اتفقنا على إيه؟ مالك: ههههههههه هو أنا اتكلمت يا بنتي. على فكرة إني أظهر لك إعجابي مش حرام والله. أنا مش قلت كلمة مش ينفع أقولها في الخطوبة. أنا قلت إنك أجمل بنت.

حورية: يمنى تسمعكم. مالك: أوباااا. لا طيب أنا هنزل أصلي بقا وأدعي لي. مش تفطر بيا. حورية: هههههههههه. أنت بتخاف منها؟ وأنا اللي عمالة أقول لها هقول لأخوكي وهنعمل فيكي اللي مش اتعمل. مالك: هههههههههه. ليه ضايقتك في حاجة؟ حورية: لا خالص. خلي الطابق مستور. يلا مش مشكلة. مالك: طيب أنا هقفل عشان تلحقي تصلي القيام. فاضل ساعة على الفجر. حورية: صليت الحمد لله وقرأت الورد ومستنية الأذان عشان الفجر.

مالك: ربنا يحفظك ويتقبل منك صالح الأعمال. حورية: اللهم واياك وجميع المسلمين. روح أنت بقا صلى. كفاية كدا النهاردة. مالك: أنتِ بتوزعيني يا حوريتي. ماشي افتكريها بس. حورية: لا والله مش كدا. بس عشان الصلاة. مالك: تفتكري يعني إني هقعد أتكلم معاكي وأنا مش صليت. بصي مهما بلغت مكانة الإنسان عندي عمرها ما هتعلى عن منزلة حبي لربي. أنتِ أيوه غالية عندي جداً بس مش أغلى من فرضي وتقربي لربي. ده طبعاً مش يدايقك.

حورية بدموع: ربنا يحفظك ويبارك فيك ويجعلك قدوة صالحة تاخد بإيدي للجنة. مالك: طيب مش تعيطي بس يا عيوطة. حورية: هههههههه. عرفت إزاي؟ مالك: هو أنا أي حد ولا إيه؟ حورية بابتسامة: لا طبعاً مش أي حد. بس دي دموع فرحة. مالك: عارف والله. أنا هقفل بقا وهنزل المسجد. مش تنسيني في دعواتك. حورية: لا الحمد لله مش بنسى حد في دعواتي. واللهم. مالك: لا بتنسي نفسك. حورية: لأني واثقة إن كتير بيدعولي. فاللهم لك الحمد.

مالك: ربنا يبارك لي فيكي. ومش يحرمني منك أبداً. صدق اللي قال إنك حورية من الجنة. وصدق اللي سماكي حورية. فعلاً اسم على مسمى. ابتسمت حورية بخجل وتعالت دقات قلبها ولم تستطع أن تنطق ولو حرف. مالك بتنهيدة: عايزة تقفلي صح؟ حورية بخفوت: ممكن. مالك بابتسامة: ممكن. ثم تابع بمشاكسة: هتكتبي إيه يا حوري؟ حورية بخجل: رخك على فكرة. مالك: هههههههههههه. شكراً والله على الإطراء ده. حورية: في حفظ الله. لا إله إلا الله. مع السلامة.

مالك: محمد رسول الله. أغلق كل منهما الهاتف ودونوا شيئًا ما في دفاترهم وعلى وجههم ابتسامة ممزوجة بفرحة كبيرة نابعة من القلب. صلى كل منهم ركعتين شكرًا لله على هذا العوض الجميل. *** طرقات على باب غرفتها أيقظتها من شرودها وهي جالسة على سجادة الصلاة. يمنى: اتفضلي. مالك: سلام عليكم. عاملة إيه يا يويوي؟ يمنى: الحمد لله يا حبيبي. تعالى. مالك وهو يجلس بجوارها على الأرض: الجميل سرحان في إيه؟ يمنى بتنهيدة: ولا حاجة.

مالك بجدية: عمر ما حد منا هيجبرك على حاجة. وعمر صداقتي بمعاذ ما هتتأثر لو رفضتي. معاذ يهمه راحتك قبلنا كلنا. صدقيني هو مش وحش. ده أحسن مني بكتير على فكرة. وأنتِ زي بنتي. لو كنت لاقيت إنه مش مناسب والله ما كنت عطيته أمل أساسًا. شوفي أنتِ راحتك فين وإحنا معاكي. يمنى بابتسامة: عارفة والله يا حبيبي. مالك: طيب إيه اللي محيرك بقا؟ يمنى بتهرب: مفيش حاجة.

