رواية احفاد المنشاوي - ندى الشرقاوي "اميرة الرعد الجزء الثالث" الفصل الثاني 2 - بقلم ندى الشرقاوي "اميرة الرعد الجزء الثالث"

تاج: أنتي 25 سنة، ليه حياتك غير الناس؟ وليه ماحبيتيش لحد الآن؟ جنة: عشان الحب بالنسبة ليا أنا ضعف، معرفش هو بالنسبة ليكوا إيه، بس أنا مش عاوزة أحب. عاوزة أكبر في شغلي وحياتي، وليا مركز كبير وأطلع مهمات أكبر. أما بقى بالنسبة لسني، أنا بعمل حاجات مبيعملهاش تميم أخويا، بس لما أكون لوحدي. تاج: حبيتي قبل كده؟ جنة: هو سؤال واحد. ولفوا الزجاجة، مالك يسأل خديجة. مالك: أنتي ليه اتنقبتي مع إن مفيش حد في العيلة منقب؟

خديجة: عشان حبيت النقاب، بيخليني ملكة وأنا ماشية، محدش عارف أنا شكلي عامل إيه ولا جسمي إزاي، ومفيش أحلى من اللبس الطويل. لفّوا الإزازة تاني. أنس يسأل تاج. أنس: أنتي ليه اتغيرتي وبقيتي لوحدك ومعنتيش عاوزة تختلطي بحد؟ تاج: عشان الوحدة حلوة بدل المشاكل، صاحبة عمري بعدت عنها، حبيت أكون لوحدي. وكملوا لعب على كده. بس جه ضيف. عمر: إزيك يا رعد باشا؟ رعد: إزيك يا عمر. عمر: كنت معدي بالصدفة قولت أسلم على حضرتك.

جنة بسخرية: هو معدي قدام حارة، لقى نفسه جنبنا. عمر: إزيك يا جنة. جنة: إيه جنة دي يا حضرة الظابط؟ عمر: أحم، إزيك يا فندم. جنة: كويسة، ياله يا شباب. رعد: على فين؟ جنة: هنطلع نلف شوية. مالك: عن إذنك يا عمو، ناخد خديجة معانا. يوسف: تمام يا مالك، بس خلي بالك منها. مالك بتوهان: في قلبي. يوسف: سلامة قلبك يا روح أمك. مالك: أحم، معلش سرحت. جنة: ياله أنا فاضية، تعالوا ومش هتخسروا.

طلعوا بره وسابوا عمر جوه ولا كأنه موجود، واستأذن ومشي. وراحوا ناحية غرفة بعيدة عن القصر تبع جنة. مالك باستغراب: إحنا جايين هنا ليه؟ جنة: بص، أنتوا عاوزين نهيص صح؟ الجميع: صح. جنة: تمام. وطلعت الدراجة النارية. جنة: دي بتاعتي، وفي واحدة كمان. مالك: بس أنا هاجي بالعربية علشان خديجة مينفعش تركب. خديجة: عادي ممكن مش أجي. مالك: لا، أنا كده كده مش عاوز أركب، أنا هركب العربية، ياله.

جنة ركبت الدراجة بتاعتها، كانت باللون الأسود. وأنس هو وتاج. ومالك طلع عربيته وركب هو وخديجة وفردوس. جنة كانت زي اللي في سباق، كانت بتسوق بسرعة عالية أوي. لحد ما وصلوا للمقطم. أنس: إحنا جينا المقطم ليه؟ جنة: بحب أجي هنا كتير والجو هادي. خديجة: عندك حق، الجو هنا جميل أوي، مع إن أول مرة أجي هنا. فردوس: بابي لو عرف هينفخنا، إحنا جينا من غير حرس. جنة بسخرية: مش مالية عينك أنا والباشا اللي جابك ولا إيه؟

فردوس: لا يا باشا، ده إنتي قمر. تاج: هو أنا ممكن أتمشى شوية؟ أنس: تعالي هتمشي معاكي علشان متكونيش لوحدك. تاج: لا همشي لوحدي. أنس: بت، امشي علشان مش أضربك. جنة: طب ما تمشوا أنتوا الاتنين بدل ما أرميكوا من فوق الجبل. مشيوا. ومالك: تعالي يا دوسة أنتي وخديجة نتمشى، الجو حلو. قاموا يتمشوا، الجو كان هادي وجميل. لكن وهما ماشيين صرخت خديجة وخبت وجهها في يوسف أو بمعنى أصح (حضنته) مالك بخضة: إيه في إيه مالك؟ وجنة جت جري.

