رواية الملاك و القاسي الفصل الخامس عشر 15 - بقلم جنات

فى جناح فارس كان بيجهز عشان يروحوا بيت سارة. فرح خرجت من أوضة اللبس وكانت لابسة دريس بلون بيبي بلو وطرحة بيضة. فارس بص لها وهي اتكسفت. "أنا جاهزة." "طب يلا." فرح وفارس نزلوا. كان الكل قاعدين. "بسم الله ماشاء الله ربنا يحميكوا ياحبايبي." ملك نازلة من على السلم. "أنا كمان جاهزة." "طب يلا عشان متأخرش عليهم." فارس وفرح وملك خرجوا وركبوا عربية فارس وراحوا على بيت سارة.

بعد شوية وصلوا. كان عامر وجده كمان وصلوا وبيستنوهم عشان يطلعوا سوا. "اتأخرت ليه كدا؟ "متعملش فيها عريس بقى، سيبني أسلم على أبو كمال ياحبيبي وحشني." "حبيبي يافارس عامل إيه يابني؟ "أنا بخير." "مين القمرات اللي معاك دول؟ "انت هتعاكسهم ياجدو ولا إيه؟ "دي فرح مراتي ودي ملك يا أبو كمال." "ملك كبرتي امتى وبقيتي عروسة." "مانت ياجدو اللي مبقتش تحضر عيد ميلاد." كامل بص لفرح. "دايماً كدا تقع واقف ياواد يافارس، مراتك زي القمر."

"طبعاً مش فارس الألفي." "طب يلا نطلع ولا هنبات هنا؟ "حفيدك مستعجل أوي." "أصله واقع يا حتة من عيني." "آه انتوا هتستلموني انتوا الاتنين مش كدا؟ "يلا نطلع." طلعوا وخبطوا وحسن أبو سارة اللي فتح لهم. "البيت نور والله، اتفضلوا." "منور بأصحابه يابني." فريدة خرجت وسلمت عليهم وأخدت فرح في حضنها. "يا حبيبة قلبي وحشاني يافروحة." "وانتي يافوفا والله، أومال عروستنا فين؟ "جوا في أوضتها. ازيك ياملك؟ "بخير يا طنط."

"عقبال ياحبيبتي ما نفرح بيكي." "يارب." "تعالوا ادخلوا لسارة." الرجالة قعدوا في الصالة. "طبعاً يا أبو علي انت عارف إحنا جايين ليه." "والله يا أستاذ كامل ده شرف لينا، وعامر شكله إنسان محترم وده كل اللي يهمني، لأن سارة مش بس بنتي، لا دي حتة من روحي." "وأنا أوعدك يا عمي إني هشيلها جوه عيوني." "كدا اتفقنا، نقرا الفاتحة بقى." "طب فين عروستنا؟ سارة خرجت مع البنات وعامر عينه عليها. "اتلم شوية أبوها قدامك."

"يلا نقرا الفاتحة." بعد ما خلصوا الكل بدأ يبارك لهم. وفارس عينه على فرح اللي باين عليها الفرحة لصاحبتها. "الخطوبة وكتب الكتاب إن شاء الله هيكونوا كمان أسبوع." "اللي انت عايزه يابني." "طب والفرح؟ "بعد سارة ما تخلص السنة دي بإذن الله." "ألف مبروك يا ولاد، عقبالك ياملوكه." "حبيبي يا جدو." "أمنيتك يا سارة انتي وفرح اتحققت." "أمنية إيه يا أبو علي؟ "معقول نسيتوا؟

كنتوا دايماً وانتوا صغيرين تقولوا عايزين نتجوز اتنين صحاب عشان تفضلوا سوا على طول." سارة وفرح بصوا لبعض. "صح." سارة حضنت فرح. "أنا مقدرش أعيش من غير فروحتي أبداً." "ربنا يخليكي ليا يا سارسورة." وملك قامت حضنتهم. "ويخليني ليكوا كمان." الكل ضحك. "ربنا يخليكوا لبعض يابنات، انتوا طيبين وتستاهلوا كل خير." بعد شويا الكل مشي وفضل عامر قاعد شوية مع سارة في البلكونة. "أخيراً بقيتي ليا." "اخيراً."

"انت ليه خليت كتب الكتاب مع الخطوبة؟ "كدا أحسن عشان نبقى براحتنا نخرج سوا كدا يعني." "براحتك إزاي مش فاهمة؟ "بلاش راسك تحدف شمال، ماشي؟ "هحاول أصدقك." "بحبك ياقلبي." "وأنا كمان." "انتي كمان إيه؟ "بحبك." "تعرفي نفسي أعمل زي السقا لما نط من فوق الشلال؟ أنا بقى هنط من البلكونة." "والله انت مجنون." "مجنون بيكي ياقلبي." فارس وفرح وملك رجعوا على القصر ونزلوا من العربية ولسه هيدخلوا.