مالك: طيب هنتفق اتفاق. لو أنتِ محروجة تتكلمي معايا أو مش حابة تتكلمي معايا أنا مش هزعل والله ومتفهم موقفك. بس عندك اتنين أنا بثق فيهم. ممكن تتكلمي معاهم وأي واحدة منهم توصلني. يمنى بمشاكسة: طيب الأولى عرفاها. التانية مين يا برنس؟ مالك: بس يا لمضة اتلمي. يمنى: أنا قولت حاجة يا لمبي. مالك باشمئزاز: لمبي. يمنى: مين بقا قول. مالك: بطلي كلامك الرخم ده الأول وأقولك. يمنى: حاضر يا حبيبي هحاول.

مالك: ماما وحورية. اتكلمي مع واحدة منهم. واللي مش عارفة توصليه ليا هما هيقدروا يوصلوه. تمام يا حبيبتي. يمنى: تمام يا عريس. مالك بتذكر: صحيح أنتِ عملتي إيه فيها امبارح يا بت؟ يمنى بمكر: مين دي؟ مالك: بلاش استهبال. يمنى ببراءة: أنا عملت حاجة؟ الله. كلهم كانوا بيحفلوا عليها لأننا اتصدمنا من اللي عملته. مالك بتساؤل: هههههههه. ليه عملت إيه؟

يمنى: يوووووه. قول مش عملت إيه. مالك حورية دي أرق إنسانة ممكن تقابلها. عاملة زي الريشة كدا بكلمة وحنية تحتويها. بالله عليك خد بالك منها. دي مش حمل جرح. حتى لو غصب عنك محدش معصوم من الغلط. الفرحة اللي شوفناها امبارح في عيون حور عمرنا ماشوفناها. بالله ما تضيع فرحتها دي. مالك: أنتِ تعرفي عني كدا؟ يمنى: طبعاً لا. بس بقولك. مالك محتضنًا إياها وهو يقبل رأسها: من عيوني يا حبيبتي. ربنا يبارك لي فيكم.

يمنى: مالك هو أنت هتحبها أكتر مني؟

مالك: لا طبعاً. بصي يا حبيبتي الحب أنواع ولكل واحد منكم نوع. هورقم واحد فيه. بس اللي مستحيل حد ياخد مكانتها هي أمي. ودلوقتي معاها ماما عفاف. بابا ده بقا مش عارف أقولك عنه إيه. ربنا ما يحرمني منه. وبالتأكيد هيكون معاه بابا أحمد. إنما أنتِ بقا أنتِ رقم واحد في حب الأخت وبدون منازع. ودلوقتي هتكون معاكي فاطمة. شريف رقم واحد في حب الأخ وبقا معاه عبدالرحمن. معاذ وعز معزتهم عندي واحدة وبحبهم جداً. الحب هو مسمى واحد بس أنواعه بتختلف. وكل واحد منكم ليه عندي مكانة خاصة في قلبي.

يمنى: نسيت حورية. مالك: لا مش نسيتها. اطلعي منها يا لمضة. يمنى: ماشي يا عريس. ربنا يسعدك. وعلى فكرة لو حبيتها أكتر مني والله ما هزعل. مالك: هقوم أنا بقا عشان قرآن الفجر بدأ. يمنى: أيوه يا حبيبي روح أذن بصوتك. في ناس مستنياك. مالك: لو ضربتك مش تزعلي يا أم لسانين. يمنى ببراءة: عيب عليك. أنا بحبك يا لوكا. مالك: سلام عليكم يا لمضة.

خرج من الغرفة وجد أخيه ووالده لم ينتهوا بعد. استأذن منهم ثم خرج مالك من المنزل متجهًا إلى المسجد ليؤذن لصلاة الفجر كما وعدها. ***

تجلس على مكتبها تدون في دفترها الخاص ما لم تتمكن من البوح به له. ومع كل كلمة تكتبها تبتسم بسعادة ويدق قلبها دقات غريبة عليها. لاول مرة تشعر بهذا الإحساس. انتهت من كتاباتها عندما استمعت إلى صوته يؤذن للصلاة. ابتسمت بحب وأغلقت دفترها. وضعته في درجها الخاص وأغلقته. ثم نهضت من مكانها. صلت ركعتين قبل الإقامة وظلت تدعو له وتتوسل ربها أن يحفظه.

