رواية الملاك و القاسي الفصل الثاني عشر 12 - بقلم جنات

راحو الجنينه وقعدو جمب حمام السباحه وفوز عملتلهم عصير. ملك: شايفاك النهارده مرتاحه شويه. فرح: لما شوفت زياد وقالى انه مش زعلان مني كاني كنت شايله حمل تقيل اوى. ملك: انتو قريبين من بعض اوى. فرح: جداً. زياد بيفهمني قبل ما أتكلم. رغم إنه مامته حاولت كتير تبعده عني بس هو كان بيقرب أكتر. كان ليا سند وضهر لما ماما اتوفت. ملك: ربنا يخليكو لبعض. فرح: يارب. ملك: صح، انتي كليه إيه؟ فرح: هندسة.

ملك: سمعت إنك أولى دفعتك. ما شاء الله كل سنة. فرح: ده كان حلم أمي الله يرحمها إنّي أدخل هندسة وأنا على قد ما أقدر بحاول أحقق لها حلمها. ملك: شكلك كنتي قريبة من مامتك أوي. فرح: أوي. كانت صاحبتي الأولى. ملك: ممكن أسألك سؤال؟ فرح: أكيد. اتفضلي. في الوقت ده فارس كان نازل يشوفهم اتاخروا ليه وسمع كلامهم. ملك: بتحبي فارس يا فرح؟ بصي أنا معرفش انتو اتجوزتو إزاي ولا إيه اللي حصل.

فرح: أنا مقدرش أقول حاجة، بس أنا مقدرش أكره حد. مش عارفة ليه بس دي عادة فيا. تعرفي أبويا؟ رغم اللي بيعمله فيا أنا بقول بكرهه بس لا مش بعرف أكره حد. ملك: معنى كده إن فارس إذاكي زي أبوكِ؟ فرح: أنا مقلتش كده على فكرة. يمكن جوازي من أخوكي حماني من أبويا ومراته. ملك: يعني انتي بتحبيه؟

فرح: لا بحبه ولا بكره. معرفش. مفيش إحساس معين جوايا. بصي هقولك على حاجة. ماما الله يرحمها كانت صادقة جداً في مشاعرها وحبها لأبويا رغم اللي عمله فيها وإنه أذاها كتير جداً. تعرفي إنه كان مشغلها خدامة لمراته؟ ورغم ده كله كانت بتدعيله في صلاتها. بقيت أقولها بعد اللي بيعمله فيكِ برضه بتدعيله؟ تقولي طبعاً مش جوزي. مفيش ست تكره جوزها مهما عمل فيها. ملك: شكلها كانت طيبة أوي. كان اسمها إيه؟ فرح: فاطمة. ملك: على اسم عمتو.

فرح: شكل كل اللي اسمهم فاطمة طيبين كده. ملك: سبحان الله. ملك بتبص وراها شافت فارس واقف وبييبصلهم. ملك: يعني ممكن في يوم تحبي فارس؟ فرح: مش عارفة. أنا معرفش إذا جوازنا هيستمر ولا لأ أساساً. ملك: قصدك إيه؟ فرح: ولا حاجة. يلا نروح ننام بقى. فرح قامت وبتلف شافت فارس واقف وبييبصلها أوي. ملك: اتاخرنا عليك ولا إيه؟ فارس: يلا عشان تصحي بدري لشغلك. ملك: حاضر يا عم. ملك دخلت وفارس قرب ووقف قدام فرح.

فارس: يلا عشان تاخدي علاجك وتنامي. فرح: حاضر. دخلوا الاتنين سوا وطلعوا الجناح وفرح دخلت الحمام وخرجت. كانت لابسة بجامة لونها أسود بكم وكان فارس نايم على السرير. فرح: هنام. فارس: تعالي يافرح نامي على السرير. انتي جسمك لسه تعبان. فرح: لا أنا كده مرتاحة. فرح نامت ولسه بتغمض عينيها حسّت إن جسمها بيترفع. كان فارس شايلها وفرح اتكسفت أوي. فارس نزلها على السرير. فارس: مكانك هنا ونامي بقى. مش عايز أسمع صوت.

فارس نام وهي كمان نامت. *** عدى شهرين وفرح بقت أحسن والجروح كلها اختفت. فرح رجعت تضحك وتهزر وتعيش حياتها عادي. معاملة فارس ليها زي ماهي قاسية جداً معاها. ورغم إنها بتخاف منه بس بتحس بالأمان لما بيكون معاها. وفاطمة وملك بيحاولوا على قد مايقدروا يقربوهم من بعض. والكل بيحضر للحفلة اللي هيعلن فيها فارس إنه اتجوز. وده طبعاً بأمر من عمته فاطمة.

