رواية اقدار الفصل الرابع والعشرون 24 - بقلم امي احمد

طلع من مكتب أبوه وهو ناوي يطلع للجامعة !
لفت نظره ساره واقفه مع عمار وعبدالله متوجه لهم !!
حس السالفه خلاص مسخت !
توجه لهم وما هو ناوي على خير !
للحظه خفف من سرعته !
وهو يفكر كيف هالبزر طلعته من بروده !
اخذ نفس رح يبعدوها عن عبدالله بطريقه خفيه !
ما في داعي للانفعال الحين
خلها تكلم عبدالله من اليوم لباكر
الأهم إنها ما رح ترجع لعبدالله !
مستحيل ترجع له !
لما شافت عبدالله متوجه لجهتها همت بالمغادره
سرعان ما غيرت رأيها لما شافت سعود !
جكر فيهم ما تحركت من مكانها !
عمار بهمس لها اختصار للمشاكل : ادخلي !
رفعت حاجب وطالعته وقبل ما ترد
تقدم عبدالله بالسلام : السلام عليكم !
رد عمار السلام : وعليكم السلام !
أشوفك هنا اليوم ؟!
عبد الله طالع بيت خاله : انتظر شروق طالعين !
كمل جملته وطالع ساره يشوف رد فعلها !
استغرب البرود وعدم الاهتمام
معقول ما تغار أو تتضايق !
إلا إذا نسيته وطوته من حياتها !
رجح الاحتمال الثاني !
ملامح الكره واضحه بعيونها حتى السلام ما كلفت على نفسها وترد !
زفر بإحباط..والندم يأكل قلبه ما هو قادر  يطلعها من رأسه ...طالع سعود إلي تقدم منهم ببرود : أشوف اجتماع عالمي هنا !
عبدالله هز كتوفه بهدوء : انتظر أختك تشرف !
هز رأسه  بتفهم الحين عرف سبب تواجده !
طالع عمار : متى طالع للدوام ؟!
عمار بابتسامه : اليوم أخذت إجازه !
عقد حواجبه سعود : صدق ؟! عسى خير ؟!
عمار بابتسامه : الخير بوجهك
بس طالع مع عمتي نغير جوووو !
ما يدري ليه قصد يقول «عمتي » حتى يستفز عبدالله !
طالع سوار وأشرلها : يلا تأخرنا !!
عبدالله رفع حاجب يبغى يعترض
بس سكت وما قدر يتكلم بوجود سعود إلي رح يفسر كلامه على مزاجه !
سعود رفع حاجب : عمتي داخل ما رح تروح معكم ؟!
عمار بانحراج ما عرف وش يقول ؟!
ردت ساره وهي تسحب عمار بهدوء : لا مو معنا !
طالعين نغير جو ما نبغى ننكد أنفسنا بشوفتها
صح عمور !
وابتسمت له بغمزه !
طالعها عمار متوهق ما يبغى مشاكل إذا وصلت السالفه لجدته!
وبتصريف تكلم: نشوفكم على خير !
وتركهم وغادر وساره ماسكه يده وكأنه طفل صغير خايفه يضيع !
عبدالله حس الضغط وصل ألف من وقاحتها : أنا ما يقهرني إلا هالخروف إلي ساحبيته معها !
سعود ببرود تكلم : هذي شروق طلعت !
وتركه وتوجه لسيارته بهدوء !
اقتربت شروق بهدوء من عبدالله !
طالعها عبدالله ما ينكر لها مكان بقلبه
بس ظهور ساره بالوقت هذا
مايدري وش يعبر أو يقول !
شروق باين البكاء بعيونها : تأخرت عليك ؟!
أشر لها عبدالله لسياره : لا عادي !
حس بتأنيب الضمير
مستحيل يجرح شروق
ما قصرت بحقه من أول ما تزوجها !
إلا بظهور ساره تنقلب وتفتحها مناحه
تخاف يرجع ساره !
يحس نفسه مكبل وما يقدر يتخذ قرار سليم !!
**
**
**
**
طول الوقت جالسه بالحديقه تنتظر رجوعهم
وبداخلها نار !
كيف عمار يطلع وما يأخذها ؟!
ام الوليد وقفت فوق رأسها : وش تبغين فيهم من ساعات وانت جالسه هنا ؟!
شوفي الساعه 9:00 !
ام محمد بغضب شوي وتبكي : بدل ما يقول جدتي وحيده ما لها أحد
أطلعها تغير جو !
يروح يأخذ الزفته ؟!
طلع وجلس جنبها : إذا تبغين الحين اطلعك !
ام محمد بحزن : مشكور يا أخوي ما تقصر !
ابوالوليد بهدوء وبداخله ما عجبه تصرف عمار : ليه تحرقين أعصابك علشان هالبزران ؟!!!
ام محمد بقهر : تحز بخاطري هالحركه !
والزفته ربيتها وطولها شبر حتى صارت طول الناقه
وتعمل كذا !
هذا جزاء رد المعروف !
طلعت نوره وطالعتهم : وش فيه ؟!
طالعها أبو الوليد وصد عنها !
أوجعها بالحركة ذي !
زعلان منها وما هو راضي يكلمها !
تبغى ترجع لعزام حتى ترضيه
بس رافض رجوعها ما يدري وش يفكر أبوها فيه !!
طالعت أمها بضيق وما تكلمت !
اشرت لها أم الوليد بعيونها تقفل على الموضوع حاليا !
أبو الوليد يكلم اخته : الحين إذا شافتك جالسه تنتظري هنا
رح تفسر حركتك إنك مقهورة
ادخلي الحين وطنشيهم ورح أطلع هالحركه من عيونهم الاثنين !!
وأخلي عمار كيف يحترمك ويقدرك مره ثانيه !
طالعته بفرح : صدق تبرد حرتي فيهم ؟!!
هزراسه بتأكيد : ادخلي الحين وما عليك !
بعد ما دخلت مع ام الوليد
كلمت نوره أبوها بنبره راجيه : يبه !
أشر لها بيده بحزم : ولا كلمه !
تركها وتوجه للداخل !
ضربت الأرض برجلها بقوه ودخلت خلفه وهي تشتم ساره لأنها سبب المشكله !!
**
**
**
وقف السياره وطالعها وهي جالسه بالسياره وما هي ناويه تنزل : سوير !
طالعته ومطت شفتها بفقدان أمل !
عمار بوعد : أوعدك إني أحاول مع خالي أبو الوليد أعرف مكان أهل أمك !!
هزت رأسها بإحباط متأكده جكر فيها أبو الوليد ما رح يخبرهم بشيء !
اخذت نفس وطالعته بامتنان حتى لو ما حصلت على إلي تبغاه
على الأقل حاول يساعدها : شكرا عمار !
ما رح أنسى
ضربها على كتفها بشويش : أقول انزلي مو لايق عليك دور المؤدبه !!
وقلدها بسخريه «شكرا عمار»
الحين شكراً وبعد ساعات تردحين لي وما تحترمين إني أكبر منك !
طالعته بدون نفس : البنات نايمات
أنا أحمل سوار وانت حور !
طالعهاوابتسم : ان شاء الله عمتي !!
سعود جالس على شرفة غرفته بالظلام
وعيونه عليهم !
طالع ساعته وهز أكتافه بسخريه الساعه 12:15
ما توقع عمار شخصيته ضعيفه كذا !!
وساره رح تتحكم فيه !
من الصباح طالع معهاوما رد إلا الحين،!!
أي طلعه لهذا الوقت ؟!

***
***
**
جلست بالقاعة ومسكت كتابها تطالع فيه
وأفكارها تأخذها للبارحه
لما أخذها عمار لبيت صالح بمحافظه ثانيه !
قطعت أفكارها وهي تحس بعائشه تحط أغراضها جنبها !