سمعت صوته يؤذن للإقامة ويبدأ في تلاوة القرآن. جلست تستمع إلى قراءته حتى انتهى من الصلاة. وشرعت هي في صلاتها. خرجت من غرفتها بعد أن انتهت من صلاتها. ذهبت لتتحدث مع شقيقتها. حورية: يا توتة فينك؟ فاطمة: في الصالة يا حور. تعالي. حورية: الجميل قاعد هنا لوحده ليه؟ فاطمة: عادي. حورية: اممم. أي ده اللي عادي؟ فاطمة: عايزة إيه؟ حورية: محتارة ليه؟ فاطمة: تفتكري هقدر؟ حورية: حابة الموضوع يكمل؟

فاطمة: أنا مش نمت على فكرة من كتر ما بصلي استخارة وبدعي للخير. وكل ما بصلي برتاح عن المرة اللي قبلها. حورية: طيب إيه بقا؟ فاطمة: مش عارفة. إن كنت هقدر ولا لأ. حورية: أنتِ اللي هتحددي. عايزة تكملي هتقدري تكملي. مش عايزة هتعمل كل المصايب بتاعتك عشان الموضوع مش يكمل. فاطمة: هههههههههه. بس يا أختي بلا مصايب. حورية: سبحان الله فعلاً شبه بعض. فاطمة: أنتِ إيه رأيك؟

حورية: الجواز مش لعبة يا بطوطة. ومش كله مقالب وهبل وهزار وضحك ولعب وخروج ودلع. مش معنى كلامي إنه نكد. لا بالعكس والله. إحنا اللي بنتحكم فيه. الجواز مع كل اللي قولته ده مسؤولية وحياة تانية. شخص تاني هتكوني مسؤولة عنه في كل حاجة. واجبك إنك تهتمي بيه. المشاكل إحنا اللي بنعملها. لو في مشكلة بنتكلم بهدوء على فكرة مش بالصوت العالي. التفاهم في العلاقات أهم من الحب. مش معنى كدا إنه مش يكون موجود حب. بالعكس التفاهم هو اللي هيولد الحب.

فاطمة: إزاي؟ حورية: لو بنتفاهم مع بعض وبنقبله في كل حياته ونتناقش بعقلانية الطرف التاني هيحس بمدى تفهمك لحالاته. الرجالة في العموم بيحبوا البنت اللي تفهمهم وقت تعبهم وتحتويهم. مش تزود عليه. حتى لو هو مش بيحسسك أنتِ حسّي بيه. لما يلاقيِك أمه وبنته وصحبته وأخته صدقيني مش بس هيحبك لا ده هيعشقك. فهمتي؟ فاطمة: فهمت يا ست حور. حورية: طيب يلا بقا هنتأخر على الجامعة. فاطمة: ماشي يلا.

ذهبت حورية إلى غرفتها أيقظت أريج وأعدت لها الإفطار وجهزت كتبها وخرجت من غرفتها. وجدت فاطمة بانتظارها. حورية وهي تقبل أريج: عايزة إيه وأنا جايه؟ أريج: هاتي بابا. حورية: ههههههههههههه. وده أجيبه إزاي؟ أريج: شيليه وهاتيه. حورية: ههههههههههههه. سلام يا حبيبتي. عندي امتحان. أريج: مش تنسي. حورية: ههههههههههه. اسمعي الكلام وأنا هعملك اللي انتي عايزاه. أريج: ماشي. مع السلامة. خرجت حورية من المنزل هي وفاطمة. *** في منزل مالك:

مالك: يمنى لو خلصتي أنا نازل. تعالي أوصلك. يمنى: هوااا. أنا جاهزة. مالك: يلا يا حبيبتي. يمنى: يلا يا لوكا. بس هتصل بالبت جوجا تيجي معانا. مالك: احم. ما تكلمي فاطمة هي كمان. يمنى بخبث: هههههههههههه. لا فاطمة بتروح مع حورية. مالك بسرعة: طيب يلا كلميها شوفي هتقابلنا فين. يمنى: اهدى عليّ. مالك: بسرعة. هاتفت يمنى فاطمة. يمنى: فينك؟ فاطمة: واقفين على أول الشارع. يمنى: معاكي مين؟ فاطمة: حور بس. أنتِ فين؟

