رواية اكاذيب السوشيال للضياع الفصل التاسع 9 - بقلم هاجر نور الدين

أنا طالب القرب منك. إتكلم معتصم وقال: _طيب قرب عليا وقول الموضوع ياعم حسين. ضحك عم حسين بطريقة مبالغ فيها وقال: = لأ لأ مش قصدي، قصدي طالب القرب منك في والدتك. بصلهُ معتصم شوية وكلنا بلمنا ومتنحين ليه لحد ما معتصم قال بتساؤل: _يعني حضرتك عايز إي؟ عشان يتكلم عم حسين بضحكة من تاني وهو بيقول بإحراج: = عايز أتجوز أمك. فضلنا شوية ساكتين وأنا كانت هتفلت مِني ضحكة لحقتها بسرعة وسط صدمة حكاتي ومعتصم اللي طبطب على

كتف عم حسين وقال بهدوء: _أنا هتفهم إنك راجل كبير ولسة فايق من إغماء وجايز عادي تبقى تعبان شوية، إطلع ريح شوية فوق يا عم حسين عشان إنت كدا هتجيب لنفسك التهزيق وإنت راجل كبير. رد عليه عم حسين اللي إتضايق من كلامهُ وقال: = الله! ليه يعني أنا بقولك إي وبعدين أنا فايق، دا طلب على سنة الله ورسولهُ. إتكلمت هنا حماتي وقالت بإنفعال: _يخيبك راجل من ضمن الرجال العايبين، خلاص شكلك كبرت وخرفت. بصيلها معتصم وقال بتبريقة:

_إسكتي دلوقتي يا أمي لو سمحتي، وإنت كمان يا عم حسين روح شقتك يلا الله لا يسيئك آحنا فينا اللي مكفينا. إتكلم عم حسين من تاني بإقناع بدون كلل أو ملل وقال: = يا معتصم يا إبني إفهم، الواحد لما يوصل للسن دا بيحتاج ونس وخصوصًا لو كان عايش لوحدهُ بيبقى خلاص رجل برا ورجل جوا وخايف يحصلهُ حاجة لوحدهُ، وأنا لوحدي وهي لوحدها ناخد بحس وونس بعض أحسن لينا بكتير. فضل معتصم باصصلهُ لثوانٍ وهو مغمض عينيه بهدوء.

ودي بتبقى حركة معتصم قبل ما يقوم يعجن اللي قدامهُ. رجع طبطب عليه تاني وقال بهدوء ما قبل العاصفة: _قوم يا عم حسين يلا أتكل علي الله، وإن شاء الله طلبك مرفوض إرتاحت كدا؟ إتكلم عم حسين بطريقة قمص وقال: = ليه يعني ناقصني إي عشان ترفضني، وبعدين مش لما تاخد رأي العروسة الأول؟ خلص أخر جملة وهو بيبص لحماتي ومبتسم جدًا. حماتي راحت شهقت بدلع وسِنة إعتراض وودت وشها الناحية التانية.

وأنا لولا معتصم هيقوم يعجنني أنا شخصيًا او صدر مني ضحكة مكنتش مسكت نفسي بالشكل دا. قام معتصم وقف ووقف عم حسين ومسكهُ من دراعهُ وهو ماشي ناحية الباب وماسك راسهُ بالإيد التانية وبيقول بتعب: _هبقى اسألها حاضر ياعم حسين شوف بس إنت رايح فين دلوقتي عشان والله تعبان وفيا اللي مكفيني ولا مؤاخذة يعني مع إحترامي مش عايز أمد إيدي عليك إنت راجل كبير. بعد ما وقفوا على الباب رد عليه عم حسين وقال:

= إتكلم معايا بأدب بقى أنا في مقام والدك، وهستنى رأي العروسة متتأخرش عليا. عض معتصم على شفتهُ بغضب وكان هيمد إيدهُ عليه فعلًا وهو بيقول: _والدي! مسكتهُ من دراعهُ وقولت لعم حسين بإبتسامة: _إنت صح يا عم حسين حاضر مش هنتقل عليك وهنرد على طول. مشي بعد شوية كلام مفهمناش منهُ حاجة بس هو عصب معتصم أكتر. دخلنا وقفلنا الباب وأنا الحقيقة مانعة ضحكتي بس الإبتسامة الواسعة على وشي مش قادرة أتحكم فيها. أول ما دخلنا