فردوس بتردد: أصل... أصل كان في اتنين وبي... وخلاص بقى. مالك فهم قصدها وفهم خديجة عملت كده ليه. بس كان مبسوط بقربها منه. بعدت خديجة بحرج واعتذرت. مالك: لا عادي ولا يهمك. جنة بهدوء: خلاص محصلش حاجة. ومشيوا على القصر. ودخلوا. مرام: مالك يا خديجة؟ خديجة: لا مفيش يا مامي. رعد لـ جنة: جنتي. جنة: مش مرتاحة. رعد: خدتي العيال ودتيهم فين يا بنت أميرة؟ أميرة: إيه وهيا مالها أميرة؟ جنة: آه آه مالها أميرة بقى؟

رعد: بتوقعينا في بعض يا بنت. جنة: يا بنت إيه بقى؟ قام رعد من على الأريكة ومشي في اتجاه جنة. جنة: أنت جاي عاوز إيه؟ رعد: ولا حاجة، وديتي العيال فين؟ جنة ببراءة: اسألهم، مش إحنا روحنا كارفور؟ الشباب في وقت واحد: كذاااابة. جنة وهيا تلعنهم في سرها. رعد: كارفور إيه؟ وجبتي جبنة وحلاوة ولا جبتي إيه؟ جنة وهيا تحاول الهروب منه وقامت تجري: اهدى بس، أنت راجل كبير مش حمل جري. رعد وهو بيجري وراها كـ

شاب في عمر الثلاثين: خدي يا بت هنا. والجميع يضحك عليهم. أكرم: كفاية يا رعد. جنة وهيا بتجري: سيبه سيبه، هو إحنا ورانا حاجة؟ رعد: روحتي فين يا بنت الـ** أميرة بتحذير: رعد. رعد وقف وقبل رأسها: سوري يا روحي. وكمل جري. يوسف بضحك: احترام. يوسف بحنية: قولي أنتي يا خديجة روحتوا فين؟ خديجة بتبص لـ جنة، وجنة بتبصلها بعيون كالصقر: روحنا... أكرم: بس يا جنة كفاية تخويف في البت. خديجة: روحنا المقطم.

قام يوسف وأكرم جري يجروا ورا جنة. جنة وهي بتجري: اللي يحصلني ليه 50 جنيه وسندوتش شاورما من عم محمد اللي في القسم. أكرم: ختي بنتي المقطم يا رم*ه. يوسف: البت البريئة توديها المقطم. مالك بخوف في نفسه: أمال لو عرف إنها استخبت في حضني. جنة وهي بتجري منهم: اهدوا بس، ده حتة مكان هادي وجميل. أكرم: بقا أنتي سنيوريتا الصغيرة الكيوت. جنة وقفت وقالت: محدش بيفضل على حاله يا أكرومتي. ياسمين: بااااس كفاية بس أنا زعلانة.

جنة: ليه يا ياسو؟ ياسمين: علشان كنت عاوزة أجي المقطم يا جنة. جنة بغمزة: بس كده من عيوني. جنة: بااااااس أمجد باشا بيرن استوووب. جنة برسمية: أحم، ألو. أمجد: مهمة يا سيادة الرائد. جنة: تمام يا فندم، مسافة الطريق وأكون عند حضرتك. أمجد: تمام. وقفل. جنة: بابي، أنا لازم أمشي دلوقتي، نلعب لما أجي. يوسف بضحك: يا بت أنتي ظابط. جنة: سيبني أفك عن نفسي شوية، الله يخليك يا چو. رعد: ياله يا جنة علشان شغلك.