رفعت نظرها لها وبعدها صدت تناظر بالكتاب إلي بيدها !
تنهدت عائشه وبهدوء : السلام عليكم !
ردت ساره بدون ما تناظرها : وعليكم السلام !
طالعتها عائشه لثواني وبدون تردد
سحبت نقاب ساره!
طالعتها ساره باستنكار : نعم !
وش قلة الأدب هذي ؟!
عائشه بطريقه عبيطه : تعرفيني ؟!
رفعت حاجب ومتأكدة عقل عائشه ضارب : نعم ؟!!
عائشه بابتسامه بانت بعيونها : تعرفيني ؟!!
هزت ساره بسخريه : ايه اعرفك
وحده ملقوفه وتتفلسف كثير
زوجة المخبول ماجد !
طالعتها عائشه عقدت حواجبها وبحيره كيف تصيغ السؤال : قصدي
تذكر
قاطعتها ساره بجديه وهي تغطي وجهها : الدكتور دخل
مو فاضيه لثرثرتك !!
طالعتها لثواني وبعدها طالعت الدكتور بإحباط مو وقته الحين !
لازم تتأكد من كلام ماجد !!!
نقزت لما سمعت اسمها على لسان الدكتور : عائشه !
ناظرت حولها وبعدها وقفت لما شافت نظرات الدكتور عليها : نعم دكتور !
سعود بهدوء : تفضلي على المقاعد الاماميه !
انت وإلي عندك !
وبعدها وزع نظراته بالقاعه : المقاعد الأخيرة يا ليت تتركونها
دامه بالأمام والوسط مقاعد فارغه ليه تتفرقون كذا !!
عائشه جمعت أغراضها : إن شاء الله دكتور !
وطالعت ساره : قومي نجلس بالمقاعد الأماميه !
ساره بعدم اكتراث لكلامه : ما رح اتحرك !
هزت كتوفها بهدوء : بكيفك !!
تركتها وتوجهت للوسط وجلست بهدوء !
ناظرت ساره البنات إلي غيروا المكان !
ما بقى بالمقاعد الاخيره غيرها !
القاعه كبيره وعدد البنات قليل !
رجعت تطالع بالكتاب وطنشت كلام سعود !
رفعت نظرها بالغلط وحست قلبها رجف من نظرته الحاده لها !
أخذت نفس تشجع نفسها وما رح تهتم له !
مسكت القلم ترسم على الكتاب
وكأنها طفله صغيره
قلب حب وبداخله
ماما وبابا
تحس كلما كبرت تحن لهم أكثر !!
رفعت رأسها على صوت سعود : الأخت إلي بالخلف جاوبي على السؤال !!!
طالعت حولها وبعدها طالعته وهو يكلمها : عندك إجابه على السؤال يا ساره !
بلعت ريقها وهو ينطق اسمها بكل صراحه !
أخذت نفس بما إنه عرفها ما في داعي للتخفي وبصوت هادي : ممكن تعيد السؤال مره ثانيه ؟!!
طالعها ما هي من عادته يعيد السؤال
مره ثانيه !
طنشها ورجع للشرح مره ثانيه !!
تنهدت وقلبها يدق طبول ما تدري وش السبب !!
حاولت تستمع للمحاضره بدون ما ترفع رأسها !
مر الوقت بسرعه تنهدت بعد خروج سعود !
جمعت أغراضها بملل !
رفعت نظرها لعائشه إلي تكلمها : الدكتور يعرفك ؟!!
رجعت تلم أغراضها بعدها وقفت وطالعتها : وانت يعرفك ؟!
عائشه :،ايه يعرفني لا تنسي تراه خال ماجد
وعمي أبو ماجد وصاه علي !
أما انت كيف عرفك ؟!
طالعتها ساره باستخفاف : ترى اسمي بالكشف عنده واكيد ميز الاسم !!
عائشه رفعت حاجب : اوكي يعرف إنك تدرسين بالقاعه !
السؤال كيف ميزك بين هالبنات وانت متغطيه ؟!!!
إلا إذا
قطعت كلامها : خلاص انسي !!
المهم عندك محاضره الحين صح ؟!!
ساره وهي تتعداها بهدوء : ايه !
تركتها وهي مستغربه من تصرفات عائشه !!
وكلامها يدور برأسها كيف عرفها بين البنات ؟!!!
تنهدت تحس عقلها دوامها الف موضوع يدور برأسها !
رفعت نظرها وشافته واقف مع مجموعه طلاب يكلمهم !،
نزلت نظرها وكملت طريقها وهي تعدل النظاره !
تعودت عليها ونادرا ما تخلعها !!
بعد يوم شاق أنهت محاضراتها !
وفتحت حقيبتها تتصل بعمار يمرها !
عقدت حواجبها !
الجوال مو موجود !
غمضت عيونها لثواني ما تركت حقيبتها
ولا تذكر إنها مسكته اليوم !!
معقول انسرق ؟!
بس الحقيبه طول اليوم معها !!
وين الجوال ؟!!
كيف تتواصل مع عمار الحين ؟!!
طالعت ساعتها الوقت تأخر بسبب الأبحاث !
والشمس قاربت على المغيب !
زفرت بضيق
ورجعت تبحث عنه بالحقيبة مره ثانيه!!
ما في فائده الجوال ما هو موجود !
ما في حل إلا سياره الأجرة !
عدلت لباسها وطلعت باتجاه بوابه الجامعه !
**
**
**
**
كمل صلاة المغرب
و ناظر ساعته وعقد حواجبه باستغراب
تأخرت وما اتصلت !
وجوالها مغلق !
اجتاحه شعور عدم الراحه !
قرر يطلع ويشوف وين طست !
كيف يلقاها وجوالها مغلق !
طلع من البيت واستغرب صوت ابو الوليد مرتفع وهو ينطق : لهنا وكافي !!
وطالع عمار بغضب : تعال شوف حل لعمتك !
تقدم عمار وطالع ساره وبعدها ابو الوليد : وش صاير ؟!
ابو الوليد بنبره غاضبه : اتوقع اتفقنا حضرتها ما تركب سياره أجره !
أشوفها تنزل من السياره والوقت متأخر !
بالأول قلتم عند زوجها !
والحين مطلقه وين طاسه لهذا الوقت ؟!!
أنا بناتي ومتزوجات ما أسمح لهم بالتأخير لهذا الوقت !
العصر كل وحده تكون في بيتها !
لكن إلي أشوفه تسيب فوق العاده !
وما رح أسكت أبدا !
تنهد عمار وما يدري وش يقول لأنه ما يدري وش صار عليها وبترقيع : كانت عند صديقتها وأنا تأخر
قاطعته ساره بحده : ليه تبرر له ؟!
تراه ما هو مسؤول عني وعنك !!
والبوابه إلي يذلنا فيها !
من باكر افتح لنا باب خاص وانتهينا !
جنن أم أمي بالسمعه !
خلاص الوضع ما ينطاق !!
تراني ساكته من الأول ومحترمه كبر سنك !
على عيني ورأسي !
بس تتدخل بأمور ما تخصك !
اسمح لي ما أقبل نهائيا !
أخوي محمد موجود وغيره ما أسمح لأحد يفرض كلمته علي !
لا انت ولا غيرك !!
قاطعها صوت حاد : حدك أبو الوليد !!
طالعت عمها أبو راكان إلي يتقدم لجهتهم !
ما انتبهت إذا كان موجود من الأول أو لا !
اقترب بحده : انت ما تحشمين أحد ؟!!
بس الحق على إلي تركك على هواك !
لا سائل ولا مسؤول !
الحين تلمين أغراضك وترجعين عندي !
رفعت حاجب : بصفتك ايش تأخذني عندك !
