رواية اقدار الفصل الثاني والعشرون 22 - بقلم امي احمد

ملامحهم إلي تدل على وجود مصيبه حفزتها تقوم خلفهم
وتشوف أي نوع من المصائب حملوا لها؟؟؟؟
دخلت خلفهم بخطوات هاديه وقلبها
يدق بقوه ما هي مرتاحه
همست لنفسها «الله يستر »
وقف أبو راكان بوسط الصاله ويحاول يمسك أعصابه وسلط نظره عليها وبنبرة اتهام : وش مهببه من خلفنا ؟!!
طالعته ساره وتكتفت وهي رافعه حاجب بهدوء : نعم ؟!!
ابو ماجد يغلي من عيال عمه كلهم وبانفعال : نعامه ترفسك !
جاوبي على السؤال !
ساره بحده رفعت اصبعها لجهته : للمره الأخيره أقول لك احترم نفسك !
وبعدين انت ما لك كلام عندي
ليه جاي ؟!!
رجاء لا تتدخل !
وطالعت عمها : عندك كلام تكلم
بصريح العبارة بدون هالالغاز!
هز رأسه أبو راكان بقهر : وتتكلمين بقوة عين ؟!!
الشرطه قبل ساعه جايين طالبينك بالاسم !!
فتحت فمها للحظات تستوعب الكلام !
«الشرطه» ؟؟؟؟!!!
ما عملت شيء حتى يطلبونها ؟!!
أبو راكان بغضب وقهر : وش مهببه ؟!
أبو عزام بهدوء : يا ساره إذا في شيء صار معك خبرينا يمكن نقدر نساعدك !
طالعته ساره باستخفاف وبنفسها تردد «يساعدونها»؟؟؟!
ابو راكان زاد غضبه من سكوتها : تكلمي يا
قاطعه دخول عزام وخلفه ابو الوليد إلي استأذن قبل ما يدخل !
أبو الوليد تقدم من أبو راكان لما شاف ملامحه وسحبه لأقرب كنبه : ارتاح يا رجال وكل شيء ينحل بالتفاهم !
أبو راكان وجهه اسود : أي تفاهم ؟!
عزام وجهه ما يبشر بخير : ارتاح يا جدي عرفنا وش القضيه !
طالعته ساره بعدم تصديق
ذول من عقلهم يتكلمون أي قضيه ؟!!!
أبو راكان بخوف بان بصوته : وش القضيه ؟!!
عزام زفر بقهر : شيكات !!
ابو عزام عقد حواجبه باستنكار : شيكات !!!
ابو ماجد طالعها لويطلع بيده يكسرها : ما شاء الله شيكات !
هذي آخرتها !.
إلتفت لأبوه يخفف عنه :هذي حلها بسيط !
غمض عزام عيونه بعجز : بسيط ؟!!
ابو الوليد طالع ساره بقهر : وين صرفتي كل هالفلوس ؟!!
من متى الحريم يوقعون شيكات ؟!!
بس ما أقول إلا العتب إلا على عمك هذا
إلي ترك لك الحبل طالعه نازله لا سائل ولا مسؤول !
أبو راكان مو ناقصه كلام زايد وبنبره تدل على مدى ضيقه : كم المبلغ ؟!!
عزام طالع ابو وليد ويتمنى يتكلم عنه هالمبلغ !
تكلم ابو الوليد بعد ما زفر : حضرتها موقعه شيك يا ابو راكان بمقدار «........»
توجهت الانظار المكذبه لأبو الوليد !
أبو راكان بهمس ضعيف : حسبي الله عليكم يا عيال اخوي !
ابو ماجد بغضب : لو نذبحك ما أحد يلومنا !
من وين تحصلين هالمبلغ الحين ؟!!
وليه توقعين على شيكات من الأصل ؟!!
ساره قلبها رجف من كبر المبلغ ما تدري وش هالسالفه ....تركوها طول هالسنوات والحين جايين يحاسبوها ...وبقوة مزيفه نطقت : ما يخصكم وين صرفتهم !
متى ما طقيت بابكم ساعدوني وقتها
تعال تفلسف !
ما انتظرت منهم جواب وتوجهت لغرفتها
تحت نظرات الدهشه ولسان حالهم يقول
«شين وقوي عين »
**
**
**
**
في بيت ابو راكان
ام راكان بهمس لام وليد بما إنه الموضوع عليه تكتمات من أبو راكان : قلبي قارصني على ابو راكان
لو تشوفينه كيف صار فيه بعد هالسالفه ؟ !!
ام وليد باستنكار : ساره من وين تعرف الرجال حتى توقع على شيك له !
ام راكان بقهر : هذي المشكلة لما تركوها على كيفها وهي بعدها بزر !
انا سمعت إنها موقعه على شيك قبل 5 سنوات
والرجال قبل فتره مات
والحين الورثه يبغون الفلوس !
أما وش علاقتها بالرجال ما أدري ولا أحد مخبرني بشيء !
طلعت روحي حتى عرفت ذي المعلومات
وساره رافضه تتكلم أو تقول وش علاقتها بالرجال
بس محمد يقول من أهل زوجها !!!
والمبلغ محمد تكفل فيه والقضيه محلوله !
بس إلي قاهر ابو راكان آخر عمره ابنة اخوه تكون مطلوبه على قضيه شيكات !
ام وليد مطت شفتها : انا بعد ذي السالفه قلبي مو مرتاح لها
ام راكان هزت كتوفها : نرجع ونقول الله أعلم وش الظروف إلي حكمتها توقع شيك !!!
ام وليد بتأييد : في ذي صادقه الله أعلم وش الظروف إلي صادفتها حتى توصل فيها الحال لهذي الدرجه !!!
أشرت ام راكان بعيونها لأم وليد تسكت لما شافت نوره داخله عليهم
**
**
**
**
جالسه وتناظر للبعيد من الشباك !
تحاول تتذكر هالشيك متى وقعته ؟!!
ما هي قادره تتذكر !!
اكيد خلف بالسالفه !
ما تقدر توصف نذالته !
تنهدت بضيق
حملت محمد فوق طاقته
وش دخله يدفع هالمبلغ ؟!!
ما تدري وش يحمل لها خلف مصائب
فوق المصائب إلي عندها !
متى تعيش باستقرار وبدون مخاوف !
كل يوم يضيق صدرها بزياده !
لمن تشكي وتفضفض إلي بقلبها !
تسلسلت دمعة قهر على خدها
سرعان ما مسحتها لما دخل عليها عمار
متجهم !
حمل كرسي وتوجه لجهة الشباك وجلس مقابل لها وبعيونه اسئلة كثيره !!
ما ناظرته ولا كأنه موجود عيونها للخارج تبغى تطلع من قوقعة الحقيقه !!
عمار بنبره فيها حده مهما حاول تكون رقيقه : ساره !
تابع كلامه متجاهل تطنيشها له : ساره لمتى هالحال ؟!!
أنا ولد أخوك لكن أحس إني بعيد عنك كثير !
انا ما اعرف شيء عنك وعن حياتك الماضية !
أحس نفسي مثل الأطرش بالزفه !
أبغى أعرف وش صار بعد طلاقك من خالي عبدالله !
أبغى أعرف كيف تزوجتي المجنون ؟!!
أبغى أعرف عمي نادر كيف مات ؟!!
زوجته وين راحت!
خلف وينه مختفي من سنوات!
وش إلي حملك توقعين شيك!!
والسؤال الأهم
التوأم مين أمهم وأبوهم؟؟؟؟
تناظر وتستمع لاسئلته المتكرره بملل
بس
آخر سؤال
حست جسدها تشنج منه !!
«التوأم مين أمهم ؟!! »
وبملامح باهته ناظرته : وش تقصد ؟!!
عمار يحاول يمسك أعصابه : تراها ما هي داخله عقلي إنك متزوجه وعندك عيال !
شوفي البنات ما يشبهونك أبدا !
جاوبيني على سؤال واحد وريح قلبي !
التوأم بنات عمي نادر ؟؟!