أميرة: بس الساعة 11 يا جنة. جنة بحنية: يا ميرو يا عسل، ده شغلي وشغلي ملوش مواعيد، وإحنا عارفين كده صح ولا إيه. أميرة: صح بس أنا بخاف عليكي. جنة: خليها على الله، أنا طالعة ألبس. طلعت جنة علشان تلبس ولبست بنطلون أسود وجاكت أسود ونزلت. رعد: سلاحك فين؟ جنة: معايا، ياله سلام عليكم. الجميع: وعليكم السلام ورحمة الله، ربنا معاكي. وغادرت جنة القصر. وراحت على المديرية. أمجد: معلش يا سيادة الرائد. جنة: لا يا فندم ده شغلي.

أمجد: طول عمري أقول إنك أحسن واحد في كل الناس اللي هنا وشغلك تمام التمام، بس قوليلي رعد طلعك إزاي. جنة: لا عدت على خير، مامي اللي كانت مش عاوزة. أمجد: مش عيب عليكي لما تقولي مامي وأنتِ العساكر بتخاف منك. جنة: أنت صديق العيلة يا ميجو، مننا وعلينا. أمجد برفع حاجب: ميجو! ياله يا بت خدي الملف وادرسيه كويس والتسليم الساعة 6 الصبح. جنة باستغراب: مش غريبة 6 الصبح دي يا فندم؟ أمجد: ما ده الغريب وده مهمتك أنتي.

جنة: تمام أنا في مكتبي. أمجد: تمام. دخلت جنة المكتب. جنة: عم محمد، قهوة لو سمحت على نار هادية خالص. عم محمد: تمام يا فندم. جنة: عم محمد، قولي يا بنتي ولو حتة هتقولي يا جنة بس بلاش تقولي يا فندم، حضرتك قد والدي وأكبر. عم محمد بابتسامة: حاضر يا بنتي. وطلع. بدأت جنة تفتح الملف وتشوف اللي فيه من المعلومات علشان القضية. بعد وقت معين.

جنة باستغراب: الملف مفهوش غلطة والراجل شغله عالي أوي وملوش في الحاجات دي، ليه متبلغ عن الشحنة بتاعته؟ بس سمعت صوت دوشة بره وطلعت. عمر: إي إي مش تفتح يا أعم*ي. عم محمد: يا ابني أنا ما قصدتش، أنت اللي طلعت فجأة. عمر: ابن إيه؟ اسمي عمر بيه. جنة: هو أصلًا ميشرفهوش إنك تكون ابنه، في إيه يا محترم؟ في كبار*يه إحنا ولا إيه؟ عمر: القهوة وقعت عليا. جنة: حصل إيه يعني؟ محسسني إنك وقعت في النار.

جنة: ياله يا راجل يا طيب اعملي قهوة تانية من إيدك الحلوة دي علشان دي حد بصلي فيها، ودخلت المكتب وقفلت الباب في وش عمر. وقعدت وخدت نفس طويل. فلاش باااك. جنة بسعادة: أخيراً خلصنا. أوس: جنة أنا عاوز أقولك على حاجة. جنة: قول يا أوس. أوس: إحنا مش هنقدر نكمل مع بعض. جاءت الصدمة على جنة كالعاصفة، كسر قلبها حبيب طفولتها وشبابها. جنة بدموع: ليه يا أوس؟ أنت بتهزر صح؟ أوس: لا يا جنة بس أنا زهقت ومش عاوز أكمل.