فتح عيونه باستنكار من كلامها: بصفتي ؟!!
أنا عمك يا محترمه !!
طالعته بأسف مرير : للأسف ما عندي لا أعمام ولا أخوال ولا أب ولا أم
أنا ما أعترف إلا بأخوي محمد وبس !
والباقي حاله من حال الغريب إلي بالشارع !
إذا نسيت الماضي أنا ما نسيت !
فلا تفرض نفسك علي بعد تخليت عني بأصعب الظروف... وخليك على موقفك الأولي يكون أحسن !
مو محتاجين لك !
ربي يغنينا عن شر خلقه !
أعطته نظرات كره وشدت نفسها باتجاه بيت عمار !
والتوأم خلفها  !
***
**
**
ابو الوليد طالعه وهو يزم شفته مو عاجبه : سمعت كلام ابنة أخوك بإذنك !!
أبو راكان هز رأسه بهمس : سمعت !
وطالع عمار : عاجبك كلامها ؟!!
زفر عمار وطالع جده وبعدها عيال أبو الوليد إلي يستمعوا من بعيد !
ما يدري وش يرقع عنها وش يبرر : اعتذر يا جدي بالنيابه عنها !
تراها ما تقصد !
هي متضايقه اتصلت فيني أكثر من مره
وأنا نسيت أمرها عند صديقتها !
وتأخر الوقت والظاهر اضطرت ترجع بسياره أجره !
سعود واقف يسمع تأليف كذب عمار !
كيف اتصلت فيه وجوالها للحين معه !!
ليه عمار واقف لها مثل السيف بالدفاع !
ويبرر ويغطي على تصرفاتها !!
أبو راكان بغضب من ساره وما اهتم لتبرير عمار : خلها تطلع بالطيب أحسن ما أتصرف تصرف ما يعجب أحد !
ابو الوليد تدخل ما عجبه تعيش ساره في بيت ابو راكان : اتركها يا أبو راكان الحين عند عمار !
وقبل ما يعترض أبو راكان مسك يده ابو الوليد : اتركها !
وخلينا الحين بسالفه عزام ونوره يكون أفضل !!
تنهد أبو راكان وهز رأسه بعدم رضى
وتوجه لمكانه بهدوء !
طالع أبو الوليد عمار : أتمنى ما يتكرر هالتصرف مره ثانيه
وتركه وغادر !
تنهد عمار بدون ما يناظر أحد
وتوجه لبيته !
**
**
**

زفرت من ثرثرته فوق رأسها : وبعدين !
أقولك ما أدري وين الجوال !
ما أذكر وين تركته ؟!
عمار عقد حواجبه : كيف ما تدرين وين جوالك ؟!
أنا ما أدري عقلك هذا كيف يفكر ؟!!
غطت سوار وإلتفتت له : ما توقعتك كذا ؟!
وش دخل ابو الوليد فينا ؟!
كم مره أقول لك هالكلام بس ما تسمعني ؟!!
ذلنا على هالبوابه !!!
وبعدين فكر بعقلك !
أنا مو دايمه هنا !
فتره وأطلع من بيتك !
بس انت باكر تتزوج وكلما طلعت زوجتك
رح يفتح هالموال ؟!!
الحين عرفت ليه انفه طويل !
لأنه يحشره بكل شيء !
لو فيك عقل
من باكر تفتح بوابه خاصه وكل واحد  في حاله !
واكتب على البوابه
«منزل عمار خلف »
واكتب ملاحظه بيت ابو الوليد جنبنا !!
طالعها وابتسم على انفعالها تتكلم وهي تشبر : انتبهي لا يطقلك عرق !!
زفرت وهي تتكتف : تراك تقهر بتصرفاتك !
قدامهم نعامه وعندي أسد !
وقسم بالله ترفعون الضغط !
عمار بروقان : تدرين وانت معصبه أحلى!!!
باكر اشتري لك خط وجوال !
طالعته بقرف وطلعت من الغرفه وهي تحاول تتذكر وين الجوال ؟!!!
**
**
**
**
اليوم الثاني
دخل ابو الوليد بغضب البيت
وطالع زوجته : ما أحد لعب بعقل عمار غيرها !
ام الوليد عقدت حواجبها : وش صاير ؟!!
ابو الوليد وهو يجلس : نزل عمال يعمل بوابه خاصه فيه !
سعود تقدم منهم بهدوء : هذا المفروض
يصير من أول !
باكر يتزوج وزوجته غريبه علينا !
ام الوليد بتأييد : صادق هذا المفروض يصير !
أبو الوليد : أنا ما همتني البوابه أنا إلي يقهرني بزر تحركه وينفذ كلامها ؟!!
زفر وطالع زوجته : وين أم محمد ؟!
ام الوليد : أميره راجعه من السفر
وتبغى تزورها !
ابو الوليد بقهر : وأكيد الجنيه معها !!
ام الوليد هزت كتوفها : ما أدري عنها !
وش عليك منها ؟!!
ابو الوليد : تقهرني بتصرفاتها وكأنه ما في والي عليها !
ام الوليد : الله يصلحها !
متى ناوي نروح نشوف عروس سعود ؟!
ابو الوليد طالع سعود وبعدها طالع زوجته : الوقت إلي يناسبكم !!!
**
**
**
**
**

وقفت السياره طالعت بيت أختها
جميل وراقي !
أول مره تدخل بيتها !!
نزلت خلف أم محمد وهي تناظر المكان بتأمل راق لها !
ام محمد بنهر : امشي خلصيني !
طنشتها وهي تمشي بشويش وتناظرحولها !
سوار تركض بطفوله وتلف حول نفسها مع الفستان الفستقي !
اميره واقفه عند البوابه الداخليه تنتظرهم !!
سلمت ام محمد على أميره ودخلت !
شدت خطواتها ساره للداخل واقتربت من اميره بتردد علاقتها بأميره منقطعه
مرات قليله إلي قابلتها فيها !
حتى عيالها ماتعرف إلا مها إلي عرفتها بالفتره الأخيره !
استقبلتها اميره بابتسامة مريحه : هلا والله !
نور البيت !
ردت لها ساره الابتسامه : منور بأهله !
أميره نزلت لمستوى التوأم : ربي يحفظكم !
انت وش اسمك ؟!
سوار كالعاده هي إلي تتكلم : أنا سوار وهذي حور !
وقفت اميره : يشبهون بعض كثير !
هزت ساره رأسها بهدوء وهي تدخل !
أميره بابتسامة: خذي راحتك ما في أحد بالبيت !
ساره هزت رأسها بالرفض : مرتاحه كذا !
ام محمد عفست ملامحها وهي تشوف ساره داخله !
جلست أميره جنب أمها : كيفك يالغاليه ؟!
أخبارك ؟!
عساك بخير ؟!
ام محمد مطت شفتها : أي خير وأختك مقابل وجهي كل يوم !
إذا قلت لها بم تقول سم !
ناظرت أميره ساره : انتم للحين ما في وفاق بينكم ؟!!
وسألت لتغيير السالفه : أخبارك يا ساره عساك مرتاحه !
ساره بهدوء : الحمد لله
اميره بابتسامة : لو شفتك بالصدفه كان ما عرفتك !
متغيره كثير !
نحفانه وقصرانه !
ابتسمت ساره : نحيفه إيه !
بس قصيره كيف صارت ذي ؟!
اميره بابتسامة : يمكن قبل كان جسدك مليان أعطاك حجم أكبر !
اما الحين لأنك نحيفه مو باين طولك !
يعني طولك عادي حلو ومناسب !
مثل مها !
عفست ساره ملامحها بقرف !
ضحكت أميره على شكلها : أدري فيكم ما تواطنون بعض !
يقول تشبهون بعض !
بس ما اشوف شبه بينكم !
