رواية اقدار الفصل الخامس والعشرون 25 - بقلم امي احمد

جالسه وما هي مرتاحه لرجوع محمد
بهذا الوقت !
ام محمد بعد السؤال عن الحال والأحوال سألت محمد باستغراب : غريبه راجع
لوحدك بهذا الوقت ؟!!
محمد بهدوء بدون ما يناظر ساره : عندي شغل هنا وراجع إن شاء الله !
ام محمد أشرت على ساره : بما إنك هنا
علم أختك تحترمني وما تفشلني قدام الناس !
وكاد تسمع منك الكلام !
قاطعها محمد بهم : إن شاء الله !
ساره باعتراض :أ
محمد بمقاطعه : ساره خلاص فكينا من هالسالفه !
وطالعهم بجديه وخاصه أمه: على فكره ساره رح تسافر معي وتستقر عندي !
طالعته ساره بصدمه من كلامه ...ما توقعت رجوعه لهذا السبب!!!
ام محمد اعترضت : نعم ؟!!
ليه تأخذها ؟!!
خلها تنطق هنا أفضل لها !
وش جابرك تتحمل بناتها بعد !!
محمد بحزم : خلاص قررت وانتهينا
تركتها هنا وكانت هذي نهايتها !!
من باكر أجهز أوراقها وبعدها تسافر معي !
حست الصدمه ألجمت لسانها ...
كيف تسافر ودراستها والبنات ؟!!!
طالعته وعلامات الصدمه للحين آثارها على ملامحها....
على بالها رجع يزوجها
إما لأبو نورس أو سعود ؟!!
أما تسافر معه ما خطر في بالها هذا الشيء !
حولت نظرها على عمار إلي يتكلم
بدون مبالاه من وجود ام محمد ما عاد يهمه سرية خطوبة سعود : وخطبة سعود يا عمي ؟!
محمد بحزم طالع عمار وبعدها ساره: أنا ما رح أحرمك من الزواج !
لكن تتزوجين واحد يقرب لنا
او تنضغطين يا ساره بالموافقه علشان بناتك
مستحيل يتم هذا الشيء !
قاطعته أم محمد بعد ما استوعبت الكلام : الحين الدكتور سعود يخطب هذي ؟!!
محمد بفخر : إيه خطب ساره !
له الشرف يخطبها !
أم محمد بعدم استيعاب طالعته وبزجر: كيف ترفض ولد أخوي !
محمد بلامبالاه : كل شيء قسمه ونصيب !
تركت أم محمد المكان بعدم تصديق للكلام إلي سمعته !
زفرت ساره بضيق بعد خروج أم محمد ..الأمور جالسه تتعقد وخاصه إذا  صمم محمد على سفرها ...نطقت باعتراض: وطدراستي ؟!
محمد بثقه : رح أخذ أوراقك وأضبط أمورك تكملين دراسة برا !
هزت رأسها بالرفض ..مستحيل ما تبغى ما تقدر  تسافر مع البنات : بس أنا ما أبغى أسافر الحين إلا بعد الدراسه !
محمد بحزم : كلامي يتنفذ بالحرف !
أنا أبغى مصلحتك !
أخاف باكر زوج اميره يخطبك رسمي لأبو نورس !
وما نقدر نرفض !
أنا أبغى أضمن لك مستقبلك عندي بعيد عن إلي حولك !
تبدين حياه جديده مع ناس جديده !
ما في صفحات ماضي سوداء بينكم !
صدقيني أحياناً العيش بعيد عن الأهل أفضل !!
بعض الاقارب ما تحصل من خلفهم إلا وجع الرأس !!
علشان كذا أنا حزمت أمرك
قبل ما تتكلم قاطعها جرس البيت !
طالع محمد عمار باستغراب : مين يجينا هالحزه ؟!
هز عمار كتوفه بعدم معرفه... وتحرك يفتح الباب !
وقف محمد وهو يشوف خاله أبو الوليد داخل ومعه أبو راكان !
بعد السلام جلس أبو الوليد وجهه ما يبشر بخير وبنبره عاتبه : وش هالكلام إلي وصلنا يا محمد ؟!
تأكد محمد إن أمه نقلت السالفه ومن المؤكد مع بعض البهارات !
وبهدوء تكلم : وش وصلك يا خالي !
أبو الوليد عيونه فقط على محمد : ترفضون سعود ؟!!
وش ينقص ولدي حتى ترفضونه ؟!
ردت ساره بتلقائيه وبداخلها انتعاش بعد هالرفض أرجع لها بعض من كرامتها الي هدرها وهو يشترط قدامها بالمستشفى..نطقت بنغزه : للأسف الشروط إلي حاطها ولدك ما هي موجوده عندي !
وأنا عندي شروط لزوج المستقبل .. وأهم شرط ما يكون عديم شخصيه قدام أهله ..وهذا الشرط ما هو موجود في ولدك!!
طالعها بنظره قويه.. ما في كلمة توصف وقاحتها ... بعدها طالع ابو راكان إلي تكلم بهدوء حازم : اتوقع ابو وليد وجه كلامه لمحمد !
محمد بهدوء طالع ساره : أتوقع الموضوع يخصها وهي أولى ترد !
أبو راكان بنفس الهدوء : أنا وأبو  وليد نتكلم معك انت ...ممكن نعرف أسباب الرفض بالرغم إنه سعود ما يتعوض وفرصه ممتازه لأختك !
محمد تنهد بحرج : سعود ما يعيبه شيء !
بس ما أشوف تناسب بينه وبين ساره !
وباختصار أنا ما أبغى أزوجها الحين !
ابو راكان بحزم : أنا عمها وموافق على سعود !
وش تقول بعد كلامي يا محمد !
محمد بضيق : يا عمي أنا
قاطعه أبو راكان بنبره غاضبه : دوم تقول لي انت عمي وكلمتك مسموعه !
وانت بمقام ابوي والحين أشوف العكس !
محمد انقلب وجهه : يا عمي انت على العين والرأس !
بس هذا الموضوع خاص بساره وما رح أحد يقرر عنها
قاطعته ساره بعد ما حزمت أمرها ..رفضها لسعود رح يجبرها تسافر بهذا الوقت ...والبنات ما تقظر تأخذهم ..وخلف الزفت ما له أثر ...ما لها حل الا تتلاعب عليهم لوقت تتخرج وتقدر تتصرف بنفسها .. نطقت بهدوء: أنا موافقه على سعود !
بس عندي شروط !
محمد طالعها بغضب ما يبغى يزوجها لسعود : ساره
عمار باعتراض غاضب ما يقل عن محمد : مستحيل يتم هالموضوع
ابو الوليد طالعهم وهو رافع حاجب : أشوف ولد أختي إلي رافض نسبنا ؟!!
محمد بترقيع : ما تفهم قصدي غلط يا خالي !
ابو وليد بزعل : وش تقصد بعد هالكلام ؟!
محمد والضيق باين بوجهه : أنا ما أبغى أزوجها لأحد يقرب لنا !
«الدم ثقيل على بعضه »
وما أبغى ترجع القطاعه مره ثانيه !
خلينا كذا حبايب بدون نسب !
ابو راكان بتدخل : عبدالله شيء وسعود شيء !
وأصابع يدك مختلفه !
فلا تربط السالفه هذي بالماضي !
وطالع ساره بهدوء : وش شروطك ؟!!
ابو وليد انتفخ وجهه وبداخله «تتشرط بعد»
ساره طالعت محمد الغاضب وبهدوء تكلمت : الحين خطبه بس بدون ملكه!
والزواج بعد سنه ونص !
ابو الوليد باعتراض : سنه كثير
قاطعته ساره بهدوء غامض : عادي ماجد استمرت خطبته اكثر من 5 سنوات !
ابو راكان باعتراض : بس ماجد ملك عليها !
ما هو مجرد خطبه !
كيف الناس تعرف إنك لسعود ؟!!
الا في حاله نعمل عزيمه كبيره ونعلن الخطوبه !
ابو الوليد باعتراض : ولدي مستعجل على الزواج !
وشهوله ينتظر سنة ونص !
ساره ببرود : ما رح أوقف بطريقه
يقدر يتزوج وحده ثانيه !
وأنا بعد سنة ونص نتزوج !
طالعها محمد بغضب من طلباتها ووقاحتها بالكلام عن الزواج وكيف تقبل بالضره : وش هالكلام ؟!
ردت بنفس البرود : وش فيها ؟!
مو اول وحده ولا اخر وحده زوجها يتزوج 2
عمار وقف بغضب: ترى باخت السالفه !
هذا إلي نحصله لما نوكل البزران بالكلام !
ابو وليد جاز له كلامها ما توقع تكون بذي السهوله السالفه...
ساره طالعته بحده : عمار لا تتدخل !
أتوقع الموضوع يخصني أنا !
لا تتدخل وأنا اتحمل نتائج اختياري !
طالعها محمد وحس إنه بدأ يفهم عليها
وسبب كلامها هذا !!
ما توقعها خبيثه كذا !
قرر يسكت ويشوف آخر هالتمثيليه !!!
**
**
**
طالع جده بعدم استيعاب : وش تقول ؟!
ابو راكان بهدوء مع التحفظ على بعض كلام ساره : سعود خطب ساره !