زفرت بضيق ورجعت تناظر من الشباك : ليه تتوقع إنهم بنات نادر ؟؟!
وليه مو مصدق إنه التوأم بناتي ؟!!
مشكلتكم تذبحون القتيل وتمشون بجنازته !!
أبغى أريحك التوأم ما هم بنات نادر !
قاطعها عمار : بس زوجته كانت حامل !،
ساره على نفس الحال : ما اكتمل حملها ونزلت !
سلط نظره عليها يبغى يعرف شيء من الحقيقه : أجل بنات مين ؟!
طالعته بحده : التوأم بنا
قاطعها دخول أم محمد تردح : انت هنا وأنا انتظرك تأخذني للسوق !!!
طالعها عمار بقهر ما هو وقتها الحين وبضجر رد : خلاص الحين ألحقك اسبقيني للسياره!
ام محمد برفض : قدامي اشوف
ما رح اطلع إلا وانت معي !!!
وقف بضجر : هذا أنا جيت !
تنهدت بعد خروجه ورجعت تطالع من الشباك !
ابتسمت بألم وهي تشوف التوأم
يلعبون بالحديقه !
**
**
**
**
بالصاله
عائشه بابتسامة : تفضل عمي !
ابو ماجد للحين متضايق من سالفة ساره : يزيد فضلك يا ابنتي !
ماجد وهو رافع خشومه وهو يدخن : قومي جيبي لي مويه !
طالعته عائشه بهدوء عكس النار إلي بداخلها : ان شاء الله !
دخلت للمطبخ وتحس نفسها تبغى تبكي
تحسه يحاول ينرفزها ما تدري كم رح تصبر على أسلوبه هذا !!
طلعت من المطبخ وصوتهم مرتفع : ما في أي ظرف يجبرها توقع على شيكات !!!
ماجد بدفاع : يا يبه البنت متزوجه مجنون وأخوها خلف ما تدري وش الضغط إلي واجهته ذاك الوقت !!
انت ما تشوف كيف تحس الانكسار بعيونها ؟!!
عائشه بنفسهابسخريه «يقبرني شو حنون !!
يقرأ لغة العيون ما شاء الله عليه »
تابع ماجد كلامه : احسكم تعاملونها وكأنها عجوز !
تراها صغيره وما تحسن التصرفات!!
تدري يبه إنها من عمر عائشه زوجتي !!
جيلها دوبهم يدرسون ويتزوجون
وهي تحمل همها وهم زوجها المجنون وهم بناتها !
اتقوا الله باليتيمه يكفيها الظلم إلي حصلته منكم!
وجايين تحاسبونها بعد ما طردتوها وخذلتوها !
بدل ما تمد يد المساعده لكم وتطلبها منكم مدتها لذاك الرجال !!!
مشكلتنا نتعامل مع الأمور بمثاليه زايده !
الواحد قبل ما يحكم على شيء المفروض
يحط نفسه مكان هالشخص وبعدها يحكم !!!
لا تضغطوا عليها ولا تحاسبوها على امور انتم كنتم سبب فيها !!!
واستأذن وطلع من البيت مخنوق على حال ساره
صحيح بالماضي كان يضايقها بالكلام مع سلمان
بس كان كله مزح !
يضحك على ابتسامتها العفويه
والبريئة
عكس الحين ما في غير ملامح كسرها الزمن
وانمحت الابتسامه من ملامحها !
ملامح اثقلتها الهموم والأحزان !
لو يطلع بيده إلا يصفق عمه عبدالله كفوف يطلع حرته فيه
لأنه السبب بكل تعاسة «ساره»
**
**
*

مرت ايام العطله بسرعه بنفس الروتين !
وبدأت أيام الدراسه
دخلت القاعه بهدوء وجلست بالمقاعد الأخيرة !
تكتفت وارخت جسدها على المقعد !
وتناظر دخول البنات للقاعه
بأشكال وألوان بما انه اليوم الأول للدوام !
لفت نظرها البنت إلي قدامها تناظر بالمرايه وتضبط أمورها !
ما تذكر متى ناظرت نفسها بالمرآة !!!
تحسست نظارتها تعدلها ورفعت الجوال تناظر نفسها على شاشته !
حاست بوزها الرؤيه ما هي واضحه !
عدلت جلستها وإلتفتت للبنت إلي جلست جنبها !
تلاقت عيونهم
وسرعان ما صدت كل وحده للجهة الثانيه بقرف!
ساره بأمر : يا كثر المقاعد الفارغه
تفضلي هناك !
عائشه بتمثيل تشيل كتبها وتناظر المقعد بدقه : ما هو مكتوب عليه اسمك !
غريبه وأنا على بالي المقاعد مسجله باسمك !
لو مكانك اروح وأشتكي عليهم ما سجلوا هذا المقعد على اسمك !
ساره عفست ملامحها : يا سخفك !
ترى كلامي واضح !
إذا ما تفهمين عربي
قاطعتها عائشه وهي تعدل كتبها وتحط رجل على رجل : الظاهر إني ما أفهم عربي !
قولي وش تبغين بالفرنسي يمكن أفهم عليك !
وبحده تابعت عائشه كلامها: مو عاجبك غيري مكانك !
أدخل القاعه وأجلس بالكرسي إلي يعجبني !
وصدت عنها وهي عافسه ملامحها !!
تنهدت ساره وشيء بداخلها أجبرها
تسكت !
بالرغم من قربها بالمنزل من بيت عائشه ومع ذلك ما شافتها كثير !
من بعد سالفة الشيكات انغلقت على نفسها أكثر !!
عائشه صدت للجهة الثانيه وبداخلها ضيق
من إلي جالسه جنبها !
هي إلي مخربه حياتها !
أحياناً يجتاحها شعور لمواجهة أم سوار بكلام ماجد وعن الحب إلي بينهم !
وتنصحها تبتعد عن ماجد وعن حياتها البائسه !
بالرغم من تقبلها من الحياه مع ماجد والرضى بالقدر !
لكن ماجد تحسه للحين ما هو متقبلها
ويتجاهل وجودها تماما !!
يطلع من الصبح للدوام بعد الدوام يجلس مع أمه شوي او بيت جده وبعدها يطلع مع اصحابه
وما يرجع الا وقت متأخر !
متأكده للحين حاقد عليها ويعاقب فيها
بأمور مرت وانطوت مع الأيام !!!!
ليه ما هو راضي ينسى كله علشان حبيبة القلب !!!
تحس من حياتها مع اهل ماجد
اخذت لمحه عن مشاعرهم تجاه أم سوار !
اغلبهم ما يحبونها او بالاحرى
خالات ماجد ما يحبونها !
أما أهل أبو راكان يطغى على شعورهم عدم الرضى عن تصرفاتها !
قطعت أفكارها لما دخل الدكتور بثقه !!
ساره رفعت نظرها للدكتور
وسرعان ما إلتفتت لعائشه
وبصوت واحد نطقت كل وحده بهمس «سعود»
أبعدت عائشه نظرها بعد التقت نظراتهم !
تنهدت ساره ماتدري سبب كره عائشه لها
وبسرعه نزلت النظاره وتلثمت بهدوء
ومسكت القلم ترسم بملل على الدفتر وهي تسمع سعود يعرف نفسه !
عائشه طالعتها باستغراب لحركتها و تذكرت على حسب معلوماتها من أم محمد إنها جاهله وما تدرس وبهمس سألتها : انت تدرسين هنا ؟؟!!
ساره طالعتها باستخفاف : لا أنظف هنا!..ا جالسه انتظركم تطلعون حتى أنظف القاعه
وصدت عنها !!
عائشه بفطنه سألت : ما أحد يدري إنك تدرسين هنا صح ؟؟!
كذا يمكن يكشف سرك سعود ويعرفك !!
ساره بلامبالاه: ما يهمني أحد ولا أسأل عن أحد !!
لا تحشري أنفك مرة ثانيه !
انقهرت عائشه من ردها : دام إنك مو مهتمه ليه تلثمتي ؟!!
ساره وهي تمط الكلام بهمس : ما يخصك !!