بصلي وقال بتساؤل وغضب: _إنتِ بتضحكي على إي؟ بصيتلهُ وأنا لسة الإبتسامة من الودن للودن وقولت: _مبضحكش والله بس مش قادرة أتحكم في عضلات وشي دلوقتي. بصلي بغضب وودا وشهُ الناحية التانية. بالنسبة لعنينا لما جات على حماتي اللي قامت وهي مبتسمة وفضلت تعدل في الطرحة وتقول بينها وبين نفسها: _حاسة لفة الطرحة دي قدمت محتاجة أغيرها للفة طرحة جديدة كدا وحلوة. إتكلم معتصم وهو بياخد نفسهُ بالعافية عشان يهدي نفسهُ وقال:

_إنتِ بتعملي إي إنتِ كمان يا أمي؟ بصتلنا بخضة وقالت وهي ماشية ناحية الباب: _هعمل إي يعني يا أخويا بلف الطرحة، إوعوا كدا وسعولي خلوني أنزل شقتي. وسعلها معتصم وقال بشك وتحذير: _أنا شوية وهنزلك ها، ألاقيكِ في شقتك ومتفتحيش لحد غيري. بصيتلهُ حماتي وقالت بإنفعال طفيف مصتنع: _إنت هتربيني يا واد إنت ولا إي، إوعى كدا وسعولي كتكم القرف الواحد يخلف ويربي ويكبر وفي الأخر يكبروا عليه.

خلصت كلامها ونزلت وقفلنا الباب ومعتصم قعد ورجع راسهُ لورا. بتعب من كتر المشاكل والأحداث اللي حصلت طول اليوم. قعدت جنبهُ وأنا خلاص إنفجرت في الضحك ولحد كدا خلاص مش قادرة أتحكم في نفسي. فتح عينيه وبصلي بجنب عينهُ بغضب وبعدين قال بعصبية: _بتضحكي على إي يا ورد؟ رديت عليه وأنا فطسانة من الضحك وقولت: _طب والله بتكلم بجد طب ما توافق وجوزهم لبعض أهو على الأقل حماتي متبقاش مركزة معانا أوي ويبقى في حد تاني مالي حياتها.

مسكني من رقبتي وكأنهُ هيخنقني وقال بتحذير: _بقولك إي أنا مصدع مش عايز إستظراف قومي من وشي إنتِ كمان. بعد إيديه وأنا كنت هتخنق بجد، فضلت أكح وقولت وأنا قايمة بضربهُ وبجري: _ياغبي يا متخلف كنت هتموتني، هعديهالك الكرة دي بس المرة الجاية هقتلك. سيبتهُ وجريت ناحية المطبخ. شوفتهُ وهو بيضحك عليا قبل ما يحط وشهُ بين إيديه وإبتسمت الحقيقة. عملت قهوة ليا أنا وهو وطلعتهالهُ بصلي وهو حاطط إيديه على وشهُ وقال

وهو بيبصلي ويبص للقهوة: _أنا قولتلك إعملي حاجة، أنا عايز أدخل أنام أصلًا؟! إتكلمت وأنا بقعد جنبهُ وفي إيدي كتاب جديد وقولت: _حسيت إنك عايزها عشان المهرجانات اللي حصلت النهاردا، بس سيبك إحنا عيشنا قصة فنتازيا إنما إي، أورجانيك. بصلي وضحك بتعب وقال: _إحنا بقالنا كام يوم في قصة خيالية متتصدقش بربع جنيه حتى! إتنهدت وقولت بإبتسامة: _يلا مش مشكلة الحمدلله ربنا عداها على خير.

