رواية المهندسة نور الفصل الأول 1 - بقلم وفاء الغرباوي

وأنتِ بقا اللي بيقولوا عليكِ المهندسة نور؟ أكتر من ساعة وأنا بسأل في المكان وأقول المهندس نور، المهندس نور، وساعة ما ألاقيكِ تطلعي ست. رفعت حاجبيها وربعت إيديها وهي بتاكل في نفسها. اصبحنا واصبح الملك لله، يا فتاح يا عليم يا رزاق يا كريم، أنا أصبحت ببوش مين النهاردة؟ نور بتتكلم وهي إيديها على بوقها ورافعة راسها وبتفكر. دي أكيد ست زغلولة، دي عينيها أنا عارفاها. واتكلمت بصوت عالي: الصبر يا زغلول لما أرجع لك.

الراجل متابع حركاتها سمعها واتكلم وسألها: زغلول مين؟ _لا يا حج، ما تاخدش في بالك، دي جارتنا. وبعدين أنت... ووقف الكلام على لسانها لأن نور مبتحبش حد يغلط فيها ولا يغلطها في تصرف. _خير أمر يا حج؟ بتسأل على الست ليه؟ اللي هو أنا المهندس نور، تحت أمرك. بس اتفضل اقعد حضرتك ارتاح الأول.. تشرب أي؟ وبنفس حدته اتكلم وزعق: لا معلش، أنا مابتعاملش مع ستات، أنا عايز راجل أتكلم معاه.

ستات مكانها البيت مش هنا، هنا مكان شغل، ومش على آخر الزمن شغلي يقف عشان ست واسمها. برقت نور بعينيها جامد أوي، والراجل مشكور سكت. يعني الله أعلم لو اتكلم كان حصل له إيه. فكت نور إيدها ولفّت حوالين المكتب وقعدت بابتسامة صفرا على وشها وردت بهدوء: معاك حق والله يا حج، إحنا مالناش غير قعدة البيت، بلا شغل بلا مرمطة. خدنا إيه من التعليم والشغل، واهو في الآخر بعد التعب دا كله مش عاجبين.

يعني أهالينا يعلمونا ويدفعوا دم قلبهم، ونشتغل عشان نحاول نرد جزء من تعبهم لينا، وبرضه مش عاجبين. وفي الآخر ييجي بن الحلال ياخدنا إحنا والشغل، ولا كأنهم ربوا ولا كبروا ولا علموا. قعد الراجل يبص لها وافتكر كلام العامل عنده لما راحت الموقع وإزاي كانت شديدة وبتأمر وتنهي وسابتهم يضربوا كف على كف، ومرضيتش تخلص رخصة العمارة، وجه هنا لقى واحدة ست كلامها مختلف تمامًا. _روحت فين يا حج؟ بكلمك.. الكلام خدنا، ما قولتش تشرب أي؟

_عايز قهوة مظبوط. رفعت نور السماعة وطلبت البوفيه واتكلمت بحذر وشدة: هات لي ٢ قهوة، واحدة مظبوط والتانية سادة. وقفل الخط. الراجل لسه محتار فيها، منين بتكلمه بالهدوء دا ومنين جامدة كده. وفجأة سألها: والداك فين؟ استغربت نور السؤال، أو يمكن مبتحبش سيرة والدها تيجي، وضحكت. _هتقول لبابا اللي أنت محتاجه في الشغل وهو يبلغنا؟ ولا هتشتكيله مني؟ انقلبت لهجتها لرسمية وجافة:

حضرتك لو عندك سؤال يخص الشغل اتفضل اسأل وأنا هجاوبك، غير كده أنا أسفة. _ما قولت عايز راجل أتكلم معاه. _والله يا حج، إحنا ٣ ستات مهندسات في المكتب زي ما حضرتك شايف، ما معناش راجل. لما يعينوا راجل هبقى أبلغك إن شاء الله. وبدأت تقلب نور في الورق قدامها وتمضي وتراجع. والراجل عمال يبص لها ونفسه يولع فيها. وقام وقف وخبط بإيده جامد على المكتب.

بس نور الخبطة ما هزتش فيها شعرة، رفعت وشها بهدوء وبصت له وقامت وقفت، بس قبل ما تتكلم.. جه عامل البوفيه ودخل حط القهوة بسكات، وقبل ما يخرج كانت المفاجأة.