ام محمد مستقويه بوجود اميره : وش جاب مها لهذي!
ساره رفعت حاجب : أنا ما لي شبيه !
وبأسلوب استفزازي كملت : ماما ما جابت إلا نسخه وحده بس !
ناظرتها أميره برجاء تقفل السالفه : وين عمار ما جاء معكم ؟!
ام محمد : مشغول شوي !
ورفعت نظرها للي داخله تتمختر بمشيتها : واو جدتي الحلوه عندنا !
عفست ساره ملامحها وبداخلها تردد «يا شين السرج على البقر »
ام محمد وقفت تسلم عليها : ايه ذي الوجوه إلي تفتح النفس !
مها بدلع : تسلمي يا جدتي !
وبعدها طالعت ساره بتقييم وتقدمت ومدت يدها !
طالعتها ساره وهي جالسه ومدت يدها ببرود !
أميره هزت رأسها ما عجبها هالتصرف : مها وش هالسلام بينكم !
عيب تراها خالتك !
مها وهي تجلس : دخيلك يمه لا تقولين خالتي ترى يصيبني غثيان !
ناظرتها أميره بزعل وصدت عنها !
ساره بلامبالاه : خلها تقول إلي تبغى
احترام لك سلمت !
ما أدري على وش متحومه فيها ؟!!
مها بانفعال غاضب: يمه سامعه وش تقول أختك !!
رفعت حواجبها ساره تغيزها : تراني خالتك !
مها عفست ملامحها : ما بقى إلا انت أقولك خالتي !
أميره طالعت مها : بعدين معك ؟!
تراها خالتك !
واحترامها من احترامي !
ولا تنسي إنها في بيتي ومجبوره تحترميها غصب عنك !
ام محمد مطت شفتها : ما هي مجبوره تحترمها !
أميره بلوم : يمه
ساره قاطعتها تغير السالفه لأنها مها بكبرها ما تهمها : ناويه تستقرين هنا ؟!!
اميره بهدوء : للحين ما أدري !
لو بيطلع بيدي ما سافرت
هنا قريب على أهلي وأهله أحسن من الغربه !
ام محمد طالعتها بانتقاد : إلي يسمعك يقول مقطعه نفسها بزياره أهلها وأهل زوجها !
لعنبووو ابليسك حماتك تشتكي منك
بيتها جنبكم ما تشوفك ولا اتصال تتصلين فيها !
اميره مطت شفتها : ترى حماتي تكبر السوالف !
وبعدين أنا مو الكنه الصغيره إلي تقدس كل يوم في بيت حماها !
تراني صرت جده !
وبعدين طول وقتي مسافره ولو رجعت كم يوم وأرجع أسافر !
بالعقل ما أقدر اقضي الوقت كله عندهم !
ما أدري كيف يفكرون ؟!
مها بانتقاد : يا يمه لولا إنها تعزك كان ما طلبت جلوسك عندها !
ترى صديقاتك أخذوا كل وقتك !
وجدتي معها حق !

**
**
**
جالس بمكتب وليد يناظر وليد إلي يحرك القلم بأصابعه يمين يسار !
وليد وعيونه على القلم : سمعت عمار فتح بوابه خاصه لبيته !
عبدالله ويتابع حركه القلم : شفت العمال الصبح !
خالي ابو الوليد طلب منه ؟!!
وليد وعيونه مسلطه على القلم : لا !
بس الظاهر عمته ساره تبغى كذا !
وطالعه يشوف رد فعله !
عبدالله بملامح خاليه من اي تعبير : وين المشكله ؟!!
وليد بروقان هز كتوفه : ما في مشكله !
متى محمد رح يرجع ؟!!
يقولون رح يأخذها عنده !
خالتي كانت تبغى تخطبها لسلفها
بس حماتها رفضت !!
عبدالله بحده : ومين طلب منها تخطبها ؟!!
رفع حواجبه وليد : هذي جزاتها تبغى تزوجها رجال يلمها مع بناتها !
عبدالله بحده أكبر : ومين قال لك إنها رح تتزوج !
قول لخالتك لا تتدخل بأمور ما تخصها !!
وليد تحولت نظراته للجديه : انت ليه حارق أعصابك ؟!
وش يخصك بالموضوع ؟!
وبعدين لازم تنبسط لو صار نصيب
ترى العريس «ابو نورس »
فتح عبدالله عيونه بصدمه وهو يرد بهمس : ابو نورس !!!
**
**
**
**
دخلت أميره بابتسامة وطالعت ساره : ابو ليث يبغى يدخل ويسلم على أمي !!!
عفست ساره ملامحها هذا آخر شخص تتمنى تشوفه !
كرهته قبل ما تشوفه من تدخلاته !
دفعها شيء تتغطى عنه
بس مو حلوه وهي أصلا جايه كاشفه !
ام محمد : شايفيتها لابسه العبايه
ما في داعي تستأذني !
مها رفعت حاجب ما عجبها ملامح ساره !
بس ما تكلمت اكتفت بنظره استصغار !!
دخل ابو ليث بهيبته واقترب من أم محمد يسلم عليها !
ما تدري ليه تحس وجهها ولع من الاحراج !
ما تدري كيف رح يستقبلها ؟!
متأكده ما يطيقها مثل أبو الوليد !
رفعت رأسها وهي تسمع صوته: كيف حالك يا ساره ؟!
ردت بصوت أقرب للخفوت : الله يسلمك !
ونزلت عيونها للأرض بهدوء،!
ام محمد : أخبارك يا أبو ليث عساك طيب !
ابو ليث بهدوء : الحمد لله ؟!
أشر على التوأم جالسات جنب ساره : ذول بناتك !
ام محمد بشماته : ايه بنات المجنون !
هز رأسه بثقل وما تكلم !
تحس الجو حولها يخنقها مو مرتاحه بالجلسه !
ناظرت مها تكلم أبوها باندماج !
اوجعها التمني !
تتمنى أمور كثيره لكن للحين ما تحقق شيء منها!
أشرت بعيونها لخالتها يرجعون !
ام محمد قاصده تكلمت بصوت عالي : علامك تناظريني كذا !
مستعجله اتصلي بعمار يرجعك !
أميره من مده ما شفتها ومشتاقه لها !
أميره طالعتها باستغراب : علامك مستعجله ؟!
ساره تنهدت الكل يطالعها : مره ثانيه نرجع !
ابو ليث طالعها : ما في طلعه إلا لما تتعشون معنا !
أول مره تدخلين البيت وما
قاطعته بلعثمه : الله يكثر خيركم بس
قاطعها بحزم: ما في مهرب !
تتعشون معنا يعني تتعشون معنا !
سكتت ما تدري من وين طلع لها كرم حاتم !
ما توقعت استقباله كذا !
عكس الكلام إلي كانت تنقله أم محمد لها !
إلا إذا كان أبو وجهين !!
ابو ليث طالع اميره بابتسامة :،سبحان الله الشبه بين مها وبين أختك كبير!!
مها عفست ملامحها بقرف : لااااا حرام عليك انا تشبهني هذي ؟!!
ابو ليث رفع حاجب : ليه كل هالغرور ؟!
صحيح في شبه بينكم !
بس خالتك اجمل
قاطعته أم محمد بعد ما عفست ملامحها : وين الشبه ؟!!
ابو ليث طنشها وهو يتأمل التوأم :،بس التوأم ما في شبه بينكم !
ما ادري شكلهم مألوف لي !
بس مو متذكر !
اميره طالعي من يشبهون ؟!!
اميره طالعت التوأم وابتسمت : ما أدري !
أنا أقول يمكن في لمحه من ساره ؟!
هز راسه بالنفي : لا لا
سكت وهو يحاول يتذكر !!
ما علقت ساره على الموضوع واكتفت بالسكوت !!