عدت عربية من قدام القصر وكان فيها شخص ملثم ضرب عليهم نار واختفت بسرعة. البنات استخبوا بسرعة ورا العربية. وفرح عينها على فارس اللي مش بيتحرك. "فاااااارس! فارس وقع على الأرض. وفرح جرت عليه بسرعة وايديها كلها بقت دم. "لالا فارس رد عليا نبي، ملك اطلبي إسعاف بسرعة." الكل خرج لما سمعوا ضرب النار وجروا على فارس. "متزعليش مني يافرح." "لالا متتكلمش." "تعالوا ناخده في العربية يلا."

الحرس ساعدوا وحطوا فارس في العربية. وفرح جنبه وملك وفاطمة ركبوا في العربية وراحوا على المستشفى. زيزي رنت على صلاح وهي فرحانة. "أخيراً هنخلص منه." "نتأكد بس من الخبر." "الرصاصة شكلها قريبة من القلب." "حلو أوي، داحنا نحتفل بقى." "طبعاً ياروحى هجيلك." في المستشفى فارس في العمليات. فاطمة اللي قاعدة وفي حضنها فرح وملك منهارين. وعادل واقف قدام باب أوضة العمليات. وعامر عرف الخبر وجالهم وخايف على صاحبه.

"محدش بيخرج يطمنا ليه؟ "اهدى ياعمي، الوقت يطلعوا يطمنونا." بعد فترة الدكتور خرج والكل قام ووقف. "طمنا يادكتور." "العملية ماكنتش سهلة لأن الرصاصة كانت قريبة أوي من القلب، بس هو لسه في مرحلة الخطر، ادعوله الـ 24 ساعة اللي جايين يعدوا على خير." "بس هننقله على العناية لحد مايفوق ويعدي مرحلة الخطر إن شاء الله." "شكراً يادكتور." المقدم ياسر صاحب فارس جه عليهم. "سلامته ألف سلامة ياعمي، فارس بطل وإن شاء الله هيقوم بسلامة."

"يارب يابني." "انتوا شاكين في حد معين ياعمي؟ "والله يابني مانا عارف، فارس رجل أعمال ناجح وأكيد ليه أعداء." "وانت ياعامر؟ "إحنا لينا منافسين كتير بس عمرها ما توصل للقتل." ياسر قرب على فرح وملك. "انتوا كنتوا معاه مش قدامه؟ هزت راسها بـ "آه". "طب شفتوا اللي ضرب نار عليكم؟ "لا، كان مغطي وشه وكان في عربية ضرب نار ومشوا بسرعة جداً." ياسر بص لفرح اللي منهارة في حضن فاطمة. "وانتي يا مدام فرح مشوفتيش وشه؟ فرح بتعيط ومش بترد.

"معلش ياياسر، انت شايف حالتها، لما تهدى أكيد هتتكلم." "طيب أنا هامشي وهبقى أطمن على فارس." في فيلا مروان الصياد. "أخيراً خلصنا منهم." "لا، لما أحضر جنازته أبقى أتأكد إنه مات واحتفل وقتها." "الدكتور قال إنه حالته خطرة و24 ساعة لو عدوا على خير هيبقي كويس، لكن لو معدوش هنحتفل." "أيوا بقى." "عن إذنك بقى أنا طالع فوق عايز أحتفل." "يلا ياروحى." "اطلعوا اطلعوا، والله هرتاح منك يا ابن الألفي." في قصر الألفي.

شيري قاعدة بتعيط. دخل أكرم القصر وشافها. "الجميل ماله؟ "انت شكلك متعرفش." "أعرف إيه؟ وبعدين فين الناس اللي هنا؟ "في المستشفى." "ليه في إيه؟ "فارس اتضرب عليه نار وهو في المستشفى دلوقتي." "قولي والله؟ طب ده حاجة حلوة يعني." "انت بجد مبسوط؟ "أكيد، لأن أخيراً هرتاح منه. وانتي بقى بتعيطي ليه؟ "أنا بحبه وأوي كمان." "بس هو مش شايفك أصلاً، وكمان اتجوز. بس متفكريش كتير، خلاص راح." "الله أعلم." في شقة زياد.

سعاد وسيد قاعدين سوا. "مانت نفذت اللي مطلوب منك، يبقى تاخد فلوسك." "طب هكلمه." "لا روح له أحسن." "حاضر." في المستشفى. "أنا من رأيي إنكوا تروحوا ترتاحوا وتيجوا بكرة." "لا أنا مش هسيبه." "ولا أنا." "عامر معاه حق، روحوا ارتاحوا وتعالوا الصبح. فارس لما يفوق مش لازم يشوفكوا كدا." "يلا ياعمتو عشان أوصلكوا." "طب يلا يابنات." "خليني أنا هنا لو سمحت يا طنط." "انتي تعبانة يافرح، روحي ارتاحي ونيجي بكرة." "لا أنا كويسة والله."