عائشه بانفعال : جعلهم يكشفونك
ويطردونك من الجامعه من شوشتك !
دفنت وجهها ساره بالمقعد وردت بصوت هامس : سخيفه !!
_ رجاء المقاعد الخلفيه ما نبغى صوت !
وإلي جاي ينام هنا نقول له مع السلامه
تراه ما هو مكان للنوم !!
كشت ساره عليه بطريقه عفويه بدون ما يشوفها وبهمس : مالت عليك !!
رفعت نفسها عن المقعد وهي تطالع عائشه إلي كاتمه ضحكتها : على وش تضحكين ياطرمه !
تذكرت ساره إنها بالمحاضره وسرعان ما إلتفتت على سعود إلي أعطاها نظره ناريه
خلتها تبلع ريقها وتنكتم لآخر المحاضره !
انتهت المحاضره وبدأت القاعه تفضى من الطلاب !
وساره على جلستها وجنبها عائشه إلي رن جوالها !
ردت بهدوء : هلا ماما ....الحمد لله تمام ...كيفك وكيف بابا ؟!! .... إن شاء الله قريب ازوركم ..... اشوف ماجد وأرد لك خبر ! .....ان شاء الله ....ايه عندي محاضره .....مع السلامه !!
قفلت الخط والدموع تلمع بعيونها
من لما تزوجت مره وحده زارتهم !!
حتى عن أهلها مانعها وساكته تشوف اخرتها معه !
استغربت ساره الدموع إلي لمعت بعيون عائشه !
ترجمتها ساره دموع شوق لأهلها !
تنهدت ساره بألم وش تقول هي اهلها ما شافتهم !
على الاقل عائشه تزورهم وتكلمهم بالجوال !
اما هي ؟!!!
رجعت دفنت وجهها على المقعد بضيق !!

***
***
***
***
انتهت محاضراتها وطلعت من الجامعه ورجعت على البيت بعد ما أخذت التوأم !!
دخلت من البوابه الخارجيه وعقلها سارح'« بعائشه »
كيف جمعهم الزمن مره ثانيه ؟؟!!
لكن بطريقه وحال مختلف !!!!
تتمنى ترجع طفله همها الوحيد
«تلعب مع عائشة»
استغفرت بهمس على صوت ابو الوليد المنتقد : من طلعتها لغيبتها لا سائل ولا مسؤول !
طالعته ساره وهو جالس بالحديقه الأماميه للبيت وبيده كتاب وقدامه كوب من القهوة قررت تطنشه وما ترد عليه !
اردف كلامه بنغزه : عسى مجنونك بخير ؟!!
ساره ببرود : طيب ويسلم عليك !!
ابو الوليد هز راسه بانتقاد : يا حيف على الرجال إلي حولك ما هم قادرين يوقفون بوجهك !
طالعه نازله بالبنات استعراض !
لو لي سلطه عليك
قاطعته ساره بسخريه: إذا جاء هاليوم لا تقصر !!
دخلت بهدوء وهي تشوف ام عمار بالصاله مع عمار !
ردت السلام بهمس وناويه تروح لغرفتها !.
وقفها صوت عمار : ساره تعالي !
طالعته بضجر رأسها يلف من دوام الجامعه وما لها خلق لأحد !!
تقدمت بضجر : وش تبغى !
أشر لها تجلس !
طالعت التوأم : سوار خذي أختك وعلى الغرفه الحين ألحقكم !
وبعدها جلست وطالعت عمار : نعم ؟!
عمار بهدوء : الله ينعم عليك !
نهاية الأسبوع طالعين تغيير جو !
رفعت ساره حاجب : مع مين،؟!!
عمار : بيت جدي أبو راكان وبيت خالي أبو الوليد !
وش رأيك تروحين معنا ؟!!
ساره ردت بحزم مباشره: أكيد لا !
ام عمار بهدوء : خلي البنات يطلعون أحسن من حشرة البيت !
تأملتها ساره للحين قلبها متحامل عليها ومستحيل تسامحها ...كانت تدمرت حياتها وتجرعت المر بسببها وهي وخلف ... نطقت بكره دفين من اعماقها: حشرة البيت احسن من مقابلة بعض الوجوه
قاطعها عمار قبل ما تزيد الحكي : ساره ما له داعي هالكلام !
ام عمار رفعت حاجب: لا تتكلمي كذا فوق ما تغاضينا عن أفعالك الماضيه
وفتحنا صفحه جديده معك
تكلمينا كذا ؟!!
ساره وهي تناظرها بحده : أي صفحات تتكلمين عنها ؟!!
أنا مستحيل أفتح صفحه جديده مع أمثالكم !
ام عمار بانفعال : لأنك حقوده !
ساره بحده :ايه حقوده وقلبي اسود مثل هذا !
واشرت على عبايتها !
ام عمار بانفعال : دامه قلبك أسود وحاقد ليه ترجعين تدخلين بيتنا ؟!
ساره ردت بكل صراحه : لولا محمد وعمار ما قبلت هالصلح الفاشل !
ودخلت بيتكم لأنكم ما تعنون لي شيء ولا تهموني !
تتكلمون عن الأخلاق والطيبه وقلوبكم سوداء حقوده !
أبوك اكبر منافق بالعالم
صرخ عليها عمار بانفعال من لسانها الطويل: ساره !
إلزمي حدودك وجدي ما تتكلمين عليه بالشينه !
ام عمار بقهر : خلها تتكلم مثل ما تبغى !
هذا جزاء إلي مد لها يده بطفولتها واحتضنها !
غدرت فيه وعضت يده إلي أحسن لها فيها !
ساره بسخريه : إحسان ؟!!
اي إحسان واحتضان وما قدر يحميني من خالتك وخلف وأخوك !
دمرتم مستقبلي وحياتي !
أعيش بالكون نكره ما لي أهل وعزوه !
استكثرتم تكلموني عن أبوي،!
ولا عرفتموني بأهل أمي !
ما أعرف شيء عنهم
وكأني «لقيطه»
أي معامله تتكلمين عنها ؟!
متى وقف بوجه خالتي وقال لها هذي ابنة أخوي ابعدي شرك عنها ؟!
منعتني من الدراسه ما شفت أحد وقف معي أكمل تعليمي غصب عن خالتي !
أي إحسان تتكلمين عنه ؟!!
طلقتوني بدون ذنب وحملتوني
ذنب خلف !
ولبستوني بسالفه أوراق ما أدري وش هي ؟!
وش دخلها بالسالفه للحين ما أدري ؟!
حطيتوا الأوراق حجه حتى تتخلصوا مني للأبد !
وكأنكم تنتظرون اللحظة الي تتخلصون مني!!
إذا خلف غلط عليك وأصابك الضرر منه !
أنا وش ذنبي أتحمل أخطاء خلف؟!!!
يكفي إلي شفته من خلف !
ارحمووووووني !!
واتقوووووا شري !
خلاااص لأني اكتفيت منكم كلكم ...وحسبي الله على كل من ظلمني!!
وتركتهم وتوجهت لغرفتها
تحت أنظار عمار وأمه الي يناظروها بسكون!!!
**
**
**
**
دخلت الغرفه ورمت نفسها على السرير
وسمحت لدموعها بالنزول لعلها تغسل قهر السنين إلي بقلبها !!
قطعت سوار لعبها وتوجهت لساره بفزع
وخلفها حور !
سوار والدموع تنذر بالنزول : ماما ليه تبكي ؟!!
حور تبكي على بكاء ساره : ماما زعلانه مني !
ماما أنا أحبك وما رح أعمل أخطاء
صح سوار !
سوار هزت رأسها بطفوله
وبدأت تنزل دموعها : ماما مين ضربك ؟!!
زفرت ساره بضيق وسوار تمسح الدموع عن خدودها : ماما لا تبكي !!!!
ناظرت ساره التوأم من حولها بوجع والدموع رافضه التوقف !
يتقطع قلبها لما تشوف التوأم !!
كل حياتها مخربطه !!
تحس بالحمل يثقل على اكتافها !!
