رواية الملاك و القاسي الفصل الثالث 3 - بقلم جنات

مرت الأيام وفرح وسارة خلصوا امتحانات وظهرت النتيجة، وفرح طبعًا كالعادة الأولى على دفعتها. فرح صحيت من النوم بدري وقامت اتوضت وصّلت، وخرجت جهزت الفطار والغدا، وراحت تغير عشان تنزل. زياد: صباح الورد يا فرحتي. فرح: صباح النور يا زيزو. زياد: رايحة فين؟ انتي مش هتفطري؟ فرح: لا، هنزل عندي مقابلة في شركة مهمة أوي، ودعيلي يارب أتقبل فيها. زياد: إن شاء الله يا حبيبتي، هما هيلاقوا زيك فين مهندسة شاطرة.

سعاد بسخرية: قال مهندسة قال. فرح: ربنا يجبر بخاطرك زي ما انت دايماً بتجبر بخاطري. زياد: استني بقي عشان أوصلك. فرح: لا، سارة مستنياني تحت وهنروح سوا. زياد: خدوا بالكم على نفسكم. فرح: حاضر يا حبيبي. *** فارس جهز ونزل، كان الكل بيفطر. فارس: صباح الخير. الكل: صباح الخير. فارس بحدة: شيري، لو هتروحي الشركة عشان تقعدي على فونك، أنا بقولك بلاش تروحي أحسن، عشان اللي حصل الفترة اللي فاتت لو اتكرر مش هعديها، ماشية؟

شيري بصت لملك: لحقتي تعرفيه؟ فارس: أنا مش عيل عشان حد يجي يقولي موظفين بيعملوا إيه في شركتي، ماشية؟ ملك: استني يا فارس، هاجي معاك. فارس: يلا. ملك: وإنتي يا شيري، ابقي خلي حد يوصلك. ملك مشيت مع فارس، وشيري بصت لأمها. شيري: شوفتي طريقتهم. زيزي: وبعدين يافاطمة، في ابن أخوكي ده؟ فاطمة: مش كل يوم نفس الحوار بقاله. فاطمة قامت دخلت المطبخ. عادل: بقيتي مملة يازيزي بجد. عادل مشي. زيزي: ماشي يا فارس باشا، شوف هعمل فيك إيه.

شيري: هتعملي إيه يا أمي؟ زيزي: انتي لازم تروحي الشركة وتفضلي فيها، فاهمة، وبعدين هبقى أقولك أنا ناوية على إيه. شيري: حاضر. *** فرح وسارة وصلوا الشركة، وكان فيه بنات وشباب كتير موجودين عشان المقابلة. سارة: ينهار أسود، كل دول جايين عشان المقابلة. فرح: ربنا يستر ونتقبل. سارة: يارب. في مكتب فارس. عامر: يعني رفضت الفلوس؟ فارس: آه. عامر: وانت عملت إيه؟ فارس: هعمل إيه يعني، اديتها الكارت بتاعي.

عامر: شكلها بنت محترمة بجد، ومزة وعليها جوز عيون يدوخوا. فارس: ماتحترم نفسك ياض انت. عامر: انت وقعت ولا إيه؟ فارس: عاااااامر، إيه اللي وقعت دي؟ بنت عادية زي أي بنت بتعدي علينا، إيه الجديد يعني؟ عامر: خلاص يا عم، أنا هروح مكتبي عشان المقابلة. هدخلك الأوائل وأنا باقي الطلبة ماشية. فارس: يلا. عامر خرج وقف قدام الطلاب.

عامر: أهلاً بيكم في الشركة، أنا الباشمهندس عامر، وإن شاء الله هنبدأ المقابلة الوقت. أنا عايز بس الأوائل يفضلوا على جنب كده، لأنهم هيدخلوا لرئيس الشركة. فرح ومعاها شاب وبنتين راحوا على جنب، وبدأ الكل يدخل بالدور. *** في مكتب عامر. الباب خبط. عامر: اتفضل. سارة دخلت: صباح الخير يا فندم. عامر: خير منين بقي؟ مافيش ولا طالب عدل. سارة: نعم. عامر: لا، متاخديش في بالك، تعالي اتفضلي.

سارة قعدت على الكرسي، وعامر بدأ يسألها شوية أسئلة، وسارة بترد بكل ثقة. عامر: والله يا بنتي، الله يصلح حالك. سارة: إيه، هتقبل؟ عامر: طبعاً هتكوني معانا. سارة بفرحة: شكراً أوي بجد. وخرجت بسرعة عشان تفرح فرح. سارة جرت على فرح: اتقبلت يافروحة. فرح: مبروك ياقلبي. سارة: مالك خايفة ليه؟ فرح: بيقولوا رئيس الشركة صعب أوي وأنا مرعوبة. سارة: انتي الأولى على دفعتك ياقلبي، خلي عندك ثقة في نفسك. السكرتيرة سهام: فرح السيد.