***
***
***
***
***
في اليوم الثاني بالجامعه !
عائشه بتحقيق غاضب : تدرين إني عائشه صديقتك وما تتكلمين ؟!!
وأنا الغبيه آخر من يعلم ؟!!
تكتفت ساره وهي رافعه حاجب : وهذي انت عرفت وش صار ؟!!!
دفتها على كتفها بقهر : يا برودك !
لذي الدرجه ما تهمك صداقتنا ؟!
ساره بملل ونظره بائسه للحياه ما تدري اليوم صحيت واليأس مسيطر عليها : أنا ما يهمني أحد !
أنا نفسي ما تهمني !
مو طايقه نفسي !
اتركيني بحالي !
عائشه طالعتها ومدت بوزها : الحق علي جيتك مشتاقه تقابليني كذا !!
يا ليت جدتك للحين عايشه وتطقك حتى تحترميني مره ثانيه !
تنهدت ساره واجتاحتها موجة حنين لجدتها الراحله،!
عائشه مسكت يدها بحنان : الله يرحمها !
مشتاقه لها ؟!!
طالعتها ساره و امتلأت عيونها بالدموع !
طالعتها عائشه وهي تشوف عيونها تشكي حالها وضيقها
ساره بصوت مخنوق : عائشه اتركيني بحالي
وانسي إنك تعرفيني من قبل يكون أحسن !!
وحملت أغراضها وغيرت مكانها !!!
***
***
**
***
***
***

مرت الايام بنفس الروتين من بعد البوابه
احتكاكها في بيت ابو الوليد أصبح معدوم !
حتى أبو راكان ما تزوره أبدا !
اليوم عندها امتحان قررت تطلع قبل الامتحان تراجع الماده !
وقت الامتحان دخلت القاعه وقلبها
يدق طبول !
تحس كل إلي درسته يتبخر من عقلها !!
اخذت نفس تشجع نفسها وهي تردد بعض الأدعية !
ناظرت عائشه وهي تدخل صدت عنها !
من بعد ذاك الموقف كل وحده بطريق !
خلاص قلبها اوجعها !
ما تبغى تفتح قلبها وبعدها تنصدم بمواقف تجرحها !
إلي فيها كافيها !
يكفي زوج أميره إلي يخطط يخطبها لأخوه !!!
والمشكله محمد ساكت يقول كل شيء بوقته حلو !
متأكدة لوى ذراع محمد بالفلوس ومحمد ما هو قادر يرفض... لكن حامض على بوزهم!!
رجف قلبها بدخول سعود ومعه الأوراق !
عفست ملامحها للحين محبطه بعد ما خطب !
كم تمنت تقهر أبو الوليد !
بس مو كل شيء تتمناه يتحقق !!
زفرت وطالعته وهو يغير أماكن الطالبات ويوزعهم !
رددت بنفسها «يا رب ما يقولي قومي»
عفست ملامحها بإحباط :،ساره اجلسي على مقعد رقم 12
هزت رأسها وهي مستغربه بالرغم من معرفته بدراستها ما خبر أحد عنها !!
غريب سعود انسان هادئ وما يتدخل بأحد !
إلا يوم الشاليه لما تكلم عليها ومن بعدها ما تدخل !
يمكن خاف على أخوه وأخته منها !
لحظه الشاليه !
الشاليه
«الجوال »
الحين تذكرت اخر مره كان معها بالشاليه !
اكيد نسيته هناك !!
قررت بعد الامتحان تتصل بعمار يكلم ابو الوليد !
رفعت عينها لما تكلم : علامات المشاركه نزلتها !
تحمست تكمل الامتحان وتشوف كم حط لها بالمشاركه !!
بعد وقت طويل كملت وبداخلها خوف من الرسوب !
رفعت رأسها واستغربت ما بقى غيرها بالقاعه !
جمعت أغراضها وتوجهت تسلم ورقتها !
حطت الورقه وهمت بالمغادره بس وقفها صوته الهادي : ساره
طالعته وقلبها يرقع طبول تتعامل معه هنا برسميه وبطريقه مختلفه هنا دكتورها اما بالبيت يختلف الوضع : نعم دكتور ؟!!
سعود وهو يعدل النظاره : صحيح في معرفة بيننا
بس هذا الشيء ما يحملك تهملين دراستك !
علاماتك متدنيه فلا تتأملي النجاح !
أنا أعطي كل طالب حقه !
اتمنى تكونين جاوبتي زين بالامتحان !
حتى تحصلي على علامة النجاح !
تحس وجهها انتفخ وهي تسمع كلامه
وبحده ردت : متى ما طقيت مكتبك وقلت لك يا دكتور نجحني وقتها تعال تفلسف !
العلامه إلي من جيبتك ما أبغاها
ناظرته بغضب وطلعت من القاعه وهي تشتم فيه بنفسها !!!
*
**
**
**
جلست على احد المقاعد وفتحت النت تشوف علامة المشاركه !
تهز رجلها وللحين متنرفزه منه !
غمضت عيونها لثواني وفتحتهم بعدم تصديق
وهي تشوف علامة المشاركه «4»
تبغى تكسر الجوال بيدها !
لمعت الدمعه بعينها من القهر !
كيف يحط لها كذا !
ولا مره تغيبت عن محاضراته !
صحيح ما تشارك بس
قطعت افكارها وهي ناويه تتصل بعائشه !
لازم تعرف كم علامتها حتى تعرف تتفاهم معه !
لحظه من وين تجيب رقمها !
لمعت بعقلها نسرين أكيد معها الرقم !
وبحركه سريعه أرسلت لها رساله !
خلال دقائق وصلتها الرساله !
تحرك اصابعها بآليه اتصلت على عائشه وقلبها يدق طبول !
أخذت نفس وهي تسمع صوتها الهادئ : الو
ساره بانفعال : عائشه كم اخذتي بالمشاركه عند سعود ؟!
عائشه بضيق : 6 ليه تسألين ؟!!
ردت ساره بانفعال : حسبي الله عليه !
عائشه بإحباط : تراه خسف أغلب القاعه بالمشاركة !
انت وينك ؟!
ساره بقهر وصفت لها المكان !
اخذت نفس تهدي نفسها وهي تشوف عائشه متوجه لها !
جلست عائشه بطفش من الامتحانات : الله يستر ما احمل مواد !
ساره بقوه : لازم ما نسكت له وغصب عنه يحط لنا علامه مثل العالم !
وإلا نمسح فيه الارض!
عائشه بإحباط : ما جاءت على سعود
ترى اخذت علامة مشاركه بماده ثانيه
تخيلي 3
اعلى علامه بالقاعة 5
يا كرهي لهذا الدكتور يتحدى الطلاب احد يحصل عنده علامه !!!
وكأنه يوزع العلامات من جيبه!!
ساره عقدت حواجبها : غريبه هذا الفصل علاماتك متدنية ؟!
كنت الأولى على القسم وش إلي تغير ؟!
زفرت عائشه بقرف : يقطع الزواج وسنينه !
ساره رفعت حاجب : مو مرتاحة مع ماجد ؟!
عائشه خزتها : ليه تسألين ؟!!
ساره بأريحيه ترد : أحسك مو مرتاحه معه !
وما في تفاهم بينكم ؟!
وأكبر دليل تراجع مستوى دراستك ؟!
عائشه زفرت بإحباط : اتركيني بهمي
اليوم زفني بابا زفة محترمه !
يقول وين إلي تبغى تكون امهر طبيبه ؟!
وين وين وين ؟!
بغيت اقول له «وين وين رميتني »
ساره بعفويه : غريبه مع إنه ماجد حبوب !
خزتها عائشه بعيونها : وقدامي تقولينها ؟!
حبتك القراده يالبعيده !!