يمنى: أنا نازلة استنوني. فاطمة: مش تتأخري. يمنى: حاضر. وسلميلي على مرات أخويا. فاطمة: هههههههههه. لو سمعتك. يمنى: هههههههههه. طيب افتحي السبيكر. قامت فاطمة ويمنى بفتح السبيكر. يمنى: الغالية مرات الغالي. حورية: يافتاح يا عليم. نعم. يمنى: بطمن عليكي بعد سهرة امبارح يا عروسة. حورية: حاضر هخلي أخوكي يطمنك. يمنى: ههههههههههه. لا بجد. حورية: آه بجدي. يمنى: ماشي يا مرات أخويا. حورية: لما أشوفك يا يمنى بس اصبري عليا.

يمنى: طيب اصبري. إحنا جايين. حورية بشك: أنتِ فين يا بت؟ يمنى: أنا داخلة عليكم اهو. استنوني بس هجيب جوجا معايا. حورية: إن شاء الله بس بسرعة. عندي امتحان برمجة بالله عليكي. يمنى: خلاص اهو. يلا سلام عليكم. حورية: وعليكم السلام ورحمة الله وبركاته. يمنى: يلا اصل الامتحان هيأثر عليها. أنا عارفة. مالك: ثواني. هاكلم والدها لأني متأكد إنها هترفض.

اتصل مالك بوالد حورية استأذنه لتوصيلهما. فوافق وأرسل رسالة لابنته أخبرها أن مالك سيوصلها لأنه استأذن منها. ركبت جوجا بالخلف مع يمنى وانطلقوا إلى حيث فاطمة وحورية. كانت تجلس عند الاستراحة تراجع مادة الاختبار. لم تشعر بمن وصلوا. وفاقّت على صوت يمنى. يمنى: تعالوا يلا. أسرعت فاطمة إلى صديقاتها. جلست معهم بالخلف واضطرت حورية إلى الجلوس في الأمام. حورية: السلام عليكم. مالك: وعليكم السلام ورحمة الله.

من قلقها وتوترها لم تستمع إلى الحديث الدائر حولها. كان كل همها أن تحافظ على مستواها. أراد إخراجها من حالتها. مالك: اهدئي. إن شاء الله خير. حورية: إن شاء الله. رن هاتفها. وجدتها أروى. تنهدت بضيق: يا الله مش وقته والله. ثم استغفرت وأخذت نفس عميق. حورية: السلام عليكم. أروى: حوري فينك؟ حورية: جاية في الطريق. أروى بحرج: كنت محتاجة جزء تشرحيه ليا. حورية: حاضر. لما أوصل. حاجة تانية؟

أروى بخجل: أنا آسفة يا حورية. مش أقصد أضايقك. حورية بحزن: أروى يا حبيبتي أنا آسفة والله مش قصدي. أنتِ عارفة إني متوترة. حقك عليا بالله ما تزعلي. أروى: خلاص حصل خير. حورية باعتذار: أنا آسفة والله يا روري. بس قلقانة شوية. مش تقلقي والله هشرحهالك بسلاسة. وإن جت في الامتحان هتدعي لي إن شاء الله. بس بالله عليكي مش تزعلي. أروى: مش زعلانة والله يا حبيبتي. أنا عارفة. وبعدين مين قالك إني كنت هدخلك الامتحان من غير ما تشرحي لي؟

حورية: آه. ما أنتم مصاحبيني مصلحة. مش ممكن على الصحاب. أروى: فعلاً. حورية: بقا كدا. طيب امشي بقا خليني أراجع كلمتين. صحيح البنات وصلوا؟ أروى: لا لسة. يلا مستنياكي. سلام عليكم. حورية: وعليكم السلام ورحمة الله وبركاته. ثم أراحت رأسها على الكرسي وأغمضت عينيها. مالك: معلش بس هو مجالنا كدا رخمه. حورية وهي ما زالت على وضعها: امممممم. بس بحبه. مالك: والله يا بخته. صحيح هي روجي عاملة إيه؟ حورية بتذكر: هههههههه. قردة.

فاطمة: هههههههههههههههه. دي لمضة مش قردة. مالك: هو في إيه؟ عملت إيه؟ حورية بابتسامة: بلاش أحسن. مالك: لا والله لأعرف. حورية: احكي يا توتة. الراجل حلف. مش هنوقع حلفانه. أنا مصدعة. مالك: أجيب لك مسكن؟ حورية: لا أنا مش بحب المسكنات. إن شاء الله شوية كدا وهيروح. فاطمة: احكي ولا هنقضيها تسبيل. حورية: اتلمي يا بت. مالك: انطقي يا لمضة. عملت إيه؟ فاطمة: هههههههه. عايزة حورية تشيلك. حورية: ههههههههههههه. يخربيت الوصف بتاعكم.