جنة بصراخ: هو أنا لعبة في إيدك ولا إيه؟ أنا جنة المنشاوي ساااامع. أنت اتخطيت حدودك معايا، خدت أكبر من حجمك عندي. أنا اللي بقولك مش عاوزاك، يلع*ن الحب اللي يخليني ضعيفة مع شخص زبا*لة زيك، مش عاوزة أعرفك تاني ومش عاوزة أعرف أسبابك. ومشيت وهي بتبكي وقلبها مكسور. دخلت القصر وهي بتجري. رعد: جنة مالك مالك. جنة دخلت جوه حضنه: تعبااااااانة. رعد: مالك يا قلب أبوكي؟ فين أوس كان معاكي؟

جنة بعصبية: مش عاوزة أسمع سيرة أوس تاني، مش عاوزة أسمع اسمه في أي حااااااجة تانية. وبدأت ترمي أي حاجة قدامها وتكسر كل حاجة وتصرخ بهستيرية. ورعد على قد ما يقدر بيحضنها ويشدد على حضنه ليها. رعد: اهدي اهدي. جنة ببكاء: كسرني يا بابي. رعد: محدش في العالم ده يقدر يكسر جنة المنشاوي. جنة: بس هو قدر، صديق طفولتي وشبابي وحبيبي قدر وكسر قلبي، 15 سنة كذب كل ده كذذذذب.

رعد مش عارف يقولها إيه، هو كان عارف إنهم بيحبوا بعض وأصدقاء من حضانة، وأبو أوس بقا صديق لرعد وكانوا مستنيين يخلصوا كلية علشان يتقدم لجنه، هما كانوا في حكم مخطوبين بس كانوا عاوزين تكون رسمي.

رعد: جنة أنتي قوية، أوعي تخلي حاجة زي كده تهزمك وتبين ضعفك، أنا مش عاوز أعرف أي اللي حصل بينكوا بس اللي عاوزك تفهميه إنك أوعي تبيني ضعفك وخليكي قوية وكملي حياتك، الحياة عمرها ما تقف على حد، أوعي تزعلي على حد في حكاية الفراق، ياما ناس كتير فرقوا وهتحسي إن فراقهم راحة ليكي، صدقيني أنا مش بكذب عليكي ومتعودتش أكدب عليكي لأننا صحاب صح. جنة بصوت ضعيف وهي بتمسح دموعها بظهر يداها مثل الأطفال: فهمت يا بابي.

رعد: خليكي قوية يا جنة وعاوز أعرف نجحتي ولا إيه. جنة: عيب عليك طبعاً نجحت وتفوقت عليهم. بعدت جنة. رعد بقلق: على فين. جنة: على مهران. رعد: جنة مهران كبر وتعب، بلاش تتعبيه. جنة: غصب عني بحس براحة معاه مش مع أي خيل من اللي جبتهم. رعد: طب براحة عليه، مش حابب أخسره، أنتي الوحيدة اللي بتركب مهران وإخواتك مش بيقربوا منه علشانك. جنة بشبه ابتسامة: حاضر براحة، هقعد جنبه ونتمشى بس مش هركب ولا هجري. رعد: تمام.

طلعت جنة وراحت على الإسطبل. (رعد جاب مهران من الصعيد علشان جنة اتعلقت بيه جداً) جنة جمب مهران بتكلمه كأنه بشر: شوفت يا مهران أوس كسرني ومشي سابني من غير سبب، تفتكر ده إيه؟ بس كلام بابي صح أنا هبص للمستقبل وبس ولا إيه رأيك يا مهران؟ بابي قالي مش أتعبك، كبرت وعجزت ولا إيه؟ لا أوعي تعجز كده خليك جامد كده، كان نفسي آخدك ونطير سوا بس شكل رعد باشا خايف عليك.

بس أنت عارف هي الدنيا كده تجارب ويا تكسب حاجة يا تخسر حاجة، مش يمكن ده مش الحب الحقيقي، بس ده 15 سنة يا مهران انخدعت فيه كل ده. في أغنية تقولك أنت فرحة آخرها طرحة، لا دي آخرها بلاش علشان عندنا حياء. فاكت. جنة: نفسي أقابلك تاني يا أوس علشان تشوف أنا اتغيرت إزاي وبقيت إيه. وبصت في الملف تاني. قامت جنة راحت المكتب بتاع اللواء أمجد. جنة: فين سيادة اللواء. العسكري: روح يا فندم.