ابتسمت ساره على تعليقها : مو قصدي
ماجد اعتبره مثل عمار وسلمان !
خلينا بسالفة الدراسه !
وابن عمي العميد ما علق على مستواك ؟!
عائشه بضيق : زعلان مني !
يقول مقصره بدراستي !
ما يدري إنه ولده يسد النفس عن الدراسه ؟!!
وبتحقيق : أنا متزوجه وإلي عندي اقرفني حالي وقصرت بالدراسه !
وانت ليه علاماتك كذا ؟!!
تنهدت ساره بوجع وبعدها أشرت على رأسها : إذا هذا مشغول 24 ساعه كيف يركز بالدراسة ؟
عائشه بإسلوب مرح : وش شاغلك يا بعد عمري ؟!!
يا حظك ما عندك زوج ينكد عليك !
إلا إذا للحين عايشه على أطياف أبو العيال ؟!
وبفضول : كيف كانت حياتك معه ؟!!
لو تشوفينه الحين وش تكون رد فعلك ؟!
والأهم حبتيه ؟!
ساره بدون نفس : يمه من فضولك !!
أشوفه ؟!
مستحيل !!
عائشه عقدت حواجبها : ليه مستحيل ؟!
مو كنت تزورينه قبل الطلاق ؟!
والا هاجر من المنطقه كلها ؟!!
ساره بغموض : مستحيل أشوفه أو نلتقي !
عائشه مطت شفتها : تحبينه ؟!
سرحت بالسؤال وظلال الماضي تلوح قدامها !
إلتفتت بغموض ..وبألم نطقت: صفحة انطوت ليه نفتحها ؟!!
وبداخلها تصرخ مستحيل تنطوي حتى تحط النقاط على الحروف !!
**
**
**
**
أم عزام ما هي مقتنعه : أنا أقول لو زوج اميره يطلع من السالفه يكون أفضل !
نوره تبغى الفكه من ساره : اكيد يبغى مصلحتها بالزواج !
تراه ما هو متهور أو يبغى يزوجها لمصالح له !
يبغى مصلحتها وللحين ما كلم أخوه ولا أهله
يبغى يفكر زين وبعدها يعرض الفكره على أهله !
نسرين :،بس ساره ما تبغى الزواج !
وما رح تسمح لأحد يدمر حياتها أكثر !
ام عزام : مو شرط يمكن تعيش مرتاحه بعد الزواج !
يكون لها بيت خاص لها وزوج مجبور ينفق عليها !
الحين محمد يرسل لها الله يطول بعمره
ما أحد يضمن المستقبل !
ترى العيشه عند زوجة الأخ ما هي حلوه !
للحين اذكر ويوجعني قلبي لما كل وحده قفلت بابها ورفضت دخولها عناد بالثانية !
والضحيه ساره !
إن شاء الله ربي يعوضها بالزوج إلي يسعدها !!
نوره من قلبها : آمين وبنفسها «زوج غير عبدالله»
ام عزام باستغراب : يقولون سعود تفركشت خطبته ؟!!
نوره هزت راسها : ايه البارحه ؟!
ام عزام : وش السبب ؟!
نوره مطت شفتها : ولد عمها المسافر حجر عليها !
واهلها اعتذروا
قاطعتها ام عزام : قولي الحمد لله ما ملك عليها !
نوره وهي تشرب العصير: الحمد لله
**
**
**
**
**
شروق بقلب ميت ناظرت امها : متى اتخلص منها ؟!
من يوم ما قالوا طلقها المجنون وهو طول وقته ساكت وسرحان !
وقسم بالله لو يرجعها لذمته إلا انجلط !
ابو الوليد بهدوء : بعيد عنك الشر !
لا تفكري بذي السالفه وتخربين بيتك بيدك !
ولا تفتحين مجال لزوجك يفكر بغيرك بإسلوبك السيء !
امسكي نفسك واهتمي بزوجك وعيالك وما عليك من أحد !
والحين ارجعي للبيت واستقبلي عبدالله بابتسامه جميله وبدون كشره ونكد وأسئلة ما لها داعي !
شروق بوجع : إن شاء الله يبه !
ام الوليد تناظر شروق بعد ما طلعت مع عيالها : والحل مع هالسالفه ؟!
رأسي صدع من هالموال !!
ابو الوليد وهو يطالع سعود : ولد أختي حاطها برأسه مثل ما أشوفكم!
لكن حريمته يوصل لها !
وبجديه اكبر : سعود وش رأيك فيها ؟!!
فتحت ام وليد عيونها بعدم تصديق : انجنيت ؟!
ابو الوليد بحده : عاجبك وضع ابنتك كل يوم تذبل ؟!!
ام الوليد باستنكار : تعدل وضع شروق على حساب سعود ؟!
ابو الوليد رفع حاجب : البنت ما هو قاصرها شيء !
وإذا على أخوها خلف لا ينجب منها سعود !
ام وليد بمقاطعه : تبغى ولدي ما يشوف العيال
قاطعها بضجر : يا ليت تفهمين قبل ما تقاطعين !
رح يتزوج وحده ثانيه يختارها بنفسه !
ومن الحين تعدل بينهم يا سعود !
إذا مو قد هالمسؤوليه ما رح نقدم على ذي الخطوه !
وش رأيك ؟!!
تنهد سعود وطالع أبوه بهدوء : كنت أبغى افاتحك بالموضوع قبل ما تتكلم !
أتزوجها وأريح نفسية شروق وبنفس الوقت اكسب أجر بالتوأم !
ام الوليد ما عجبتها الفكره : مثل ما أرضى لبناتي ما أرضى عليها !
تبغى تتزوجها بس لا تحط فوق رأسها ضره !
ابو الوليد بهدوء حازم : رح نحط فوق رأسها ضره وبرضاها بعد !
وبعدها إلتفت لسعود : أنا أضبط الموضوع بس اتمنى ما تطلع السالفه من هنا !!
وخاصه انت يا أم الوليد !
**
**
**
**
طلعت تركض وهي تلحق خلف سوار بسرعه
مسكت طرف فستانها الخلفي
وامسكت فيها وسحبت منها الجوال وبحزم : كم مره قلت لك ما تمسكين الجوال ؟!!
سوار تكتفت بزعل : ليه أنا ما عندي جوال ؟!
خزتها ساره : وش تبغين بالجوال ؟!!
سوار حاست بوزها بطفوله : أكلم صديقتي !
ضحكت ساره على تعليقها : مين صديقتك ذي ؟!
أعطيني رقمها ؟!
سوار بزعل : ما يخصك !
أعطيني الجوال أكلمها الحين؟!
ضحكت ساره على أسلوبها : وتتأمرين بعد !
وصلها صوته من خلفها : دوم هالضحكه !
إلتفتت له وبروقان : هلا سلمان !
سلمان يقرص خدود سوار : تبغين جوال ؟!
رفع نفسه وهو يغمز لساره : هالبنت مو مضبوطه من الحين تبغى جوال وحركات !
ساره بتهديد مازح : ترى ما أسمح لك !
سلمان بطفش : وين جدتي؟!
ردت بدون نفس : دورها بالبيوت تلاقيها من بيت لبيت !
سلمان بكسل : صادقه جدتي ما تجلس بالبيت !
وش رأيك تتغدين معنا بالبيت !
ترى أمي مشتاقه لك !
وحضرتك مو مستعده تزورينا !
جيبي قردتك الثانية وامشي معي
قاطعته سوار : أنا مو قرده !
سلمان يضرب على صدره بتمثيل: يمه يمه من هالجيل !
يفهمون أكثر مني!
ساره دفته بخفه : على بالك بناتي غبيات مثلك !
رد بابتسامة : احم احم بصراحة توقعت يكونوا التوأم نفس الغباء إلي كنت فيه !!!