وآخر الأسبوع رح يكون عزيمه اعلان الخطوبه !
ماجد بعدم تصديق : خالي سعود خطب ساره ؟!
وبضحكه : الظاهر خالي وقع بصراحه ما ينلام !
قطع ضحكته وهو يشوف عبدالله يناظره بغضب !
ابو ماجد وهو يلعب بالسبحه : ترى هالسعود ما هو بعقله !
أعزب وتزوجها ؟!
ابو راكان بهدوء ظاهري : أبو ماجد اتمنى ما تتدخل أو تعلق بشيء ما يخصك !
وبنت عمك ما ينقصها شيء !
سلمان باعتراض مازح : خالتي تنخطب وما أحد يستشيرني ؟!!!
ابو عزام خزه : سلمان !
مسلسل السخافه ما نبغى نحضره !
كون جدي بذي المواقف !
سلمان بمزح : والله ما تضبط أكون جدك تراك ابوي إذا نسيت!
بلع ريقه لما شاف نظرات ابو راكان الغاضبه!
ابو تالا بهدوء : محمد موافق وإلا ساره ؟!!
ابو راكان بهدوء : محمد وعمار رفضوا بشده !
بس ساره موافقه وأعطتنا الموافقه بنفس الجلسه !
حس عبدالله وجهه قلب أحمر ..والتار تحرق قلبه ...وغادر المكان !!
ماجد بضحكه شامته تكلم حتى يسمعه عبدالله : يمه جيل بعبع!
ما يعرفون الوفاااااااء
ابو ماجد بنهر بعد ما طلع عبدالله : انت وش تبغى من عمك ؟!
كلما تشوفه تبدأ بالنغزات ؟!
ماجد بجدية : لأنه ضيعها من يده وفرط فيها !
والحين انبسط لما أشوف علامات الندم بوجهه !
ابو راكان بحزم : ماجد فكنا من المشاكل !
واترك المركب يسير !!!
عزام وقف وهو مقرر يروح ويسمع الموافقه بإذنه !
المره هذي مستحيل يقبل إنها تنجبر هلى زواج ما تبغاه !!!،
**
**
**
نوره وبداخلها نار صحيح تمنت زواج ساره بس ما يكون العريس أخوها : انت كيف وافقت عليها ؟!
ترى متزوجه قبلك 4 !!
وفوق هذا عندها عيال،!!
ام الوليد طالعتها : خلاص خطبها وانتهينا !
قفلي حلقك وخاصه قدام عزام تراها خالته !
شروق حست بتأنيب الضمير : وش ذنبك تربط نفسك فيها علشاني ؟!!!
وليد بمزح : تراك ماخذه بنفسك مقلب !
اقول لك اخوك وقع بشباكها !
طالعه سعود وابتسم بدون نفس : يا سخفك !
وليد بضحكه : اعترف كم مره مسكتك ترسم قلب الحب واسمك واسمها ؟!
وبطريقه مضحكه : ترى أبغى انبهك
انها طريقه قديمه لتعبير عن الحب وخرابيطه !!
ام الوليد ما عجبها كلامه : يا سخفك يا وليد وش هالكلام؟!
هذا الكلام تقوله لنفسك مو لسعود تراه رزين وثقيل وما عنده حركات المراهقين !
وخزته بعيونها !
ضحك بصوت عالي وبتبرير : حرام عليكم !
تراكم ظالميني !
الحمد لله زوجتي ما هي جالسه وإلا طلقتني !!
ام ماجد ما هي رايقه لسوالف وليد !
مقهوره من الخطبه !
كيف تقول قدام معارفها هذي زوجة أخوها ؟!
مستحيل تعملها !
بس الكل رح يعرف بالموضوع !،-
وإلي يقهرها أبوها وابو راكان إلي حركوا هالخطبه !
كله من شروق ومن دلعها ومساختها الزايده !
أكيد خطبوها حتى ما ترجع لعبدالله !
والضحيه سعود !
وش ذنبه ؟!
طالعت سعود يستمع لكلام وليد ويبتسم بهدوء !
ما في على وجهه اي علامه للرفض او ضيق من الموضوع !
معقول سعود يبغاها واستغل هالفرصه ؟!!!
***
**
**
**
**
*
فتحت عائشه عيونها بصدمه : خالك خطب ساره ؟!!
ماجد ابتسم :علامك منصدمه كذا ؟!!
مو مصدقه ؟!
عائشه جلست على الكنبه : بصراحه مو مصدقه !
ما أدري
يعني كيف
قصدي
سكتت ما هي قادره تجمع جمله صحيحه !
ماجد بضحكه : علامك فصلتي؟!
تنهدت وطالعته وللحين مو مستوعبه مع إنها شاكه بميل سعود لساره : بصراحه تفاجأت شوي !
متى الخطوبه والزواج ؟!
وبسرعه وقفت : اتصل ابارك لها !
وتركته وتوجهت لغرفة النوم تكلم ساره !
**
**
**
**
اميره تطالع الصاله وبعدها سلطت نظرها على ساره تتأملها وتتأمل الجلابيه البسيطه عكسها تماما تحب الملابس أحدث الموديلات بالرغم من كبر سنها !!!
تناولت القهوه من ساره و تكلمت بهدوء : ترى أبو الليث تضايق !
كان يبغى يخطبك لأخوه أبو النورس !
بس تبغين نصيحتي سعود فرصه حلوه
وأحسن من ابو نورس بألف مره !
يكفي إنه أعزب !
وتقدري تكسبينه بصفك !
أما أخو زوجي أعوذ بالله متسلط والحريم عنده مثل العبيد !
حتى إخوان زوجي كلهم نفس التسلط
ابو الليث أخف منهم بالتسلط !
متفهم أكثر منهم !
يعني بين قوسين إذا أخذت منهم لازم تكون شخصيتك قويه وما ترمين لهم واطي !
وإلا يستعبدوك !
وانت شخصيتك ما تناسبهم طيوبه وقلبك يلين حتى لو حقد !!
طالعتها ساره بقلب ميت : ما تفرق معي !
انا قرفت الحياة كلها !
اتمنى ألحق أمي وأبوي وارتاح !
ما ني قادره أحصل على الراحه ؟!
وكأنها محرمه علي !
اميره تنهدت : صدقيني رح يسعدك سعود !
ترى أعرفه رجال اجودي ورح ترتاحين معه ،!
قاطعتها بقرف : اي راحه وخالك هو المتحكم !
بدون ما أكون لولده وهو يحاول يفرض سيطرته علي !
كيف الحين !
بس ما أقول إلا الله يعيني على السنه والنص وبعدها افتك منه !
قاطعتها اميره بشك : وش سالفه السنه والنص هذي !
ساره انت ناويه
قاطعتها ساره وهي تهز رأسها بحقد : ايه ناويه افركش الخطوبه بعد سنه ونص !
أميره تحاول تفهم خطط ساره : طيب ليه هالمده بالضبط ؟!!!
اصلا ارفضي إذا ما كنت مقتنعه وما أحد يجبرك على الزواج !
ساره مطت شفتها بقرف : وزوجك المتسلط وش يضمني ما يضغط على محمد ويزوجني لأخوه !
وأكيد رح انحرج من محمد وما أقدر أرده!
أنا ما أبغى اتزوج خلاص أخذت نصيبي من الدنيا !
اميره بتفكير : تظني بعد هالمده حلوه حركتك ؟!!
طالعتها ساره بعجز : أعطيني حل ؟!
أنا ما أبغى أتزوج ولا أبغى أسافر !
أنا ما أبغى إلا خلف !
تابعت كلامها بوجع : أنا أحس نفسي ضايعه !
أخاف أتكلم بأمور وتنقلب على رأسي !
أنا ما أدري كيف أتصرف ؟!!
اميره عقدت حواجبها بحيره من وضعها : ساره تكلمي وش السالفه ؟!!
طالعتها ساره تبغى تتكلم لعله الحمل الثقيل على صدرها يزول !
بالرغم من المرات القليله إلي جلست مع أميره بحياتها !
لكن تحس بالراحه بالجلسه معها وشيء بداخلها يدفعها تبوح بكل ما في داخلها : انا
سكتت لما دخل عمار وماد بوزه شبرين !
سلم على أميره وجلس يطالعهم : علامك سكت لما دخلت !
اميره بانتقاد : علامك داخل وماد البوز 3 امتار !
إذا وجودي مضايقك
قاطعها وهو يغصب نفسه هلى الابتسامه : لك صدر البيت يا عمتي !
بس بعض ناس
قاطعته ساره بحده : جالسه هنا على قلبك وما رح اتزحزح !
تظن ما أدري إنك إلي اتصلت بمحمد يأخذني عنده !
علشان حضرتك تتزوج وتأخذ راحتك مع المدام !
لكن خذها على بلاطه جالسه على قلبك !
وما رح أسافر !
ابتسم بدون نفس على ملامحها المنفعله : صدق متخلفه !
تكذب الكذبه وتصدقها !
أنا أبغى بس تحلفين بالله إني تواصلت مع عمي محمد وقلت له كلامك السخيف هذا !
اميره بدفاع : حرام عليك تظلمين عمار !
ترى ما له علاقه بالسالفه !
ومحمد رجع من نفسه ما يبغى سالفة الزواج كلها !
