رواية الملاك و القاسي الفصل الثالث عشر 13 - بقلم جنات

عند فرح خلصت وكانت قمرايه بفستانها الأبيض، وملك كانت لابسة فستان بلون البينك ورافعة شعرها وكانت رقيقة جدًا. ملك: بجد مش قادرة أشيل عيني من عليكي، حلوة أوي ما شاء الله. فرح بفرحة: بجد؟ ملك: والله قمر. فرح: وإنتي كمان حلوة أوي. ملك: ما أنا عارفة. فرح: إيه يابت كل الغرور ده، أوعي تقعي على وشك. ملك وفرح ضحكوا. سارة دخلت: ينهار حلاوة. فرح: سوسو إيه الجمال ده. سارة: جمال إيه بس اسكتي، إيه حلاوتك دي يخربيت رقتك.

ملك: وأنا إيه؟ شفافة حضرتِك؟ سارة: دانتي الجمال كله ياللوز اللوز انتي. فرح: أنا متوترة وخايفة أوي. ملك: لا اجمدي كدا، دي حفلتك. فرح: دي أكتر حاجة مخوفاني أوي. سارة: لا خلي عندك ثقة في نفسك يا فروحة. فرح: لما أكلم زياد عشان ما يتأخرش. سارة غمزت لملك: حبيب القلب. ملك: بس بقى. *** في شقة زياد كان بيلبس وفونه رن، وكانت فرح. زياد: يا فرحتي. فرح: قولت أكلمك عشان ما تتأخرش. زياد: وأنا أقدر أتأخر عليكي يا قمر؟

وبعدين دي حفلتك يا فروحة. فرح: قدامك كتير. زياد: لا خلاص نازل أهو. سعاد كانت واقفة وسامعة كلام زياد. زياد خرج وسعاد جرت على سيد عشان تقوله. سيد: يعني إحنا هنستفيد إيه لما نروح؟ سعاد: نشوف العز اللي عايشة فيه السنيورة ونطلب منها فلوس، انتي ناسيه إن المعلم جعفر عمال يهدد فيكي. سيد: طب هما هيرضوا يدخلونا؟ أنا كل أما أروح عند القصر بيمشونى. سعاد: قوم البس بس خلينا نلحق الحفلة من أولها. سيد: أما أشوف آخرتها معاكي إيه.

سعاد: فل بإذن الله يا سيد. *** البنات كانوا في جناح فرح وقاعدين يهزروا ويضحكوا. الباب خبط، قامت ملك تفتح وكان فارس. ملك: أهلاً أهلاً بالعريس. فرح قلبها دق جامد. سارة بهمس: في إيه يابت مالك؟ ما تهدّي كدا، دانا سامعة صوت دقات قلبك. فارس: فين فرح يا ملك؟ ملك: تدفع كام؟ فارس: يخربيت رخامتك، ابعدي. فارس زق الباب ودخل، وانبهر بجمال فرح ورقتها، وهي كانت مكسوفة أوي.

فاطمة دخلت الأوضة: بسم الله ما شاء الله، ربنا يحميكوا يا ولاد يا رب. يلا يا بنات انزلوا انتوا عشان فارس وفرح هينزلوا في الآخر. الكل خرج من الأوضة، وفرح وشها في الأرض. فارس رفع وشها وبص في عينيها. فارس: زي القمر يا فرح. فرح ابتسمت: انت كمان شكلك حلو. فارس مسك إيدها: إيدك متلجة كدا ليه يا فرح؟ انتي كويسة؟ فرح: خايفة أوي. فارس: من إيه؟ فرح: لا أنا بس مش آخدة على جو الحفلات ده عشان كدا متوترة. فارس: طب اهدّي يلا ننزل.

نزلوا وخرجوا الجنينة، وكان فيه صحافيين كتير والناس مهمين، والكل مستغرب مين اللي مع فارس الألفي. فارس حس برعشة إيد فرح. قرب على ودنها وهمسلها: ممكن تهدّي شوية. فرح: حاضر. فارس أخد فرح وراح وقف في نص المسرح، وهو ماسك إيد فرح وماسك المايك. فارس: أهلاً بكل الموجودين، شرفتونا ومبسوطين بوجودكم معانا. طبعاً الكل مستغرب حفلة النهاردة ليه؟ حفلة النهاردة مهمة جداً عشان عايز أعرفكم على شخصية مهمة دخلت حياتي من فترة قريبة. فارس

ساب إيد فرح وشاور عليها: أقدم لكم فرح فارس الألفي، مراتي. احنا كتبنا الكتاب في جو عائلي وحبيت أعمل الحفلة عشان الكل يعرف إني اتجوزت. الناس كلهم صفقوا، وفارس ساب المايك وحاوط خصر فرح وقربها منه، وهي كانت متوترة جداً من قربه ومن الناس الموجودين. الصحافيين بقوا ياخدوا صور كتير جداً. واشتغلت موسيقى هادية، وفارس لف فرح ليها ورقصوا سوا سلو. بعد ما خلصوا الرقصة، فارس قرب من فرح ولبسها خاتم ماس. الكل انبهر من جماله.