مسح مكان الضربه على كتفه : أهون عليك تضربيني ؟!!
خزته بعيونها : أقول تلايط من هنا
مسكها من يدها : والله والله إلا تتغدين معنا اليوم !
طالعته بقلة حيله : انتظر اقفل البيت دقيقه !
نادت على حور وقفلت البيت وطلعت لسلمان إلي ينتظرها !
سلمان أشر بيده : تعالي من هنا ما في داعي نطلع من الشارع !
ساره بعناد : لا نطلع من البوابه على الشارع وبعدها نروح لبيتكم !
اشر لها وهو عافس ملامحه من عنادها : تفضلي يا سندريلا !
**
**
**
عفست ملامحها اول ما شافت ساره داخله مع سلمان ومندمجين مع بعضهم !
عدلت ملامحها لما تذكرت وجود عزام !
ما تبغى يصير بينهم زعل مثل ذيك المره !
ضاعت بين زوجها وأبوها وإلي متأكده متفقين مع بعضهم ضدها !
وبطلوع الروح حتى وافق عزام يرجعها
بعد ما وعدته ما تتكلم على ساره وما تشتكي منها ساره !
اضطرت بالغصب توافق على شرطه !
وانقهرت بزياده لما شافت عزام يبتسم لساره : هلا والله بسوير القاطعه !
ساره سلمت على عزام بهدوء : انت القاطع ما تزور خالتك !!
كش عليها بمرح : ما بقى الا انت تكونين خالتي !
تراني عمك عزام إذا نسيت أذكرك !
وغمز لها بابتسامة !
سلمان بمرح : تراها ماخذه بنفسها مقلب !
ساره سلمت على ام عزام : شوفي عيالك ما يحترموني !
ام عزام ضحكت وما تكلمت !
بعدها سلمت ساره على نوره بسرعه وإلتفتت على سلمان : عيالي طولي
قاطعتها نسرين بابتسامه وهي تدخل : خالتي الحلوه عندنا !
اشرت عليها ساره : هذي الناس الفهمانه يا عالم !،
تعالي أعطيك بوسه !
ضحكت نسرين بعفويه : استحي !
وبتحقيق : غريبه جايه هنا
تنازلت ودخلت بيتنا ؟!
ساره جلست جنب أختها : عزمني ولد اختي على الغداء !
وين اسيل وخلود
قاطعها عزام : مو شايفه مرتاحين من بزرانهم !
طالعت ساره التوأم يلعبون مع عيال عزام : وبزرانك
قاطعتها ام عزام بابتسامة : عيال عزام ما يتقارنون بأحد !
سلمان تنرفز : ليه تحبين عيال عزام أكثر شيء !
وقسم بالله لما أتزوج إذا فضلتي عيال عزام على عيالي إلا
نسرين بضجر: تزوج الحين وبعدين فكر بالعيال وغلاتهم
قاطعها بقرف : انت لا تتدخلين !
وين أبوي الحين ترى عندنا ضيوف وأنا عازمهم على الغداء !
وأشر على ساره !
ام عزام بنبره عاتبه تطالع ساره : ساره من أهل البيت وما هي ضيفه !
ما أدري ليه مصممه تجافينا كذا ؟!!
حركت شفتها ترد بس سبقها عزام : لا تبررين ترى الحق عليك !
أمي أختك الكبيره المفروض تزوريها كل يوم او بين فتره وفتره تشوفينها
أم عزام تقفل الموضوع : اتركها على راحتها يا عزام !
**
**
**
**
انتهت أيام الامتحانات بعد تعب وعناء !
رفعت شعرها بالرباط وطالعت عمار وهو داخل البيت رد السلام بدون نفس !
عدلت شعرها وردت السلام وهي رافعه حاجب : وعليكم السلام !
جلس مقابل لها بطفش ومسك الريموت يغير القنوات !
عيونها تراقب حركاته مستغربه كم يوم متغير في شيء شاغل فكره !
وإذا سألته وش فيه يرد عليها ببرود ما في شيء !
تكلمت وهي تحوس بوزها : يقال مندمج بالتي في!
طالعها بغموض وتنهد : وش تبغين ؟!
ساره بهدوء،: أحس عندك سالفه تخصني ومخفيها عني !
صفر بإعجاب ساخر : واوووو عندك الحاسه السادسة ما شاء الله !!!
احتدت نظراتها : بدون سخريه أنا أتكلم بجديه !
والحين تكلم وش فيه ؟!!
طالعها بجديه لثواني : ومستعده تسمعي كلامي وبدون ردح ومقاطعه ؟!
ساره بلقافه وقلبها يدق متخوفه لأنه هالشيء يخصها : تكلم وما عليك !
تنهد وهو يناظرها : رح أكلمك بالموضوع من باب الفضفضة !
وإلا الموضوع بالنسبة لي منتهي ومستحيل يتم !
ساره انحرقت أعصابها من مقدمته : إلي هو
عمار طالعها وابتسم بدون نفس على انفعالها وحب يثير أعصابها : افكر اغير أثاث المطبخ قبل ما أتزوج
سكت وهو يتصدى بيده الخداديه : عمار يا زفت !
تكلم مثل العالم والناس !
تكلم بعد ضحكه قصيره : أعصابك يا حلوه !
طالعته بحده : خلصني وقول إلي عندك !
عمار تحولت ملامحه للجديه : اسمعي يا ساره !
خالي ابو الوليد كلم محمد يبغى يخطبك لسعود
قاطعته بعدم استيعاب : نعم ؟!!!
عمار يعيد الكلام بطريقه بطيئه: يبغى يخطبك للدكتور سعود !
ساره تحس نفسها مو مستوعبه الكلام
ردت بغضب : خطبه القرد إن شاء الله !
اففف من هالخال الغثيث يظن الناس تمشي على هواه !
قاطعها وهو يؤشر بيده : وطي صوتك !
وبحده : أنا وش قلت لك ؟!
ما أبغى ردح !
ما تفهمي الكلام ؟!!
أخذت ساره نفس عميق وعيونها على عمار إلي يتكلم : قلت لك مستحيل يتم الموضوع وخبرتك حتى يكون عندك علم وما تكونين مثل الاطرش بالزفه !
رفعت حاجب : و ليه رافض انت سعود ؟!!
عمار بهدوء : أنا مو رافض سعود !
أنا رافض الموضوع كله !
لا سعود ولا غيره !
قاطعته ساره بردح : نعم ؟!
وش علاقتك حتى ترفض الموضوع ؟!
هذا الشيء يخصني أنا !
و حط خط أحمر تحت «انا »
إذا بغيت أتزوج رح أتزوج وما حنتظر موافقتك !
هذي حياتي وأنا ارسمها مثل ما أبغى
عمار تنرفز منها : صدق ما تستحين على وجهك !،
قدامي تقولين هالكلام !
انسي سالفه الزواج واهتمي بالتوأم !
ما هو ناقصنا إلا الخامس يشرف !
حتى نصير علكة بحلوق الناس !
وقفت ساره بانفعال : الحين رح اكلم محمد
قاطعها وهو يسحبها بطريقه سريعه ويرجعها لوضع الجلوس : محمد ما يبغى توصلك السالفه !
بس أنا لساني طويل !
الحق علي إذا خبرتك بشيء مره ثانيه !
زفرت بقهر وطالعته : عمار للمره الأخيره انبهك !
لا تتدخل بأمور حياتي !
هذا انت خطبت وما تدخلت بشيء بالرغم إني عمتك !
رجاء لا تتدخل بحياتي وما تتخذ قرارات بالنيابه عني !
فتح عيونه بشك : انت تبغين سعود وموافقه عليه ؟!!
حاولت تظهر قناع البرود : موافقه أو رافضة هذا شيء راجع لي وما يخصك !