عمار بحنق مظلوم : والله ما أسامحك على ظنك السيء !
ساره بحده اقوى : ولا أنا رح أسامحك على ظنك !
وقلدت صوته بسخريه « قولي تبغين سعود وفكينا »
عمار للحين مقهور من سالفة الخطوبه : خلاص قفلي الموضوع ترى للحين مو طايقك !
إلي يسمع يقول مو لاقيه لقمة الخبز حتى تتزوج كذا ؟!
وش قصرنا أنا وعمي محمد حتى تدفني نفسك عند خالي ابو الوليد!
وقسم بالله إلا يحرمك تشوفين النور !
والدكتور سعود ما يرفض كلمه لأبوه !
صدق هذي العيشه وإلا بلاش !
وبنبره متوعده : وقسم بالله إذا جيتي تشكين لي الحال إلا
قاطعته اميره : عمار !
أبغى أفهم ليه انت منفعل زياده !
عمار وبداخله نار : الناس العاقله تستشير الأكبر منها بذي المواضيع !
وأنا وعمي قلنا لها لا !
ومع ذلك بقوة عين وافقت !
غبيه وطول عمرك رح تبقين غبيه !
على بالك خطبوك معجبين بجمالك الفتان ؟!
ترى خطبك ابو الوليد حتى يبعدك عن خالي عبدالله إلي للحين عايش على أطيافك !
ما شفتي جدي ابو راكان مشى بهذا الموضوع بالرغم إنك كنت خطيبة ولده !
ومع ذلك مشى بالموضوع لأنه يعرف رجوعك لعبدالله رح يدمر ويخرب أكثر من بيت !
كذا ضحى بسعود وقطع أي طريقه يرجعك فيها !
وما انتهينا هنا !
على بالك فرحانين بنسبك وإنك زوجة ولدهم الدكتور الأعزب ؟!
لا يا حلوه فترة قصيره ويتزوج بنت الحسب والنسب ..
وانت ؟!!
رح تكونين مثل الجدار مالك وجود بحياتهم !
قاطعته ساره ببرود : وأنا موافقه أكون جدار !
طالع عمته أميره والدخان يتصاعد من رأسه : هذي إلي أبغى اذبحها وأشرب من دمها !
اميره بهدوء : اتركها يا عمار !
تراها مو صغيره !
طول عمرها الكل يحركها يمين ويسار
بدون إراده منها !
اتركها لمره وحده تتخذ قرار بنفسها !
انت نصحتها وإلي عليك عملته !
طالع ساره يبغى يذبحها من الغباء إلي ملتصق فيها بنظره !
ناظرته بابتسامه مستفزه !
عمار بغضب صرخ : شفتي بعينك حركاتها !
اميره صفقت يد بيد : لا حول ولا قوة الا بالله !
انتم بزران ؟!
أنا وش إلي جابني هنا !
وجعتم رأسي !
أروح أجلس مع امي في بيت خالي ابو الوليد أحسن لي !!!
***
***
***
بعد مرور يومين
جالسه بالحديقه لوحدها تطقطق بالجوال والتوأم حولها منشغلين باللعب !
من لما رجع محمد من السفر ما تشوفه كثير
منشغل مع صديق له بالعمل !
ما غابت عنها نظرات عدم الرضى على تصرفاتها !
أخذت نفس ورفعت نظرها عن الجوال
وابتسمت تلقائيا لما شافت عائشه متوجه لها !
ما أحد يتغطى بالعائله إلا عائشه ونوره !
اقتربت عائشه بفرح وناظرت حولها : أخوك او ولد أخوك هنا ؟!
توسعت ابتسامة ساره : ما في أحد خذي راحتك !
جلست متربعه وتناظر حولها : أخاف اكشف ويطلع بوجهي واحد من أخوال ماجد !
ساره بهدوء أشرت لها : اجلسي كذا
حتى لو طلع واحد منهم ما يشوفونك !
عائشه بعد ما عدلت جلستها ابتسمت بغمزه : حركات والله ؟!
وضبطتي الدكتور سعود !!
ساره بهدوء تغير السالفه : وش صاير بالدنيا وزرتيني ؟!!
عائشة مطت شفتها بقرف : جلطني !
طلعت روحي حتى وافق على هالزياره !
المشكلة إنه ما هو مستوعب إني من لما عرفت إنك ساره وقلبي مشتاق للجلسه معك !
بس انت سخيفه مو معبريتني !
ساره بإتهام : قول هالكلام لنفسك ما تركتي فرصه أكلمك !
من أول مره شفتك وانت تتعاملي معي بفوقيه وكأني أكلت حلالك !
مطت شفتها عائشه : كله من هالماجد !
وحكت لها عائشه السالفه !
فتحت ساره عيونها بصدمه: صدق إنه وقح !
ما بقى إلا هالغبي أناظره !
خزتها عائشه : صحيح انه جالطني وحاط المر بحلقي !
بس ما أسمح لك تشتمين زوجي !
ساره بضحكه : وصرنا ندافع !!
عائشه بإحباط : الحياة تبغى كذا !
لازم نرضى بنصيبنا !!!
وكل شيء قدره ربنا لنا نرضى فيه !
لأنه الوضع الأفضل لنا !
لو اطلعنا على الغيب لاخترنا هذا الحال إلي اختاره لنا ربنا !
هزت رأسها بموافقه : الحمد لله على كل حال !!!
***
***
***
***
***
ام محمد للحين النار بقلبها كيف ساره تتزوج سعود ؟!
وبعيون حاقده : خلاص رضختي لهذا الزواج ؟!!
أول بخته ويتزوج ساره المطلقه الأرملة ؟!!
طول عمرك يهمك المظاهر ... كيف تقبلين فيها زوجه لولدك !
الناس وش رح تقول عنك ؟!!
ام الوليد بهدوء : قولي هالكلام لأخوك !
ما أحد حط سالفة الخطوبه غيره !
وما أحد سامع لاعتراضاتي !
وحتى سعود وكأنه ما صدق أبوه يعرض عليه وعلى طول وافق !
ام ماجد بقهر ؛ لا تتكلمي بهذي السوالف ترى أحس ضغطي يرتفع !
وش فيها شيء مميز عن باقي البنات ؟!
ام راكان طالعتها : لأنك ما تحبينها ما تشوفين شيء مميز فيها !
دام سعود موافق عليها ليه الكلام الزايد الحين ؟!
الله يوفقها ويسعدها !
ام محمد بكره وحسد : لو يتم هالموضوع إلا انجلط !
ام راكان بحق : اتركي البنت بحالها وش تبغين فيها ؟!
**
***
***
**
**

ابو الليث طالع أمه : هذي البنت انخطبت لو سمعتي كلامي وافقتي عليها ؟!
مطت شفتها بفوقيه ما تبغى شيء يقرب لأميره : الله يوفقها !
وبعدين أبو نورس ما يعجبه اي بنت
ويبغاها بنت في بيت أهلها !
ابو الليث والسبحه بيده بسخريه : ويتشرط بعد !
تراها الرابعه !
ردت بنفس النبره المغتره : الرجال ما يعيبه شيء !
شوفه عنده 3 حريم ولا وحده تقدر ترد له الحرف !
وبعض ناس متزوجين وحده وما هم قادرين عليها !!!
ابتسم على مقصدها : وين عيالك ما أشوف أحد هنا ؟!!
وأبو الحريم ما أشوفه !
ردت بدفاع : عنده مشاغل !
هز رأسه بتفهم : وعيالك العوانس متى ناويه تزوجينهم ؟!!
هزت رأسها بعجز : ذبحوني ما أحد سامع كلامي !
واحد ما يفكر بالزواج يبغى يعيش حياته
والثاني يقول ما هو مستعجل على غث الحريم !!
ابو الليث وقف بهدوء : خلليهم !
اروح أجهز نفسي للخطوبه !
رفعت حاجب : غريبه ام الوليد ما عزمتني على الخطوبه !
ابو الليث بهدوء : ما في حريم بس عشاء للرجال !
طالعته بتفكير : ما أذكر اني شفتها من قبل !
رد بدون اهتمام : هي ما تحضر حفلات وهذي الخرابيط !
إستأذن وطلع من عندها !
وهي تحاول تستذكر إذا شافتها من قبل أو لا !
حتى الحفلات إلي تحضرها ام محمد تكون لوحدها !
آخر زواج لهم كان لابن ام ماجد !
اميره ما حضرته !
لحظه مها كانت موجوده !
بس ما شافتها وقفت مع أحد غريب !
او يمكن وقفت وما انتبهت !
هزت رأسها بالرفض ليه تفكر فيها من أصل !
يمكن الفضول ذبحها تشوفها لأنها أم وسيم كلمتها عنها !

**
**
**
**

يوم العزيمه اجتمع أغلب المدعوين في بيت ابو راكان !
محمد يناظر المتواجدين بهدوء بعد ما أعلنوا الخطوبه ويحس بضيق مو مرتاح لهذا الموضوع !
طالع سعود راسم ملامح الرضى على وجهه !
أما أبو الوليد مبتسم !!
تنهد وهو ناوي يكمل مراسيم هالخطوبه ويرجع يسافر !
حاول يبعدها عن الزواج بس أصرت !
رح يتركها تتخذ قرارها بنفسها !
