رواية الحامي الوسيم الفصل الثالث 3 - بقلم ملك أسامة

سيدرا كانت هتصرخ لكن مالك منعها وكتم بوقها. مالك: أهدي، هشيل إيدي ومتصرخيش، هما مش هيفهموني، أنتي بس اللي هتفهميني. أشيل؟ سيدرا هزت رأسها وهو شال إيده. سيدرا: يعني أنا مصاصة دماء فعلاً ولا إيه؟ فهمني. مالك: تعالي معايا. سيدرا: فين؟ مالك: هعرفك كل حاجة. سيدرا: بس ماما أو حد ممكن ييجي. مالك: هرجعك قبل ما ييجوا، هنا يلا تعالي. سيدرا حطت إيدها في إيد مالك وهو شدها نحيته وغمض عينه وهي عملت زيه.

فتحت عينها لاقت نفسها قدام بحر. سيدرا: إيه دا؟ مالك: ممكن تقعدي أفهمك ولا لأ؟ سيدرا: طيب إحنا فين؟ مالك: بصي حواليكي هتعرفي. سيدرا بصت حواليها ومعرفتش. سيدرا: فين برضه؟ مالك: واضح إنك مجتيش إسكندرية قبل كده. سيدرا: قول من الأول إن دي إسكندرية. مالك بدأ يقلدها: قول من الأول إن دي إسكندرية. سيدرا: ماااالك متعصبنيش وفهمني. مالك قعد قدام البحر وبدأ يتكلم.

والدتك كانت في إسكندرية وقابلت والدك هنا زي ما قولتلك، هو بشري، حبوا بعض وهي كانت خايفة عشان هي مصاصة دماء، اعترفتله وهو اتمسك بيها أكتر ومردش يسيبها، هي بعدت عن المصاصين واتجوزته وخلفتك. ملكة المصاصين اللي هي سيدرا كانت بتحميهم وأمرتهم إنهم يسموكي سيدرا زيها، وأنتي عندك 14 سنة أمرت والدتك تسيبك، لكن والدتك رفضت رفض تام، ووالدك كمان، لكن هي قالت إن ده الصح وإن ده اللي لازم يتعمل، وفعلاً سابوكي، وأنتي كل ده عايشة تحت حمايتها، لكن أهلك في السنوات الأخيرة بعدوا عن حمايتها وعصوا أوامرها ومختفيين بقالهم كتير، وهي خايفة عليكي ليظهروا وهيكونوا خطر عليكي.

سيدرا: أنا دماغي عملت ايرور. مالك: طيب تعالي نتفسح شوية وبعد كده أكملك. سيدرا قامت معاهم وبدأوا يتفسحوا، وآخر النهار راحوا اتعشوا في مطعم. سيدرا: كمل بقى. مالك: وهما ممكن يكونوا خطر عليكي عشان يعني أنتي آه مصاصة دماء، لكن دمك بشري. سيدرا: ولو عايزة دمي يبقى زيكوا؟ مالك: مينفعش، إحنا مش عارفين لو دمك بقى زينا إيه اللي هيحصل، ممكن تموتي. سيدرا: أهلي خطر عليا إزاي؟

مالك: والدتك ممكن تحاول تخلي دمك زينا، وده شيء إحنا مش عارفين نتيجته. سيدرا: لا بقولك إيه، أنا دماغي مش هتتحمل كل ده، أنا اللي فهمته إنك زي الحارس الشخصي كدا يعني. مالك: بالظبط، هبقى معاكي دايماً. سيدرا: ده إزاي وبابا وماما هيقولوا إيه؟ مالك: لا ما أنا عامل حسابي. سيدرا: حساب إيه بالظبط؟ هتفضل معايا دايماً إزاي؟ مالك بثقة: هتجوزك.