عضت على شفتها بقهر وعجز
وحال لسانها يقول
«وينك يا خلف »
**
**
**
جهزت الاكل له بهدوء : تفضل !
ماجد بدأ بالاكل بنفس الهدوء !
تنهدت عائشه قبل ما تتكلم : ماجد!
رفع حاجب وطالعها قبل ما يحط اللقمه بحلقه : نعم ؟!
عائشه بهدوء : امي اليوم اتصلت علشان
قاطعها بحزم : روحه لأهلك احلمي !
قاطعته بانفعال خلاص أكثر من كذا ما تتحمله : ما هو على كيفك !
ماجد ببرود : إذا طلعت ما ترجعين !
عائشه بقهر : هذا مناي اطلع وما ارجع !
لا تفكر ميته عليك !
تراك واقف لي بالزور هنا !
_واشرت على بلعومها _ ماني قادره اابلعك ولا اطلعك !
هز رأسه بقهر : ايوه كذا اطلعي على حقيقتك ولسانك الطويل !
ترى التمثيل مو لايق عليك !
قاطعته بغضب : أبغى أزور أهلي !
ماجد ماسكها من اليد إلي توجعها مستحيل تطلع من البيت بدون اذنه ..ما ينكر إلتمس جمال هالخلق فيها ما تطلع بدون اذنه
بس هو رح يطلع الأيام الماضيه من عيونها وببرود نطق : أنا قلت لا !
عائشه قبضت على يدها بقهر وبهمس خرج عن ارادتها وصل لمسامعه : اكرهك
رد ماجد باستمتاع وهو يشوف القهر بملامحها
ضرب عصفورين بحجر قهر الأب وابنته !!
ابو سعود ازعجه وهو يطلب زياره عائشه لهم !
شعور جميل تشوف الأشخاص إلي تكرهم يغلون من القهر : شعور الكره متبادل بيننا يا حياتي !
وقفت بغضب بعد ما ضربت الطاوله بكل قهرها : جعل حياتك تتحول لجحيم !!
واليوم طالعه لأهلي غصب عنك وتشوف !
وتركته وهي تغلي من صدى ضحكاته بالمطبخ !
***
**
***
***

أبو سعود بغضب : مو على كيفه مانع البنت من زيارتنا !
ام سعود بقهر : مو هذا إلي صممت إلا تزوجه لعائشه !
قاطعها بغضب مو ناقصها : اتركي اللوم عنك تراها واصله هنا !
وأشر على أنفه !
الحين اراويه هالزفته !
طلع الجوال من جيبه وقرر يتصل بأبو ماجد يحل هالمهزله !!
نهى مطت شفتها بغيره وهمست لأسماء : سبحان الله لو نغيب أشهر ما سأل عني ولا عنك !
أسماء بنفس الغيره :« العز للرز والبرغل شنق حاله »
رجعتي عليه مكسره من الحمار زوجك
ورجعك معه بنفس اليوم ولا اهتم!
وعائشه لأنها ما زارته قام الدنيا واقعدها !
نهى: صرت اكره عائشه بسببه !
الحين تلاقينها مولعه من هالحصار
تراها مدلعه وكل شيء تبغاه تناله !
أسماء بشماته : نفسي أشوف رايات الأخلاق إلي صدعت رأسي فيها طبقتها وإلا رمتها !
نهى مطت  شفتها بقرف: تراها تحب الفلسفه الزايده !!
**
**
**
دخل ماجدالبيت وابتسم بانتصار لما شافها جالسه مع أمه بالصاله
جلس جنب عائشه بعد السلام وبهمس استفزازي : أشوفك هنا !!
وقلدها بصوتها :«غصب عنك»
اخذت نفس وطالعت ام ماجد إلي تتكلم بالجوال !
وبعدها طالعته لثواني ووقفت وقبل ما تمشي مسك يدها بابتسامه نصر : وين ؟!
ردت وهي ماسكه نفسها : اشرب مويه !
وإلا ذي تحتاج إذن ؟!
ضحك باستفزاز وبعدها تكلم : امممم أفكر اضيفها للقائمه !
نفضت يدها وتوجهت للمطبخ تشرب مويه لعلها تطفئ النار إلي بداخلها !
بعدها طلعت ورجعت للصاله لما شافت ابو ماجد جالس معهم !
توجهت وجلست بعيد عن ماجد وتحاول تكون طبيعيه !
ابو ماجد يكلم ماجد : انت مانع عائشه عن أهلها ؟!!
ماجد ببراءه : أنا ؟!!
ابو ماجد هز رأسه بتأكيد : ايه انت أبو سعود دوبه مكلمني ويشتكي منك !
ماجد ببراءه: يتصل فيني أرسل له ابنته وأنا بوسط دوامي
وحضرتها بدوامها !!
وبعدين ماسكني كل يوم يبغى ابنته تزوره !
تراني متزوج وأبغى لما أرجع من الدوام ألقى زوجتي بالبيت !
دام ما يقدر يبعد عنها ليه يزوجها !
كان حطها بعلبة وخللها أحسن له ولنا !
ام ماجد بانتقاد : ماجد وش هالكلام ؟!!!
ماجد بانفعال : جنني أبغى البنت !
روحي لاهلك وفكينا من هالسالفه !
ابو ماجد أعطاه نظره قويه : أنا الحين أسأل انت مانعها من أهلها ؟!
ماجد طالع عائشه: تبغين تروحين لأهلك روحي !
وأعطاها نظره الرفض وعدم الرضى !
عائشه طالعت عمها بخبث : إذا ماجد يقبل الحين أزور أهلي وأنام عندهم ليله ما عندي مانع !
ابو ماجد بثقه : اكيد ما رح يرفض ماجد وبأمر !
قوم يا ماجد ودي زوجتك لأهلها !
ماجد احتقن وجهه من الغضب مستحيل تمشي كلمتها عليه : بس
الحين تأخر الوقت
ابو ماجد : تراهم بيت أهلها وما يهم أي ساعه تروح لهم !!
قوم ودي زوجتك لأهلها !!
ماجد بطاعه وما قدر يرفض طلب أبوه: إن شاء الله يبه!!
وناظر عائشه ؛ انتظرك
طالعته عائشه بانتصار وبعدها إلتفتت لعمها : ما أقدر اليوم ازورهم عندي تحضير ومضغوطه بالدراسة !
مره ثانيه إن شاء الله !
ناظرت ماجد إلي ارتاحت ملامحه
و بداخلها وجع مستحيل تطلع وزوجها مو راضي عنها !
ما تدري وش نهاية الطريق مع ماجد !!!

***
***
****
دخلت المحاضرة وجلست جنب عائشه في شيء غصب عنها يجذبها تجلس جنبها !
طالعتها عائشه وهي رافعه حاجب بمعنى "خير"
شخصية ساره بالنسبه لها غريبه
ما تركب بعقلها ...ساعه متغطيه وساعه كاشفة ....وكعادتها ما تعرف تسكت إذا ما عجبها الشيء.. نطقت  بانتقاد: تراها ما تركب أبدا دايره بالأسواق ومن حاره لحاره كاشفه
وبالجامعه تتغطين ؟!
تراها ما تركب هنا !
وأشرت على عقلها !
حطت كتبها ساره وناظرتها وهي عافسه ملامحها : يا شين اللقافه !
عائشه باستغراب : وش تحسين فيه
قاطعتها ساره بضجر :احس بثقل طينتك !
وش دخلك فيني ؟!!
تنهدت عائشه وناظرت للأمام : طالعه معهم بالرحله ؟!!
ساره طالعتها : اكيد لا !!
وانت ؟!!
عائشه بصراحه أوجعت ساره : إذا كنت موجوده بالرحله ما رح أروح !!!
ساره حست بضيق من كلامها ..ما تدري  ليه تكرهها ...وبروح خاويه نطقت: ليش ؟!!
عائشه إلتفتت لها وهي تتربع على المقعد : تبغين الصحيح وإلا ابن عمه ؟!!
ساره طالعتها وهي تحاول تكون طبيعيه: اكيد الصحيح !
