رواية الهجينة الفصل السادس والخمسون 56 - بقلم ماهي احمد

عبارات نابيه مما جعل مارال تتصدى له وتقف أمامه بحده: _أخيس ياحسان قطع لسانك ماتقولش عليها كده. يدخل بدر ليحجم الموقف: _غدير عمرها ما كانت كده، هي بس كانت مخنوقة و.. قبل أن يكمل، أشار له بربروس بكف يده حتى يكف عن الحديث قائلاً: _نعلم جيداً بنات عائلتنا، فمن صفاتهم الاحترام. لا داعي بأن يدخل غريب بيننا ليعلمنا من هن بناتنا. طالع حسان بنظرة حادة، نظرة جعلته ينظر للأرض بندم:

_وما قاله حسان عن ابنتنا ما هو إلا ترهات ناتجة عن قلقه فقط. أشار برأسه لـ مارال يحثها على أخذ غدير للداخل. وافقت، تمد كف يدها لها. وما أن مدت كفها حتى استجابت لها غدير، تطالع بدر بعيون دامعة. يراها تبتعد عنه تحت ناظريه. وما أن دلفت داخل المنزل حتى حث بربروس بدر على الرحيل وتوعد لـ حسان على فعلته منذ قليل. رحل الجميع. وقبل أن يلدف إلى المنزل وجد الطبيب يصعد إلى سيارته. حثه على النزول بقول:

_أيها الطبيب، أين أنت من ليلة البارحة؟ قالها بلهجة طغت عليها اللامبالاة: _معلش يابربروس، سيبني دلوقت. يعلم جيداً ما بداخله، فنظر بربروس إلى الساعة بمعصم يده وقد دقت التاسعة. صعد جواره داخل سيارته وبدأ بقول: _إنها التاسعة صباحاً، وقد تذكرت شيئاً. أريد منك أن توصلني إلى مكان ما. وضع الطبيب المفتاح بالسيارة وحركها وهو يسأل: _عايز تروح فين يابربروس؟ أجابه بربروس بما لديه:

_إلى المكان الذي تقصده، فقد تذكرت أن لدي موعد هناك. قالها الطبيب بحدة: _بس أنا مش عايز حد معايا يابربروس، أرجوك تسيبني في حالي. لم يقابلها بربروس إلا بكل هدوء، يجلس بأريحية على مقعده وبدأ بقول: _حسناً، إلى أين تريدنا أن نذهب؟ أدرك الطبيب مراوغة بربروس، ضغط على دواسة البنزين يتحرك بالسيارة وهو يردف بحنق: _أنا عارف إني مش هعرف أخلص منك.

حلت الظهيرة ولم يأت منها إلا ضوء خافت جاء على استحياء. اتجه ياسين ناحية الكوخ يطالعها بهدوء من بعيد، يستند بظهره على الباب، يطالع سكينتها متمنياً بألا يصيبها أي مكروه. فشعور بأنك ستفقد من تحب يدفعك للجنون. يتحدث بعيونه ما لم ينطقه لسانه:

_لو جرالك حاجة في يوم، العيشة في بعدك هتصبح مرة والدنيا هتفضى من الونس. على واحد عاش سنين محروم منه، ومحسش بيه إلا بوجودك جنبه. أنا الغريب في دنيا نابذة وجودي جواها، متقيد بيها ومعاها وكأنك حريتي اللي فضلت سنين أتمناها. كلمات يرددها بينه وبين نفسه، فأتى عم نصير من خلفه بعدما رحلت حكيمة وهي تحذره من ألا يعلم أحد بقدومها. يمد يده بكوب من الشاي الدافئ يعطيه له، يقطع شروده سائلاً: _بتحبها يابن الصاوي؟

سؤاله أربكه. شعر بانسحاب الأنفاس من سؤاله. أعطاه ظهره يجلس على الأريكة الخشبية أمام الكوخ قائلاً بكلمات متقطعة نافياً سؤاله: _عارف لما تبقى أكتر حاجة انت عايزها هي أكتر حاجة ماتنفعلكش، اللي بتتمناه يبقى جنبك هو الوحيد اللي لازم تبعده عنك. أتى يجلس بجواره ومازال ممسكاً بكوب الشاي بيده، يعيد عليه سؤاله: _مش ده رد سؤالي اللي مستنيه ياياسين؟ لاحت على شفتيه ابتسامة ساخرة وتحدث نافياً: _شمس عمرها ما انكتبت ليا في يوم.

قالها عم نصير: _وده أنت اللي قررته بنفسك. أغمض عينيه بتعب فأعطاه عم نصير كوب الشاي الساخن ومد يده يستقبله منه وقال بوجه بشوش يتابع حديثه: _طب بلاش بتحبها، على الأقل بتحس ناحيتها بأيه؟ وقبل أن يجيبه، اقترح عليه أن يجيبه كما يفعل سابقاً بطريقته الشاعرية بحديثه الفصحى كما كان يحب منذ سنين مضت وهو يدون كل شيء بداخل مفكرته، حتى يخرج ما بقلبه. صمت قليلاً ينظر أمامه وقد كان يحاول تجميع الكلمات. قال وعيونه تدور في أرجاء

المكان يشرد بما شعر به: _أشعر وكأن العالم مظلم ووحدها من تضيء عتمته، وكأنها الجار والجوار والدار والديار. لا شبيه لها ولا مثيل ولا بديل. أجابه بغموض لم يروي ظمأ أسئلته، فنطق يؤكد عليه: _يبقى بتحبها ياياسين. صرح ينكر جملته سريعاً: _ما تكبرش الموضوع، مش للدرجة دي. أكمل حديثه يغير مجراه، وتابع نصير ردة فعله وهو يرى الغضب الذي كاد أن يلتهم وجهه:

_أنا طلعت مغفل كبير أوي ياعم نصير، كنت فاكر نفسي شديد ومحدش يقدر يضحك عليا، لاء وكمان كنت فاكر إني أقدر أحمي اللي مني وطول ما هما جنبي هيبقوا في أمان. عمار طلع.. مي..ت مش عايش وكمان لما.. مات.. مات قدام عينيا وشمس انضربت بالـ..نار وهي في حضني ومش هتطلع من حد غيره، مش هتطلع غير من فريد. قال عم نصير: _وهتتصرف إزاي ياياسين؟

وجه عم نصير سؤاله له، وقبل أن ينطق أتت زهرة تهرول وقد انتشر الخبر سريعاً بين أهل القرية. الكل علم بخبر إطلاق الـ..نار على شمس في المساء بعدما رآه أحد الماره يهرول بها بين طرقات القرية تنسدل دماؤها منها متجه ناحية الكوخ. أتت زهرة تهرول ناحيتهم، ظنت أن ابنتها قد فارقت الحياة. مجرد تخيل هذا جعل جنونها ينشط. فتحدثت بصوت نال منه الفزع وعيون مستنجدة قد نال منها الذعر، تقبض عليه من تلابيبه: _بنتي، بنتي فين ياياسين؟

حصلها إيه، انطق. أغمض عينيه بتعب وفتحهما تلقي على مسامعه البقية: _شوفت، شوفت أنا كنت خايفة بتي تبقى معاك ليه، عشان مافيش خير بييجي من وراك ياياسين مهما حصل. أنت اللي مكنتش فاهم ده، حرقتلي بيتي وطلقتني من جوزي وأنت السبب في أذية بنتي. أنا كنت كل همي في الدنيا أنها تتجوز واحد سوي تعيش معاه أيامها في أمان واحد ما تخافش معاه من بكرة، وأهو قبل ما ييجي بكرة يابن الصاوي كانت مضروبة بالـ..نار. هو ده اللي أنت عايزه؟

أنت كده بتحميها؟ أنت ما بتعملش حاجة غير إنك تدمر اللي حواليك. إيه اللي جابك بس؟ إيه اللي رجعك؟ ما أنت كنت بعيد وقولنا خلصنا منك. عشر سنين عشناهم من غيرك كنا عايشين في أمان، ومن وقت ما رجعت ماشوفناش غير وجع القلب وعدم الأمان. روح منك لله.

انهارت، لم تقدر قدماها على حملها أكثر من هذا. استشعر رعشات جسدها، خانتها قدماها وقد خرت على الأرضية ومازالت ممسكة بتلابيبه. جلس معها وفعل عكس المتوقع، فعل ما أدهشها. تحدث معها هذه المرة ووضع استفزازه لها جانباً، ربت على كفيها بحنان يحدثها بعينين صادقة وقلب مكسور: _أول مرة أوافقك على كل كلمة قولتيها يازهره.

حركت زهرة رأسها بغير تصديق وعادت تنظر له من جديد. ساعدها على الوقوف وقد جلسا سوياً على المقعد الخشبي. وضع كفه أسفل وجنته وهو يقول بهدوء واستسلام، لم تعهده منه من قبل: _ماتستغربيش يازهره، أنتِ فعلاً عندك حق في كل كلمة قولتيها. أنا دلوقتي بس فهمت إن طول ما شمس جنبي هتشوف الأذية ألوان. الصدق ينطق في حديثه وفي مقلتيه وهو يدافع عن نفسه:

_بس مش هتبقى الأذية مني، هتبقى من اللي حواليا. عشان أنا جنبها حاجة مكنتش فاهمها وفهمتها دلوقتي. حاولت تنبهيني قد إيه أنا مؤذي، بس مكنتش فاهم. كنت فاهم إن اللي زيي ينفع يتغير ويقدر يعيش في أمان زي بقيت الخلق. برزت ابتسامة على ثغره يحاول بها أخفاء الألم الذي ينزف من كلماته:

_آه، أنا حرقت بيتك وعارف إن مكانش ينفع أعمل كده، بس وقتها مكنتش بفكر. مكنتش عايز حاجة تبعدني عنها، كنت خايف لا تبعد وتتأذي. محطيتش في بالي ولو لحظة إني السبب في أذاها. اطمني، شمس لحد دلوقتي بخير وأنا همشي وأسيبها يازهره، بس مش قبل ما أبعد عنها اللي ممكن يأذيها وأطمن قلبي عليها. عند هذه النقطة تحديداً انفجرت في البكاء، تعالت شهقاتها وأصبحت تسرق الأنفاس بصعوبة من بين شهقاتها. تحدثت تبرر له:

_ياسين أنا مش وحشة، بس أنا شفت الوحش اللي جواك. محدش فيكم باصصلي بعين أم خايفة على ضناها واللي هي حتة منها. أنا اتحرمت من شمس 16 سنة وأنت كنت بالنسبالي الوحش اللي حارمني منها. كنت بنام وأقوم وأنا كرهالك. عارفة، عارفة إن كل اللي حصلك كان غصب عنك، بس أنت مش ابني مش حتة مني عشان أحس بيك. لكن هي لأ، هي اللي طلعت بيها من الدنيا وكل اللي بتمناه إنها تعيش في أمان اللي باقي من عمرها. وأديت شوفت واعترفت بنفسك إنها كل ما هتكون معاك كل ما الأذى هيجري وراها بالمشو.

تحدثت معه باستفاضة وتفهم هو مشاعرها، وافقها على كل شيء. وأتى إلى النقطة الأصعب ولكنه كان بارعاً في التعبير: _شمس تستحق ترتاح والدنيا تبقى ليها براح، حتى لو أنا مش فيها. ولا أستحق براح الدنيا معاها. شمس تستحق كل حاجة حلوة في الحياة، هي أصلاً بالحياة وما فيها. صدق نبرته أذهلها، وحتى حاول أخراجها من نوبة بكائها الزائدة بقول: _خلاص بقى، ده أنتِ نكدية بزيادة.