جنة في نفسها: بقا أنا قاعدة هنا وهو راح ينام، أي الحظ ده. رنت عليه. أمجد: السلام عليكم. جنة: يا فندم في حاجة غريبة. أمجد: خير. جنة: أنا بانسحب من المهمة. أمجد باستغراب: أنتي بتقولي إيه. جنة: يا فندم أنا ما أدخلش مهمة خسرانة، الراجل ده ملفه سليم 100%. أمجد: جنة ركزي معايا اللي معاكي ده المدير العام صاحب الشركة أو الصفقة مسافر ومحدش يعرفه، المدير بتاعه ده معاه توكيل.

جنة: يا فندم أنت عارفني أنا ما أدخلش حاجة خسرانة، ده ملعوب والله. أمجد حب يشد عليها وقال بصرامة: في إيه يا سيادة الرائد؟ هو إحنا هنمشي بالإحساس، دي مهمة وأنتي عليكي تنفذي. جنة بهدوء: تمام يا فندم، معلش على الإزعاج. (جنة ما قالتش آسفة على الإزعاج لأنها ما بتحبش تتأسف أياً كان السبب إيه) وقفلت ودخلت المكتب. ورنت على رعد. رعد قام بقلق: جنة مالك حصل حاجة؟ جنة بابتسامة: لا يا حبيبي حابة آخد رأيك في حاجة.

رعد باستغراب: أول مرة من ساعة ما اشتغلتي وأنتِ مدخلتنيش في شغلك أبداً. جنة بهزار ومرح: أقفل يعني ولا إيه؟ رعد مسرع: لا أنا معاكي للصبح، دقيقة بس علشان ما أزعجش أميرة. جنة: أيوه يا رومنسي أنت. رعد: بس يا بت لحسن تصحى تضربك. طلع رعد ونزل المكتب. رعد: أحكي يا ستي.

جنة: القضية فيها حاجة غلط، مبلغين عن شحنة مخد*رات هتتحط في لعب أطفال في حاجة، الشحنة دي هتوصل الساعة 6 الصبح، غريبة التوقيت، غير إن صاحب الشغل مسافر محدش يعرفه ومدير الشغل هو اللي بيستلم كل حاجة بتوكيل. الحكاية مش في دماغي قررت أنسحب. قاطعها رعد بصدمة، أول مرة تقرر جنة الانسحاب: تنسحبي! أنتي مدركة كلمتك؟ جنة: آه واتصلت على اللواء أمجد قالي لا. رعد: جنة هتخسري إيه لو روحتي المهمة دي؟

جنة بذكاء: يا بابي افهمني، أنا لو روحت المهمة دي ومطلعش في حاجة وإن الشحنة سليمة ده في قانوني أنا غلط، أنا ما أخسرش أي مهمة، أنا بادخل مهمات مضمونة 100%. رعد بتفاهم: فاهِمِك فاهِمِك، طب بذمتك مش حابة تعرفي مين صاحب الشغل؟ جنة بضحك: للأسف عاوزة ومصممة. دخل عمر فجأة. جنة بغضب: أي! داخل البيت ولا إيه يا حضرة الظابط ولا عملوا الباب ليه. ده كله ورعد على الخط سامع. عمر: أي يا جنة عادي يعني. جنة بغضب: تاني جنة!

أفهم أنا سيادة الرائد جنة المنشاوي وبس. عمر: بس أنا طلبت إيدك من رعد باشا. جنة: وأنا رفضت ومن حقي أرفض، ياله خد الباب في إيدك. طلع عمر وهو في قمة غضبه. رعد: جنة أي مالك؟ جنة بغضب: أتجوز أعمل بيه إيه ده كمان يا بابي! كنا في مهمة وضرب نار الأستاذ بيرد على التليفون. رعد بضحك: طب اهدي اهدي. جنة: أنا هنام شوية، المهمة الساعة 6 جايبني 12 ليه معرفش. رعد: معلش يا قلب أبوكي. جنة: الحمد لله هنام علشان أفوق لبكرة.