رفع عيونه على الداخل بملامح ما تبشر بخير نطق بثقل ورزانه : السلام عليكم !
وقف أغلب الحضور للترحيب فيه
ابو راكان بترحيب مبالغ فيه : يا هلا يا هلا بأبو فهد !
ابو الوليد بترحيب وأشر على صدر المجلس : تفضل تفضل !
طالع الموجودين وبعدها بنبره قويه وجه كلامه لمحمد وأبو راكان: ما كانت هذي سلومنا يا ابو راكان !
طالعوه بعدم فهم !
وجه كلامه مباشره لمحمد : من متى يا أبو خالد الحرمة المتزوجه تنخطب وهي على ذمة زوجها !
أبو راكان عفس ملامحه : وش تقصد بكلامك ؟!
طالع ابو الوليد بنبره غاضبه: ترى إلي خطبتها لولدك واعلنت خطوبتها
تكون زوجتي على سنة الله ورسوله
قاطعه سلمان المندفع : كذاب !
توجهت أنظار المجلس لسلمان بانتقاد على كلامه !،
كيف يقول لأبو فهد هالكلام !!
ابو الليث وقف بحزم : احترم ألفاظك يا سلمان
سلمان ما اهتم لنظرات من حوله ولكلام زوج اميره وطالع ابو فهد بتكذيب : معك اثبات
قاطعه ابو راكان بنهر :،سلمان !
تقدم كم خطوه وهو يمد بورقه العقد لابو راكان !
تناول ابو راكان الورقه وبعدها
غمض ابو راكان عيونه لثواني وملامحه بهتت بعد هالفضيحه !
محمد لا يقل عنه يحس نفسه بدوامه والدنيا تلف فيه !
وش هالموقف المخزي والمحرج بنفس الوقت !
يزوج أخته المتزوجه !
وش تقول الناس عنه !
والمصيبه ما توقع ابو فهد زوجها !
وين المجنون إلي تكلموا عنه !
يحس نفسه بدوامه وما هو فاهم شيء!!
وبنبره ضعيفه يبرر موقفه قدام المتواجدين : بس انت طلقتها !
ابو الوليد ما هو قادر يستوعب ابو فهد متزوج ساره !!
ناظر من حوله وعلامات الدهشه والاستنكار بنفس الوقت مرسومه على ملامح أغلبهم !
وبنبره هاديه : تفضل اجلس خلينا نفهم السالفه !
رد بعدم رضى : اي تفاهم ؟!
تحرك محمد يجر اذيال الخزي من هالموقف وش يبرر لهم ؟!
كيف كذبت عليه ساره وقالت له إنه زوجها ميت !
لذي الدرجه مستخفه فيه ؟!!
كيف لعبت عليه وصدقها !
ابو الوليد ما هو مستوعب شيء: بس البنت انت طلقتها وعدتها خلصت !
طالعهم بقوه : ومين قال إني طلقتها ؟!
محمد وقف يبرر بكذب: أنا وقفت محامي للقضيه
وخبرني إنه طلقها أنا
قاطعه بحزم : قول لأختك تجهز نفسها ترجع معي الليله !
هز محمد رأسه وطلع من المكان يأخذ هواء بعد الاختناق إلي حصله !!!
ابو ماجد حلف عليه الا يجلس بعد خروج محمد !
ابو الليث طالعه بعدم استيعاب للموضوع !
عمار بهدوء حاول يرد الاحراج إلي حصلوه : دامها زوجتك للحين !
ليه تاركها طول هالسنين وما سألت عنها ؟ !
هذي هي سلوم العرب ؟!
رد بثقه : سلوم العرب ما تتدخل بين الحرمه وزوجها !
وقف عمار وجهه منتفخ وبهمس متوعد : يصير خير !
ابو راكان يحس نفسه متغيب عن إلي حوله !
كل اللوم عليها وعلى محمد وعلى المحامي النصاب !
اخذ نفس وبإعتذار : باسمي وباسم عيال اخوي نعتذر لك عن هالغلط !
حسبي الله على المحامي كيف كاد يعمل فتنه بين العائلتين !
هذا حال بعض المحامين النصب حتى يحصل كم فلس !
ابو الوليد يكمل : وأنا وسعود نعتذر لك !
ما كان عندنا علم سابق إنها للحين على ذمتك !
رد بهدوء وبداخله غضب كيف يخطبونها وهي على ذمته ؟!
حتى لو ما تعني له شيء
تبقى من ممتلكاته وما يسمح لأحد يتعدى عليها !
للصدفه سمع عن خطبة سعود من أمه وإلا كان مثل الأطرش بالزفه !!!
***
***
***
مستلقيه على السرير بارتخاء وتتصفح كتاب وعقلها بالخطوبه !
تتخيل لو فعلا كانت حقيقه !
وتكون عروس مثل باقي البنات !
قطعت أفكارها على دخول محمد وملامحه ما تتفسر !
جلست على السرير بعد ما حطت الكتاب جنبها !
استغربت لما توجه لها وعيونه الشرار يطلع منها !!
قبل ما تكمل تأمل بملامحه تفاجأت بالكف على خدها وبصوت غاضب : ليه تضحكين علي ؟!!!
ليه تخليني مسخره بالمجلس للي يسوى وإلي ما يسوى !
خليتني بحجم النمله !
ما أقدر أرفع رأسي !
ليه ليه جاوبي !
فاتحه عيونها باستنكار محمد يضربها ؟!
وعلى ايش تجاوب ؟!
ما هي فاهمه شيء !
ردت بحيره والدموع بدأت تتجمع بعيونها : ماني فاهمه عليك ؟!
تكلم والنار تغلي بداخله : كيف قلتي زوجك ميت ؟!
على أساس إنك أرمله ؟!
اخخخخخ ذبحتيني يا ساره !
فشلتيني قدام الي يسوى  والي ما يسوى!
وش الذنب إلي اقترفته بحقك حتى تجازيني كذا ؟!!
وبصرخه : وش ذنبي ؟!
بلعت ريقها وهي تناظره ما تدري وش سبب ثورانه وش دخل زوجها الميت بالسالفه !
وبصوت هادي : أنا ما كذبت زوجي ميت
قاطعها بقهر وهو يهزها من كتوفها وإلي يقهره اخو زوجها خاطبها وما تكلمت وبغضب : أنا الغبي إلي ما سألت مين زوجك بالضبط !
قالوا مجنون وصدقت هالكذبه !
هزها بأقوى : دامه زوجك ميت أبغى أعرف وش اسمه ؟!
طالعته وهي تشوف ملامحه الغاضبه !
شد على كتفها بقوه حاولت تفلت نفسها وبصراخ ردت : اتركني !
زاد من قوة القبضه : مين زوجك ؟!
حاولت تفلت منه وبحده : ما أعرف ما أعرفه !
روح إسأل أخوك الزفت لمين زوجني !
أنا ما أعرف حتى اسمه !
أنا ما أعرف شيء عن هالمجنون السكير !
ما أعرف إلا إنه مات وارتحت منه وجعلني قريب ارتاح منكم كلكم !
وأبعدته بقوه وبصراخ : اتركوني بحالي !
جلست على الارض وعيونها بالأرض
ودموعها تنزل بغزارة !
محمد بغضب : لا تجننيني زوجك في بيت عمي ابو راكان جاء وفضحنا بين المعازيم !
رفعت رأسها بعدم استيعاب : كيف ؟!
خلف قال إنه مات ؟!!
الميت ما يرجع
محمد جلس على الكرسي ويحس خلاص ما بقى شيء على جلطته : الله يأخذ خلف !
اسمعي ترى زوجك جاء يأخذك جهزي نفسك !
ضحكت وسط دموعها : وين يأخذني للمقبره !
دق محمد على صدره بقهر: على وش تضحكين يا حظي !
يحس نفسه كان مغفل طول هالسنين !
جلس على الأرض مقابل لها : أبغى أسمع السالفه كامله من بعد طلاقك من الزفت عبدالله !
فاهمه !
طالعته وعيونها تنذر بسيل دموع جديد : خلاص أنا مليت !
خلف يقول إنه ميت !
وانت تقول زوجك في بيت عمي أبو راكان !
الظاهر كلما شفتم مجنون حسبتوه زوجي !!
دف رأسها بخفه : ما لقيت إلا هذا تقولين عنه مجنون !
والله انت المجنونه !
ابتسمت والدموع تلمع بعيونها : إلي يعيش معكم يبقى فيه عقل ؟!!!
محمد يحثها على الكلام : تكلمي ترى أعصابي محروقة والدم يغلي بعروقي !
هزت رأسها وطالعت لجهة الشباك وعقلها يستذكر ذيك الأيام ........
**
**
**
**
غادر المعازيم بعد هالفضيحه لأبو راكان وأبو الوليد !
الصمت يخيم على المكان وأسئلة كثيره تدور بعقل الموجودين !
أخذ نفس ابو الوليد وبداخله ما هو مصدق زواج ابو فهد من ساره ...طالع ولده سعود البرود فقط يغلفه
سلط نظره على ابو فهد وتكلم بهدوء ما هو قادر يسكت : يا أبو فهد ما أدري أحس السالفه فيها شوي غموض !
يعني ساره محمد طلقها من زوجها المجنون !