اشتركت تقاسيمها وزادت شهقاتها التي هتفت من بينها وتعالت نبرتها بغـ ـضب: _ما أنتَ السبب، أنتَ برضوا سبب طلاقي ياللي منك لله. حول عينيه للون الأحمر وتهكمت تقاسيمه وقد بان على ملامحه الجدية: _صوتك ما يعلاش يازهره، ولا عشان قعدتك جنبي وطبطبت عليكي بكلمتين هتاخدي على. أدب الذعر بقلبها، ابتعدت عنه متجه إلى طرف المقعد. ابتسم عم نصير من فعلته. ضاق نفسها فهي الآن بمفردها معه. ابتسم يشير لها بيده مازحاً بعدما أعاد

عينيه إلى لونه الطبيعي: _والله يازهره أنتِ غلبانة بجد، وما طلعتيش حيع ولا حاجة. تعالي، تعالي، أنا بهزر معاكي. في برضه حد يأذي حماته. نفت كلمته وبشده: _ما تقولش حماتي. انصاع لأمرها يخبرها: _اللي تشوفيه يازهره، حلو كده. صدرت عن زهرة تنهيدة متعبة ثم أخبرته: _حلو، بس عايزاك توعدني إنك فعلاً هتبعد عنها وتطلقها.

صمت للحظة وألقت عليه نظرة وقد خيم على عينيه الحزن. وجدته يطالعها بعينين وقد لمعوا ببريق ممزوج من الحزن. وبالرغم من ذلك يجبر شفتيه على الأبتسام: _هوعدك، بس مش قبل ما تفردي وشك ده الأول. كانت نبرته هنا جادة عكس نبرته المازحة مسترسلاً:

_هوعدك، بس مش قبل ما تطمن عليها وتبعد اللي عايزين يأذوها عنها. بس لحد ما ده يحصل، أنا هفضل جنبها ومش عايز منك أي اعتراض إني أبقى قريب منها. واللي أقولك عليه تنفذيه، يعني وقت ما أقولك خليها معايا هتفضل معايا. قالتها معترضة: _أيوه بس.. فبتر حديثها بعدما علم مقصدها: _مش هلمسها، ولا هقربلها. شمس عمرها ما كانت ليا في يوم يازهره، اطمني. دي حاجة أنا عارفها ومأمن بيها كويس. أشار برأسه يحثها على النهوض:

_يلا، ادخلي لبنتك واطمني عليها، هي قريب هتبقى بخير.

كانت في الحقيقة تبكي وكأنها المرة الأخيرة، تفرغ كل ما لديها من الدموع. شعرت مشيرة بكل ما هو قاتل. كلامه مزقها. فعل كل هذا فقط حينما علم بأنها جارته بأن عمار ما زال حي يرزق. أبعدها عن حياته للأبد. وأه كل الأه لو علم بأنها تدس له الدواء بداخل مشروبه حتى يظل على عماه. أخذت تحدث نفسها ماذا لو علم بأنها هي من تسبب بإطلاق الـ..نار على شمس. ماذا سيفعل حينها. كل هذا نفضته عن تفكيرها. كل شيء مباح لديها فقط ليظل بجوارها.

عادت إلى المنزل بعدما وعدته بأنها تريد الراحة ولو قليلاً وستغادر بعدما تلملم أشياءها المتبقية من بيت الصاوي، وهي تعرف تمام المعرفة أنهم سيكتشفون مـ ـقتل شمس قريباً ومن ثم ستبقى بجواره لمواساته كما تفعل كل مرة. توقفت لدقائق تفكر. لم تسمع نحيب أحدهم. لم يتحدث هو عن مـ ـقتل شمس وكل ما يشغل باله فقط هو عمار. تحرك حسان أمامها فاستوقفته مسرعة تسأله بلهفة: _إلا قولي ياحسان، هي فين شمس؟ لم حاجبيه باستغراب

ثم أرضت هي فضوله بقول: _أقصد يعني، مافيش حد في البيت. هو أنتوا فين؟ بان عليه القلق بقول: _أنتِ ماسمعتيش، أختي شمس انضربت بالنـ ـار. كل اللي في البيت مش موجودين، كلهم راحوا عند كوخ عم نصير. قالت: _يعني عايشة؟ مامـ ـاتتش؟ كانت ترغب وبشدة في موتها. رمقه حسان وبشدة وهو يعترض على ما يقول بقوله: _بعد الشر، إن شاء الله اللي يكرهها. جت سليمة بس عم ياسين هيعرف يجيب اللي عملها، إن شاء الله لو كان في جحر نملة.

شلت الصدمة مشيرة. الآن ما هذا الذي تسمعه. اشتعلت عيناها. ودت لو قـ ـتلته ولكنها تصنعت الشفقة ببراعة وهي تقول: _أنا ما أقصدش، بعد الشر عليها طبعاً. أنا بس كنت عايز أطمن عليها. أشار بكف يده للخارج: _أنا كنت بجيب لها هدوم ورايحلها دلوقتي. لو حابة تيجي معايا، استناك. هتفت مسرعة: _لا، لاء. هاروح لها وقت تاني. أنا هدخل أوضتي عشان أرتاح. جاء رده جافاً: _عن إذنك ياطنط.

استدار ليغادر من هنا. ترمقه بعيونها التي لو كانت سهاماً لأصابته. وخر حسان أرضاً سريعاً. الآن تمتمت بداخلها بقول: _طنط لما..

