رواية القاسي العنيد الفصل الثاني عشر 12 - بقلم وحيدة كالقمر

آسر بهدوء: أنا بحب سارة. ضحك حاتم بشدة، غضب آسر وقام من مكانه ليرحل، أمسك حاتم يده. حاتم: اقعد بس يا هولاكو مالك. آسر بنرفزة: ما أنا بقولك بتنيل بحبها وأنت بتضحك. حاتم بهدوء: طب ما أنا عارف. آسر باستغراب: عارف؟

حاتم: أيوه عارف، لأنك عمرك ما حبيت غير سارة… سارة كانت حب الطفولة والمراهقة وفضلت تحبها حتى وأنت مع نيفين… نيفين كانت مجرد انبهار بالمظهر والأسلوب، وإنها في سنك، لأنك متنساش إنك لما دخلت الجامعة، سارة كانت في الإعدادية يعني طفلة، وأنت كنت محتاج اللي تهتم بيك وتقولك كلام حلو… يعني باختصار حبك لنيفين كان حب احتياج. صمت آسر ولم يرد. حاتم: في إيه تاني؟ المفروض تكون فرحان إنك بتحبها وهي كمان بتحبك… هيييح بقى.

آسر بسخرية: أهو كله من قرك الفقر… سارة مش طايقاني ونفسها تولع فيا يا وش النحس. حاتم ضاحكًا: ليه عملت إيه في البت؟ آسر: بت لما تبتك، متقولش عليها بت. حاتم: اخلص يا عم هولاكو وقول في إيه. حكى آسر له كل اللي حصل واللي قاله لسارة قبل ما يرجعوا، وحكى له على معاملة سارة له. حاتم بغضب: تصدق إنك حيوان ومعندكش ذوق، وسارة معاها حق لو ولعت فيك… أنت إزاي تقولها كده؟ آسر بغضب هو الآخر: في إيه يا حاتم؟ ليه كل ده؟

أنا غلطان إني حكيتلك. حاتم بسخرية: أيوه فعلًا أنا غلطان إني بقولك كده، المفروض أقولك برافو يا آسر أنت صح. آسر بضيق: أنا عارف يا حاتم إني غلطان ومكنش المفروض أقولها كده أبدًا، بس أنا كنت متنرفز وجت فيها، هتساعدني ولا لأ؟ حاتم: ماشي يا آسر هساعدك، دلوقت لازم تخلي سارة تثق فيك وترجع تتكلم معاك، وبلاش كلامك الدبش ده، وعاملها بحنية، ومش أنا اللي هقولك تعاملها إزاي، أنت عارف سارة أكتر مني.

ابتسم آسر بخبث: أنا عرفت هعمل إيه. حاتم بقلق مصطنع: أنا مش مرتاحلك يا هولاكو، هتعمل إيه؟ آسر بابتسامة: لا متشغلش بالك. ثم قال وهو يقوم من مكانه ليرحل: يلا بقى سلام. حاتم بصوت أنثوي: آه يا واطي عاوز ترميني بعد ما خدت غرضك مني؟ طيب اللي في بطني أعمل فيه إيه؟ آسر ضاحكًا: يلا يا صايعة من هنا. ورحل وهو يضحك. أما عند سارة فظلت تلعب مع ياسين وتضحك حتى رن هاتفها فاستأذنت وذهبت لترد.

تالا بصوت عالي: أهلًا بالواطية اللي مش بتسأل. سارة ضاحكة: براحة يا بنتي ودني، والله كنت هرن عليكي علشان عايزة أشوفك. تالا: أمتى وفين؟ سارة: بعد ساعة في الكافيه بتاعنا. تالا: أوك سلام. سارة: سلام. وذهبت إلى مرفت لتستأذنها. سارة: ماما أنا خارجة أشوف تالا. مرفت: استأذنتي من آسر يا حبيبتي؟ سارة بتوتر: هااا آه آه. مرفت: طيب روحي يا حبيبتي. ذهبت سارة لتبدل ملابسها ثم تقابل تالا. في كافيه (….) احتضنت تالا وسارة بعضهما بقوة.

تالا: وحشتيني خالص يا بت. سارة: وأنتِ كمان. تالا: مالك يا بت فيكي إيه؟ شكلك مش طبيعي. سارة ضاحكة: ديما قفشاني كده. تالا: متتهربيش في إيه؟ محدش هيفهمك زيي. تالا بقلق: في إيه يا سارة؟ سارة: ……………