ما هو منك !
ابو فهد بنظره استنكار : أي مجنون ؟!
تراها على ذمتي وش سالفه هالمجنون ؟!!
ابو الوليد بحيره : حسب كلامها إنها عن متزوجه واحد مجنون
وكانت عايشه معه ..ولما انتقلت هنا  كانت تزوره كل يوم قبل الطلاق !
وبتوجس سأل : هي كانت تزورك ؟!
رد بنبره غضب مكبوته : وش تقصد اني مجنون ؟!
وش هالكلام ؟!!
عزام حس بالاختناق إذا هذا زوجها وما يدري عنها !
مين كانت تزور ؟!
وكيف استغفلتهم وكذبت عليهم بسالفه المجنون ؟!
وبسرعه تكلم حتى يغطي على السالفه بدون فضايح : الحين انت تبغى تأخذها معك ؟!
سلمان باندفاع كالعاده : وين يأخذها ؟!
تاركها طول هالفتره والحين ترجعها ؟!
ماجد بتأييد : تظن بنات الناس لعبه عندكم ؟!
إذا تظن إنها ما لها أهل وسند تراك غلطان إلي
قاطعه ابو فهد وهو يناظره بتقييم وبعدها وجه كلامه لأبو راكان : أنا كلامي معك ومع أخوها محمد !
والحين ابغى
دخل محمد بهدوء وعيونه وزعها بين أبو فهد وأبو ليث : أبغاك على انفراد
وقف ابو فهد بهدوء واستأذن من الموجودين بلباقه وتبعه ابو الليث بهدوء !
محمد ما يدري وش يتكلم حاول يستجمع الكلام : ءءء بالنسبة لساره !
انا كلمتها عن وجودك !
بس حاليا اممم تقدر تخلي وقت رجوعها مو الحين
لأنها مو مجهزه نفسها و
قاطعه ببرود : قول إنها رفضت الرجوع معي !
ابو الليث يحس نفسه بدوامه مو فاهم شيء لازم يجلس معه ويفهم السالفه بالضبط : أنا أقول اتركها الحين وباكر يصير خير !
ابو فهد بإحترام لكلمته : خلاص باكر اكلمك ويصير خير !
محمد تنهد بارتياح هم وانزاح عنه حاليا: خلاص إن شاء الله باكر موعدنا وإذا بغيت تشوف بناتك من حقك !
رفع حواجبه بعدم استيعاب : بناتي!
ابو ليث حس بالموضوع لبس تكلم عنه بعجله : خلاص ان شاء الله باكر نرجع !
والحين اسمح لنا تأخر الوقت !!
**
**
**
**
أبو راكان بغضب يطالعها : أبغى أعرف وين كنت تنقلعي الفتره الماضيه ؟!
تتحججين بالمجنون !
ابو الوليد بإتهام : وينه زوجك المجنون ؟!
كذبت على الكل لكن عمر الكذب ما يدوم !
ساره تكتفت بملل وهي تناظر أبو الوليد : نفسي افهم مين حاطك علي وصي ؟!!
دخل محمد بملامح باهته وتكلم بهدوء بعد ما سمع أطراف الحديث : خالي خلاص قفل على الموضوع
قاطعه ابو الوليد بغضب : يا برود دمك ؟!
أختك بعد سواد وجهها
رفع محمد أصبعه وهو يحاول يضبط أعصابه : خالي ما أسمح ولا كلمه تطعن فيها بساره !
ترى وجهها ابيض وما هي إلي تسود الوجه !
أبو راكان وللحين يشعر بالخزي من الموقف واكيد الحين صاروا علكه بحلوق الناس : اخخخ يالقهر
فشلتونا قدام الخلق !
طول عمركم تفشلونا بكل مكان يا عيال أخوي !
وطالعهم بقهر وطلع وتبعه أبو الوليد !
زفر بضيق محمد بعد خروجهم وبصوت منهك : وين عمار ؟!
ساره ردت بضيق : ما أدري !
محمد مسح وجهه بكفيه : باكر رح ييجي ابو فهد ونتكلم معه ونفهم السالفه لأني أحس نفسي بدوامه
وما أدري إذا كان هو نفسه المجنون أو لا !
ساره بقهر : محمد لا تقهرني ما أبغى اشوفه ولا أشوف رقعة وجهه !
محمد وبدأ الصداع يضرب رأسه : ساره لا تزيدي علي !
ترى إلي فيني كافيني !
ما تبغينه ارمي البنات عليه إذا كانوا بناته وتعالي معي
وانتهينا !
طالعته بصدمه : نعم ؟!
طالعها وهو عافس ملامحه من وجع رأسه: اذا ما تبغين هالحل
تنطقين هنا وتنتظرين باكر نتفاهم معه !
وانتهينا !
تركها وتوجه للغرفه يريح اليوم كان ثقيل عليه حيل !
ما في مشكله الا سببها خلف !!!
جلست على الكنبه وهي تهز رجلها بتوتر ....
ما تدري من وين طلع لها أبو فهد هذا ؟!
كيف أخو زوج اميره يكون زوجها ؟!
معقول بعد موت المجنون زوجها لواحد ثاني وما خبرها ؟!
تحس عقلها بدوامه ....اخخخ من خلف تتمنى يكون قدامها وتطلع كل حرتها فيه !
رفعت رأسها على دخول عمار بخطوات بطيئه .....
تابعت خطواته حتى استقر مقابل لها..تأملت وجهه الباهت والضيق باين بملامحه ..... إلتزمت الصمت وما تكلمت ....
زفر بضيق وتكلم : هذي آخر إلي يمشي خلف البزران .....وش استفدنا من حركاتك البايخه هذي إلا سواد الوجه !
رفعت حاجب بحده : وش قصدك ؟!
عمار نفخ بقهر : بعد خروج هالفارس الكل يسأل عن المجنون إلي كنت تزورينه؟!!
وش استفدتي من التكتم على دراستك ؟!
كلام الناس ما يرحم !!
وبنبره رجاء : ساره لا تقولين ابو فهد رقم 5
ترى ذبحني الاحراج من حولي !
ردت ساره بتهكم : ما ذبحكم إلا كلام الناس !
أنا ما يهمني أحد .... وأبو فهد هذا المتعني وجاي بكل بساطه يقول إني زوجته ...لو يموت ما قابلته ولا جلست معه !
أنا ما أعرف إلا المجنون ومات وغير كذا ما عندي !
عمار بقرف وقلب ميت من هالسالفه : ورقة العقد معه وكل شيء موثق !
وعقد الزواج موجود
وليه رح يتبلى ويقول كلام ما هو صحيح ؟!
وش مصلحته ؟!
تراه رجال واصل وآخر همه يطالع خشتك!
شوفيه ما سأل عنك وما يدري عن هوى دارك !
ومنشغل بحياته وسفراته وتلاقينه سمع بالصدفه عن الخطوبه
قاطعته بغبن وقهر اوجعها كلامه : انكتم !
عمار أخذ نفس عميق : لا تزعلين من الواقع !
للحين ما أدري كيف خطبك !!
قطع كلامه لما حس بالخداديه بوجهه : خطبك القرد قول آمين !
وجكر فيك ما رح أرجع وما رح اقابل هالزفته !
وتركته وتوجهت لغرفتها ...
ضحك عمار بغبن : ارجوك ارجعي له الحين ينتحر !
أسند رأسه على الكنبه بتعب رح يبذل كل جهده ويطلقها من أبو فهد !
مستحيل تلقى السعاده عندهم .... المظاهر أهم شيء عندهم !
وساره يعرفها ضعيفه حتى لو تظاهرت بالقوة
قلبها طيب وتلين بسرعه........

**
**
**
**
ابو الليث بغضب : كيف ما تدري عن شيء ؟!!
إذا انت ما تدري عن شيء ؟
مين إلي يعرف ؟!
رد بقلة صبر : انت تعرف صحيت من الحادث وما اذكر شيء إلا إني !
ابو ليث قاطعه بعد ما تنهد : والحل الحين ؟!
اذا وصلت السالفه لأمي وش يخلصك منها ؟!
تراني خطبتها لابو نورس وفضحتني ما تبغاها
قاطعه بغضب : نعم ؟!
تراها مسخت السالفه !
انقطع الحريم حتى تخطبها لأخوي !
الشاطر يخطب زوجتي
ابتسم على ملامحه الغاضبه : هذي حالك وانت ما تعرفها ؟!
كيف إذا عرفتها ؟!
خزه بعيونه : وش عرفك فيها ؟!
ضحك ابو ليث عليه : علامك تناظرني كذا !
تراها أخت زوجتي
قاطعه بغضب : هذا ما يعني إنك تجلس معها وتشوفها !
ابو ليث بلامبالاه : الكل شايفها جاءت علي !
رفع حاجب باستفهام : وش تقصد ؟!
رد وهو يوقف السياره : البنت ما تتغطى اكيد رح اشوفها
هز راسه بتوعد : يصير خير !
ابو ليث بتذكر : والبنات ؟!
زفر بضيق :انا ما أعرف إلا إني تزوجتها..ما أدري عن البنات !
اكيد انت شفتهم ؟!
ابو ليث تنهد : ايه شفتهم
باكر نتأكد من سالفة المجنون من ساره بنفسها !