فضلنا نتكلم شوية في حاجات عادية ونهزر عشان بحاول أخرجهُ برا المود اللي هو فيه. بعد شوية وقت حماتي رنت عليا. كان معتصم قاعد بيتفرج على التليفزيون. إبتسمت عشان إفتكرت اللي حصل وأنا بمنع نفسي أضحك،رديت وقولت: _أيوا يا قلبي؟ بصلي معتصم وقال بتساؤل: _بتكلمي مين؟ رديت عليه وقولت: _مامتك. بص تاني ناحية التليفزيون. ردت عليا وقالت: _بقولك إي إنزليلي دلوقتي عايزاكي. إتكلمت بتساؤل وقولت: _ليه في حاجة ولا إي؟

بصلي معتصم بإهتمام وهو بيسألني براسهُ. ردت عليا وقالت: _لأ مفيش حاجة عايزة اسألك على حاجة بس، إنزلي يلا. _خلاص حاضر نازلالك دلوقتي. ققلت معاها ومعتصم لسة باصص ناحيتي. إتكلم بتساؤل وقال: _خير في إي، عايزاكِ في إي؟ رديت عليه وقولت وأنا بقوم: _لأ مفيش عايزة تسألني على حاجة بنات، هنزلها وطالعة. بصلي بشك وقال بتساؤل وتريقة: _حاجة بنات! سيبتهُ ونزلت بعد ما لبست الإسدال. فتحتلي الباب وهي مبتسمة وقالت:

_أنا عارفة إنك عايقة شوية فـ عشان كدا قررت اسألك إنتِ على شوية حاجات كدا. دخلتني وهي بتسحبني حرفيًا لأوضة النوم وكملت بتساؤل: _عايزاكِ بقى تعلميني أستخدم الحاجات دي إزاي؟ بصيت ناحية الحاجات اللي بتقول عليها وكانت ميك آب وسكين كير. إبتسمت إبتسامة واسعة وقولت وأنا بغمزلها: _دا ليه دا يا عروسة؟ إتكسفت وقالت وهي محرجة: _يعني عادي عروسة إي وبتاع إي بس، هما عندي من بدري ومش عايزاهم يبوظوا فـ قررت أستخدمهم. قعدت

على السرير وقولت بإبتسامة: _بس أنا عمري ما شوفتك بتحطي مكياچ ولا بتهتمي بالحاجات دي يا حماتي! ردت عليا وقالت بإحراج وإنفعال: _بقولك إي لو مش عايزة تعلميني قولي بس بطلي كلامك دا. إتكلمت بضحك وأنا بقوم وبحضنها: _لأ لأ خلاص هعلمك تعالي. وفضلنا شوية نهزر ونضحك وأنا بحطلها مكياچ بعد ما عملتلها تنضيف بشرة وسكين كير. عدا تقريبًا ساعتين ونص باب الشقة خبط. روحت فتحت وكان معتصم اللي بيسأل بإستغراب:

_في إي يا ورد طولتي كدا ليه إي اللي بيحصل؟ بصيتلهُ بإبتسامة وقولت: _مفيش حاجة، كنا قاعدين قعدة بنات. دخل وهو بيقول بإستغراب وعصبية: _هو إي اللي كل ما أكلمك قعذة بنات حاجات بنات، بنات إي دي أمي يا ورد في إي؟ إبتسمت وسكتت مقدرتش أرد عليه هو كدا كدا كان داخل الأوضة قولت يشوف هو ويتفاجئ لوحدهُ. فعلًا دخل وكانت حماتي قاعدة بتحب في نفسها بالميكاب في المراية وإحنا مشغالين الأغاني وهي بتغني معاها.

إتصدمت أول ما شافتهُ وفضلت بصالهُ ومبلمة شوية. فضل معتصم باصصلها لثوانٍ وقعدين ودا وشهُ الناحية التانية. خرج وقفل الباب وراه وقال بغضب وإنفعال وهو بيكلمني: _يعني دي حركة تعمليها يا ورد يعني، مش تقوليلي إن أمي عندها ضيوف تدخليني كدا على الست! رديت عليه وقولت بضحك: _ضيوف مين؟ رد عليا وقال وهو بيبص يمين وشمال بتدوير: _الست اللي جوا دي، فين أمي بقى دلوقتي؟ رديت عليه بإبتسامة وقولت:

_عروسة المولد اللي جوا دي الحلوة دي تبقى حماتي. رد عليا بعدم إستيعاب وهو مش فاهم تقريبًا اللي بقولهُ وقال: _مين؟