عامر اعترف بحبه لسارة وده فرحها جداً لأنها معجبة بيه. وكلم باباها اللي رحب جداً. وعامر قاله إن بعد حفلة فارس هيروح يتقدم رسمي. ملك حبها لزياد بيزيد كل يوم وهو كمان بيحبها بس عامل حساب لفرق المستوى اللي بينهم. سعاد وسيد بيحاولوا يوصلوا لفرح بأي طريقة عشان يطلبوا منها فلوس بس فارس بيمنعهم. وسعاد فضلت تزن على زياد عشان ياخدهم يعيشوا معاه في شقته الجديدة وزياد وافق. زيزي ومروان الصياد بيخططوا عشان يوقعوا فارس.

شيري اللي بتحاول تتقرب من فارس بأي طريقة وده مضايق فرح جداً. وفارس ملاحظ ده جداً. *** فرح صحت وكان في أصوات كتير في القصر. فتحت البلكونة اللي في الأوضة وشافت ناس كتير بتشتغل وبتزين الجنينة عشان الحفلة. فارس كان بيلعب رياضة في الجيم الخاص بالجناح ولابس شورت قصير. بس دخل الأوضة شاف فرح واقفة في البلكونة بشعرها. نادى عليها بحده: فرح. فرح اتخضت ولفت بسرعة: نعم. وحطت وشها في الأرض بسرعة لما شافته كده.

فارس: إزاي تخرجي البلكونة بشعرك كده؟ مش شايفه الرجالة اللي تحت؟ فرح: أنا آسفة. فارس شاور على كافر فيه فستان على السرير: ده الفستان بتاعك. البسيه في حفلة النهارده. وعمتو طلبت بنات عشان يجوا يساعدوكي. فرح: شكراً. ماكنش في داعي لأي حاجة من دي. فارس: فرح لازم تعرفي إنك متجوزة فارس الألفي. ومراتي لازم تكون أحلى واحدة في الحفلة. وعمتو عملت الحفلة دي عشانك إنتي في الآخر. فاهمة؟ فرح: فاهمة. فارس سابها ودخل الحمام.

فرح: يوووه بقى! كل مرة بتكلم معاه بحس قلبي هيخرج من مكانه. الباب خبط ودخلت ملك. ملك: صباح القشطة يا قشطة. فرح ضحكت: صباح الفل. ملك: واو! الفستان وصل؟ فتحتيه؟ فرح: لا لسه. ملك: بجد؟ وقاعدة عادي كده؟ مش نفسك تشوفيه؟ فارس خرج من الحمام وقعد على الكنبة. فرح: عادي. ملك: بجد مراتك دي مش طبيعية. أنا فتحت الفستان تحت مصبرتش لما أطلع أوضتي.

ملك: يا بت فروحة مقولتلكيش على فستان شيري. يالهوي آخر صياعة. مش عارفة هي هتتعب نفسها وتلبسه ليه. ملوش لازمة يعني. فرح: يا بنتي كل واحد حر. ملناش دعوة بحد. ملك: بقولك إيه يا فرح؟ أنا كنت عايزة مرات أخ. نفضل ننم على خلق الله ونتريق عليهم. إنتي طيبة أوي يا بنتي. فرح: فطومة عودتني. مليش دعوة بحد. ملك: عمتو. فرح: إنتي نسيتي إن ماما الله يرحمها اسمها فاطمة بردوا؟ ملك: آه صح. طب إيه؟ فرح: إيه؟

ملك بصت لفارس: إنت هتلبس لون إيه يا فروسة؟ فارس: الطبيعي يعني. ملك: أسود كالعادة. ملك: فروحة فستانك لونه إيه؟ فرح: معرفش. ملك: بجد؟ مرارتي هتتفرقع منك. ابعدي أنا هشوفه بنفسي. ملك فتحت الكافر كان فستان أبيض رقيق جداً خفيف ونازل واسع. ملك: وااااااااااو. ده حلو أوي. فرح قربت تبص عليه وابتسمت. وفارس عينه عليها وشاف الفرحة في عيونها. ملك: إيه رأيك؟ فرح: يجنن. ملك: هتبقي أحلى عروسة وإنتي لابسااه.

