معاد الدكتور يوم الخميس _طب ما تاخدي مامتك معاكي _لأ أنا محتجاك أنت معايا _طيب إن شاء الله "بتمسك ورقة وقلم وبتكتب جملة وتحطها على باب التلاجة" "معاد الدكتور يوم الخميس ارجوك متنساش" -مسكت النوت بتاعتها وبدأت تكتب...
"أتمنى بجد مينساش المرة دي أنا كتبت الجملة في كل مكان ممكن عينه تيجي عليه علشان مروحش لدكتور لوحدي زي كل مرة المرة دي الدكتور هيقولي العلاج جاب نتيجة وأقدر أحمل ولا العلاج جاب نتيجة ولا لأ بقالي خمس سنين بتعالج علشان أقدر أخلف" "أتمنى بجد مينساش" بيعدي الأسبوع. بتصحى الصبح تشيل الورقة وتحطها في جيبها وتدخل تحضر فطار. _صباح الخير بتبصله و تبتسم. "صباح النور"
بيقعدوا يفطروا في سكوت تام. بتبصله وهو مركز في الفون. وبعد نص ساعة بينزل الشغل. "مسكت النوت" _فاضل على معاد الدكتور خمس ساعات و17 دقيقة "بترجع تمسك النوت بعد كام ساعة بتوتر" _فاضل ساعة على معاد الدكتور وهو لسه مرنش يقولي اجهزي علشان نروح الدكتور "بتعدي ساعتين وبتمسك النوت بكل خيبة أمل" _كنت أتمنى أنه مينساش أنا دلوقتي هنزل لدكتور لوحدي
نزلت. وبعد ساعة ونص رجعت بكل خيبة أمل أنه محصلش حمل. الموقف صعب. عارف يعني إيه تفضل تتعالج سنين علشان بس تسمع جملة "مبروك أنتي حامل" وميحصلش؟ وميكنش حد جنبك حتى أقرب شخص ليك؟! سمعت صوت فتح الباب وصوت ضحكته وهو بيتكلم في التليفون مع واحد صاحبه. فضلت متابعه بعيونها بنظرات ثابتة. بيقعد جنبها وهو مكمل في المكالمة. وبعد دقيقة بيقفل المكالمة. _أحضّرك غدا _أكلت مع صحابي _هو انت كنت مع صحابي؟
_آه مانتي عارفة إن يوم الخميس بكون مع صحابي أنتي نسيتي ولا إيه _لأ أنا مبنساش قامت دخلت المطبخ وطلعت الورقة من جيبها ورمتها في الزبالة ووقفت تعمل شاي.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!