رواية المدرسه بقلم ايسو ابراهيم | كاملة

كانت الميس طالعة حصتها. فجأة عالسلم لقيت ولد بيشد الدفتر منها والشنطة. اتخضت وقالتله: سيب يا عسل حاجتي. الولد: لأ يا مس أنا هاخده. الميس تشد والولد يشد. الولد: يا ميس بقى سيبي حاجتك خليني أطلعهم ليكي يلا. الميس باستغراب: لأ يا حبيبى سيبهم وأنا كدا كدا طالعة ليكوا. الولد: لأ هاتيهم هطلعهم أنا. الميس: خلاص خد الدفتر بس. وخده منها وطلع جري عالسلم. دخل الفصل وقال: الميس رودي هي اللي علينا يلا كلنا نطلع كتب الانجلش بسرعة عشان طالعة دلوقتي عالسلم ودفترها أهوه. طبعا كل الطلاب صدقته لما شافوا دفتر الميس. دخلت الميس الفصل، بدأت الطلاب كلها تقف. ألقت السلام وتحية الصباح وسمحت لهم بالجلوس. طبعا دي كانت تاني حصة لهم معاها فحاطة نظام للحصة، وكلهم عارفين النظام إيه. كل حاجة باستئذان وممنوع الكلام والاستظراف. كان دا فصل ولاد بس. الميس رودي بدأت تكتب عالسبورة التاريخ والعنوان، والكل بيكتب وراها عشان خايفين تمسح السبورة زي المرة اللي فاتت وعاقبتهم...