مالك: هههههههههههههه. ليه بقا؟ فاطمة: بتقولها أجيب لك إيه وأنا جاية قالت بابا. ولو مش جه شيله وهاتيه. انفجر جميع من في السيارة على حديث تلك الصغيرة. حورية: ربنا يهديهام. مالك: اللهم آمين. ظلت تمسد بحركات دائرية على رأسها علها ترتاح قليلاً. مالك بقلق: على فكرة كدا كتير وغلط عليكي. لازم تشوفي حل للصداع ده. حورية: من التوتر من الامتحان والله. مش تقلق. مالك: برمجة أكواد ولا إيه؟ حورية: امممممم.

مالك: مادة جميلة. كنت بحبها جداً. حورية وهي تنظر إليه: بجد؟ مالك: آه والله. وكنت دايماً بجيب فيها تقدير كويس. حورية بحماس: أنا كمان بعشقها والله. صحابي بيقولوا عليا مجنونة. مالك: هما اللي مجانين. تحبي أشرح لك حاجة؟ حورية بفخر: تحب أنا أشرحلك حاجة يا هندسة؟

مالك: هههههههه. شكراً يا هندسة. اهدئي والامتحان هيكون كويس. وأنتِ محفظة البت يمنى دي أدعية حلوة. كل ما أقولها واحد تقول لي حور حفظتهولي. وأخدة الثواب كله لوحدك أنتِ. حورية: لا خلاص هشاركك فيه. مش تقلق. يلا يابنات استعدوا عشان وصلنا. يمنى: حور هجيلك بعد المحاضرة. عايزة. حورية: هنتظرك. هتلاقيني في مكاني إن شاء الله. فاطمة: يلا الدكتور سامر هيتأخر على السكشن ومش هيبدأ. يمنى: ههههههه. أيوه يلا بسرعة.

جوجا: يلا يارخمة منك ليها. قبل أن تخرج من السيارة أوقفها مالك. مالك: طمنيني لما تخرجي من الامتحان. حورية: حاضر. ادعي لي. مالك: من غير ما تطلبي أساساً. حورية: ربنا يبارك لي فيك. مالك: ويبارك لي فيكي. حورية: هنزل بقا عشان ألحق أشرح للبنات. مالك: ماشي. في رعاية الله. حورية: خلي بالك من نفسك. لا إله إلا الله. مالك بابتسامة: حاضر. وانتي كمان. خلي بالك من نفسك. محمد رسول الله. استودعكِ الله الذي لا تضيع ودائعه.

ذهبت حورية دون أن تأخذ هاتفها. فسمعت صوته يناديها قائلاً: مالك. ابتسمت لأنه نادى عليها باسمه. التفتت إليه بتساؤل. أعطاها الهاتف قائلاً: خدي بالك مش تنسي حاجتك عشان أعرف أطمن عليكي. حورية بابتسامة: سماح المرة دي. مالك: المرة دي بس. حورية: اتفقنا. سمعوا صوت زميل لها في الكلية يسخر منها قائلاً: الشيخة واقفة مع واحد من برا الجامعة. هه. ثم تركهم وذهب. غضب مالك مما سمعه وبرزت عروقه بشدة وكأنه بركان على حافة الانفجار.

تسارعت أنفاسها مما سمعت. ولكنه أغمضت عينيها لمنع دموعها من النزول. سمع همسها تذكر الله وتستعيذ من الشيطان. مالك: افتحي عيونك. أنتِ أرقى وأسمى من أن واحد زي ده يتكلم عليكي. ارفعي رأسك وأنا هعرفه مقامه. حورية بتنهيدة: يلا روح شغلك وأنا هشوف محاضراتي. مالك: مش هتمشي إلا لما تضحكي. حورية بابتسامة: هو أنت إزاي كدا بجد؟ مالك: كدا وكدا. حورية: ههههههه ما شي. مالك: ركزي. عايز النهاية. حورية: إن شاء الله.