تركته وتوجهت لغرفتها !
تنهد وهو يفكر بحالها !
معقول موافقه على سعود ؟!!
ما يستبعد عنها بعد ما أخذت عنده ماده !
أفكار البنات بالنسبه له غريبه!
عقليا لو بنت ناضجه مرت بالحياه إلي شافتها ساره إلا عافت الزواج وسنينه !!
ما يقدر يفهمها كل ساعه لها حال !!!
**
**
**
قفلت الباب بقهر من عمار ومن ابو الوليد !
وش دخلهم بحياتها !
متأكده ابو الوليد يبغاها لسعود حتى تكون له سلطه عليها ويذوقها الويل !
بس مستحيل تحقق له مناه !
ورح تبقى شوكه بحلقه وحلق أخته !
للحين عقلها مو قادر يستوعب !
سعود يخطبها ؟!!
تمنت هالخطوه حتى تقهر أبو الوليد !
لكن الحين مو مرتاحه من هالسالفه
وقلبها قارصها !
أكيد عندهم شيء !
وإلا ما تنازلوا وخطبوها !
لازم تكلم محمد وتفهم السالفه منه !
ما رح تستعجل متأكده محمد اليوم وإلا باكر رح يتصل فيها ويخبرها !
لذاك اليوم لازم تجهز الرد إلي يبرد حرتها بأبو الوليد !!
المشكلة ما أحد خبرها أو لمح عن ذي السالفه ؟!!
تأففت بضجر من تزاحم الأفكار المتضاربه بعقلها !
إلا شيء واحد أجمعت عليه هالخطبه مستحيل تتم !
**
**
**
**
عائشه بضجر من الجلسه بالبيت
كل شيء عنده لا !
وبفكره طرت لها وبسرعه ابتسمت مجامله وهي تشوفه ناوي يطلع : ماجد!
طالعها بضجر : نعم !
عائشه بنفسها «مالت عليك انت وهالكشه» وبمجامله :ينعم حالك !
امم عندي طلب !
ماجد بضجر أكبر : يا كثر طلباتك ؟!
خزته بقهر : وكلها مرفوضه !
قاطعها بملل : وش طلبك ؟!
عائشه بابتسامة : خاطري ازور ساره وأجلس معها !!
ماجد رفع حاجب بابتسامة يغيضها : خلاص نويتي تخطبينها لي ؟!!
عائشه بغضب : ماجد !
ضحك على وجهها إلي تحول أحمر من الغضب : أعصابك !
أقول اجلسي بالبيت يا زين الجلسه بالبيت !
ليه ما تزورك حضرتها ؟!
وإلا حضرتها سندريلا والكل يراكض خلفها !
طالعته وهي رافعه حاجب : علامك قالب عليها ؟!
طول وقتك محامي دفاع عنه !
الظاهر الشهر هذا ما دفعت لك أجرة المحاماه !
قاطعها وهو يدفها للخلف بخفه : بالضبط ما دفعت لي أجره !
جكر بلسانك الطويل ما رح تطلعين !
مع إني كنت ناوي تروحين لها !!
قاطعته بقهر : ما أبغى اروح !
وتركته وتوجهت للغرفة !
تكلم بصوت ساخر مرتفع : حركاااااات !
دخل خلفها وطالعها جالسه على كرسي التسريحه : كل شيء ولا زعلك !
تراني اموت لما أشوفك زعلانه والكشره مرسومه على وجهك !
علشان كذا
انا حطيت لك ملابس تبغى كوي !
تتسلين فيهم لوقت رجوعي حتى ما تملين يا زوجتي العزيزه !
وضحك بصوت مستفز وطلع من الغرفه !
قبضت يدها بقوه وهي ماسكه نفسها ما تكسر رأسه !
**
**
**
**
ام الوليد طالعت حولها وبعدها إلتفتت على زوجها بصوت هامس : وش رد عليك محمد ؟!
ابو الوليد مط شفته بسخريه : تعرفين البنت اول مره يزوجونها ويبغون وقت !
ام وليد عقدت حواجبها : ذول من عقلهم يبغون وقت للتفكير ؟!!
طيب محمد موافق ؟!
ابو الوليد هز كتوفه : ما ادري عنه !
قال يفكر ويرد لي الخبر !!
ام الوليد بضيق : أخاف تظلم ولدي وساره بذي الزواج !
ابو الوليد بهدوء واثق : سعود قدها وما رح يظلم احد !
وتحمد ربها أحد يأخذها مع بناتها !
ام الوليد : أنا أقول تتريث بالموضوع ترى أبو الليث يبغى يخطبها لأخوه
إذا خطبها كذا ترتاح شروق وما تظلم سعود بهذا الزواج !
ابو الوليد طالعها بسخريه : ومين قال إنه أخوه يوافق عليها !
تراهم يهمهم المناصب !
وانت خالتك تعرفينها أكثر مني !
تهمها المظاهر كثير !
كم مره قالت لك إنها طلبت من ابو الليث يطلق اميره
علشان إخوانها ؟!
بس أميره لها مكان بالمجتمع
يجبر الجميع يحترمها!
أتوقع أبو الليث يبغى يزوجها حتى يضمن  ما يكون له عديل متخلف او مجنون !
كذا تكون قريبه من عينه !
ام الوليد بحيره من كلامه : تتوقع محمد يوافق على سعود وإلا على أبو نورس ؟!
ابو وليد بتأكيد : رح يختار أبو نورس بدون شك !،
تراه ما يقدر يرفض طلب لزوج اميره !
**
**
**
طلعت للحديقه وهي رايحه جايه !
نفسها تروح وتمسح فيه الارض !
الحين كرهته من قلب
متأكده جاوبت زين بالامتحان النهائي !
ينزل لها علامه على حفه !
علامه وترسب ؟!!
بعد سواد وجهه جاي يخطبها !
اخخ لو تروح وتمسح فيه الارض ؟!!
مترددة على ذي الخطوه !
تحس نفسها تموت لو ما طلعت حرتها فيه !
تقدمت خطوات بهدوء وابتسمت بنفسها وهي تشوف سوار واقفه مع سعود !
بدون ما تقترب كلمت سوار بحده : كم مره قلت لك ما تكلمين ناس غريبه !!
تعالي هنا !
مسك يد سوار بلطف وتوجه لساره بهدوء وبإسلوب ناقد : دامك خايفه على البنت من الناس الغريبه ليه تاركيتها تلعب في بيتنا !!
ساره بحقد : يا حبك للفلسفة !
لا تمثل دور الأب الحنون ترى مو لايق عليك الدور !،
يالظالم !
والله ما أسامحك على ذي العلامات !،
إذا كنت تكرهني تحط حرتك بعلاماتي ؟
سعود ناظرها ما ينكر إنه البنت ما يعيبها إلا  شيء واحد  أخوها خلف ...ينتظر اللحظة إلي يملك عليها ويمشيها على الصراط المستقيم ..ما يدري وش معنى حركتها بالجامعه تتغطى وخارج الجامعه تكشف .. والأهم ليش ما أحد يعرف عن دراستها ...نطق ببرود : أنا أحط للطالب العلامه إلي يستحقها !
بعيد عن العلاقات الشخصيه !
وهذا مستواك وعلامتك إلي تستحقينها !
إلا إذا كنت تنتظرين أحل الامتحان عنك !
هذا شيء ثاني !
انقهرت من اسلوبه حسسها إنها غبيه : ما بقى إلا انت تقيم مستواي !
زاد قهرها لما تركها وغادر المكان بهدوء !!
طالعت سوار بتهديد : إذا شفتك تكلمين هذا أذبحك بيديني !
نوت ترجع لكن حست رجلها ثبتت بمكانها وهي تشوف عمار ومعه ومحمد !!!
**
**
**