دخلت إلى غرفتها صافعها الباب خلفها بعدما أدركت أن ما خططت له أصبح بلا فائدة. ركلت الطاولة التي أمامها بقدميها بقوة. مسحت دموعها بعنف تحاول كتم صرختها ولكنها فشلت. وما أن وجدت زجاجة من المياه أمامها حتى ألقت بها بعرض الحائط. تحولت الزجاجة إلى قطع. التقطت إحداها لكي تجرح يدها بعنف حتى تهدأ. فهذه هي وسيلتها الوحيدة للهدوء عبر جرح ذراعيها تتلذذ بالألم الخارج منها. وما تجهله بأن الخالة مازالت بداخل المنزل تضعها تحت أعينها دون أن تراها وأن الألم الحقيقي قادم لا محالة.

أخيراً وقف الطبيب بسيارته أمام بيت مهجور، بيت قديم من الطين متهالك. هبط من سيارته يقف أمامه يتأمله. تبعه بربروس يقف من خلفه. قطع صمت الطبيب بسؤاله يربت على كتفه بابتسامة: _هل هذا بيتك القديم؟ هز الطبيب رأسه وقد لمعت الدموع بعينيه وهو يقول: _كان بيتي أنا وياسين. جلس على الطوب اللبن بهدوء يسرد له ما كان يحدث منذ زمن:

_لما كنا صغيرين، والدي كان دايماً شايف ياسين مستهتر مابيشيلش مسؤولية. كان كل ما يقعدوا في قعدة معاه وهو بيحل مشا مشاكل أهل القرية، ياسين كان بيزهق ويسيبهم ويطلع فوق السطوح جنب غية الحمام. الحمام أول ما يشوفه كان بيتلم حواليه ويمسك دفتره اللي مكانش بيسيبه ويكتب قد إيه إن نفسه يكبر عشان يبعد عن القرية ويعيش حر زي الحمام اللي بيربيه. أبويا لما كان يبص ما يلاقهوش جنبه كان بيعرف مكانه أكيد جنب غية الحمام. يطلع ويدور في

الضرب ويديله كل قلم وقلم. كان لسه صغير ما يكملش العشر سنين. وأنا كانت صحتي على قدي. أبويا كان عارف إني همـ ـوت زمان. مكانوش يعرفوا حاجة اسمها كانـ ـسر. كان عارف إن صحتي على قدي وبس، ماقدرش أمسك قرية بحالها مع إني كنت بحب أقعد معاه أوي بس هو مكنش بيرضى. كنت بصلب طولي بالعافية وأطلع السلم عشان أدافع عنه ومخلهوش يضربه واقف في النص ما بينه وما بين أبويا. وأبويا مراعاة لصحتي التعبانة كان بيوقف ضرب في ياسين أول ما يشوفني

وينزل ويسيبه.

لمع بريق في عينيه وهو يتابع من جديد: _كنت وقتها باخده في حضني ويفضل يبكي جواه ويقولي أنا مش عايز أبقى كبير القرية، مش عايز أبقى مسؤول عن حد. كان حديثه هذه المرة غير المرات السابقة، حرك داخله أشياء ساكنة دفعته للانهيار وهو يقول:

_ولاقيته بيقولي اللي خلاني أبقى مسؤول عنه سنين طويلة، لاقيته بيقولي ياريتك كنت أنتَ أبويا بداله. أخدته في حضني وأنا بعيط ووعدته إني مش هخلي حد يمد إيده عليه بعد كده. وجينا آخر القرية أنا وهو وبقينا نعمل البيت ده من الطين حتة حتة وطوبة طوبة. قعدنا فيه شهور نبنيه بس كنا مبسوطين. وأنا لما كنت بتعب كان بيكمل هو بدالي. ولما كنا بنحب نهرب من القرية ومسؤوليتها كنا نيجي هنا ونفضل سوا. ولما ظهر المهدي وحكيمه أشـ ـفقت عليا

لأني خلاص جبت آخري وفي أيامي الأخيرة حولتني وأنقذتني من المـ ـوت وحاكيتله اللي حصل. قالي ماتسبنيش وأنا كمان ماكنتش عايز أسيبه وطلبت من المهدي يحولوا زيك. وبقينا من ساعتها سوا. بس مكنتش أتخيل في يوم من الأيام إني أنكث بالوعد اللي وعدتهوله وأنا اللي اضربه بدل أبويا. مش فاهم عملت كده إزاي. لأول مرة ماقدرش أتحمل استفزازه ليا، لأول مرة أندفع في شعوري يابربروس وماتحكمش في نفسي قصاده. خايف لا ما يسامحنيش ويبعد عني وأنا ما

صدقت رجع يبقى جنبي من جديد. ياسين مش أخويا الصغير وبس، ياسين ابني اللي ما خلفتوش وصاحب العمر ورفيق السنين الكتير اللي عيشته.

تابع من بين دموعه: _محتاج أخده في حضني زي زمان وعارف إن هو كمان محتاج الحضن ده وخايف لا الأوان يكون فات. ربت بربروس على كتفه مهوناً: _هون عليك يا أخي. من خبرتي لسنين طوال فقد علمت بأن مصارين البطن تتعارك ولكنهم يظلوا مصارين في بطن واحدة. مهما تشاجروا سيعودون من جديد سوياً، فقط إنها الأيام ستداوي الجروح.