فارس: روحي خليكي مع عمتو وملك. فرح: حاضر. فرح راحت وقعدت مع فاطمة اللي بدأت تعرفها على الناس الموجودين، وفارس كان مشغول مع رجال الأعمال بس عينه على فرح. فرح: فطوم أنا هروح أشوف زياد جاه ولا لسه. فاطمة: طيب يا حبيبتي. فرح قامت تدور على زياد، وفارس عينه عليها. فرح واقفت فجأة لما سمعت أكتر صوت بتكرهه. سعاد: إزيك يا مقصوفة الرقبة.

فرح لفت بسرعة شافت أبوها ومراته قدامها. جسمها كله اترعش وافتكرت كل اللي كانوا بيعملوه فيها، وخلاص رجليها مش شايلاها ولا حاسة بيها. سيد: بقي يابنت 🐶 عايشة في العز ده كله ومش معبرة. سعاد: ليها حق متعبرناش يا سيد عشان تصدق لما قولتلك إنها بت طماعة زي أمها بالظبط. فرح اتوجعت من الكلام بس مش قادرة ترد عليهم، خايفة يمد إيده عليها قدام كل الناس دي. سيد: إيه انتي اتخرستي ولا إيه يا سنيورة.

سعاد: شوفي الخاتم اللي لبساه ده، إحنا لو بعناه نعيش ملوك. فرح لسه هترد، حست بإيد بتحاوط خصرها. بصت جنبها كان فارس، اتنهدت وحست براحة وأمان. فارس: إيه اللي دخلكم هنا؟ سيد: إزيك يابني؟ أنا حماك سيد أبو فرح. سعاد: وأنا سعاد مراته وفي مقام أمها. فرح: لا عمرك ما هتكوني في مقامها، لأنك مش شبهها. سعاد: ليه كدا يا فرح يا حبيبتي؟ فرح بصت لفارس وعينيها كلها دموع: خليهم يمشوا ونبي يا فارس. فارس

شاور لرعد اللي جاله بسرعة: خرجهم برا من غير شوشرة، ماشي؟ ومش عايز أسمع نفسكم حتى. يلا اتفضل. وسعاد بصت لفرح بغل وخرجت هي وسيد مع رعد. وزياد جاه عليهم، شاف فرح بتعيط بس ميعرفش إن أهله كانوا هنا. زياد: فرحتي. فرح جرت على حضن زياد: وحشتني يا قلب فرحتك. فارس كان بيبصلهم ومضايق إنها بعدت عنه عشان حضن أخوها. زياد: إزيك يا فارس؟ فارس: بخير يا زياد. زياد بص لفرح: إنتي بتعيطي يا فرح؟

فرح: ولا حاجة يا زيزو، أنا بس متوترة من جو الحفلة، انت عارف مش متعودة عليه. زياد بغمزة: بس إيه الحلاوة دي يا فرحتي؟ فرح: حلوة. زياد: حلوة بس، دانتي قمراية. فارس كان بيبصلهم ومضايق بس بيحاول ما يبينش. ملك جت عليهم: إزيك يا زياد. زياد: الحمد لله يا آنسة ملك. ملك: يا عمي، قولتلك ملك بس بلاش آنسة دي، إحنا بقينا قرايب. زياد: حاضر يا ملك. ملك: فروحة تعالي أعرفك على أصحابي. فرح: يلا. زياد بص لفارس: فرح بتكذب مش كدا؟

فارس: قصدك إيه؟ زياد: أول لما شفتها كانت خايفة، عيونها فيها دموع. إيه اللي حصل يا فارس؟ فارس حكى لزياد. زياد: إزاي عرفوا بالحفلة ودخلوا هنا إزاي؟ فارس: الدخول ده سهل عشان فيه حفلة، أكيد دخلوا في وسط الزحمة، بس عرفوا إزاي ده الله أعلم. زياد: ممكن يكونوا سمعوني وأنا بتكلم مثلاً؟ فارس: مش انت عايش لوحدك؟ زياد: لا عايشين معايا. فارس: جايز يكونوا سمعوك. بعد شوية فارس واقف لوحده وفرح مع ملك وشيري قربت ووقفت جمب فارس.

شيري: أوعى تكون زعلان مني يا فارس، أنا كنت بهزر مع فرح. فارس: هزار عن هزار يفرق. شيري: متزعلش يا فروسة بقى. فارس: في إيه يابت ما تتعدلي، إيه فروسة دي؟ فارس سابها ومشي. فرح بتهمس لملك: شفتي بنت عمك الملزقة دي؟ ملك: شيفاها يا أختي، بت رخمة بصحيح. فرح: كويس إن فارس سابها ومشي. سارة جت عليهم وشكلها مضايقة. ملك: مالك يابنتي؟ سارة: عامر لسه مجاش لحد دلوقتي. فرح: يمكن مشغول. سارة: في الشركة. ملك: زمانه على وصول، روّقي بقى.