فرح: أنا. سهام: اتفضلي. *** في مكتب فارس. بيكلم عامر في تليفون المكتب. فارس: ولا واحد كويس، مش عارف أوائل إزاي دول. عامر: أنا لسه خارج من عندي بنت رهيبة. فارس: من كل العدد اللي برا واحدة بس. عامر ضحك: لا، بقوا ٣. فارس: لا، كثر خيرك. الباب خبط. فارس: اقفل الوقت.. اتفضل. فارس وشه في الورق اللي قدامه، وفرح دخلت وشافته قدامها، اتصنّمت. فارس رفع وشه: فرح. فرح: صباح الخير. فارس: صباح النور، تعالي اتفضلي.

فرح قعدت على الكرسي وهي متوترة. فارس: فرح السيد، الأولى على دفعتك، مالك متوترة ليه كده؟ فرح: ابداً، أول مرة أعمل مقابلة. فارس: لا، متقلقيش، وبعدين من الورق اللي قدامي باين عليكي شاطرة وبتحبي الدراسة. فرح: جداً. فارس فضل يسألها شوية أسئلة، وهي ترد عليه. بعد شوية: مبروك يا فرح، تقدري تيجي من بكرة بإذن الله. فرح: بجد، شكراً لحضرتك. فارس: العفو. فرح خرجت وقالت لسارة، وفرحوا أوي إنهم هيكونوا سوا. ***

بالليل، ملك بتتمشى في الجنينة. جه من وراها صاحب أكرم. صاحب أكرم: القمر ماله؟ ملك اتخضت وخافت لما لقيته قريب منها، ومتعرفش مين ده. ملك: انت مين؟ صاحب أكرم محمود قرب عليها وهي بتبعد لورا. ملك: ابعد عني، والله هقول لفارس. محمود: انتي بس لو تطوعيني يامزة. ملك عيطت، ومحمود حاصرها بين إيده في الشجرة. فارس دخل القصر وسأل الحارس: ملك رجعت؟ الحارس: أيوه، وهي في الجنينة يا باشا.

فارس راح على الجنينة وشاف حد قريب من ملك، راح عندهم بسرعة. ملك كانت بتعيط، ولما شافت فارس ارتاحت. فارس مسكه من هدومه ولفه ليه، وضربة بوكس قوي وقعه على الأرض. فارس أخد ملك في حضنه: انتي كويسة يا حبيبتي؟ ملك هزت راسها بـ"أه". فارس راح تاني لمحمود وفضل يضرب فيه: انت مين يا ابن 🐶؟ والكل خرج على صوتهم. عادل: إيه يا فارس، مين ده؟ فاطمة خدت ملك في حضنها: مالك يا حبيبتي؟ ملك بعياط: حاول يقرب عليا جامد يا عمتو.

وأكرم جري بسرعة عليهم: انت بتعمل إيه؟ بتضربه ليه؟ فارس: انت تعرفها؟ أكرم: آه، ده محمود صاحبي وجاي يسهر معايا. عادل راح شد أكرم وضربة بالقلم: أنا كام مرة أقولك متجبش الأشكال دي القصر؟ انت إيه يابني آدم مش بتفهم؟ أكرم: يا بابا أنا... عادل: اخرس، مش عايز أسمع صوتك. فارس قرب من عمه: اهدى يا عمي عشان متتعبش. عادل بتعب: خليه يغور من وشي.

فاطمة: خلاص يا عادل، وتاني مرة يا أكرم، اسمع كلام أبوك وابن عمك، وبلاش تجيب حد غريب البيت فيه بنات. فارس: خد صاحبك ارميه بره القصر. الكل دخلوا، وفضل أكرم وصاحبه اللي واقع على الأرض، وشيري وزيزي. أكرم: قوم قوم، مش لاقي غير اخت فارس. محمود: مش ناقصك أنا. أكرم: تعالي نخلي السواق يوصلك. أكرم ركب محمود العربية ورجع تاني لزيزي. زيزي قربت من أكرم: خليك معايا عشان ناخد حقنا منه. شيري: انتي بتخططي لإيه يا أمي؟

زيزي: انتوا لازم تكونوا في الشركة وتجبولي كل أخبار فارس، وأنا هبقى أقولكم على الخطة.. ها يا أكرم، معايا؟ أكرم: معاك، بدام فيها دمار لفارس. زيزي: أكيد، دماره على إيدي. *** فارس وصل عمه لأوضته، وراح أوضة ملك اللي في حضن عمتها بتعيط. أول ما فارس دخل الأوضة، جرت على حضنه. ملك: كنت خايفة يا فارس. فارس: اهدى، خلاص يا لوكا، أنا معاكي يا حبيبتي. فاطمة: يلا يا حبيبتي عشان تنامي وترتاحي. فارس: آه، يلا، تصبحي على خير يا لوكا.

