رواية اللغز الفصل الأول 1 - بقلم سالي محمد

كنت يوم ماشية راجعة من شغلي متأخر، وحظي كان الجو مطر غزير بدرجة تخوف جداً ومافيش مواصلات. فضلت أمشي لعلي وعسى ألاقي مواصلة ولا حاجة، بس ملقتش بشر حتى. تعبت جداً وهدومي بقت كلها طينة ورجليه مابقتش شيلاني. ماكنتش أكلت أي حاجة طول اليوم.

وأنا ماشية لقيت نفسي في مكان مفهوش حد، لكن بيت النور منوّر فيه. قولت أخبط عليهم أداري من المطر، بس قلقت ليكون الناس اللي فيه مش كويسة ولا حاجة. قولت أكمل مشي، لكن معرفش إيه اللي حصل. أول ما قربت من البيت دا حسيت بدوخة ومادريتش بنفسي. معرفش حصل إيه، لكني لقيت نفسي... لما صحيت على سرير ولابسة هدوم نضيفة وف دفاية في الأوضة، بس مافيش جمبي حد. اتفزعت، قولت لنفسي: بيت مين دا وأنا فين؟ إيه جابني هنا؟

قمت بالعافية من السرير وخرجت وأنا خايفة أشوف حد ولا إيه، ولا أمشي. أول ما خرجت من الأوضة قولت أدور على حاجتي وأشوف فين باب البيت وأخرج. لكن سمعت صوت من ورايا رعبني. صوت راجل بيقول: "رايحة فين ياهانم؟ " كان صوته مرعب وعالي جداً. بصيت على الصوت لقيت راجل قمة الجمال، واكنه مش بشر من جماله. رديت بصوت يدوب طالع ومبحوح: "خارجة." قالي: "هو دخول الحمام زي خروجه؟ قولتله بنفس الصوت الهادي: "أنا فين وانت مين وإيه جابني هنا؟

قالي: "إيه كمية الأسئلة دي ياهانم؟ إنتي مش عارفة أنا مين؟ قولتله: "لا والله معرفش." قالي: "إزاي يا سمر؟ فيه مالك؟ الحالة رجعتلك تاني." قولتله: "حالة إيه؟ أنا فعلاً معرفكش، وأساساً أنا مش سمر، أنا اسمي أمنية عبد الحي. مين سمر؟ لقيته رد بصوت حنين: "يا حبيبتي أبوس إيدك بلاش الكلام دا تاني. أمنية مين بس؟ قولتله: "أنا أمنية. إيه ياحضرت؟ انت مين انت وإيه جابني هنا؟

رد بنفاذ صبر: "يووووه هنعيده تاني. سمر أنا تعبت. اقعدي كدا. احنا في سنة كام يا سمر؟ قولتله بعصبية: "أنا مش سمر. أنا منية. أمنية." قال: "طيب تمام. ردي. احنا في سنة كام؟ قولتله: "2012." قالي: "لأ غلط. 2024. شوفتي رجعتي تنسي تاني اهو." قولتله: "متجننيش! أنا امبارح كنت مروحة من شغلي والدنيا مطر جامد ومعرفش إيه جرى. اغمى عليا ودلوقتي أصحى تقولي اسمي سمر وف 2024. إزاي دا؟ قالي: "طيب استني. اقري كدا الجرنال."

لقيت فعلاً احنا في 2024. استغربت. بعدين أخدني بره البيت. شوفي الدنيا تمام واحنا في الصيف ومافيش مطر. كنت هتجنن! إيه دا؟ في إيه؟ حسيت بصداع في دماغي جامد، وكأني حد مسك حاجة وضربني بيها على دماغي. قولت بتوتر: "لأ لأ. فيه حاجة غلط. انت مين انت؟ رد: "أنا أمجد. جوزك." وجابلي صورة فرحنا وصور تانية كتير.