غادر مالك بسيارته بعد أن اطمأن أنها دلفت إلى الكلية بابتسامة على وجهها. هند: ما لسة بدري يا عروسة. حورية: السلام عليكم ورحمة الله وبركاته. البنات: وعليكم السلام ورحمة الله. حورية: يلا نبدأ. جهاد: مالك. حورية بابتسامة: الحمد لله كويسة. مش تقلقي. جهاد: طيب يلا. بدأت حور في الشرح وهم يستمعون إليها بتركيز حتى انتهت. جوجو: عليا النعمة ما بفهم من الدكتور كدا. أروى: ربنا يحفظك والله.

حورية: طيب يلا بقا نروح السكشن ونلحق الامتحان. ذهبت الفتيات إلى السكشن وكان الامتحان بسيط وفي غاية السهولة. أروى: ربنا يبارك لك يااااااااارب. حورية: على إيه يا بنتي. ولا يهمك. هند: الامتحان كان جميل. حورية: الحمد لله. أروى وهند جهزوا نفسكم. واحدة الأربعاء وواحدة الخميس. عن إذنكم بقا لأني مصدعة. معلش اتفّقوا وعرفوني. سلام عليكم. انصرفت حورية هاتفة يمنى: أنتِ فين يا ييويوي؟ يمنى: خلصت اهو وجيالك.

حورية: اطلعي لوحدك. أنا قدام المبنى بتاعك. خرجت يمنى فقالت لها حورية: ممكن نمشي لحد البيت. مصدعة وعايزة أتمشى. إيه رأيك؟ يمنى: تمامووووز. يلا بينا. حورية: هه سمعاكي. يمنى: مش عارفة أقول إيه. حورية: اممم. هاتي كل الحيرة اللي جواكي. يمنى: مش عارفة. مبسوطة أو قلقانة. حورية: كملي يا حبيبتي. يمنى: حور شكلك تعبانة. نأجل كلامنا. حورية: لا يلا نتسلى واحنا ماشيين.

يمنى: بصي مش عارفة. إحساس غريب. في البداية كان كل همي دراستي. مش عارفة ليه مش قولت لا عليه. حورية: هو ده الحب. لما بيجي بيغير كل أفكارنا. دي حاجة حلوة ووحشة في نفس الوقت. يمنى: بمعنى إيه؟ حورية: ممكن الحب غير فكرنا للأفضل. نشوف منظور تاني للتفكير. زي ما مالك عمل معايا كدا. وزي ما معاذ وعز ما عملوا معاكم. اتمسكوا بحبهم ليكوا وفي نفس الوقت دعموكم تكملوا مشواركم وطموحكم. مش خذلوكم أو اتحكموا.

يمنى: أقولك حاجة محدش يعرفها. طول عمري أعرف معاذ وبشوفه على طول عند مالك. وكنت بحب أهزر معاه وأقعد معاه وكان بيحبني ويجيب لي شوكولاتة. لحد ما فجأة لقيتوا قطع زيارات لينا بعد ما اتعلقت بيه. استغربت. كنت في إعدادي. سألت مالك. فهمني إني كبرت ومش ينفع أهزر معاه تاني. قلت إنه فترة مراهقة وهتروح لحالها. وحاولت أنساه بس مش عرفت. بس تناسيت. كنت بتجاهله دايماً. وكل ما مالك يفتح معايا سيرة الجواز أحط أمل إنه هو. تعرفي إن لحد دلوقتي كنت بفكر فيه وبدعي ربنا بيه. ساعات بحس إني غلط وبدعي ربنا يسامحني. هو ده الحب.

حورية: مش عارفة بس تقريباً هو. تعرفي الحب ده بيجي في وقت مش عاملين له حساب. بيغير حياتنا وإحساسنا بكل حاجة. تحسي إنك طايرة. مش عايشة على الأرض. عارفة عندي حاجات كتير مش عارفة أعبر عنها. يمنى: أنا على فكرة مبسوطة وفرحانة وموافقة. حتى لو اتجوزت متأكدة إنه هيدعمني. بس خايفة يضيع مني تاني. حورية: اللهم إني استودعتك إياه يا من لا تضيع ودائعه فاحفظه لي وبارك لي فيه فأنت خير الحافظين. ردي الدعاء ده دايماً.

