رواية الضحية الفصل السادس 6 - بقلم رويدا راشد

كنت نستنى في ردة فعل محمد. أحيانا القلوب قداش غبية تتعلق بناس ماتعرفش الحب. مر الأسبوع الأول وأنا كل يوم نقول خلاص، اهو اليوم بيجي بيقولي: "أنا نحبك مهما صار بينا، انت ليا وأنا ليك". جنان: أسبوع يعادل شهر عندي. نفيق على نكد، نرقد على نكد. للي المفترض اسمها أمي رافضة فكرة إني نفركش الموضوع مع عريس الغفلة محمد. غزالة: مادام حتى رانيا انخطبت، خلي انديرو بدل الفرح فرحين.

محمد: أنا قررتي تخطبيلي واسكتت. وضميت فمي أنا. إنك تجبريني نشوفها وهيا مع غيري هلبا الحق. صفاء: شن فهمك؟ هاذي حركات باش تقدر تنساها. محمد: مليون ألف مرة نقولك اطلعي منه الموضوع. غزالة: اختك تبي مصلحتك للي انت ماتندريش عليها. محمد: كنت أضعف وأحقر من إني نقوي قلبي وندافع على حب حياتي. رانيا سيبتها تضيع من إيديا وأنا ساكت ومسلم.

خديجة: أنا نعرف يابنتي إنه قلبك مع شخص ثاني. لكن صدقيني الظروف عذره. يحطه الشخص الضعيف باش يبعد. لو كان يحبك ربع الحب للي شفته في عيونك مستحيل يفرط فيك. ماتعرفيش الخير وين. للي نعرفه ومتأكدة منه إنه قيس يحبك ومستحيل تندمي على قرارك هذا في يوم من الأيام. رانيا: كنت نسمع في كلام خالتي وهو ينزل على قلبي زي البلسم. وندعي ربي يقويني باش ننسى ونتخطى. قيس إنسان مخلص ونظيف. مايستاهلش مني إني نخونه ولو بالتفكير.

فهيمة: علاش عطيتها ولا؟ ضروري بنتي انخطبت تلحق حتى هيا. محسن: اسمعي، بنتي ماعندكش بيها علاقة. مش ساد تخطيطك انت وغزالة اختي. مازال حتى مع ولد خالتها تبي توقفي فيها. فهيمة: اقل ضريبة ممكن تدفعها باش ننسى الخسائر للي مريت بيها على خاطرك. رانيا: كنت أضم. بالصدفة سمعت جزء من النقاش بينهم. محسن: من ضربك على إيديك؟ انت أصلاً سبب في كل حاجة صارت في حياتي. مستحيلة تكوني بشر زينا. تقولي مخلوقة من ضلعة؟ من شيطان.

فهيمة: إيه نسيت. ماهو أنا للي... محسن: سكري فمك. نصيحة مني ليك. خير ما يصير تصرف ثاني تندمي عليه. فهيمة: معناها دير حل وأثبت نسب جنان ليك. لأنك انت بوها. وللي يغلط يتحمل نتيجة غلطه. محسن: مريضة انت. تبي تفضحيني في عقاب عمري. معقولة. فهيمة: إيه نبي نثبت حقها. من بيستعرف بيها. محسن: كانك تحكي على الورث، أنا مستعد نكتبلها الحوش باسمها. غير سكري فمك. فهيمة: شن سكري فمك؟ حق بنتي ونبي نضمنه. واكتبه باسمي أنا. محسن: علاش؟

شن انت بنتي ولا هيا. فهيمة: أنا أمها للي انحرمت منها سنين. وأنا نعرف مصلحتها. بنتي مضحكة. ينضحك عليها بكلمتين. لو غزالة تعرف الموضوع تفرح فرح. محسن: ساهل. ساهل. سكريه الموضوع توا لين أنا نكلمك. رانيا: الكلام للي سمعته قهرني. خلاني مصدومة. معقولة بابا هوا أب جنان. وكيف هانت عليه أمي باش خانها. لبست عبايتي وكلمت خالتي كميلة وقتلها تعالي ارفعيني. كميلة: مسافة الطريق ونكون عندك. جنان: خيرك وجهك أصفر. شن فيك.

رانيا: كنت خاطري نقولها ابعدي عليا. أكيد تعرف السر هذا. مافيا شي. تعبت من حوسة الحوش. جنان: هاتي منك. معاش تمسي شي لين تشدي حيلك وترجعي صحتك. رانيا: أصلاً خالتي جاية في الطريق. بنطلع. جنان: إيه غيري جوك. الحوش مولي طاقة سلبية يفدد. طلعت رانيا هيا وكميلة لحوش خالتها خديجة. الطريق كلها وهيا ساكتة. رانيا: كيف بنحكيلهم الموضوع. مش ساهل. هذا موضوع شرف ونسب. خديجة: شن فيه رانيا. تكلمي.

رانيا: نبي مهما إيصير الكلام للي تسمعوه يقعد بينا. لأنه أي تصرف غلط رح يرجع علينا. كميلة: احكي شن صاير. رانيا: قعمزت وحكيتلهم للي سمعته بالحرف. لأنه مافيه ماندس. طبعاً ملامح خالاتي كانت كفيلة تفهمني إنهم في قمة الصدمة. خديجة: وربي من وقت كان خالك عايش وكنا نتجمعوا العيلة كلها. كنت انجئ نقول لأمي ردي بالك من فهيمة. شبحاتها تخوف.

كميلة: كيف طوعها قلبها ادير هكي. لاعلي للي تحمل معاها المرة قبل الحلوة يستاهل. وعايدة الطيبة الحنينة. هكي جزاها. خديجة: صارلها زي للي يربي في فرخ الحنش في كمه. معقولة ربت بنت محسن الخاين. رانيا: جنان "الضحية" في الموضوع. شن علاقتها بالشئ للي صار.

كميلة: حتى ربي قال ﴿ قُلْ أَغَيْرَ اللَّهِ أَبْغِي رَبًّا وَهُوَ رَبُّ كُلِّ شَيْءٍ ۚ وَلَا تَكْسِبُ كُلُّ نَفْسٍ إِلَّا عَلَيْهَا ۚ وَلَا تَزِرُ وَازِرَةٌ وِزْرَ أُخْرَىٰ ۚ ثُمَّ إِلَىٰ رَبِّكُم مَّرْجِعُكُمْ فَيُنَبِّئُكُم بِمَا كُنتُمْ فِيهِ تَخْتَلِفُونَ﴾. خديجة: أنا مقهورة. تعرفوا شن معناها زنا؟ ولا نفهمكم. كيف بنقدر نجامل جنان؟ كيف بنتقبل كلمة ياعمتي من فمها.

رانيا: لو فهيمة حست إنه إحنا عرفنا للي صاير. رح تزيد تتقوى وادير مافي بالها. خلوها عايشة في خوف. مرات خنقة الكلب خير من قتلته. وبالنسبة ليا جنان هيا أختي زي قبل زي توا. عمري ماننسى وصية أمي. كميلة: ربي يكملك بعقلك يابنتي. هذا الصح. جنان عاشت يتيمة الأب ورغم إنه بوها حي. رانيا: أنا توا بنروح. لأنه عقرب زي هاذي معاش نخليها بروحها بكل. لازم يكونوا عيوني عليها.

خديجة: ردي بالك على روحك. وقت تشكي في شى طول اتصلي. حتى في نص الليل. روحت رانيا لحوشهم وكأنه شئ لم يكن. فهيمة: تتكلم في الهاتف. إيه للي نبيه كله رح إيصير. هانت.