وش أبغى بابن عمه !!
عائشه أخذت نفس : بصراحه بس لا تزعلين
تراني ما أطيقك ولا تدخلين عقلي !
يعني بين قوسين «ما أحبك »
ساره بهتت ملامحها وحست تكسر قلبها من كلامها «ما أحبك» وبصوت محبط خافت : وش السبب ؟!!
زفرت عائشه بضيق وندمت كذا تجرح مشاعرها
مدت يدها ونزلت نقاب ساره تشوف ملامحها : زعلتي ؟!!
ساره ابتسمت بألم وغطت وجهها : متعوده على هذا الشعور من حولي !
ما وقفت الدنيا عليك !
وما يهمني تحبيني أو لا ؟!
المهم اني أح
قطعت كلامها ساره بزفره  وما كملت كلمتها ...ورجعت لنفس السؤال : ليه تكرهيني ؟!!
والحين قاعده تكلميني ؟!!
متناقضه !
ابتسمت عائشه وغمزت لها : مثلك بالضبط !
انت تكرهيني وتكلميني !
وباستغراب سألت عائشة : ليه أهلك ما يحبونك حسب كلامك ؟
علاقتكم غريبه ؟!
الحين أم عزام أختك ؟!!
وأم عمار كانت زوجة أخوك !
ساره طالعتها وهي رافعه حاجب : علامك مستغربه ؟!!
عائشه عقدت حواجبها باستغراب: مستغربه لأنك صغيره وذول كبار يعني عيال إخوانك وأخواتك أكبر منك !
عكسي تماما عيال أخواتي بعدهم صغار !
ذكرتيني بوحده كانت صغيره وإخوانها كبار مثل كذا !
كنا بالابتدائي وعيال إخوانها كبار !
حست ساره بدقات قلبها تدق بقوه وطالعت عائشه بصدمه !
معقول تتذكرها للحين ؟!!
تابعت عائشه كلامها بدون انتباه لنظرات ساره : ذيك البنت مسكينه أمها وأبوها ميتين وإخوانها يطقونها
وهي غبيه وهبله !
تظن الناس طيبه وعلى نياتها !!
سألت ساره بحذر،: للحين تذكرين صديقه بالابتدائيه ؟!
طالعتها عائشه : يمكن أذكرها لأنها كانت تسكن جنبنا !
وكل يوم عندنا !
ونلعب مع بعض !
كان اسمها
سكتت لما دخل الدكتور !
طالعت ساره الدكتور بقهر مو وقته الحين !
ورجعت تسأل عائشه وذبحها الفضول : بعدكم للحين صديقات ؟!!
عائشه اشرت على الدكتور الحين يشوفهم!
مطت شفتها ساره وأشرت على الدفتر تكتب الإجابة !
مسكت عائشه القلم وفتحت اخر صفحه وكتبت بخط صغير....
غمضت ساره عيونها لثواني متحمسه تشوف ردها معقول عائشه للحين تتذكرها ؟!
أخذت نفس عميق قبل ما تشوف وش كتبت لها عائشه على الدفتر
اخذت الدفتر وقرأت بصدمه:« انكتمي أبغى اركز بالمحاضره »
حولت نظرها لعائشة تطالع للأمام يقال إنها مركزه بالمحاضره !
وبهمس« وقحه »
إلتفتت عائشه وهي كاتمه الضحكه وباين من عيونها !
ساره بقهر ونست نفسها إنها بالمحاضره : اراويك يا بنت النفيس
قاطعها صوت سعود الصارم : آخر بنتين بالمقاعد الخلفيه تفضلوا خارج المحاضرة !!!
وأشر عليهم !!
طالعت عائشه وساره بسعود وأشروا على أنفسهم بطريقه غبيه !
سعود بنبره حازمه يتخللها الغضب : ما أحد غيركم !
بسرعه براااا !
عائشه باعتراض مؤدب : أنا ما تكلمت يا دكتور !
سعود بحزم : كلمه وحده وما رح أكررها «برا»
وقفت ساره بقوه و بصوت ساخر مضحك : طالعين بس لا تنسى تحطنا حضور ...يا حضرة الدكتور !!
امتزجت القاعه بضحكات متنوعة من صوتها وطريقة نطقها للكلام ،!
نظره من سعود وزعها على القاعه أعادت السكون للمكان !
اشر لها بيده تطلع !
طلعوا وساره تتكلم بصوت منخفض ؛ امشي ليطق له عرق ويموت علينا !
ابتسمت إحدى الطالبات على تعليقها
كانت قريبه منها !
سرعان ما أشر لها سعود بحزم تطلع خلفهم بدون نقاش !
أول ما طلعوا خارج القاعه تكلمت عائشه بقهر : كله منك !
ساره بروقان : يا شيخه انبسطي حضور بدون ما نحضر المحاضره !
عائشه مطت شفتها : إذا تظنين إني جايه هنا سياحه وسفر فانت غلطانه !
امشي نروح نجلس بمكان فاضي لوقت المحاضره الجايه !
ساره هزت رأسها وتوجهت معها لمكان منعزل
جلست ساره مقابل لها ونزلت نقابها : افففف حررررر
عائشه تعبث بحقيبتها : كل البنات ما يتكلمون بالمحاضره هذي إلا حضرتك فاتحه إذاعه اف ام !!
رن جوال ساره ردت بهدوء ؛ هلا .. أعطيني إياها ..هلا ماما ......لما ارجع يصير خير .....سوار قلت لك الحين لا ....مع السلامه !
طالعتها عائشه : هذي ابنتك !
هزت ساره رأسها بدون إجابه !
عائشه بحالميه : حلو يكون عندك أطفال وتربيهم مثل ماتبغين !
بس بناتك كبار غريب ما حملتي مره ثانيه !
انصبغ وجه ساره وصار بالألوان !
تابعت عائشه حديثها بتساؤل: صحيح إنه زوجك مريض نفسي ؟!!
ساره ما تحب هالسيره: قفلي على الموضوع !
عائشه بهدوء: آسفه مو قصدي أزعجك !
واردفت كلامها : طيب كيف تتركينه بالبيت لوحده وعايشه عند أهلك ؟!
طيب ما يعترض ؟!!
ما أدري أحس حياتكم غريبه !
ساره تنهدت : لو جاوبت وش تستفيدين ؟!!!
روحك معجنه باللقافه !
عائشه تنهدت بحسره : يا حظك بالمجنون وين ما تروحين ما أحد يقولك شيء !!
طالعتها ساره باستغراب سبحان الله أمور تشوفها نقمه غيرك يشوفها نعمه !!
وباستخفاف لصغر عقل عائشه ردت ساره : الحين حاسديتني على المجنون السكي
سكتت بندم وبنبره مجروحه: عائشه غيري القناة وشوفي موضوع ثاني غير مجنوني !
عائشه بمراوغه سألت حتى تصل لمرادها : تحبينه ؟!
طالعتها ساره بصدمه من السؤال !!!
ما توقعت هالسؤال !
ابتسمت بسخريه: استحي اتكلم بذي المواضيع !
رح أكتب الإجابة على الورقه وأخذ راحتي بالكلام !
هزت عائشه رأسها بحماس
تعرف الإجابة
اذا كانت تحبه كذا ترتاح من الكابوس!
اما إذا ما تحبه فهذا يعني إنها ما زالت على أطياف ماجد !
سحبت الدفتر بشغف تشوف المكتوب وسرعان ما قطعت الورقه لما قرأت المكتوب
«انكتمي وبلاها هاللقافه »
ضحكت ساره من قلبها على عائشه !
ومن بين ضحكاتها: واحد واحد !!
سكتت ساره وهي تشوف ملامح عائشه المصدومه: وش فيه ؟!!
عائشه باستغراب : أول مره أشوفك تضحكين كذا ؟!!
على بالي ما تعرفين الضحك طول وقتك ماده البوز شبرين !
تنهدت ساره بأسى : ليه في شيء بالدنيا يضحك ؟!!
عائشه بتأمل : ضحكتك حلوة !
