رواية العطر الفريد الفصل العشرون 20 - بقلم هنا سلامة

تاليا بصدمة: إبعد عني أنا حامل! سرحان بغيظ: وكمان حامل منه؟ كان بيحاول يسيطر عليها بس معرفش، وتاليا بتحاول توصل لفازة على السفرة لحد ما وصلت ليها وضربته على دماغه. تاليا بردح: إيه؟ هو كل حد معدي يقولي كمان حامل منه؟ هو أنا كنت ضفدعة وهو إنسان مثلاً، فمينفعش يحصل حمل؟ فضل سرحان يصرخ والدم مغرق وشه، فـ أخدت تاليا نادية من تحت السفرة وجروا من الباب الوراني. تاليا وقفت ميكروباص عشان يروحوا على القسم. "في القسم"

تاليا بتنهيدة: أنا حطيت له جي بي إس في الساعة يا فندم.. نقدر نوصله. الظابط: بس مفيش حاجة بتأكد إن فريد الغالي في خطر. تاليا بغيظ: يا فندم هو قبل ما يروح قالي أنا هبقى في خطر. هانية بعصبية: يا فندم إحنا هنستنى لحد ما تحصل مصيبة ونروح له؟ تاليا بتوتر: أرجوك يا فندم.. صدقني إحنا مش كدابين. الظابط: ولو طلع بلاغ كاذب؟ هانية ببرود: عادي.. احبس تاليا. تاليا بغيظ: أنا حامل يا تيته!

هانية: وأنا كبيرة في السن.. يبقى تحبس نادية. نادية برقت وشاورت على بوقها، فـ قالت تاليا: ما نادية خرسا. هانية: تتحبس عادي يعني. تاليا: دي بنتك يا تيته. هانية: عادي برضه، أنا أم عاق. الظابط بزعيق: إيه؟ رغي رغي رغي.. يلا بينا منك ليها على المخزن ده.. نشوف آخرتها. راحوا هما التلاتة مع الظابط، والظابط خد معاه قوة، وهما داخلين سمعوا صوت رصاص. تاليا بخوف: فريد!

دخلت تاليا جري والظابط بيزعق، لقت فريد رجله بتنزف، ورضوان ماسك سلاح، وخليل واخد طلقة في قلبه. تاليا جريت على فريد وقالت بخوف: أنت كويس؟ فريد بعصبية: إيه اللي جابك؟ تاليا وهي بتبوس راسه: كنت عايزني أسيبك إزاي؟ حط فريد إيده على بطنها وبص في عيونها وقال: أنتِ كويسة؟ تاليا حركت راسها بمعنى آه، وفريد قرب عليها وهو بيشيل شعرها و... الظابط: يا عم الرومانسي!

تاليا اتنفضت وبعدت عن فريد وهي هتموت من الكسوف، ونادية وهانية بيضحكوا. فـ قال الظابط: ده مات! رضوان: أيوه يا فندم.. المخزن ده ملك ليا وملك لفريد الغالي، وخليل ضرب فريد في رجله زي ما حضرتك شايف. فريد: يبقى اللي عمله عمي رضوان ده دفاع عن النفس. الظابط بتنهيدة: مفهوم مفهوم.. بس لازم تيجوا القسم بس عشان شوية إجراءات بسيطة.

تاليا بغيظ: وفي واحد في البيت اسمه سرحان حاول الاعتداء عليا وعلى جوزي كذا مرة.. فـ ده لازم أكيد ياخد عقاب. الظابط: أكيد.. يلا بينا. "بعد مرور 6 شهور" تاليا بصوت رقيق: في البحر سمكة.. سمكة.. بتزق سمكة. فريد جه من وراها وهو لابس بدلته ولسه جاي من الشغل، وهي بتعمل كيكة بالنوتيلا والكاكاو: على البحر واقف.. صياد بشبكة. ضحكت تاليا وهو بيبوس رقبتها وبيضمها من ضهرها، فـ قالت: مقولتش إنك هتتأخر.

فريد بإرهاق: معلش يا حبيبي.. بس عمي رضوان كان محتاجني في الشركة عنده كمان.. وكان في اجتماعات كتير وحاجة كده في منتهى ضيق التنفس. ضحكت تاليا والتفتت ليه والكاكاو مغرق هدومها: خلاص قول لماما نادية تجهز لك الحمام عقبال ما أطلع الأكل من الفرن. حاوط فريد بطنها وقال بحب: بنتي عاملة إيه؟ تاليا بضحك وهي بتلعب في شعره وهو حاطط ودنه عند بطنها: معرفش ليه أنت حاسس إنها بنوتة وأنا حاسة إنه ولد.

