دخلت الفصل لقيته كله ورق وأكياس مرمية عالأرض ونص الفصل برا.
واللي داخل لابس سلسلة ومربي شعره، وكمان بيدخل على طول بدون ما يستأذن أو يخبط عالباب.
كانت بتبص عليهم بصدمة واستغراب.
ولسه في ولاد بتطلع من الفصل بدون ما يعملوا ليها اعتبار ولا كأنها واقفة.
ولد لسه داخل وفي إيده كيس شيبسي وبياكل بدون اهتمام للمس رودي.
رزعت الدفتر اللي كان في إيدها عالتربيزة قدامها وقالت بصوت عالِ:
"إيه يا ض انت وهو، إيه شغل الاستعباط والشوارع دا؟"
"إذا كنت متربي في الشارع يبقى احنا هنا نربيك التربية الصح."
كلهم انتبهوا ليها.
وولدين لسه داخلين ومشمرين البنطلون.
بصت لهم بقرف وقالت:
"تعالى انت وهو هنا عالسبورة."
العيال دخلوا ولا عملوا لكلامها أي اهتمام ولا احترام، لأنهم متعودين على كدا مع كل المدرسين عشان مالهمش أعمال سنة.
بصتلهم بسخرية كدا لما كمان راحوا قعدوا ومش واقفين زي الباقي لما المدرس يدخل عليهم.
راحت عندهم وقالت بكل برود أعصاب:
"هو حضراتكم طرش ولا عندكم إعاقة في دماغكم عشان كدا مابتفهموش؟"
واحد منهم بصلها وقال ببجاحة:
"ماتغلطيش فينا واحنا متعودين على كدا وماحدش بيقول لينا حاجة."
المس رودي:
"اممم بس دا مش مسموح في حصتي يا حلو انت وهو."
"إذا كان بمزاجك أو غصب عنك، وقوموا اقفوا أحسن لكم."
الولد اللي جنبه بدون اهتمام:
"معلش يا صاحبي نقوم نقف خلينا نخلص من الحوار دا."
وقفوا وهي رجعت لورا عند السبورة ووشها ليهم.
قالت برفعة حاجب:
"مش بقول تربية شوارع، ماتستغربوش إني بطلع الألفاظ دي، أصل دي اللي من مقامكم."
"مش كل واحد فيكوا طول شوية وصوته تخن يبقى كبرت ومايهمكش حد، لا يا عسل انت وهو الكلام دا مش في المدرسة وبالأخص في حصتي."
"المنظر المقرف دا مش هسمحله في حصتي وعدم الانضباط والاستهتار دا."
"احنا هنا عارفين إنكم مش جايين تتعلموا ولا تستفادوا، والعينة اللي قدامي دي جاية عشان تلعب وتضيع وقت."
"لكن أنا عارفه إن في ناس قاعدة في بيتها بتستغل كل ثانية بتعدي وبتجتهد وبتذاكر عشان توصل لهدفها."
"لكن أنتم عبثين ومش فارقة معاكم، جايين لمؤاخذة تتمرقعوا هنا وتتسلوا، أصل مفيش حاجة جبراكوا تيجوا لا ليكوا أعمال سنة ولا حضور ولا غياب."
"بس مش معناها إننا مش هنعرف نسيطر عليكم، لأ في أساليب كتيرة وعقاب ليكوا وممكن تتحرموا من الامتحانات سنة أو اتنين، فهتيجي هنا يا أستاذ منك له يبقى تحترم نفسك عشان ماتزعلوش مني وبعدها تيجوا تعيطوا أنتم وأهلكم."
ولد من اللي واقفين:
"هتعملي إيه يعني يا مس؟"
المس بدون اهتمام:
"سيبها لوقتها ولو الفضول قاتلك خالف قوانيني وشوف بنفسك اللي هعمله."
"وعشان تبقوا عارفين أنا مابخافش من حد ولا بيهمني أي حد."
"هتقولي هتشتكيني للمدير ولا الوزير ولا يهمني يا عسل ولا يرفلي رمش حتى عشان نبقى على نور."
"شغل قلة الأدب دي ماشوفهاش تاني."