يوم جديد والأيام تتوالى على ركودها متدثرة بفراش عم نصير. حالتها بدأت بالاستقرار التام. تأتي لها والدتها طوال النهار وترحل بالمساء. وهذا بعدما طلب ياسين من والدتها استكمال علاجها هنا تحت أنظاره حتى لا يلتقي بالطبيب علي داخل منزل الصاوي. هو الآن وفي هذه اللحظة هنا حيث الكوخ البسيط. الوقت يمضي بسرعة البرق. وككل ليلة يسهر بجانبها، يسهر على راحتها بعدما غادره عم نصير وأخبره بأنه سيقضي الليلة لدى قريب له. فأصبحوا بمفردهما سوياً. وكالعادة أشعل النيران بالأخشاب التي بالخارج في ليلة شديدة البرودة كهذه. لعله ينعم ببعض الدفء. كل ليلة يتمنى أن تستعيد عافيتها تعود لمحادثته من جديد. وغالباً الشيء الذي نرغب به بشدة نجده يحدث بعد قليل.

عندما شعر بوجودها تقف خلفه دون إصدار أي صوت. أغلق عيونه يستشعر وجودها. يشتم رائحتها التي طالما ميزها. اقتربت منه تقف أمامه لتجد هيئته التي نمت على أنه ليس بخير. حين رمقته تصرح بصدق معاناته. نطقت وقد بدا على وجهها الاهتمام: _ياسين، أنت كويس؟ مجرد نطقها باسمه يصيب قلبه باضطراب. ابتسم على سماع صوتها من جديد. رمقها بنظرة مشتاق، يشتاق إلى روحه التي كادت أن تسلب منه. لاحت على شفتيه ابتسامة ساخرة وقال:

_أنتِ بتسأليني أنا السؤال ده؟ المفروض أنا اللي أسألهولك. أنتِ اللي اتضررتي بالـ..نار ياشمس وبقالك أكتر من تلات أيام نايمة ومحاسة باللي حواليكي. شعرت بعدم الاتزان فحاوط كف يدها سريعاً يساعدها على الوقوف قائلاً: _تعالي ارتاحي على السرير، الجو هنا برد عليكي. أخبرته راجية: _لا عشان خاطري، أنا زهقت من جوه. عايزة أشم شوية هوا.

انصاع لطلبها يساعدها على الجلوس أمام النار. دار بعينيه يبحث عن المزيد من الأخشاب بالجوار. ومن ثم وضعهم بداخلها وقد أحضر غطاء من الداخل يحاوطها به يضعه على كتفيها من الخلف قائلاً: _خلي الشال ده على كتفك عشان يدفي. ووضعت يدها تعدل من وضعية الشال الذي وضعه هو بفوضوية على جسدها فلامس كفها كفه. رفعت شمس رأسها فتقابلت عيناها بعينه. ارتبكت من نظراته الثابتة واستدارت تنظر جوارها. فحمحم يخبرها وهو يجلس بجوارها:

_أعملك معايا شاي؟ أتى بالبراد الموضوع بجواره يضعه على النار المشتعلة أمامهم. طالعته بذهول. عن أي شاي يتحدث؟ فهي تعلم جيداً بأنه لا يحب الشاي. فهم هو تعابير وجهها فابتسم بقول: _أنا عارف إنك زمانك بتقولي إن ما بحبش الشاي وإزاي بشربه دلوقتي. بس اللي يقعد بقى مع عمك نصير لازم يحبه غصب عنه. مع إنه بيعمله وحش أوي بس أتعودت عليه. تعالت ضحكاتها فابتسم هو على ضحكتها يمد كفه بكوب الشاي بعدما سكبه لها. تناولت

الكوب تقول وسط ضحكتها: _المشكلة إنه بيجبرك إنك تشرب الشاي بتاعه عافية أصلاً ومهما تقنعه إنه بيعمله وحش مابيصدقش. وذكرته هي بحدث مر عليه أكثر من اثني عشر عاماً تسرده بقول:

_فاكر لما دخلت عليا القبو وخليله كانت بتشرب كوباية الشاي وأول ما شفتك خافت وترعشت وبقت تغمي عينيها على طول بالقماشة وفضلت ماسكة كوباية الشاي مارمتهاش. وقتها نزلت علينا بخطواتك البطيئة وبنظرتك الشريره دي. ومع إنها معملتش حاجة روحت باصصلها كده وكسرت كوباية الشاي من إيدي. ابتسم بألم يرتشف رشفة من كوبه يبتسم على ذكرياته وهو يقول:

_المشكلة مش في كده. المشكلة إنها معملتش حاجة ومش لاقي لها أي غلطة. روحت مزعق فيها وقولتلها وأنتِ كمان بتشربي شاي. انكمش ما بين حاجبيه يكمل: _مش فاهم، ماتشرب شاي؟ كنت بزعقلها ليه أنا؟ غلطت في إيه عشان أبهدلها البهدلة دي كلها وأبهدلك أنت كمان معايا. انمحت الابتسامة من على وجهه ببطء وتهكمت تقاسيمه يشعر بالذنب نادماً على ما فعله:

_كنت حارمها من كل حاجة، من أولادها وبيتها وجوزها ومن جبروتي. بعد ما فضلت 16 سنة تربي فيكي وما تشوفي الشمس في يوم. أقتـ ـلها بدم بارد ولا كأنها بني آدمة وليها حياة. ده أنا كنت جبار. اعتدلت بجلستها كي تقترب منه. طالعته بهدوء قبل أن تقول بابتسامة حزينة ونبرة حنونة:

_ياسين، أنتَ مكنتش في وعيك وأنتَ بتعمل كده. كل ده كان غصب عنك. كل ما تفتكر حاجة زي كده قول لنفسك إن مش أنت السبب وإن اللي حصل ده أنتَ كنت مجبر عليه مش بإرادتك. ثم لانت نظراتها ورأى فيها خوفاً حقيقياً عليه، تحاول ألا تشعره بالذنب:

_وبعدين أنا كنت بفرح أوي لما بتزعقلها، بس برضه كنت بخاف عشان بعد ما كنت بتمشي بطلعهم عليا. طب على الأقل أنتَ مكنتش في وعيك، لكن هي كانت بكامل عقلها وهي بتعامل طفلة ماتكملش السنتين بمنتهى القسوة. لمعت العبرات في مقلتيها وهي تحكي له:

_طبعاً مش فاكرة كتير، بس فاكرة كويس أوي لما كانت بترميلي الأكل في الأرض عشان أوطي آكل منه. مكنتش بترضى تخليني أستخدم إيدي. كانت بتسيبني عطشانة بالأيام. حتى الكلام مكانتش عايزاني أنطقه. مفكرتش ولو للحظة تاخدني في حضنها زي أولادها وخصوصاً إن هي اللي مربياني. لما كرهتها وكنت بكره حتى أسمع نفسها. على الأقل في أيام رغم إن الضبع كان مسيطر عليك كنت بتبقى حنين عليا فيها. ولما كنت بتلاقي شفايفي زي الحجر رغم قسوتك كنت بتديني بوق الماية. آه، بعدين بترجع تطلعه عليا تاني. بس على الأقل كان بيحصل.

كل شيء يؤلمها وبان هذا في سؤالها بوجع طغى في عينيها: _تفتكر أنا عملت إيه عشان يحصل معايا كل ده ولحد دلوقتي لسه بيحصل؟ لسه بعاني. فرت دموعها تشعر بسخونتها على وجنتيها أثناء تنهدها بعمق:

_أنتَ ما تعرفش أنا عشت إزاي طول العشر سنين اللي فاتوا. ماتعرفش حسيت بإيه بعد مـ ـوت عمار ياياسين وكمان بعد ما مشيت وسيبتني. كنت وحيدة فضلت سنتين مكنتش بعمل فيهم أي شيء في حياتي غير إني قاعدة جنب قبره بفكر في ألف سؤال لو كان لسه عايش كان إيه اللي هيحصل في حياتي دلوقتي؟ طب ليه مات؟ ليه مش موجود؟ صمتت لثواني يتابعها بنظراته المستفسرة فأكملت وقد حاربت ترددها:

_لحد ما مذاكراتك وقعت معايا بالصدفة. رجلي خدتني ليها من غير ما أحس. لمحت التوتر الذي ظهر على وجه ياسين وهو يرد: _مذكراتي!! ردت تؤكد على ما قاله: _أيوه مذكراتك، هي دايماً معايا في الشنطة مابشلهاش أبداً. منها لو كنت فتحت شنطتي كنت لقيتها فيه. بدا على وجهه الانزعاج فأضافت تبرر:

_أنا عارفة كويس إن اللي عملته ده غلط وإن مكانش ينفع أبداً إني أقرأ حاجة شخصية ليك كده ولا أعرف عنك كل اللي عرفته. بس هتصدقني أو لاء، بس مذكراتك واللي قرأته جواها أنقذني من الوحدة وخلاني أتجه للتعليم. كان عندي فضول شديد أعرف إيه اللي مكتوب جواه. رد بهدوء جاهد ليستدعيه: _وعرفتي!! وردت بسؤال آخر: _اتضايقت؟ اختار الكذب وقال: _لأ ما ضايقتش، بس كنت عايز أعرف. عرفتي إيه؟ ابتلعت غصة مريرة في حلقها قبل أن تضيف:

_إن حياتي زي ما كانت صعبة حياتك كانت أصعب. وأن الحج يزيد باباك كان دايماً بيعاملك بقسوة وأنك ماشفتش حلو الدنيا غير من مامتك واختارت إنك تعيش مع دكتور علي وإنك تعيش مـ ـيت على إنك تمـ ـوت عايش. مش ده كلامك اللي كاتبه في مذكراتك؟ طول عمرك كان في غيرك بيتحكم في حياتك. الأول باباك ولما يادوبك طلعت من تحت جناحه اتحطيت تحت جناح الضبع.

رأت شمس الدموع في عينيه ولم يخفها ياسين بل طالعها معاتباً على النبش بماضيه ونظراته تطالبها بأن تكف عن الحديث. ولكنها ختمت وكأنها لم تر هذه الدموع: _الظاهر إن إحنا طلعنا شبه بعض أوي ياياسين، كل واحد فينا ضحية لغيره. قال: _مش جعانة؟ ألقى بسؤاله للهروب من مجرى الحديث أو الهروب من نفسه. طالعته بابتسامة وعلمت قصده وقررت ألا تضغط عليه وجارته بحديثه بقول: _بصراحة أه جعانة أوي بس مش عايزة آكل أي أكل، عايزة آكل حاجة معينة.

قبض حاجبيه بتساؤل فأشارت بعينيها خلفه. استدار للخلف على البقعة الزراعية وعاد يطالعها من جديد ببسمة حانية يشير بعينيه بمعنى لكِ ما تريدين. في بعض الأوقات من المفترض أن تنفذ تهديدك حتى لا تشمت من هددته بك. ولكن بحالة كحالتها لم تعد تفكر بشيء سوى محادثته حتى لو لدقائق. ظلت تنتظر الطبيب كالعادة أمام بيت الصاوي ولكنه يتهرب منها ويوصد باب غرفته عليه. ولكنها استطاعت أن توقفه هذه المرة قبل أن يوصد باب غرفته عليه بقول:

_علي، أرجوك ما تمشيش وتقفل الباب في وشي زي كل مرة. وقف أمامها يطالعها ورد بابتسامة كادت أن تقتلها قائلاً: _إيه ده، زهرة؟ أنتِ هنا غريبة. مكنتش واخد بالي منك. قال علي: _يا زهرة، بلاش كذب، أنتِ شايفني وبتشوفني كل يوم. استدار الطبيب يطالعها ورأى غضـ ـبها في عينيها وخاصةً وهي تتابع: _أنت من ساعة اللي حصل ما بقيتش حتى تبص في وشي خلاص. نسيتني ياعلي، نسيت زهرتك. كانت تقاسيمها بعض الشيء، تقترب منه:

_أنا زهرة ياعلي اللي لما كنت بقولك سيبني في حالي كنت بتقولي أنا حالك ومكنتش بتسيبني مهما حصل. رد الطبيب وهو يمسح على عنقه بتعب يتخطاها بقول: _أديكي بتقوليها بلسانك يازهره، كنت حطي بقى تحت كلمة كنت دي ألف خط وخط. قبل ما تقوليلي إني مش راجل، قبل ما تعرفيني إنك بتبقي نايمة جنبي وخايفة لا أشتهي دمك. قبل ما أعرف إنك على استعداد إنك تسيبيني وتبعدي وتعيشي بعيد عني. أشار برأسه مستفسراً:

_إيه اللي مخليكي قاعدة في بيت الصاوي لحد دلوقتي؟ مش ده البيت اللي كنتي كارهة تقعدي فيه؟ احلو دلوقتي وبقى عليه سكر. حاولت التبرير وقبل أن تنطق بتر عبارتها بقول: _ما تقوليش إن عشان بيتك اتحرق بيت أخوكي أبو حسان لسه موجود. تنهدت زهرة الدموع تلمع بعينيها: _عمرك ما كنت قاسي عليا أوي كده ياعلي. رد عليها بما وجعها وجعل الدموع تنهمر من عينيها بغزارة:

_علي اللي كنتي تعرفيه، أنتِ خسرتيه خلاص ومهما عملتي مش هتعرفي تكسبيه تاني يابنت الناس. ألقى بكلماته عليها كالسهام التي نخرت بفؤادها. رأته يبتعد عنها ومع رحيله سلب أنفاسها منها. كانت تسير وهي تنظر للسماء وقد زينتها النجوم والقمر بالمنتصف كلوحة بديعة تسر النظر وتطرب القلب. قاطع شرودها بقول: _مش قولتلك بلاش نتمشى أنتِ تعبانة ياشمس.

كان هذا قوله ممسكاً بكوز الذرة بعد أن قام بشويه على نار هادئة يتسيرون بالطريق بجوار الرقع الزراعية. الليل قاتم بالمكان ولا يوجد سوى عامود إنارة واحد يضفي إضاءة خفيفة. قضمت قضمة واحدة من كوز الذرة وبدأت بقول: _لاء أنا بقيت أحسن دلوقتي وبجد كنت محتاجة أتمشى شوية. وقفت أمامه بعيون سائلة سؤال يلح عليها من أول جلستهم. لاحظ هو اقتضابها وقام بإرضاء فضولها بقول:

_أنتِ مستغربة إن اللي لحد دلوقتي ما جبتش سيرة عن اللي حصلك وشيفاني هادي صح؟ التحمت عيناه وهو يلقي على مسامعها رده: _عشان عارف هتقولي إيه ياشمس. تخطاها يتابع سيره، فحاولت توسيع خطواتها للحاق به تخبره بصوت عالٍ نسبياً: _اقف ياياسين أنا مش قادرة أمشي، ممكن تقف عشان خاطري. لأجل خاطرها، لأجل خاطرها فقط يفعل المستحيل. وقف يعطيها ظهره يلبي طلبها ووقفت هي خلفه بعيون راجية تتابع حديثها بقول: _أنا مش عارفة مين عمل كده.

بتر حديثها بحدة: _بس أنا بقى عارفة. تابعت وكأنها لم تسمعه: _ومش عايزة أعرف، مش عايزة أعرف مين اللي عملها ياياسين. أنا عارفة مين اللي في بالك بس ده بالذات لازم نبعد عنه. تقصد بقولها فريد، أضاف وقد تبعت الحدة نبرته: _أهوه ده بالذات اللي مش هسيبه. لو سيبته أكتر من كده هيقتلوا واحد ورا التاني. استعد لرحيل فتابعت بقولها الذي أثره: _أنا بخاف عليك.

أغمض عيناه من قولها لطالما تمنى سماع هذه الكلمات منها واليوم أخيراً قد أخبرته بها. تقدمت تقف أمامه نزلت دموعها وهي تطلب منه برجاء:

_أيوه بقيت بخاف عليك ولو وقفنا قدامه أبواب هتتفتح في وشنا. أوعدني إننا نعيش في أمان. أنا تعبت ياياسين وعايزة أعيش حياة طبيعية زي أي بنت في سني. فريد لو اكتشف حقيقتنا الدنيا كلها هتتقلب علينا والسر اللي فضلنا مخبيينه سنين هيتكشف وهنبقى مطاردين من كل الناس وأنا مش عايزة كده، مش عايزالك أنت بالذات كده.

أوعدني ياياسين، أوعدني إنك هتبعد عنه. ده تعبان حي بلاش تقرب منه. في كل خطوة بينصب فخ وفي كل فخ بؤرة بيتمنى إنك تقع فيها. ولو وقعت فيها هضيع منك. تنهدت تخبره بما داخل قلبها: _وأنا مش عايزالك أنت تضيع مني. أوعدني ياياسين، أوعدني إنك هتنسى الموضوع ده خالص ولا كأنه حصل.