تأخذني لأيام الطفوله !
مطت ساره شفتها بألم وأطياف الطفوله يلوح قدامها !
تنهدت وتتمنى ترجع طفله ما تبغى تكبر!!
بالطفوله نكون متشوقين حتى نكبر !
لكن لما نكبر سرعان ما نتمنى نرجع أطفال!
الحياة قاسيه صعب تتحملها !
هزتها عائشه بخفيف :وين سرحتي ؟!!
هزت ساره رأسها بالنفي بدون كلام !
عائشه أسندت ظهرها للمقعد وهي تتكلم بشويش: تدرين في ناس حرصوني ما اقترب منك !!!
طالعتها ساره بلامبالاه : اكيد حضرة عميد الجامعه ولد عمي أبو ماجد !
ما في غيره غثيث ؟
استندت عائشه وطالعتها بصدمه : كيف عرفت ؟!
وبنصيحه : ليه توزعين حسناتك على الناس!!
وبعدين لا تلومين إلي من حولك
بنت ومطلوبه بقضيه شيكات !!
صعبه عليهم !!
وبلقافه : أنا قلت بنفسي يمكن زوجك جبرك على هذي الشيكات !
على فكره ما أحد يدري عن سالفة الشيكات حتى خطيبك السابق عبدالله !!
طالعتها ساره بنظرات غاضبه : انت ملقوفه بزياده !
وش تبغين بكل هالاسئله ؟!!
إذا خايفه أحد يشوفك معي ويخبر أبو ماجد ..انقلعي من وجهي !!
طالعتها عائشه باستغراب من انفعالها : انتبهي لا يطق لك عرق !
أنا ما أخاف من أحد ولا أهتم !!
أكلم وأجلس مع إلي أبغى !
وبعدين لا تنسي ما أحد يدري إنك بالجامعه !
بس يمكن الدكتور سعود يعرفك ويخبر عنك !
واكيد يعرف صوتك
متأكده عرفك اليوم وانت تلعلعي
ما تعرفين تطلعين وانت منكتمه !
كشت عليها ساره : أحسن منك
وانت تتعذرين له وبسخريه قلدتها : أنا يادكتور ماتكلمت !
عائشه بانتقاد : يعني الدكتور محترم ليه اتكلم بقلة أدب ؟!!
وكل بالقسم يمدحونه بأخلاقه إنسان راقي بتعامله !
ساره رفعت حاجب باستغراب : هو كان مدير قسم الجراحه وش جابه هنا ؟!!
عائشه خزتها : وتعرفين مكان شغله من قبل ؟!!
ساره بتبرير: انجرحت خالتي وكنت معها لما راجعت بالمستشفى عنده !
عائشه هزت رأسها بتفهم : سمعت خالتي ام ماجد تقول إنه أبوها حصلت عنده مشكله بالمستشفى
وما أدري كيف صار بالضبط باع المستشفى !
ضحكت ساره على تعبيرها
خزتها عائشه :-وش يضحك ؟
ساره ابتسمت : حلوه ذي «باع المستشفى»
عائشه مطت شفتها : ما أدري هو له شريك وتنازل عن حصته
ساره بشماته : خسر؟!
جعله من هالحال واردى !!
عائشه طالعتها باستغراب : لا تتشمتين بالناس !
بعدين ما خسر يبغى يفتح مشروع جديد مع ولده وليد !
اما سعود انقبل بالجامعه دكتور هنا !
عقدت ساره حواجبها : كم عمره ؟!!
ودكتور بالجامعه ؟!
عائشه : انا سمعت من خالتي ام ماجد
عمره يمكن 35 سنه !
فتحت ساره عيونها : كبير !
وليه مو متزوج للحين ؟!!
عائشه بسخريه : والله ما قال لي !!
وبجديه : وليد نفس الشيء تأخر بالزواج
بس سمعت البارحه خالتي تقول انه حاط عينه على وحده بالجامعه يبغى يخطبها
بس يتأكد من أخلاقها !!
انصبغ وجه ساره وصار مثل الطماطم !
دفتها عائشه بالخفيف : علامه وجهك كذا مستحيه !
وبمزح اصحي يا ماما
لا تفكرين إنك المقصوده يا سندريلا !
البنت هذي استخفت !
ضحكت ساره وخزت عائشه : تخيلي تطلعين انت !
ضربتها عائشه : غبيه !
ساره تابعت كلامها بضحكات : لأنه يبغاها محتشمه ومحترمه !
مسكين ما يدري إنك زوجة ابن أخته !
عائشه ترفع يدينها للسماء : الحمد لله والشكر على نعمة العقل !
تعترفين بنفسك إنك مو محترمه ولا محتشمه !!
ساره بلامبالاه وقفت : تركت الاحترام لك!
عائشه رفعت حاجب : وين رايحه ؟!!
ساره غمزت لها : لمجنوني!
وتركتها قبل ما تتكلم !!
طلعت من الجامعه وقررت تمر بالبنات للألعاب !!
¶¶¶
جالسه تناظر التوأم على الألعاب
حست باهتزاز جوالها طلعته وعقدت حواجبها «عمار»
من الصبح يتصل فيها !
وش يبغى فيها ؟!!
وببرود رجعت الجوال بالحقيبة ما لها خلق !
ينتدابها شعور غريب... قضت اليوم بعض الوقت مع عائشه !
ايقنت إلى الآن عائشه ما تعرفت عليها !
يا ترى وش شعورها لما تعرف إنها نفسها صديقة الطفوله !
هل رح تبقى على نفس وضعيتها !
او
قطعت افكارها وهي تحس بالجوال يهتز مره ثانيه !
زفرت بضيق وطلعت الجوال
«عمار»
وش يبغى فيها ؟!!
طنشته وجلست تراقب البنات !
بعد وقت... وقفت ترجع للبيت وهي تشوف الشمس غابت !
اخذت البنات ووقفت سياره اجره
ورجعت للبيت !
نزلت من السياره حست بالجوال يهتز مره ثانيه
قررت ترد عليه وتشوف وش يبغى
ردت بدون نفس : نعم ؟!!
وصلها صوته الغاضب : نعامه ترفسك !
تأففت بضجر : يا ليل أبو لمبه !
إذا ناسي تراني عمتك يا زفته !
رد بغضب من تجاهلها لاتصالاته : تخسين يا زفته !
وينك الحين ؟!
من الصبح طالعه وما رديت البيت للحين !!!
انت شايفه الساعه كم يا محترمه ؟!!
رفعت حاجب وبنفسها علامهم اليوم على مصطلح «الاحترام »
ابعدت السماعه عن أذنها من صراخه المتحكم : وينك الحين ؟!!
ردت وعيونها على التوأم وبحده : لما تكون مسؤول عني وقتها تعال إسألني يا
قاطعها بتوعد : الحين رح اتصل بعمي محمد وأخبره عنك !
أنا ما أقدر أتحمل تصرفاتك !
مو ناقصنا كلام من حولنا !
احترمي سمعتنا وارجعي الحين !!
مطت شفتها بسخريه : قول من البداية العجوز أبو الوليد شاحنك علي وخلصنا !
خذها على بلاطه ارجع للبيت بالوقت إلي أبغى !
واليوم ماني راجعه للبيت انا والتوأم نايميين عند «مجنوني» !
مطتها بطريقه تنرفز الي يسمعها !!!
وقفلت الخط بوجهه !
¶¶¶
¶¶
¶
جالس بالحديقه الأماميه مع أبو الوليد
طالعه بقهر : قفلت الخط !
وليد طالع البوابه وهي تفتح ويدخل التوأم بملامح فرحه : هذا هي جت !
ابو الوليد إلي سمع كلامها كان جالس جنب عمار بالضبط
طالعها وهي داخله ورافعه خشومها للسماء
شد على قبضة يده بقوه !
وقف عمار على دخولها واقترب منها
وبهمس حاد : وينك من الصبح ؟!!
دفته من صدره عنها وبنفس الحده : ابعد عني !
انحرج من دفتها له قدامهم !