"خلاص سيبيها على راحتها يا فاطمة." "يلا ياملك." عامر راح يوصل فاطمة وملك. وعادل قعد جمب فرح اللي دموعها زي الشلال. "هيبقى كويس يابنتي، فارس قوي وإن شاء الله هيقوم لينا بسلامة." فرح بصتله. "يارب ياعمو." عادل خدها في حضنه. وفرح عيطت أكتر لحد ما هدت خالص. "تعالى بقى ارتاحي في الأوضة، عامر حجزها عشان تاخدي راحتك." "حاضر." في فيلا مروان الصياد قاعد على نار بيستنى خبر موت فارس الألفي. دخله مسعد دراعه اليمين.

"في راجل برا عايزك يا باشا." "راجل مين ده؟ "سيد ياباشا." "إيه اللي جابه هنا ده؟ طب دخله بسرعة يامسعد." سيد دخل وبيتفرج على الفيلا. "انت إيه اللي جابك هنا يا غبي؟ "الله يسامحك ياباشا، أنا نفذت اللي انت عايزه." "لا، لسه، فارس لسه مامتش." "وأنا مالي بقى بكلام ده، أنا عايز فلوس." "أنا طلبت منك تموته. وهو لسه حي، لما أسمع خبره هتاخد فلوسك فوقيها بوسة كمان." "لا ياباشا متفكرش إنك هتلعب بيا، لأ."

"انت بتعلي صوتك عليا يا راجل إنت؟ "مانا لو ماخدتش منك الفلوس هدخل السجن ياباشا. الراجل اللي أنا مضيله على وصلات الأمانة بيهددني." "طب هديك نص المبلغ، ونص التاني لما أسمع خبره." "وانا موافق." مروان أمر مسعد يجيب له الفلوس. ومسعد جابهم واداهم لسيد اللي فرح بيهم. "دول كام ياباشا؟ "100 ألف، والـ 100 التانية لما يوصلني خبره." "تشكر يابيه." سيد خد الفلوس ومشي. ومروان أمر مسعد يخلي حد يراقب سيد كويس.

في أوضة صلاح الصياد قاعد على السرير وزيزي في حضنه. "مش ناوي تتجوزني بقى يا صلوحة؟ "ده مكانش اتفاقنا يازوزو، وبعدين قولتلك متفتحيش الموضوع ده تاني." "نغير الاتفاق ياصلاح، هنفضل لحد امتى كدا؟ "سبيها بظروفها يا قمر إنتي." "أنا لازم أمشي عشان محدش يشك فيا." صلاح شدها لحضنه. "تمشي فين؟ أنا لسه مشبعتش منك." زيزي ضحكت بدلع. "بحبك ياشقي." تاني يوم في المستشفى. فرح واقفة قدام باب أوضة فارس وبتبص عليه من الازاز.

عامر قرب عليها. "فرح، انتي لازم ترتاحي شوية، انتي منمتيش خالص." "أنا كويسة." "بعد كل اللي عمله فيكي وخايفة عليه كل الخوف ده؟ ده أنا قولت انتي أكتر واحدة هتفرحي فيه." فرح بصتله وعينيها كلها دموع. "عمري ما أفرح في حد مهما أذاني." ورجعت بصت على فارس تاني. "بتحبيه يافرح؟ فرح عيطت.

"أوي، مش عارفة امتى ولا إزاي، بس أنا بحس معاه بالأمان وبحسه سندي ليا. بس أوقات بقول لنفسي مينفعش، هو مش من حقي، لأننا مش هنطول في تمثيلية الجواز دي." عامر لسه هيرد عليها. فاطمة وملك جم. "فارس عامل إيه دلوقتي؟ "الدكاترة بيقولوا الوضع مستقر." "طب هو لسه مفاقش ليه؟ "إن شاء الله يفوق قبل 24 ساعة ما يخلص." "طب لو مفاقش؟ "يبقى دخل في غيبوبة." ملك بانهيار. "لالا مستحيل." فاطمة خدتها في حضنها.

"اهدى ياحبيبتي، إن شاء الله هيبقى بخير." "يارب ياعمتو، يارب." زياد عرف بالخبر وجه المستشفى. "فارس عامل إيه دلوقتي؟ "لسه مفاقش يازياد." "إن شاء الله يقوم بسلامة." الكل. "يارب." زياد عينه على ملك اللي منهارة في حضن عمتها. وقرب من فرح وشدها لحضنه. "هيبقى بخير ياحبيبتي، متخافيش." "خايفة أوي عليه يازياد، خايفة أخسره زي ما خسرتها." "فارس قوي ومستحيل يستسلم بسهولة يافرح، ادعيله ياحبيبتي." عادل جه عليهم.

"الدكتور بيقول إن الوضع مستقر الحمد لله، ادعوله إن يفوق قبل 24 ساعة ما يخلص." الكل. "يارب."