ملك نامت في حضن فاطمة. فاطمة: خليكي معايا النهارده، ممكن؟ فاطمة: ممكن طبعاً، يلا نامي. فارس خرج من الأوضة وراح على أوضته، خد شاور وغير ونام. *** تاني يوم، فرح صحت بدري ولبست عشان تروح الشغل، وخارجة من الأوضة. سعاد: هي الهانم مصحتش بدري وجهزت الفطار والغدا ليه؟ فرح: النهاردة أول يوم شغل ليا، ولازم أروح عشان متتأخرش. سيد: وعلى كده هتقبضي كام؟ فرح بحزن: معرفش يا بابا، أنا لسه في فترة تدريب.

سيد: اهاااا، يعني راحة جاية كل يوم على الفاضي. سعاد: وإنتي سبتي المطعم يابت انتي؟ فرح: آه، سبته. سعاد: لا، ترجعي تشتغلي تاني فيه، ومرتبك كل شهر تديه لأبوكي. فرح: بس كده هيبقى كتير عليا، مش هقدر أشتغل في مكانين. سيد بصوت عالي: اسمعي كلام ستك يابت انتي. فرح بحزن: حاضر يا بابا. سيد: يلا، غورى من وشي. فرح نزلت، كانت سارة مستنياها تحت. سارة: كل ده يابنتي؟ فرح بحزن: معلش يا سارة. سارة: مالك يابنتي، في إيه؟

فرح: أنا هخلص شغل الشركة وهروح على المطعم. سارة: لسه مش قولنا هتسيبي المطعم؟ فرح: لا، هروح ياسارة، كده أحسن. سارة: أبوكي اللي قالك؟ فرح: لا، عادي، أنا عايزة أروح. سارة: فرح، انتي مش بتعرفي تكدبي، أبوكي مش كده؟ فرح عيطت: آه، هو. سارة: طب اهدى ياحبيبتي، وخلينا نروح الشركة، ولما ترجعي قولي لزياد وهو يتصرف معاهم. فرح: ربنا يسهل.

بعد شويا، فرح وسارة وصلوا الشركة وطلعوا، راحوا على مكتب عامر عشان يشوفوا أماكن شغلهم. كانوا باقي ١٠ طلاب واقفين قدام المكتب. السكرتيرة خرجت وسمحت ليهم بالدخول. عامر: صباح الخير. الطلاب: صباح الخير يا فندم. عامر: انتوا طبعاً في فترة تدريب، كل مجموعة منكم هتبقى مع مهندس، والمجموعة هتكون من ٥ طلاب. بدأ يوزع الطلاب، وسارة وفرح كانوا سوا.

عامر: المجموعة الأولى هتكون مع المهندس أحمد، والمجموعة التانية مع المهندس يحيى. يلا، كل واحد يروح على مكتب المهندس بتاعه. ***

عدى أسبوعين، وفرح بتشتغل في الشركة وكمان المطعم، وكان تعب جامد عليها، ورغم ده بتجتهد في شغلها ومتميزة على كل الطلاب. وطبعاً إهانة سيد وسعاد اللي مش بتخلص، وزياد أكتر وقته في شغله لأنهم داخلين على مشروع كبير، وكمان ميعرفش إن فرح معاه في نفس الشركة. وشيري وأكرم بيوصلوا أخبار الشركة لزيزي، وشيري مضايقة من فرح لأنها ملاحظة نظرات فارس ليها واهتمامه بيها. *** في يوم جديد في شركة فارس.

عامر راح على مكتب المحاسبة، كانت شيري وملك قاعدين مع زياد. عامر: صباح الخير. زياد: صباح الخير يا فندم. ملك: صباح الخير يا فندم. شيري بصتله ومردتش عليه. عامر: إيه الأخبار؟ شغالين تمام؟ زياد: الآنسة ملك ماشاء الله عليها، بس الآنسة شيري محتاجة تركز شوية. عامر: طيب يا زياد، خد ورق الميزانية وروح على مكتب فارس. زياد: حاضر. عامر: شيري، إحنا هنا في شغل، وعلى فكرة فارس عارف كويس انتي بتعملي إيه.

شيري: أكيد من ملك هانم أو منك؟ عامر: لا، مش مني ولا من ملك، بصي فوق كده. شيري بصت في السقف، شافت كاميرا. عامر: شفتي بقى بيعرف منين؟ هو صابر عليكي، فبلاش طريقتك دي. شيري خافت وحطت الفون في الشنطة وقعدت كويس، وملك ضحكت عليها. *** في مكتب فارس. كانوا مجموعة طلاب اللي منهم سارة وفرح موجودين عنده مع المهندس يحيى، وزياد خبط ودخل، والطلاب كلهم وشهم في ورقهم. زياد: صباح الخير يا فندم. فارس: صباح الخير يا زياد، اتفضل.

فرح رفعت وشها لما سمعت الاسم، وشافت زياد، بس هو مش شايفها. فارس: خلصت الميزانية يا زياد؟ زياد: جاهزة يا فندم، اتفضل. فارس أخد الملف منه، ركز فيه شوية. وزياد بص ناحية الطلاب وشاف فرح في وسطهم، ابتسم أوي. وفي نفس اللحظة فارس رفع وشه وشاف زياد وهو بيغمز ناحية الطلاب، وبص ناحيتهم شاف فرح بتضحك. فارس اتضايق جداً.