فرح: هو وصل خلاص. عامر جه عليهم: مساء الخير. ملك وفرح: مساء النور. عامر: مبروك يا فرح، اتفضلي هديتك. فرح: مرسي يا عامر، كلك ذوق. عامر مسك إيد سارة: عن إذنكم بقى، أصلح عروستي. ملك: إذنك معاك يا خويا، عقبالي يا ناس. فرح ضحكت: دانتي قمر، مليون واحد يتمناكِ. ملك: يارب، اللي أنا عايزاه بس اللي يتمناني. فرح بغمزة: يارب. *** عامر أخد سارة وقعدوا على ترابيزة.

عامر: خلاص بقى يا حبيبتي، غصب عني والله. فارس وعمي عادل مجوش الشركة وكل الشغل كان عليا، والله تعبت أوي النهاردة. سارة بصتله: ماشي، هسامحك المرة دي. عامر: انما إيه الجمال ده يا قلبي! سارة: انت بردو زي القمر. عامر: أنا كدا هيغمى عليا. سارة ضحكت. عامر: أنا جعان، ما تيجي ناكل. سارة: يلا. *** فرح وملك واقفين سوا، وأكرم قرب عليهم. أكرم: مساء الجمال. ملك: عايز إيه يا أكرم؟ أكرم: طب ردوا المسا طيب. ملك: مساء الخير، نعم.

أكرم: مبروك يا فرح. فرح بصتله واضايقت من نظراته ليها: الله يبارك فيك. ملك تعالي نروح لعمتوا. أكرم: هو إذا حضر الشياطين طاروا الملايكة ولا إيه؟ فارس: بالظبط كدا يا أكرم. أكرم لف كان فارس واقف وراه: مبروك يا فارس. فارس: بتضايق مراتى ليه يا ابن عمي؟ أكرم: مين قال كدا؟ دانا كنت ببارك ليها بس. فارس: لا كتر خيرك، اتفضل يلا من هنا. أكرم اضايق منه ومشي. وفارس قرب من ملك وفرح.

فارس: ملك روحي قعدي مع عمتو، وانتي يا فرح تعالي معايا. ملك مشت. فرح: هنروح فين؟ فارس: الناس كلها عايزة تباركلك، وعشان مينفعش هما اللي يجولك، إحنا هنتمشى ونسلم على الكل وأعرفك عليهم كمان. فرح بتوتر: بس أنا مكسوفة وخايفة أوي. فارس بحده: امشي يا فرح معايا يلا. هما هياكلوك. فرح زعلت من طريقته، وهو مسك إيدها وبدأوا يتمشوا في وسط الناس، والكل بيبارك ليهم وبيتصوروا معاهم.

بعد فترة الحفلة خلصت والكل روح، وفضل فارس وفرح وفاطمة وملك قاعدين في الجنينة. ملك: لا بس كانت حفلة حلوة، إيه رأيك يا فروحة؟ فرح: آه، كانت حلوة. فاطمة: شكلك مش بتحبي الدوشة والزحمة يا فرح. فرح: بصراحة آه، ماليش في جو الحفلات ده. شيري من وراها: صح، مانتي آخرك في الحفلات حفلة حنة أو فرح. فارس بص لها بصة خرستها. شيري خافت ومشت من بصته. فاطمة: اطلعوا ناموا يا ولاد، انتوا أكيد تعبانين.

فرح: والله يا فطوم، أنا بس هشوف السرير مش هتلاقوني. فاطمة: وهتسيبي فارس لوحده في ليلة زي دي؟ فرح بصت لفارس وفضلت تكح جامد. فارس اداها كوباية مياه. فارس: اتفضلي. فرح أخدتها وشربت: أنا هروح أنام. ملك: البت هتموت من الكسوف. فرح جرت بسرعة على القصر. ملك: مراتك دي غلبانة أوي يا فروسة. فارس: والله أنا خايف عليها من القاعدة معاكي. ملك بشهقة: قصدك إيه؟ فارس: هتخليها مجنونة.

ملك: لا معلش، هي مراتك مجنونة لوحدها أصلاً، دي أجن مني. فاطمة: فرح دي زي الملايكة بس حظها اللي وحش. ملك: كفاية حظها في أهلها يا عمتو، بس ربنا عوضها بفروسه اللي هيحلي أيامها. فاطمة: ربنا يسعدكوا ويرزقكوا بذرية صالحة. ملك: أنا هبقى عمتو قمراية. فارس: أنا شكلي مش هخلص النهاردة، أنا طالع. أصبحوا على خير. فاطمة وملك: تلاقي الخير.