ختمت حديثها وضمها إلى صدره فدبت القشعريرة بجسدها. شعرت بالأمان تشعر بكفه يربت عليها تتغلل أصابعه بين خصلاتها الطويل. بحنان زادت دقات قلبها وشعر هو بأضطرابه. تنطق من بين دموعها: _عشان خاطري أوعدني. أبعدها عن حضنه بروية يطالعها بعيونه الصافية كصفاء الليل القاتم يمسح بيده دموعها قائلاً: _أوعدك إني هحاول عشانك. هحاول أنسى عشانك ياشمس. مازالت عباراتها تتوالى على خديها. برزت ابتسامة على ثغره يمسح دموعها بقول:

_خلاص بقى، كفاية دموع. مابحبش أشوف الدموع نازلة من حد عزيز على قلبي وبالذات لو من عيونك عشان. ابتسم يطالعها بعينين محب صادقة: _عيونك حبايبي ياشمس. إن شعور الاختناق مميت. كانت غدير غارقة بنومها تشعر بوجود شخص ما بغرفتها يقترب رويداً رويداً. هنا وبالرغم من برودة الطقس استيقظت غدير لاهثة والعرق يغطي وجهها. شهقت عند رؤية ياسين فهو لم يعتاد على دخول غرفتها هكذا. ابتلعت ريقها وقبل أن تنطق سألها هو بنبرة حادة:

_عملتي إيه ياغدير، انطقي، قولتي لها. اقتربت منه بجسد دبت به القشعريرة من نبرته. ولكن لانت تقاسيمها حين أقتربت منه تخبره بابتسامة: _حصل. حاكيت لبدر على كل حاجة زي ما اتفقنا بالظبط. ابتسم بسمة ماكرة يثني عليها ما فعلته: _برافو عليكي. ابتسمت بغرور تغمز له بطرف عينيها مازحة: _عيب عليك ده أنا تلميذة ياسين الصاوي.

الأيام متواصلة تحسنت فيها حالة شمس كثيراً وهذا سمح لـ ياسين بالذهاب إلى القاهرة. ذهب لغرض واحد فقط وهو مقابلة فريد. قرر مقابلته ورمى بطلب شمس عرض الحائط. وبالرغم من وعده لها إلا أنه لم يستطع تنفيذه. ذهب، ذهب يتوعد له، يتوعد بأنه سيقلب حياته رأساً على عقب. وكل اعتقاده أن ما حدث لشمس كان هو السبب فيه. هو الآن هنا بغرفته تسري رعشة بكف يده. يقف أمامه يتواجهان وجهاً لوجه بتحدي. ومع عقاب والده له بعدم تركه لغرفته وخاصةً أثناء تلك الأيام ظل فريد داخل غرفته مجبوراً. ابتلع غصة مريرة بحلقه فوجه ياسين لا يبشر بالخير أبداً وكأنه تحول وعاد إلى أسوأ أيامه من قبل. وخاصةً بعدما حول عيناه إلى اللون الأحمر القاتم.

عاد فريد خطوات للخلف ببطء. لم تعد تتحمله قدمه من شدة خوفه. بلل سرواله من شدة رعبه. إنه هنا معه وبغرفته. حاول فريد التكلم من بين شفتيه بتقطع بقول: _أنتَ، أنتَ عايز إيه؟ صمت دون إجابة ولكن عينيه كانت تنطق بنواياه. هرول فريد بقدم مرتعشة يحاول الخروج من الغرفة. وقبل أن يلمس المقبض الخاص بالباب كان ياسين هو الأسرع وقد أغلق الباب بإحكام. يقترب منه ببطء ويصك على أسنانه وما قال سوى كلمة واحدة. كلمة واحدة

كانت تفي بكل ما يريده وهي: _عايزك. يلزمها اعتذار منه على غيابه لمدة يومين. يومين لم تعرف بهما شيئاً عنه. جلست على المقعد أمام الكوخ كالعادة بأنتظاره. الطقس اليوم أدفأ عن البقية. جلست زهرة بجوارها تحثها على المغادرة بهدوء: _مش يلا بقى ياشمس؟ قعدتك عند عم نصير طولت، أنتِ بقيتي كويسة دلوقتي. لم تكف عيناها عن التدوير بكل مكان عنه فأخبرتها متحججة: _أصل أنا لسه مش قادرة أمشي ياماما. أخبرتها سريعاً:

_ما تمشيش، هجيبلك عربية لحد هنا ترجعنا بيتنا. أنا فرشت بيت خالك القديم. تنهدت بتعب وقد نفذت حجتها: _طيب ياماما، اللي تشوفيه.

كان القلق ينهش قلبها من كثرة قلقها عليه. حاولت مهاتفته للمرة التي سئمت من عدها ولكنه دائماً مغلق. دلفت إلى الكوخ توضب حقائبها. وقبل أن ترحل طلبت من والدتها الذهاب أولاً إلى منزل الصاوي لأحضار بقية أغراضها. وعند وصولها وجدت حشد كبير يقف أمام المنزل من ظباط وعساكر وأهل القرية يحاوطون المنزل. حاولت المرور بين الحشد وبعد معاناة قد دلفت إلى المنزل ترى الضابط أحمد يضع الحديد بيديه.

يأخذه جاذباً إياه خلفه. الفضول كاد ينهش بها تستفسر بعينيها قبل لسانها بقول: _وخدينه ورايحين بي على فين ياحضرة ظابط؟ هو عمل إيه؟ أجابها بآلية يسير به إلى السيارة الحديدية: _متهم بقضية قـ ـتل فريد الدمنهوري. هوى قلبها أرضاً. استسلامه لهم دون مقاومة. يطالعها الضابط يجذبه من خلفه. ومن بين صوت الحشد الكثير استطاعت سماعه من بينهم يخبرها بعينين بهما الصدق يحرك شفتيه نافياً: _ما قـ ـتلتهوش.

من جديد هناك جرح يتوسط القلب وكأن حياته ناقمة عليه وعلى راحته. كلما حاول الوصول إلى بر الأمان تجرفه الموجه إلى الغريق. مهما كان استسلم. استسلم بعيون هاوية وكأنه سئم التجديف بقارب لن يصل أبداً.