رجع تقدم منها وقبض على يدها بقوه وبهمس : قدامي !
إلتفت للخلف وهو يسمع ابو الوليد متقدم لجهتهم ويتكلم بصوته الحاد: شوفي يا بنت الناس !
تجلسي هنا باحترامك وتحترمين قوانين هالسور !
اشر على السور بحده : طالعه نازله بسياره أجره ما أسمح لك !
قاطعته وهي رافعه حاجب : بصفتك ايش ؟!!
رد بحده : بصفتي هذي المساحه كلها بإسمي
وإلي يشوفك طالعه نازله بسياره أجره لوحدك ما يقول هذي أخت خلف !
يقول هذي وحده من بنات أبو الوليد !!!
من يوم طالع ما تطلعين إلا مع واحد من محارمك وإذا شفتك طالعه بسياره أجره
رح يكون تصرفي ما يعجبك !!!
أنا أقول كلامي قدام عمار ولد أخوك وإذا كلامي غلط يقول لي !
اذا ما عجبك قوانين هالمكان
تقدرين تحملين قشك وتروحين لعمك أو أخوك أو مجنونك !
قاطعته بكره يتدخل  بكل شيء: جعلهم يحملون جنازتك قريب قول آمين
قاطعها ةليد بصرخه غاضبه : انكتمي !
ابو الوليد أشر لوليد : اتركها تقول إلي تبغاه !
ساره بسخريه : أكيد أقول إلي أبغاه
وإلا تبغاني أطلب منك الاذن !
تقدمت منهم بعد ما سمعت كلامها: صدق قليلة حياء !
تكلمين أخوي كذا بدون احترام ؟!
ساره بحده رفعت يدها : انت لا تتدخلين !
وناظرت ابو الوليد :،قبل ما تطبق هالقانون علي
طبقه على أختك من بيت لبيت دايره على رأسها
لا زوج يمسكها وإلا اخوان يدرون عن هوى دارها
حتى عيالها هجو
قاطعها ابو الوليد بغضب :ساره احترمي نفسك
ما ردت عليه وأشرت للبنات يتوجهون للبيت معها !
تركتهم بدون كلام !
أبو الوليد يناظر زولها وبعدها إلتفت لعمار : عاجبك وضع عمتك ؟!!
عمار بقلة حيله : وش اعمل لها ؟!
تراها مو صغيره !
وليد  بقهر من طريقتها بالكلام مع أبوه: خلاص اتفق معها توصلها لمجنونها و انتهينا من السالفه !
ابو الوليد بتوعد : الحين رح اتصل بمحمد يحل هالمهزله !!!
يرجع ويطلقها من هالزفته إلي حطته حجه لطلعاتها !
ام محمد : ما أدري وش أخر محمد عن طلاقها
المفروض ينزل بالعطله ويطلقها !
رجع وليد وجلس عند سعود إلي جالس
وبيده أوراق جامعيه يقلبها بهدوء،!
زفر وليد : يا برودك يا شيخ !
رفع نظره عن الأوراق وطالع أبوه وعمار يتكلمون باندماج : بنت مو لاقيه رجال يوقفها عند حدها ويعلمها الصح من الغلط !
غلطان أبوي إذا ظن إنه يقدر يوقفها ؟!!
الحده والصراخ والتحكم مو دائما هو الحل لكل الأمور !
وليد بتفكير : يا أخي أحسها هالبنت رقيقه وطيبه بس تحاول تظهر لمن حولها العكس !
بس نرفزتني لما كلمت ابوي كذا !!
أحس أبوي يعرف شي
قاطعه سعود وهو يرفع جواله يهتز : دقيقه !
استغرب رقم غريب فتح الخط ورد وهو معقد حواجبه
¶¶¶
¶¶
¶
مرت ساعتين وهي تقلب بالكتاب وعقلها مقفل مو قادره تستوعب شيء !
يقهرها ابو الوليد بتصرفاته يبغى يفرض سيطرته عليها !
متى تتخرج وتطلع من هنا ؟!!!
مدت يدها وتناولت الجوال إلي يرن جنبها !
طالعت الشاشه وعقدت حواجبها
اكيد عمار خبره !
تنهدت وعدلت جلستها وردت بهدوء : آلو
رد بجمود : السلام عليكم !
ساره بترقب : وعليكم السلام ...كيف حالك !
محمد بهدوء : بخير
كيف دوامك ودراستك ؟!
ساره وهي متأكده سؤاله عباره عن مقدمه : الحمد لله بخير !!
محمد بتردد : ءء نزلت لك مصروف بحسابك !
ساره بانحراج تكلفه فوق طاقته : مشكور
اخذ نفس محمد وتكلم : اعذريني ترى مصروفك اقل من كل مره !
قاطعته وزاد انحراجها وهي تحس إنها تكلفه فوق طاقته : ما هي مشكلة
محمد قاطعها : اسمعي يا ساره ابغى تعطي عمار الأوراق المطلوبه
نرفع على اهل زوجك قضية نفقة للبنات
بهتت ملامحها للحظات وتكلمت وهي تبلع ريقها : آسفه كلفت عليك وما انت مجبور !
قاطعها بضيق : لا تفهمي قصدي غلط !
أهل البنات أولى بالنفقه حتى لو كان ولدهم مجنون !
انا تغاضيت عن سالفة الطلاق لأني انشغلت !
قاطعته ساره : بس هو وحيد وما عنده أهل !!
محمد بقهر : الله يأخذ خلف وارتاح منه
ما في من خلفه إلا المصايب !!
من وين استدل على هالزفته !
وقسم بالله لو أشوفه إلا أذبحه وأشرب من دمه !
ما في من خلفه الا البلاوي !
وانت
قاطعته بصوت خافت خايب : ما له داعي ترسل مصروف ان
قاطعها بغضب : انكتمي يا ساره
تراها واصله لهنا !
ماني عجزان عن مصروفك !
لا تفهمي كلامي غلط
أدري إنك مالك ذنب بموضوع الشيكات!!
زفر بضيق وتكلم : تدري كم اتصال جاني اليوم شكاوي عنك !!
ساره تجمعت الدموع بعيونها وبصوت مخنوق : ما أقدر اتحملهم !!
الكل يبغى يتحكم فيني ويفرض سيطرته علي!
حتى وصلت بخالك ابو الوليد يتحكم فيني !!
محمد حس بصوتها المخنوق رق لحالها : شوفي يا ساره كلامه منطقي
بما إنك تطلعين من باب بيته !
هو وجهة نظره كذا !
ويهتم لسمعته وكلام الناس !
وحتى منصبه وبرستيجه ما يسمح لأحد يتكلم ويقول وحده من بناته تركب سياره اجره !
حتى نخلص من هالسالفه
خلاص أنا أخبر عمار وبنفسه يأخذك للجامعه وانتهينا من هالسالفه !
قاطعته بقهر : والعجوز يمشي كلامه
علي !!!
تأفف بضجر : يعني السالفة عناد !!
يا ساره ترى خالي ما هو بعمرك تردين له الكلمه بكلمتين !
خلاص طنشي يا بنت الحلال
وانتظري رجوعي أحل الموضوع
تحملي علشاني يا ساره !
أنا اليوم أكلم عمار وانتهينا !
ساره بتأكيد : قول له مايخبر أحد عن دراستي !
محمد : إن شاء الله !
وبتذكر : كلمني عمار عن الطلعه وإنك رافضه !
وبأمر اطلعي معهم وغيري جو مع بناتك !
انسي الماضي وافتحي صفحه جديده !
ساره باعتراض:بس
محمد بحزم : أنا وش قلت !
ساره أنا أخوك الكبير معقول ما تسمعي كلامي وتعارضيني
وتفشليني قدام عمي أبو راكان !
أنا قلت له إنك رايحه معهم !
ساره حاست بوزها : إن شاء الله !!
قبل ما يقفل تكلم : لا تزعلي علشان الفلوس
قاطعته بهدوء: لا تهتم!!
انهت المكالمة وبداخلها قهر من خلف ..وش ذنبه محمد يتكلف بهذا المبلغ ..وتحمله فوق طاقته !!!