يمنى براحة: مالك مش غلط لما قال إنه واثق إنك هتفيديني. حورية بابتسامة: ليه؟ يمنى: كان بيتكلم معايا وحس إني مش واخدة راحتي في الكلام. قالي كلمي ماما أو حورية وواحدة منهم هتوصل لي الكلام بأسلوب كويس مش يسبب لك الإحراج. حورية: ههههه. واثق أوي أخوكي. يمنى: لأنه مش مالك لأي حاجة. ده مالك الحورية. حورية: طيب يلا يا لمضة وصلنا. هطلع أنام. محدش يكلمني. اقطعوا علاقتكم بيا يومين كدا.

يمنى: ههههههههههههه. على قلبك. صحيح عملتي إيه في الامتحان؟ حورية: الحمد لله. إن شاء الله النهائية. يمنى: إن شاء الله. سلاموووووووز. حورية: في رعاية الله. دخلت إلى غرفتها أدّت صلاة العصر ثم نامت بعمق بعد أن أغلقت هاتفها. *** في منزل مالك: لا يعلم للمرة الكم يهاتفها ولكن نفس النتيجة. مالك بقلق: يمنى آخر مرة شوفتي حورية إمتى؟ يمنى: بعد العصر دخلت البيت. ليه؟ مالك: الفون مقفول بقاله فترة.

يمنى: هههههههههههه. آه ما هي هاربة مننا. عايزة تنام وعارفة إننا بنزعجها وهي نومها خفيف جداً. مالك: وبتزعجوها ليه يا متطفلين؟ يمنى: بنحبها يا عم. مالك: روحي أوضتك أحسن. ثم دخل إلى غرفته. لقد اقترب أذان العشاء وبالطبع نائمة لم تصلي المغرب. هاتف أخيها: عبدالرحمن: حبيبي يا أبو نسب. مالك: في البيت ولا فين؟ عبدالرحمن: أيوه بجهز عشان نازل المسجد. مالك: طيب ممكن تصحي حور تصلي المغرب. عبدالرحمن: صحيت صلت ونامت تاني.

مالك: هي لسة تعبانة ولا إيه؟ عبدالرحمن: لا إرهاق من قلة النوم عادي. مالك: طيب صحيها تصلي العشا وتفتح الفون. عبدالرحمن: حاضر يا كبير. مالك: تسلم يا غالي. يلا سلام عليكم. عبدالرحمن: وعليكم السلام ورحمة الله. حورية من خلفه بنعاس: بتكلم مين كدا؟ عبدالرحمن: أخيراً صحيتي. حورية: ولا اللي بقالها سنة مش نامت. عبدالرحمن: أحسن يعني. حورية: أيوه الحمد لله. عبدالرحمن: صحيح مالك كلمني. فونك مقفول. افتحيه. هيكلمك بعد صلاة العشاء.

حورية بخضة: أوبس نسيت خالص. هو فاضل قد إيه على الأذان؟ عبدالرحمن: نص ساعة. حورية: طيب عن إذنك. دخلت إلى غرفتها فتحت هاتفها واتصلت به. مالك بهدوء: السلام عليكم. .... وإخيراً. حورية: آسفة والله مش حسيت بنفسي. مالك: ولا يهمك. مش تعتذري. مش حصل حاجة. أحين دلوقتي. حورية: الحمد لله. كتييييييييييييير. مالك: طيب الحمد لله. عملتي إيه في الامتحان؟ حورية بابتسامة: لا الحمد لله. إن شاء الله النهاية. مالك: إن شاء الله.

حورية: هتنزل للاذان امتى؟ مالك: ربع ساعة كدا وهنزل. حورية: على خير إن شاء الله. مالك: هتعملي إيه؟ حورية: هاكل لأني مش كلت. وبعدين هصلي وممكن أنام. مالك: كل ده مش كلتي. والله ما ينفع. حورية: معلش بقا أنا كدا في الامتحانات. مالك: لا يا سكر. الوضع ده هيتغير. بلاش دلع. حورية: هههههههه. طيب روح صلى لحد ما أكلم. مالك: تقريباً كدا بتوزعي. حورية: أينعم يا أفندم. مالك: ماشي يا أختي. لما أرجع لك.

حورية: خلي بالك من نفسك. في رعاية الله. مالك: حاضر. لا إله إلا الله. حورية: محمد رسول الله. بعد قليل استمعت إلى صوته يؤذن للصلاة. انتهت من طعامها ثم أدّت فرضها وجلست تقرأ في مصحفها حتى وجدته يتصل بها. حورية: هو أنت مش لسه قافل؟ مالك: هههههههه. طيب ردي السلام طيب. حورية: وعليكم السلام ورحمة الله وبركاته. مالك: كليتي وشربتي ونمتي وصليتي الحمد لله. ناوية على إيه؟ حورية: هنام. مالك: هههههههههههه. أنتِ مش بتشبعي نوم.

