رواية ألف سنة لحبيبي الفصل الثامن 8 - بقلم سارة منصور

اتفظت نجوى وشفتها بترتعش بخوف من كلام الدكتور، بعكس ياسر اللي وشه الابتسامة مش بتفارقه. فردت عليه: _ماشي، تتعمل العملية. _للأسف صعب جدًا وهو بالحالة دي. _يعني إيه؟ _الأمر متروك بيد الله. **** نجوى جالها حالة صعبة جدًا، لا بتاكل ولا بتشرب، لحد ما خسّت خالص والهالات بقت على عنيها زي الميتة. على طول بتراقب تنفس ياسر وهو نايم وماسكة إيده مش بتسيبه. وبتدعي ربنا ليل نهار إنه ما يبعدش عنها.

_تعرفي أنا فرحان جدًا، إن ربنا قبل دعوتي وإن وقتي خلاص هينتهي. أنا عاوزك تعيشي حياتك من تاني. وصيتي ليك إنك تتجوزي وتعيشي حياتك. ربنا يعوضك يا نجوى عن كل دمعة نزلت من عنيكي. ارتجفت شفتها بحزن وبدأت تبكي بقهر وهي حاسة بحزن السنين على قلبها، وإن الحاجة اللي بقت مدمنها زي العلاج معرضة إنها تروح منها في أي وقت. فقالت له وهي بتعيط:

_متقولش كده، أنا لو أقدر أعيش ألف سنة لحبيبي مش هتأخر. أنا عاوزاك تكون جنبي بس. متسبنيش يا ياسر، حرام عليك. أنا ممكن أموت من غيرك. _نفسي في اللحظة دي أقدر أتحرك لمدة دقيقتين أحضنك بس فيهم. نجوى حسّت إنه بيودعها بعد ما راحت له تحضنه بكل خوف، كأنها عاوزة تدخل جواه، وحاسة إنها مهما قربت منه روحه بتبعد عنها. فقالت له: _أنا طول الفترة دي كنت بحس إنك جنبي وبتحضني بنظرة عنيك بس. أنا بحبك يا ياسر وهفضل طول عمري أحبك.

_سامحيني يا حبيبتي. مسكت نجوى فيه جامد وهي بتحضنه والوجع بيقتل فيها، وهي ما عدتش حاسة بنبض قلبه. وفضلت تعيط بقهر زي الطفلة الصغيرة. ومات ياسر وراحت معاه كل حاجة حلوة وكل كلمة حلوة. وكان كل يوم بيمر عليها في بعده كان ألف سنة. ساعات الحياة بتقرب مننا ناس بدأنا معاهم بتبقى غلط بسبب دخول أطراف تانية، بس ساعات المسار بيتغير في أي لحظة، ووقت ما قلبنا يضعف ونحبهم يروحوا مننا بكل سهولة.

اختارت نجوى إنها متتجوزش، عشان تبقى زوجته في الجنة، وأنها تعيش عشان بنتها. وكانت بتستنى يخلص وقت شغلها كل يوم عشان تروح تقعد في أوضتها وتقفل عليها الباب وتعد بالساعات الطويلة لوحدها.

وتمر السنين بطولها وعرضها وبنتها مرعوبة عليها وحاسة إنها اتجننت بسبب كلامها طول الليل مع نفسها في أوضتها. ولحد دلوقتي خايفة تواجهها. ولو بنتها تعرف إنها قاعدة تلبس في هدوم ياسر وتشم في ريحه وتتخيل طيفه ماشي قدامها بضحكته الراضية اللي كانت سبب إنها تعيش لحد دلوقتي، ما كانتش هتقول عليها مجنونة، بس ده هتقول عدت مرحلة الجنون بكتير اللي بيطلق عليه لفظ العشق.

رفضت نجوى فكرة إن ياسر ذكرى حلوة، وكانت دايما تقول لبنتها إنه عايش جوه عنيها وفي قلبها. من حق شريك حياتك إنك تديله فرصة إنك تحبه، يمكن هو ده اللي قلبك بيستناه من زمان، متستناش إنه يفتح لك الباب، افتح باب قلبك أنت الأول وحبه، يمكن تخرج منه أسمى معاني الحب يغذيك بيها طول حياتك.