ما استبعد عن خلف زوجها بعدك بدون طلاق !
استغفر الله !
مع اني متأكد إنه البنات بناتك فيهم شبه من أمي ومنك !
اسمع الحين ما تكلم أحد بالموضوع حتى أمي!
هز رأسه بضجر : إن شاء الله !
**
**
**
**
ام راكان بصوت هادي : اذكر الله يا رجال وش فيك شاب نار كذا ؟!
دامها للحين على ذمته وش إلي حارق بصلتك !
ابو راكان بغضب : انت شايفه وضعنا حلو بعد هالموقف المخزي !
نزوج البنت وهي متزوجه ؟!
وسالفة المجنون ما هي داخله رأسي !
وينه ؟!
ومحمد ليه ساكت ؟!
أنا إذا ما فهمت السالفه رح انجن !
ام ماجد تحس بفرحه من هالخبر ما تم موضوعها مع سعود : طيب البنات من أبو فهد وإلا من المجنون ؟!
ابو ماجد هز كتوفه : والله ما ندري وش المصايب إلي رح نحصلها بسبب خلف وأخته !
أبو راكان يحاول يضبط أعصابه من جديد : باكر يذوب الثلج ويبان إلي تحته !
دخل عزام بهدوء وألقى السلام ببرود
ابو راكان وداخله يغلي : ما في شيء جديد تراني من البارحه ما نمت !
عزام بهدوء : الزوج الرابع ابو فهد وما في غيره !
الظاهر حضرتها ألقت لقب مجنون عليه من عندها !
شهقت ام راكان باستنكار : ما لقت الا هذا تناديه مجنون !
عز الله لو يدري إلا يقوم الدنيا !
ام ماجد بنفس الاستنكار : والله ما أحد مجنون غيرها !
أبو ماجد بفوقيه : صدق إنه مجنون يوم تزوجها !
ابو راكان للحين بدوامه : الحين التوأم بناته ؟
هي كانت تزوره ؟!
عزام حرك راسه بالنفي : حسب كلام عمار ما شافته من سنين !
وسالفة طلعاتها تغطيه من عمار وخالي محمد حتى ما أحد يتكلم
قاطعه ابو راكان بغضب : انا ما رح يذبحني غير برود محمد !
يمشي مع أخته بكذبها وحنا الأغبياء صدقنا هالسالفه !
وبعدين ليه أبو فهد تاركها طول هالسنين ؟!
لا متزوجه ولا مطلقه ؟!
الحين تذكرها ؟!
وقسم بالله إلا يطلقها وأزوجها واحد من عيالي وتبقى تحت عيني هالسوسه !
شافوني ساكت طول هالمده
قام كل واحد يتمادى بأفعاله !
ما رح اسمح لهم يشوهون سمعتي بعد اليوم !
ام راكان بانفعال : وش هالكلام ؟!
ابو راكان والغضب يسري بدمه : انت لا تتدخلين !

**
**
**
**
ساره برفض قاطع جلست على سريرها : مستحيل أطلع له وأكلمه !
اميره صفقت يد بيد : ما أدري من وين وصل خلف له ؟!
وكيف ابو فهد وافق يتزوجك !
ساره بضجر من هالسالفه : ليه وش شايفيتني ؟!
الشاطر يقول كيف وافق يتزوجك ؟!!
اميره تنهدت مو عاجبها كل هالموضوع : مو قصدي شيء بس تراه شايف نفسه حبتين !
ويطالع فوق فوق!
وأنا نصحتك بيت حماي ما رح تقدرين تعشين معهم !
إذا قدرت تتطلقين منه لا تترددي
يمكن سعود ترتاحين معه اكثر من هالعقده !
ومطت شفتها بقرف !
ساره تنهدت بحيره : إذا كان مثل ابنتك مها
تراك صادقه اكيد غثيث وما ينطاق !
خزتها أميره : ساره !
تراها ابنتي وما أرضى عليها !
وبدفاع : والله إنها حبوبه ما أدري ليه ما تطيقون بعض !
امالت شفتها بجعرفه : ما أطيقها !
تحشر خشومها بكل شيء !
مين يصدق إنك أمها !
سبحان الله خلق وفرق !
اكيد طالعه لأهل زوجك !
اميره بنغزه ماكره : وأهل زوجك بعد !
ساره بإحباط انحنت..ما تبغى تشوفه وأحداث  الماضي توجع قلبها :لا تذكريني !
اميره بابتسامة : نفسي أشوف رد فعل حماتي لما تسمع بالخبر !
اتوقع ينقلونها للمستشفى !
إذا لابو نورس زوجه رابعه ما وافقت عليك !
كيف عاد حبيب قلبها !
ساره زفرت بقرف : تدرين قرفت عائلة زوجك قبل ما اشوفهم !
ليه هالتكبر ترى اخرهم جثة تندفن بالأرض
لا مال ولا جاه !
اميره هزت راسها وهمست : يا رب حسن الخاتمة !
وبتذكر : خلصيني ترى زوجك له وقت بالمجلس !
ساره بعناد : لا يعني لا !
أميره بأسلوب لين : تبغين تجلطين محمد أخوي !
تراه ضايق صدره زياده من هالسالفه !
لانت ملامح ساره وهي تتذكر ملامح محمد ...ما تبغى تفقده مثل ما فقدت نادر .....
هو إلي تبقى لها من إخوانها !
طالعت اميره بتفكير : اكلمه من خلف الباب !
اميره تدق على صدرها وهي كاتمه ملامحها بغضب : ساره
ضحكت ساره على ردها : خلاص !

***
***
***
***
**
محمد ملتزم الصمت ما رح يتكلم بشيء إلا بعد ما تقابل ساره أبو فهد
بعدها يقرر وش رح يعمل !!
ابو ليث يطالع ساعته : وينها تأخرت ؟!
محمد بهدوء طالعه : الحين تيجي !
وطالع الباب لما دخلت أميره بهدوء : السلام عليكم !
ادخلي يا ساره !
ابو ليث طالع ساره وهي تدخل ومتغطيه: تفضلي يا ساره حياك !
ردت ساره بصوت اقرب للهمس : الله يسلمك !،
وجلست جنب محمد وقلبها يدق طبول وعيونها بالأرض !
أبو فهد ببرود وهو يناظرها منزله رأسها : كيف حالك يا ساره !
حست في شيء يضرب بإذنها وأصابها الصمم !
هذا الصوت مر عليهامن قبل بس ما هي متذكره وين بالضبط ؟!!
رفعت رأسها بتلقائية وسرعان ما نزلت رأسها بخجل لما التقت عينها بعينه
لحظه !
لحظه !
هذي العيون شافتها ومستحيل تنساها شهقت بدون صوت وبهمس : المجنون ؟!
محمد طالعها يبغى يعرف إذا كان نفسه المجنون او لا وبهمس : ساره هو نفسه؟!
ساره وقلبها يدق بقوه هزت رأسها ...رجعت ألقت نظره سريعه تتأكد من ملامحه وبذات الهمس ردت لما شافت نفس الملامح : ايه !
طالعهم ابو فهد وهو رافع حاجب بانتقاد يتهامسون ولا كأنه أحد موجود
ابو ليث بضيق : وش فيكم تتهامسون ؟!
محمد بهدوء : ما في شيء !
هذي ساره إذا عندك سؤال أو استفسار يا أبو فهد
علشان بعدها نحط النقاط على الحروف !
ابو فهد هز راسه وبصوت رزين : قلنا أول شيء كيف حالك يا ساره !
اشر لها محمد بعيونه ترد بعد ما حس إنها تبغى تطلع
هزت رأسها وردت بصوت فيه رجفه بسيطه من الشخص إلي جالس قدامها : الحمد لله !
ابو فهد بصوت هادي : الحمد لله بكل الأحوال !
أنا كلمت محمد حتى تجهزين نفسك البارحه وترجعين معي ..
ردت بصوت هادي فيه قوة بعد ما تأكدت انه نفسه المجنون : بس أنا ما أبغى الرجعه !
رفع حاجب باستفهام :تبغين الطلاق ؟!!
ساره أخذت نفس بهدوء وللحين ما هي مصدقه إلي شافته وجهت كلامها لأبو ليث : أنا ما تفرق معي الطلاق !
اهم شيء أعيش عند أخوي محمد !
ابو ليث رفع حاجب بانتقاد : بس ما أشوفك عايشه مع محمد !
ساره بهدوء تكلم ابو الليث: أنا قررت أسافر مع محمد
قاطعها ابو فهد بحده : وبأمر مين طالعه ان شاء الله ؟!
محمد يلطف الجو : دامها على ذمتك ما رح تسافر معي إلا بموافقتك
أما اذا اتفقتم على الطلاق رح تسافر بموافقتي أنا !
ابو ليث بهدوء يسحب الكلام من ساره : اي طلاق وبينهم بنات ؟!
ساره توجه كلامها فقط لزوج أميره : الحمد لله بناتي عايشات طول هالسنين بدون أب ما عندنا مشكله نكمل حياتنا بدونه !
ابو فهد طالع محمد بهدوء: عاجبك كلام أختك ؟!
تدخلت أميره : وينك طول هالسنين عنهم ؟!
الحين تذكرت انه عندك زوجه وعيال ؟!