***
***
***
***

ام عمار بتأكيد لكلامها : انا متأكدة قالت ما تبغى تروح معنا !
ابو راكان  بضجر: أقولك رايحه معنا
محمد خبرني إنها رايحه !
أم راكان طالعت زوجها وهي مستغربه
كانت تسمعه لما كلم محمد وأصر إنها
تروح معه !
ما عادت تفهمه !
أبعدها طول هالسنين عنها !
ومجافيها
والحين يبغاها معه بالطلعه !
وإلي فجعها طلبه من محمد انها تنتقل عنده وتعيش !!
ما عادت تفهم على زوجها
وإذا سألته يكتفي بالسكوت !!
طالعت عبدالله المنشغل بالجوال
متأكدة يظهر إنه منشغل بالجوال
عقدة قلبها تقول إنه للحين متعلق فيها
ويبغاها !
بس رجعتها له مستحيله !
حولت نظرها على بنات أخوها «أم ماجد ،شروق،نوره »
الظاهر مو عاجبهم تواجد ساره بالطلعه
وخاصة شروق !!
ناظرت ماجد إلي يتكلم وباين انه قاصد يستفز عبدالله : يا عيني ام سوار بالطلعه !!
طالعه عبدالله بنظرات ناريه وما علق !
ابو ماجد بحده : ماجد !!
ابو راكان طالع الموجودين بحزم : اتمنى ما اسمع اي مشاكل ونغزات !
كل شيء بالماضي انتهى !
**
**
**
في الصباح
ماجد بأمر : جهزي حالك ساعه وطالعين !
عائشه بعناد : ما أبغى أروح !
عندي دراسه
قاطعها وهو يقترب وينفث الدخان بوجهها : جهزي حالك بلا هذره زايده !
دفته عنها بقرف وكحت من الدخان : قرف يقرفك !
الله يأخذ الجامعة إلي خرجتك !
جلس مقابل لها وهو ينفث الدخان :،بسرعه تحركي !
ما أبغى أتأخر !
طالعته بقهر : ما أبغى أروح !
رفع حاجب : كنت موافقه تروحين
وش إلي غير رأيك ؟!!
ردت وهي تؤشر على رأسها : بكيفي !
وقف وتحرك بطريقه تنرفز : نشوف مين كلمته تمشي !
بعد ساعه ركبت السياره بقهر بعد ما ضربت الباب بقوه
طالعها باستفزاز : أعصابك لا يطق لك عرق !
مسكت نفسها لا تصفقه كف !
حرك السياره وشغل أغاني متعمد !
مدت يدها تقفله تفاجأت لما ضربها على يدها بقوه : أكسر يدك مره ثانيه !!
تأوهت من ضربته وطالعته بحقد : جعل يدك للكسر
حشى يدك من حديد !
ما رد عليها وهو يرفع الصوت عالأخير
طالعته بكره وحطت السماعات بإذنها
وصدت للجهة الثانيه !
ابتسم وطلع علبة السجائر يزيد
استفزازها !!
***
***
***
رن جوالها للمره العاشره
وهي تناظره ببرود وتتخيل شكل عمار الحين وهو يتصل عليها !
ما هو موجود بالبيت ما تدري متى يرجع علشان الطلعة !
ابتسمت لما وصلها مسج «ردي يا زفته»
وبعدها اتصل فورا
ردت وهي تبعد الجوال عن اذنها من صراخه : لا تجننيني !
وقسم بالله ترفعين الضغط !!
اسمعي ما أقدر اجي الحين
جدتي أم محمد تنتظرك روحي معها بسرعه !
قاطعته بقرف : مو طالعه معها !
رد بقهر منها : كله طلع ما بقى إلا جدتي !
لا ترفعين ضغطي !!!
وانزلي الحين !
وقفل الخط بوجهها !
تثاوبت بنعاس وطالعت سوار تناظرها بحماس للطلعه !
وحور مستنده على السرير وغفت عينها !!!
سوار تكلمت بحماس : ماما نطلع الحين ؟!!
تثاوبت ساره بنعاس : مو الحين !!
سوار بإحباط : ماما كلهم راح
قاطعتها ساره بضجر : اوووووه وبعدين معك !!
أبغى اغفى خمس دقائق بس
ما أبغى ازعاج !
حاست بوزها وجلست على الأرض وحطت يدها تحت خدها بعبوس !
ابتسمت ساره على ملامحها وغمضت عيونها
وهي تتخيل شكل ام محمد تحتريها تحت !!
صحيت مفزوعه على صوت الجوال
ناظرته وهي شبه مغمضه
«عمار »
تأففت بضجر منه وردت : نعم !!
عمار يتمنى تكون قدامه ويطلع حرته فيها وزاد عليها لما حس نبرة صوتها تدل إنها نايمه : نايمه!!!
ينتظرونك من قبل ثلث ساعه خلصينا وانزلي !
وقسم بالله 5 دقائق اذا ما نز
قفلت الخط بوجهه قبل ما يكمل كلامه !!
تأففت منه مزعج لأبعد أحد !
ما تبغى تروح !
وقفت وطالعت التوأم بسابع نومه !
**
**
**
ام محمد بغضب : تخسى أطلع لها وأناديها ..... اتصل مره ثانيه خلها تنزل .....اسمع 5 دقائق إذا ما نزلت
رح نحرك !.....ان شاء الله ...سلام
قفلت الخط وعيونها على بيت عمار !
عفست ملامحها وهي تشوفها تتقدم ببطئ
متأكده قاصده هالحركه وبصرخه : تحركي !
خايفه على البيض يتكسر من تحتك ؟!!
أشرت للتوأم : انقلعي انت وإياها على السياره أشوف !!!
تقدمت ساره وبحده : تكلمي مره ثانيه معهم كذا وشوفي وش رح يصير !!
ام محمد أشرت على سائق السياره : امشي حسبي الله عليك فشلتينا معه !!
طالعتها ساره بعد ما ألقت نظره على السائق : وين سيارتك حتى ترمي نفسك على الناس يوصلونك !
ام محمد : السيارة تعطلت قبل ساعه
وما بقى إلا ولد أخوي يوصلني !!
وما هو غريب عني !
قولي هالكلام لنفسك !!
هزت رأسها ساره بهدوء وبصوت آمر : سوار ،حور
انزلوا من السياره وتعالوا هنا !
تحرطمت سوار ونزلت مع حور وتوجهوا لساره !
ساره لفت نفسها وبأمر: عالبيت !!
ام محمد انجنت منها : لنا ساعه ننتظرك وآخر شيء تنقلعي كذا !
ساره بهدوء : ما أركب مع رجال غريب !
سوار بدأت تبكي : كل البنات راحوا
وحنا نبقى هنا !!!
وحور دخلت معها بنوبة البكاء !
نزل من السياره بهدوء وببرود تكلم بعد ما سمع كلامها : ما تبغين تركبين بكيفك !
انتظري عمار !
على الأقل اتركي التوأم مع عمتي
وأشر لها تناظرهم يبكون حتى ترفق بحالهم !
ام محمد بكره: هذا الناقص !
بناتها معها !
أنا ما أطيقها حتى أطيق بناتها !
أشر سعود للتوأم بلطف : اركبوا
وطالع عمته : لما تكون سيارتك وقتها تحكمي مين يطلع ومين ينزل !
ورجع للسياره ركبها بعد ما أشر لعمته تركب !!
ام محمد بغضب من رده فشلها : والله ما أحد يركب منكم لا انت ولا بناتك
وانطقي هنا تنتظرين عمار !!
سوار وهي تشد عباية ساره ودموعها تنزل : يا ماما نركب يا ماما
أخذت نفس وأشرت على السياره مجبره : اركبوا !!
ام محمد بغيض من خلفها بهمس :الله يأخذك !
ركبت السياره وقفلت الباب بهدوء
تحس بالتوتر والاحراج وهي تتذكر كلام عائشه
يبغى يخطب بنت من الجامعه !

**
**
**