رعد: تمام يا حبيبتي باي. جنة: تصبح على خير. رعد: وأنتي من أهل الخير والجنة يا جنتي. في صباح يوم جديد. في تمام الساعة الخامسة صباحاً. قامت جنة بنشاط تستعد لمهمة جديدة فالمهمات بالنسبة لها عبارة عن مغامرات شيقة. مثل تسلق الجبال والسباحة والجري وركوب الخيل. الشغل بالنسبة لجنه مغامرة فقط تريد أن تعيشها بكل حلو ومر فيها. جنة وهي بتجهز سلاحها: يا رب. عمر خبط على الباب ودخل: أنا جاهز يا فندم.

جنة بنفاذ صبر: يا صبر أيوب، ورايا ورايا. عمر: بتقولي حاجة يا فندم؟ جنة: بقول عاوزة أشرب قهوة. عمر: محمد مشي. جنة بعتاب: عيب، راجل قد والدك مش هيفرق لو قولتله عم محمد زي ما أنت واخد لقبك يا حضرة الظابط، ياله بينا. وكملت بسخرية: واقفل تليفونك مش ناقصة مامي تقولي أعملك بيض عيون ولا مسلوق. وطلعوا وكان العساكر في الاستعداد. وراحوا المينا. وكانوا بيستلموا شحنة الألعاب. جنه برسمية: معايا أمر بتفتيش الشحنة دي.

رئيس العمل: ليه؟ وأنتِ مين؟ جنه: الرائد جنه المنشاوي، ومعايا أمر بتفتيش الشحنة. خلينا نشوف شغلنا لو سمحت. رئيس العمل: فين الأمر؟ جنه بملل: اتفضل. شاف الأمر. جنه: فتشوا الشحنة. بدأوا يفتشوا كل حاجة لدرجة فتحوا كل لعبة. العساكر: مفيش حاجة يا فندم. جنه بعصبية: يعني إيه مفيش حاجة؟ فتشوا كويس. عمر: يا فندم مفيش حاجة. جنه بعصبية وصوت عالي: إحنا جايين نلعب هنا ولا إيه؟ عمر: بلاغ كاذب.

رئيس العمل: إحنا ناس لينا سمعة ومينفعش اللي بيحصل دا. جنه حاولت تتماسك ومش تتعصب: اتفضل حضرتك معانا علشان نشوف الحوار دا. رئيس العمل: ليه؟ لقيتي اللي أنتِ عايزاه علشان أجي معاكوا؟ جنه: ما أنا مش لعبة ولا إيه علشان أجي مهمة ويطلع بلاغ كاذب! يالا. وراحوا كلهم على المديرية. جنه بصوت عالي: أنا قولت مش عايزة المهمة، قولت أنسحب من المهمة. من إمتى وأنا أدخل مهمات خسرانة ومفيش دليل؟

أمجد بعصبية: من إمتى وأنتِ بتعلي صوتك يا سيادة الرائد؟ أنتِ هنا تنفذي وبس، أنتِ بتخدمي وطنك. جنه: عارفة يا فندم ودي حاجة تشرفني إني أخدم بلدي، بس دي أول مرة أخسر مهمة. جنه المنشاوي مبتخسرش، ولو في مهمة تانية وأنا مش متأكدة منها هكون بنسحب نهائي واستقالتي هتكون على مكتب حضرتك قبل ملف القضية. وأدت التحية وانصرفت تحقق في الموضوع. جنه: يا فندم بقولك في بلاغ أن شحنة الألعاب دي فيها مخد*رات.

رئيس العمل: يا فندم أنا عبد المأمور، أنا معايا توكيل بس، وحظ حضرتك أن صاحب الشغل نازل انهارده من السفر وأنا كلمته ويطلع من المطار على هنا على طول. جنه بهدوء: تمام. وقعدت مستنية الشخص صاحب الشغل. بعد ساعة. العسكري: يا فندم. قاطعته جنه وهي لافة الكرسي ومش شايفة العسكري: خليه يتفضل. دخل الشخص: خير يا حضرة الظابط؟ جنه لفت: حضرتك... لكن مكملتش الجملة..!