حورية: مش كدا بس مرهقة شوية. مالك: طيب مفيش مذاكرة لبكرة؟ حورية: لا ما أنا مش هنزل الأسبوع ده. مالك بقلق: ليه؟ حورية: كله مؤتمرات وندوات وحفلات. أذاكر في البيت أفضل. وكمان المشروع قرب. ربنا يستر. مالك: ربنا معاكي يارب. إن احتاجتي أساعدك في حاجة أو أشرح لك حاجة أنا معاكي. حورية: إن شاء الله. مالك: صحيح مين الواد بتاع الصبح ده تعرفيه؟

حورية: زميلي في القسم. رفضت أديله كشكول ليا من يومها. حاططني في دماغه. أنا كنت منزلة المحاضرات على جروب الدفعة. يبقى لي العبط ده. بس سيبك منه. مالك: اللي يجي عليكي ولا على كرامتك. اللي يفكر بس يبص لك بصة همحيه من على الدنيا والله. بس لو كلمك تاني عرفيني. حورية بابتسامة: حاضر. مالك: يمنى كلمتك؟ حورية: امممممم. مالك: وأي الأخبار؟ حورية بتلاعب: ده سر على فكرة. مالك: اممم. حورية: أيون. مالك: يعني موافقة ولا رافضة؟

حورية بدهاء: البنت منا طالما قدامها فرصة الاختيار مش هتوافق على حد رافضاه. وصلت يا كابتن. مالك بابتسامة: وصلت يا حوريتي. حورية: امم. طيب هو معاذ ممكن يقدم لها إيه لو اتجوزوا في الدراسة؟ مالك: بتلمحي إيه؟ حورية: جاوب وأنا هقولك. مالك: معاذ مش عاوز من الدنيا غيرها وهيكمل معاها مشوارها ومش هيقتل طموحها. أهم حاجة يكونوا مع بعض. حورية: وده اللي هي عايزاه. مالك: وضحي.

حورية: بص عموماً إحنا لما بنحس بالأمان مع حد بنرمي روحنا فيه لأننا بنكون واثقين إنه مش هيخذلنا. واثقين إنه مهما يحصل لينا سند. أحياناً فكرنا وطموحنا بيتغير لو حسينا بذرة أمان مع الإنسان ده. مالك: تقصدي إن يمنى موافقة على الجواز أثناء الدراسة لأنها واثقة في سندها. حورية: بالظبط. مالك: طيب وفاطمة؟ حورية: اتكلمنا الصبح وموافقة على الفكرة. بس مش عارفة إيه رأيها في موضوع الجواز أثناء الدراسة. هعرف وأبلغك. مالك: تمام.

حورية: بعد إذنك هبقى أروح لهند وأروى. يوم الفاتحة دي يوم ودي يوم. يومين يعني. مالك: براحتك. شوفي رأي والدك إيه. أنا مش همنعك. حورية: عارفة إنك مش هتمنعني. بس حالياً رأي بابا أولاً ثم رأيك. يعني واجب إني أستأذن وأعرفكم. مالك بفخر: ربنا يحفظك يا بنتي والله ويحميكِ. حورية: وإياك. مالك بتلاعب: وإن رفضت؟

حورية بدهاء: وقتها واجب عليا إني أسمع كرمك. بس قبلها لازم نتناقش بهدوء وأشوف سبب اعتراضك. يا إما تقنعني بوجهة نظرك يا إما أنا أقنعك بوجهة نظري. مالك: اممم. غلبتيني يعني. حورية بثقة: طبعاً يا بابا. مالك بابتسامة: ماشي يا بنوتي الحلوة. روحي بقا ارتاحي شوية وهصحيكي للقيام إن شاء الله. حورية: إن شاء الله. تصبح على جنة وكل حاجة حلوة. مالك بحب: أصبح عليكي.

ابتسمت بخجل ثم أغلقت الهاتف وأمسكت بدفترها دونت به ما تريد. ثم ذهبت في ثبات عميق وعلى وجهها ابتسامة عاشقة. وكذلك كان حال بطلنا هو الآخر.