رواية المحلل الفصل الثامن 8 - بقلم ثقتي بربي تكفي

مش مهم اللي نفسك فيه يعمله. وأنا لو هحارب الدنيا كلها مش هسيبك. بجد؟ أكيد طبعًا. والعيال هعمل فيهم إيه؟ إنتي ليه بتدوري على حاجة تضايقنا! خلينا دلوقتي مع بعض ومتفكريش في حاجة تضايقنا. حاضر، بس العيال وحشوني قوي. اتصلي يلا علشان تطمني عليهم. اتصلت حنان بأولادها وكلمتهم. بمجرد ما خلصت المكالمة نزلت دموعها. أخدتها في حضني وحسيت بحزنها على بُعاد أولادها عنها. مسحت دموعها من على خدودها وهي بتقولي:

وحشوني قوي، مش عارفة أعمل إيه! قولتلها: معلش، ربنا ما يبعدك عنهم أبدًا. كلها أيام وهتبقي معاهم. هتطلقني يا وائل؟ أنا أهم حاجة عندي راحتك وسعادتك. أنا لو عليا مش عاوز أبعد عنك أبدًا. ولا أنا، بس مش عارفة أعمل إيه! قولتلك سيبيها للظروف وإن شاء الله ربنا يعمل ما فيه الخير. وبعدين قولتلها: إيه رأيك نلعب شوية؟ ضحكت ولسه الدموع في عينيها: هنلعب إيه؟ هو إحنا لسه عيال! وهما العيال بس اللي ليهم حق يلعبوا!

وقعدنا نلعب ونهزر مع بعض، وخلتها تضحك من قلبها وتنسى حزنها. وبعدين قالتلي: إنت بجد مش معقول! إزاي؟ خلتني أضحك وألعب في عز ما كنت حزينة. علشان بحب أشوف ابتسامة عيونك طول الوقت ومش عاوز أبدًا أشوفها حزينة. أنا نفسي أسعدك زي ما إنت بتسعدني. ومين قالك إني مش مبسوط وسعيد؟ عاوزة أسعدك أكتر علشان متنساش الأيام دي أبدًا. لو إنتي هتنسيها يبقى أنا ممكن أنساها.

أنا عمري ما أقدر أنسى حبك وحنيتك عليا واهتمامك بيا أبدًا. قولي بقى على أي حاجة نفسك فيها؟ نفسي تبقي معايا طول الوقت. عارفة يا حنان، اللي اتولد في قلبي في أيام حب كأنه حب سنين. وأنا كمان. وفضلنا مع بعض كذا يوم مش بخرج من البيت أبدًا وقاعدين مع بعض طول الوقت نضحك ونلعب، زي ما يكون كل حد فينا لقي نصه التاني اللي كان بيدور عليه. قالتلي: أنا هنزل أشتري حاجة من تحت.

ولما حاولت أعرف مش رضيت تقولي. بعدها اتفاجئت إنها اشترت كام بيبي دول أشكال وألوان مختلفة. كانت بتسيبني قاعد لوحدي وتختفي. ألاقيها دخلت أوضة النوم وقفلِت على نفسها وتتأخر. ولما كانت تخرج أشوف قدامي ملكة جمال بمعنى الكلمة. كانت بتتفنن في الميكاب علشان تعجبني وترضيني. حقيقي، كانت عاوزة تسعدني بأي طريقة فعلاً. ومهما أقولها إنها أجمل ست في الدنيا، كانت بتحاول تعجبني أكتر.

عدى أكتر من أسبوع واحنا مع بعض. وكل يوم علاء يتصل بيا وأنا أطمنه بأي كلام مختصر وأقفل معاه. كنت بصحى من النوم ساعات على بوسة ليا وأنا نايم. وأحيانًا كنت بحس بيها تمسك إيدي وتبوسها، وكنت بعمل نفسي إني نايم ومش حاسس. ولما كانت تنام قبلي كنت أقعد أبصلها وأشوف قد إيه هي جميلة قوي وكيوت وهي نايمة. كنت بحس إنها ملاك. معرفش إزاي راجل يبقى معاه الملاك دي ويطلقها!

أكيد علاء ده مش يستاهل يعيش مع ملاك زيها، أو إنه مجنون ومش عارف قيمة النعمة اللي في إيديه. لحد ما في يوم لقيت علاء بيرن على جرس الباب. حنان أول ما عرفت خافت قوي. قولتلها: مفيش أحسن من المواجهة. أنا هفتح وأقوله إننا مش هنطلق. قالتلي: وأنت فعلًا مش ناوي تطلقني؟ أيوه. طيب بلاش المواجهة تبقى هنا. أنا هرد عليه من ورا الباب وأقوله إنك مسافر ومش هقدر أفتح الباب. وفعلًا ردت حنان على علاء وقالتله: وائل مش هنا، مسافر في شغل.

قالها: طيب افتحي الباب. لأ مش هينفع. ليه؟ افتحي يا حنان. مينفعش، إنت ناسي إني على ذمة راجل تاني! طيب افتحي نتكلم كلمتين وأمشي على طول. وأنت ترضاها على نفسك؟ ده مش جوزك بجد، ما إنت فاهمة الموضوع! برضه مينفعش. هو دلوقتي جوزي قدام ربنا. إنتوا حصل بينكم حاجة؟ إنت بتقول إيه! وطي صوتك، إيه الفضايح دي! طيب قولي أيوه أو لأ وأنا همشي على طول؟ لأ، امشي بقى. أنا هتصل بيكي نكمل كلامنا. لأ متتصلش علشان مش هرد عليك. ليه؟

لما أطلق منه نتكلم، إنما دلوقتي مينفعش أبدًا. انزل بقى من فضلك علشان محدش من الجيران يسمع. نزل علاء. لقيت حنان بتقولي: إنت فعلًا مش هتطلقني؟ لأ، هطلقك في حالة واحدة بس، لو إنتي اللي طلبتيها مني. لولا العيال كنت مستحيل أفكر أبعد عنك وأضيعك من إيدي أبدًا. يعني إنتي عاوزة ترجعي له تاني؟ لو عن نفسي لأ، خلاص اللي بيني وبينه انتهى. إنما العيال هعمل فيهم إيه؟ بصي يا حنان، عيالك أنا هعتبرهم عيالي ونكمل مع بعض ومش هطلقك.

مش عاوزة عيالي يعيشوا تجربة جوز الأم. أنا مش هبقى جوز أمهم، أنا هبقى أبوهم وأحن منهم عليهم كمان. أنا عارفة يا وائل، بس إنت لسه مش عرفت عيالي ولا عرفت شقاوتهم. ومهما كنت حنين عليهم، معلش يعني صعب تبقى زي أبوهم. هبقى أحسن من أبوهم. خلي بالك، لما العيال يبقى معايا مش هتبقى واخد راحتك معايا كده، وأنا كمان مش هبقى فضيالك زي دلوقتي. مش مهم، أهم حاجة تبقي جنبي.

عارف يا وائل، ده حلم جميل عشناه، وأجمل أيام حياتي فعلًا هي اللي بعيشها معاك. مش هقدر أشوفك وتبقي بعيدة عني، خصوصًا لما ترجعي له. وأنا كمان مش متخيلة إن واحدة تانية تبقى مراتك. أنا حاسس من كلامك إنك قررتي خلاص إنك ترجعي لعلاء؟ على رأيك، زي ما بتقول، بلاش نضايق نفسنا واللي فيه الخير يقدمه ربنا.