ابو فهد ببرود: أتذكر إنه عندي زوجه
أما عيال ما أتذكر لأني ما أدري بوجودهم !
اميره : كيف ما تدري بوجودهم !
ابو فهد طالع ساره : كيف أعرف بوجودهم والبنات ما لهم اسم يرتبط فيني سواء بدفتر العائله او
قاطعته أميره وهي تناظر ساره باستفسار: التوام ما سجلتيهم
قاطعتها ساره بغضب : لا ما سجلتهم !
ابو ليث بانتقاد : ليه تتكلمين كذا ؟! وبعدين كيف ما سجلتيهم ؟!
كيف تقبلي بناتك يعيشون كذا بدون هويه !
وقفت ساره وتحس النار تمشي بعروقها : لما يكون أبوهم مجنون عادي ما تفرق أسجلهم أو لا !
ابو ليث باستنكار : وش قصدك ؟!
الحين أخوي نفسه زوجك المجنون ؟!!
ساره صفقت بسخريه : برافوووو
للأسف ايه !
محمد بصوت مخنوق : اجلسي يا ساره !
للحين ما تفاهمنا !
جلست بدون نفس تنتظر هالمهزله تخلص !
طالع ابو ليث أخوه لعله يلمح تعليق على كلامها ...
بس تفاجئ بملامح البرود والهدوء وهو يتكلم : انا طلاق ما رح أطلق !
وخاصه بعد ماعرفت إنه في بيننا عيال !
أنا الحين رح أخذ البنات معي !
إذا بغيتي ترجعين معنا حياك الله
ما بغيتي بكفيك !
ساره طالعت محمد وبصوت مقهور : تكلم ؟!
محمد بهدوء : ما تقدري تحرمين البنات من أبوهم !
لكن إذا عندك شروط أو شيء
قاطعه ابو ليث : وش هالشروط يا ابو خالد ؟!
تراها متزوجه
ساره بخبث: عندي شرط واحد
وأرجع معه !
ابو فهد بطول بال : تفضلي !
ساره طالعت محمد وتمنت تكون بعيده شوي عنها حتى ما يطقها على كلامها : امممم أنا أبغى عرس كبير !
وبأفخم القاعات ونعلن الزواج
قاطعها ابو فهد وهو يوقف بغضب : اجلسي في بيت اخوك ألف سنه وانتظري القاعه !
وناظر محمد : وش هالمسخره هذي ؟!
تبغى نعلن الزواج عادي بدون طقطقه وسخافات !
اما زواج وقاعه وعيالها طولها ؟!،
والحين اسمح لي
محمد طالع ساره بنظرات ناريه على عالشرط البايخ !
توقع تشترط تكمل دراستها او بيت مستقل !
اما هذا الشرط ما خطر في باله صدق قليله عقل وبهدوء تكلم : انتظر يا ابو فهد ! خلينا نتفاهم !
ابو فهد بحده: اي تفاهم وهذي شروط أختك !
ابو ليث طالع ساره بانتقاد : وانا أقول عنك عاقله !
لو طلبتي حفلة استقبال بالبيت عائليه أخف من هالطلب !
ساره بتصميم تناظر ابو ليث : هذا شرطي!!
ابو فهد بحده أخافتها : لما تتكلمين طالعيني أنا !
وكلامك معي أنا ما هو مع أخوي !
ناظرت محمد وبلعت ريقها ما تدري ليه قلبها رجف كذا وبصوت منخفض لمحمد : قول له هذا شرطي وما أتنازل عنه !
تابع كلامه بنفس الحده بعد ما وصله صوتها : ليه تحطين واسطات !
أنا أقولها لك على بلاطه اجلسي انتظري حجز القاعه إن شاء الله بعد 10 سنين تكون جاهزه نزفك مع بناتك بنفس الوقت نخفف من المصاريف !
وطالع محمد بهدوء : ابغى اجلس معها لوحدي !
في امور خاصه أبغى استفسر عنها
محمد بهدوء : هذا حقك تجلس معها
وقبل ما يكمل كلامه كانت ساره عند الباب وبحده: ما في كلام بيننا !
وتركتهم وطلعت !
عض محمد على شفته بإحراج وهو يسمع ابو ليث يتكلم بانتقاد: وش حركات البزران هذي ؟!
اميره بترقيع : تراها صغيره ومتفاجئه من الموضوع شوي !
محمد تنهد : نهايه الأسبوع بإذن الله أجيبها بنفسي مع البنات !
انت الحين رتب أمورك وعلم أهلك بالموضوع
ما هي حلوه تدخل عليهم فجأة كذا معك زوجتك والبنات !
ابو ليث بتأييد : وأنا أقول كذا !
ابو فهد بثقه : أنا ما يهمني أحد !
والحين أبغى اشوف البنات !
اميره بهدوء : أنا أقول بعدين على الأقل نمهد للبنات إنك موجود !
رفع حاجب بغضب : نعم تمهدي؟!
اميره مطت شفتها : ايه نمهد لهم
طلعوا على الدنيا وامهم ربتهم على أساس أبوهم ميت والحين نقول لهم تعالوا شوفوا أبوكم !
هز رأسه بتوعد وبنظره حاده : نهايه الأسبوع إذا ما كانت عندي مع البنات رح يكون لي تصرف ثاني !
محمد بهم : إن شاء الله !
اميره بتدخل : أنا أقول الانفصال هو الحل !
قاطعها بنظره حازمه : ما هو أنا إلي اطلق !
ولو بغيت أطلق أطلقها بكيفي والبنات عندي !
اميره انقهرت من تسلطه : حكمت إنهم بناتك
محمد بنبره ضعيفه بعد ما خبرته ساره بأحداث الماضي : تراهم بناته يا اميره !
ما في داعي نزيد ونتكلم بنفس الموضوع !
ابو ليث بهدوء : توكلنا على الله !
والبنات تشوفهم آخر الأسبوع !

***
***
***

تحس بنار ولعت بداخلها كيف محمد يتصرف كذا ؟!
وبصوت رافض : ما هو على كيفكم !
ماني راجعه له !
محمد يحس إنه عاجز عن التصرف ما يبغى يجرحها بعد ما سمع ماضيها وبنفس الوقت ما يبغاها ترجع مثل الأول الكل يتحكم فيها وخاصه بعد كلام عمه أبو راكان اليوم ...وبنبره صارمه : ساره كلمتي وما أتراجع نهايه الأسبوع أخذك لزوجك !
وقلت لك من قبل ما أجبرك على الرجوع بس بالمقابل أعطيه بناته وانتهينا !
بغت تقاطعه حرك يده : ولا كلمه
هذا إلي عندي !
معك مهله تفكرين لنهايه الأسبوع وأعطيني جوابك !
وغادر المكان بهدوء !
ضربت الأرض بقوه ....بداخلها نيران مشتعله !
تحس بنص حلقها خنجر !
لا هي قادره تطلعه ولا تبلعه !
كيف رجع هالمجنون السكير من جديد !
همست بصوت مقهور «حسبي الله عليك يا خلف ما أدري من وين تتعرف على ذي الأشكال لا والمشكله مرتب نفسه يرحم أيام الحلاوة »
عضت على شفتها بقهر كيف تتصرف الحين ؟!
كيف تتخلص منه ؟!
مستحيل تتخلى عن بناتها !
وبنفس الوقت ما هي مستعده تنتقل للعيشه مع ناس جديده !
ما لها إلا اميره توصل إلي بقلبها لهذا المجنون !
وبسرعه بأصابع مرتجفه دقت على رقمها !
***
***
***
***
بالسياره أميره ما هو عاجبها الوضع : صدقني الانفصال أفضل لكم !
أختي وأعرفها تراها بزره
قاطعها بهدوء متوعد : بزره أنا أربيها !
أميره بضيق متأكده ساره ما تقدر تعيش معه : قول شيء يا أبو ليث !
ابو ليث بحيره : والله ما أدري وش أقول !
طول وقتي أسعى بطلاقها من المجنون
وما كنت أدري إنه المجنون أخوي !
أنا ماني قادر أفهم وش سالفه المجنون هذا ؟!
طالع للخلف لما رن جوال اميره !
سأل ابو ليث بهدوء : ساره ؟!
اميره بضيق : ايه ساره !
ما ادري وش اقول لها
وقف السياره على جنب والتفت للخلف بأمر : انا ابغى ارد عليها !
اميره بتردد طالعته ومدت له الجوال بعد كلام زوجها : خليه يكلمها يمكن يتفاهمون !
أخذ الجوال بهدوء وفتح الخط وسرعان ما عقد حواجبه من هذا الهجوم : اسمعي اميره الحين تقولين للمجنون السكير الغبي إلي معك لو يموت ما أرجع له !
ما بقى اقضي عمري الا معه هالسكير التافه !
وبنات ما له عندي وما ابغى يسجلهم بإسمه
ما يشرفني بناتي يحملون اسم هالعائله السخيفه !
وقولي له ابغى الطلاق الحين قبل ما تدري زوجته
حرام بلاه تعاقبه وينام برا البيت
تراه يكسر الخاطر
وخاصه لما تكون بيده الحلاوه !
_وضحكت من القهر إلي بداخلها_ تراه يكسر الخاطر هالمجنون المتخلف !