فريد بضحك: معرفش.. أي حاجة منك حلوة يا جميل. تاليا وهي بتحضنه: يا قلب الجميل. هانية بغيظ: ميت مرة قولت خدوا بالكم من الشباك.. الشباك مفتوح. تاليا بكسوف وهي بتزق فريد: آسفين يا فندم. هانية: ليكم أوضة تلمكم.. تمام؟ فريد بضحك: تمام تمام. تفيدة مامة تاليا نزلت من على السلم بسرعة، فـ قال فريد بهمس: أول مرة أشوف التتار وهو داخل على المسلمين. ضربته تاليا بكوعها في بطنه فـ اتألم،

وتفيدة بتقول بصوت عالي: يا عيال أنا اتعلمت حاجة بالتركي. تاليا بضحك: قولي يا ماما يا حبيبتي.. قولي. تفيدة بإنشراح: سيني سيفيوروم (بحبك بالتركي) هانية: استغفر الله العظيم.. ده سحر ولا إيه؟ اللهم إن كان سحر فـ أبطلُه. تفيدة بشر: لا دي طلاسم. هانية وهي بتجري من تفيدة: لااا طلاسم لااا فيل أزرق لااا. تاليا وفريد فضلوا يضحكوا بهستيرية لحد ما قال فريد: لو ما كنتش قابلتك كان حصل إيه يا تاليا؟

تاليا بحب: معرفش.. بس أنت أحلى حاجة حصلت لي في حياتي. فريد وهو بيحضنها: وأنتِ الأربعة وعشرين قيراط بتوعي. "على الغداء" تاليا بدوخة: بالهنا والشفا. قرب فريد من نادية وباس راسها، فـ ابتسمت نادية بسعادة وهي حاسة إن ربنا بيعوضها بفريد دايمًا. تاليا بتعب: كنت تقول لعمو رضوان يتغدى معانا. فريد: لا ما هو مسافر على بليل.. فـ مشغول. بدأوا ياكلوا بس تاليا كانت حاسة بألم في بطنها، فـ قالت بتعب: فريد. فريد: نعم؟

تاليا بوجع: بطني.. بطني شادة عليا يا فريد. تفيدة: يا بنتي الولادة كمان أسبوع.. ده تلاقيه طلق هيروح وييجي. تاليا بصرخة: مش قااااادرة! فريد قام بسرعة وقال: طيب إهدي إهدي. تاليا بعياط: لا لا مش قادرة... ودوني المستشفى يا فريد. فريد وهو بيشيلها: طيب إهدي إهدي. تفيدة بعصبية: المستشفى اللي هتولدي فيها في التجمع يا فريد.. عمال ما نوصل هتكون ولدت. فريد بعصبية وتاليا بتعض في كتفه: وأنا أعمل إيه؟

نادية شاورتله على الأوضة فوق، فـ قالت هانية: صحيح ده نادية هي اللي مولدة كل بنات العيلة. تاليا بعياط: لا لا فريد لا.. مش عاوزة أولد طبيعي يا فريد. فريد وهو بيبوس راسها: إهدي يا حبيبي.. إهدي. تفيدة: مالك يا بت؟؟ ما أنا ولدتك طبيعي.. كده أحسن ليكي. فريد: ها يا حبيبتي؟ تاليا بوجع: يلا يا فريد بسرعة مش قادرة.. اتصرفوا. تاليا من كتر الوجع وافقت، وطلعها فريد الأوضة وطلعوه بره.

تفيدة: يلا يا حبيبت ماما.. هنقول واحد اتنين تلاتة.. فـ تبدأي. نادية كانت بتطلع الطفل وتاليا بتعيط وبتصرخ، لحد ما سمعت صريخ البيبي، فـ قالت تفيدة بفرحة وفريد بيعيط بره. تفيدة بفرحة: ولد يا فريد.. ولد. هانية أخدته من إيدها ونادية بتنضف المكان وبتغطي تاليا. تفيدة بصوت عالي: أدخل يا فريد. دخل فريد وهو حاسس إنه رجله مش شيلاه وحاسس بمشاعر كتير أوي، أخد الولد من إيد هانية، فـ عيط أول ما لمسه.

تاليا بصوت خافت من التعب: كبر في ودنه يا فريد.. كبر له يا حبيبي. قربت نادية من فريد وحضنته وهو بيعيط والبيبي بيعيط. تاليا ابتسمت بإرهاق وغمضت عيونها من التعب ومامتها بتمسح لها عرقها. فريد: هنسميه إيه؟ تفيدة بثقة: فينيك. تاليا بإرهاق: بس يا ماما بس.. هنسميه عز الدين.. على اسم بابا فريد. فريد قرب منها وباس راسها وقال: يا روح فريد. "في سبوع عز الدين فريد الغالي" تاليا بعصبية: براحة يا ماما.

تفيدة بعصبية: أنتِ تخينة على الفستان.. أعمل إيه يعني؟ تاليا بحب وهي بتبص على الفستان الأزرق اللي فريد كان جايبه ليها: حاولي يا ماما.. حاولي. تفيدة وهي بتلمس عرقها: قفل.. الحمد لله. رضوان بفرحة: مبروك يا حبيب عمك.. مرضتش أسافر غير لما أشوف عز. فريد وهو بيحضن عمه: حبيبي يا عمي. تفيدة بصوت عالي وهي ماسكة عز: فريد.. تاليا عايزك عند الحمام. فريد بإستغراب: ليه؟ مالها؟ راح بسرعة لقاها منكمشة في نفسها قدام الحمام.

فريد بصدمة: تاليا! تاليا رفعت راسها ليه وقالت بضحك: اقلع يا فريد! فريد ضحك بصوته كله وشالها من على الأرض ولف بيها وهو بيقول بهمس: آه يا بنت الجنية. تمت. النهاية