"أنا النهارده هعدي دا كله بمزاجي عشان لسه أول حصة معاكم، لكن لو دخلت تاني ولقيت نص الفصل برا ولا بتدخلوا من غير استئذان ولا بتقاوحوا وتبجحوا كدا زي دلوقتي يبقى انتظر حرمانك من الامتحانات ولو هتمسك أسلاك الكهربا مش حد هيعبرك ولا يساعدك."
"وعشان بردوا تبقوا عارفين إنكم ممكن ماتنجحوش عشان مش عندكم أعمال سنة اللي أنتم مبسوطين إنها مش ليكوا السنة دي."
"قوانين بتاعتي أولا مش عايزه أدخل بعد كدا ألاقي منظر الفصل كدا عايزاه نضيف."
"ثانيا هتحضر معايا يبقى أدواتك كلها معاك."
"ثالثا ممنوع الكلام والاستظراف طول ما أنا بشرح."
"رابعا ممنوع الأكل أو الشرب بدون استئذان."
"هتنفذوا اللي بقوله هنبقى حلوين مع بعض هنخلص الحصة واللي عنده حاجة عايز يقولها هسمعه عادي تمام؟"
"واللي مش هينفذوا يبقى استنوا العقاب وماتنسوش في ورقة بتمضي عليها لو عملت مشكلة ولو راحت للإدارة انسى إن يجيلك استمارةها."
"قولتوا إيه؟"
"أنا عندي استعدادا أقعد أذنبكم وماشرحش عادي طالما مش عايزين شرح."
"أنا عارفه إنكم بتاخدوا دروس برا ومش منتظرين مننا نشرح."
"بس لو حسبتوها من زاوية تانية هتلاقي إنك هتستفاد هنا يعني كأننا بنراجع ليكوا اللي خدتوه وكدا هيثبت في دماغكم، أو مثلا إنك كنت غايب من الدرس في شرح قاعدة وهنا هتنشرحلك ومش هيفوتك حاجة."
ولد من اللي واقفين قال:
"على فكرة يا مس أنتم بتتعبوا في نفسكوا عالفاضي، احنا كدا هنغش وهننجح عادي بدون ما نذاكر ولا ناخد دروس."
المس رودي ببرود:
"عارفه إن في ناس معتمدة عالغش، بس كلامي الأخير دا للناس اللي مجتهدة وبتذاكر وعارفه مصلحتها وعايزه تجيب مجموع كويس."
"عارفه إن في ناس مش هاممها حاجة هيغشوا ويدخلوا ثانوي فني وياخدوا شهادة وخلاص وفي ناس حاطة في راسها إنها تجيب كلية بعد كدا ولا معهد، وفي ناس عايزه تدخل ثانوي عام."
"عالعموم ربنا يوفق الجميع."
"إذا كنت كدا ولا كدا عايزاك تحترم الحصة بتاعتي ووقفتي عالسبورة حتى لو أنت مش عايز شرح تعالى على نفسك شوية عشان أنا هشرح بردوا لأن دا هتحاسب عليه وربنا رقيب علينا."
"على فكرة لو أنت قبل ما تطلع من بيتكوا الصبح وفي نيتك تروح المدرسة عشان تتعلم دا هتاخد عليه حسنات أصل هنتحاسب على دا كله عشان تبقى عارف."
ألقت عليهم التحية وسمحت لهم بالجلوس وبدأت تكتب عالسبورة وقالت لهم يكتبوا وراها بسرعة عشان هتبدأ تشرح الدرس الأول والتاني ومش هتسمح لحد يمسك القلم وقتها وبعدها هتخلي ولد يطلع يشرح اللي شرحته واللي مش هيعرف هتبعت للمدير ويبعت لأهله يعرفهم مستواه.
الكل نفذ اللي بتقوله وفي ناس بتعمل بضيق وبيتكلموا بهمس.
بعد لما خلصت كتابة وبتلف وشها لقيت موبايل مع ولد.
زعقت له وقالت:
"هات الموبايل دا بسرعة."
الولد اتخض وحطه في الشنطة وقال:
"خلاص يا مس."
راحتله وقالت:
"طلع الموبايل وريني كنت بتنيل إيه؟"
يا ترى كان بيعمل الولد إيه؟