وينك اميره ؟! الو
رد بصوت هادي عكس البركان إلي بداخله : كملتي ثرثرتك ؟!
وبتوعد : وقسم بالله إذا نهايه الأسبوع ما كنت عندي إلا أسحبك من شعرك
سكت بعد ما قفلت الجوال بوجهه !
أعطى اميره الجوال وهي تعترض : وش هالكلام ؟!
وكأنها ما لها أهل تسحبها من شعرها ؟!
شغل السياره بهدوء : لو سمعت كلامها كان ما اعترضت !
تنهدت اميره وبداخلها «سمعت حسبي الله على ابليسك يا ساره وش هالكلام ؟!! »
ابو ليث بهدوء: كل شيء بالتفاهم ينحل !
البنت للحين ما هي مستوعبه شيء !
رد وهو كاتم غضبه : أنا تقول عني سكير ومجنون ؟!
ابو ليث هز كتوفه : والله ما ادري من وين طلعت سالفة هالمجنون !
وطالع اميره بشك : متأكد إنها إشاعه طلعتها أمك حتى تقهر ساره !
وساره على طول صدقت هالكذبه !
اميره مطت شفتها : كل شيء تحطه بأمي !
إسأل أخوك يمكن بعد ما تزوجها فقد عقله !
ابو ليث بقهر طالع أخوه : حاول تذكر شيء ؟!
رد بغموض : ما عليك مني !
زوجتي وأقدر اتصرف معها !
وقف السياره بعد ما وصلوا اشر على مها بجعرفه وهي طالعه من بيت جدها : هذي متى تستحي على وجهها ؟!
اميره بدفاع : يا أخي وش تبغى فيها زوجها راضي بلبسها وانت وش إلي حارق أعصابك ؟!
ابو ليث وهو ينزل : تعال خبر أمي وتحمل العاصفه بنفسك !
انا ما لي دخل !
**
**
**
ما هي عارفه تجلس بهذا المكان كذا بدون ما تتدخل ...طالعت اخوها بقهر حلف عليها يمين ما تطلع من بيته اليوم وما تقابل أبو فهد !
وليد بضحكه : حالتك صعبه يا عمتي !
تراه من زمان غادر !
ام محمد واللقافه ذبحتها : أدري إنه غادر بس أبغى اعرف التفاصيل !
اميره الزفته ما ترد ومحمد وعمار ما يردون على الجوال !
ابو الوليد خزها بعيونه : وش تبغين فيها ؟!
ام محمد ذبحها القهر والغيره : الحين ساره المعفنه متزوجه هذا ؟!
وانا الغبيه الفرحانه لما خبرني خلف إنه مزوجها مجنون !
اخخخخ يالقهر !
لكن هذا وجهي اذا ما خليته يطلقها !
ام الوليد بضجر : وش عليك منها ؟!
الله يوفقها !
وليد بتفكير : معقول يمه خالتك ام سالم توافق عليها ؟!
ام محمد ولمعت بعقلها : ام سالم !
ما لها إلا أم سالم إلي تطلع حرتها بساره !
كيف ما خطرت في بالها ؟!
توسعت ابتسامتها الخبيثه وهي ترسم وتخطط للموضوع بدقه !
رفعت نظرها على سعود إلي دخل بهدوء وابتسمت بخبث سعود ورقه رابحه معها رح تضيفها وبهدوء تكلمت بعد ما مسحت معالم الخبث : عاش من شافك يا سعود !
ترى ما تسوى كل هالحزن علشانها
رفع حاجب بعد ما جلس : ليه ما قالوا لك بغيت انتحر بس الناس لحقتني آخر لحظه !
عفست ملامحها : يا شينك لما تنكت !
وش شعورك وانت خاطب زوجة صديقك !
طالعها بحده : شعوري ما يخصك !
ويا ليت تنشغلين بنفسك وبهمس «يالله حسن الخاتمه»
ابو الوليد بنظره : سعود وش هالكلام ؟!
وطالع اخته بحده : وبعدين مع ذي السوالف !
ام محمد بتبرير : انا وش قلت !
ام وليد اعطتها نظره تختصر !
**
**
**
**
اسيل تعدل فستان ابنتها : انتبهي لا يطق لك عرق !
نوره بدلع : يا أختي فرحانه وش عليك مني !
اسيل كشت عليها : من زين اخوك مستخسره فيه ساره !
سبحان الله انقلبت الايه وطلعت متزوجه واحد أحسن من أخوك بألف مره !
نوره بروقان : احسن وإلا مو أحسن الأهم تكون بعيده عن أخوي !
أسيل بنغزه : سمعت انه سعود صاير مثل عمي عبدالله
عااااشق وحالته حاله !
تحول وجهها احمر وبنبره غاضبه : ترى إلي وصل لك هالكلام
كذاااااب !
ويكون بعلمك ترى عبدالله اليوم طالع مع شروق وقبل شوي كلمتني ومستانسين كثير !
اسيل بضحكه تنرفز : اكيد رح يطلع معها ويرضى بنصيبه بعد ما فقد الأمل منها !
وحركت حواجبها تغيضها !
بغت ترد نوره بس سكتت لما شافت عزام دخل بخطوات هاديه !
اسيل بابتسامة ودلع: هلا عزام !
ابغى أسآلك ساره بالبيت ؟!
عزام بضجر جلس : شايفيتني مدير أعمالها !
وطالع نوره إلي اعطت اسيل نظرة شماته : قومي حطي الأكل بدل هالنظرات !
مطت شفتها نوره بقهر وهي تشوف اسيل تبتسم بشماته !
بعد ما طلعت نوره سألت اسيل بهدوء : كلمت ساره ؟!
عزام بهدوء : لا
عمار نصحني ما أكلمها لأنها فاقده عقلها
حتى خالي محمد ما خلص من لسانها !
وتعرفيني ما أحب أحد يطول لسانه علي !
أخاف أفقد اعصابي واجرحها !
خليها تهدأ وبعدها يصير خير !
**
**
**
**
**
سوار بدلع : ماما أبغى
قاطعتها ساره بضجر مو متحمله أحد : خلااااص ولا كلمه !
ترى واصله هنا !
واشرت على انفها !
عمار بسخريه وهو مستلقي على الكنبه ويقلب بجواله : أعصابك يا حلوه !
سوار أشرت على أمها : ماما سيئه !
ابتسمت ساره بنفسها على تعليقها وبتحذير : سوار
شدت خطواتها سوار بقهر وطلعت برا
وقفت ساره متجاهله سوار ما تدري وين تروح ؟!
وإلي قهرها كلامه الأخ واثق من نفسه !
على أساس إنه ميت وش رجعه الحين ؟!!
ما رح تسامحه على هالسنين إلي طافت !
صارت علكة بحلق إلي يسوى وإلي ما يسوى !
طالعت عمار إلي يكلمها : علامك واقفه مثل الناقه !
أعطته نظرات ناريه : جعل الناقه تتوطاك يا زفته !
ترى والله ما لي خلقك !
قوم وقف معي وطلقني من
المجنون أحسن من جلوسك مثل البوم !
عمار خزها بعيونه : انت كل شوي لك حاله ؟!
ساعه تبغين الطلاق وساعه
قاطعته بعبوس : ما ابغى هالمجنون واشوف نظرة الشماته بعيون إلي حولي !
لا والمشكله مطقم حضرته ما أدري من وين استعار هالملابس !
اكيد ابو ليث محفظه كم كلمه ومرتب هندامه !
يومين ثلاث وألاقيه عند الإشارة يتسول ويسكر !
وترجع حليمه لعادتها القديمه !
ما رح اقبل بهذي المهزله ابدا !
تسمعني !!
هز راسه بأسف : عمتي العزيزه بعد إذنك ابغى أصورك وأعرضك على المستشفيات الأمراض العقليه !
متأكد رح يستقبلونك !
قاطعته بصرخه : عمار !
وقسم بالله إذا ما قفلت حلقك إلا
دخل محمد وبصوت حاد : وبعدين مع هالحياه ؟!
الحطب إلي براسك متى إن شاء الله ينزل
ساره بقهر : حتى تخلصني من هالمجنون !
محمد بقلة حيله : والله ما زوجتك منه حتى اطلقك منه !
هذي العائله أنا مو ندها !
تبغين تتطلقين أنا معك بس البنات ما اضمن لك يكونوا معك !
وانت بالخيار فكري زين ما بقى وقت على نهايه الأسبوع !
عمار بسخريه من شرطها : خلاص أنا مستعد على نفقتي الخاصه أعمل لك زواج لا صار ولا استوى بالعالم !
خزته ساره بعيونها بقوه : خليك رجال قد كلمتك ونفذ هالكلام !
محمد باعتراض : ساره وش هالمسخره !
اكيد إنك مجنونه !
طالعته بتحدي : اكيد رح اكون مجنونه مثل زوجي !
هز راسه بأسف من تخلف عقلها : اقولك زوجك ما فيه شيء وما هو مجنون !
انت ما تفهمين الكلام ؟!
تنهدت ساره : اوكيه
زوجي إلي حفظ كم كلمه قبل ما ييجي ما هو مجنون !
خلاص اقتنعت !
طالعت عمار بتحدي : خليك رجال ونفذ كلامك بالحرف الواحد ....