فرح بصت على فارس لقيته بيبص عليها. لفت وشها وبصت على الفستان تاني. الباب خبط ودخلت فاطمة. فاطمة: صباح الخير يا ولاد. الكل: صباح الفل. فاطمة: إيه رأيك في الفستان يا فروحة؟ فرح: حلو جداً يا فطوم. بجد متشكرة أوي. فاطمة: إنتي بتشكريني ليه؟ فارس اللي جابه. مش أنا. ملك: أوووبااا بقى! فاطمة: أكرم راجع النهارده من سفره يا فارس. فارس: ينور يا فطوم. فاطمة: ناوي على إيه يا ابني؟ فارس: ولا حاجة. هسيبهم يكملوا لعبتهم للآخر.

ملك: إنتوا بتقولوا إيه؟ مش فاهمة حاجة. فارس: مالكيش دعوة إنتي. فاطمة: يلا يا بنات افطروا عشان البنات اللي هتعمل لكم الميكب زمانهم على وصول. البنات: حاضر. *** في بيت سارة كانت قاعدة في أوضتها بتكلم عامر. سارة: برضه ماكنش ينفع تبعتلي فستان. أنا قولتك إني هنزل أشتري. عامر: يا حبيبتي أنا وإنتي واحد. أنا نزلت مع فارس كان بيجيب فستان لفرح. ولما شوفت الفستان حسيته شبهك أوي ومعمول لكِ. قمت اشتريته. بس يارب يعجبك.

سارة: يعجبني. بس ده يجنن. يا عامر ربنا يخليك ليا. عامر: يا فرج الله. أخيراً أبو الهول نطق. سارة: أخس عليك يا عامر. أنا أبو الهول؟ عامر: ما إنتي اللي منشفها عليا يا سارة. سارة: أنا لسه مش خطيبتك على فكرة. يعني غلط وحرام إننا نكلم بعض كده. عامر: هانت يا قلبي. هيبقى كل حاجة رسمي. سارة: إن شاء الله. يلا أنا هروح أجهز بقى عشان هروح لفرح. لازم أكون معاها. عامر: أجي أوصلك؟ سارة: فرح قالتلي إن فارس هيبعتلي عربية عشان تاخدني.

عامر: حاضر يا سارة. سارة: سلام. عامر: سلام. *** في أوضة اللي خصصتها فاطمة للبنات عشان يجهزوا فيها كانو فرح وملك وفاطمة وزيزي وشيري. البنت اللي بتعمل لها ميكب: تحبي أعملك حاجة معينة؟ فرح: أنا عايزة حاجة بسيطة خالص مش أوفر لو سمحتي. شيري: لازم تعملي ميكب كتير عشان تبقي حلوة. ملك: فرح زي القمر من غير أي حاجة. زيزي: تلاقيها عمرها شافت كمية الميكب دي. أو حطيتها على وشها أصلاً. شيري: صح يا ماما. دول آخرهم زبدة كاكاو.

زيزي: أو تلاقيها كانت بتستعمل ميكب وحاجات لوكال عشان تداري علامات ضرب أبوها ومرات أبوها. زيزي وشيري ضحكوا بصوت عالٍ. وفرح خرجت من الأوضة وراحت على أوضتها. فاطمة بحده: ممكن أعرف إيه اللي عملتوه ده؟ ملك: هما كده يا عمتو. مش بيحبوا يشوفوا حد فرحان أبداً. فاطمة: محدش ليه دعوة بفرح. فاهمين؟ وده آخر تحذير منى. بلاش التحذير يبقى من فارس. زيزي وشيري خافوا. فاطمة: روحي يا ملك هاتي فرح.

ملك: لا يا عمتو. أنا هاخد البنات يعملولها الميكب في أوضتها أحسن. فاطمة: يكون أحسن برضه. *** فرح كانت بتعيط ودخلت جناح فارس وقعدت ورا الباب وفضلت تعيط. فارس كان بياخد شاور وخارج لابس بنطلون بس. وشاف فرح بتعيط قرب منها. فارس: فرح مالك؟ فرح بصتله وعيطت تاني. فارس قومها من الأرض وقعدها على السرير وقعد جنبها. فارس: طب فهميني. حد قالك حاجة تزعلك؟ فرح بعياط: هما معاهم حق. أنا مش من مستواك. أنا عارفة والله.

فارس: اهدى يافرح. ومين اللي قالك كده؟ فرح بصتله بكسوف وخصوصاً لما شافته من غير تيشيرت. ومسحت دموعها: محدش قال لي حاجة. فارس: المفروض كده أصدقك يعني؟ فارس رفع وشها عشان تبصله. فارس: مالك؟ فرح: أنا كويسة والله. الباب خبط ودخلت ملك وقعدت جنب فرح. ملك: ماتزعليش يافروحة. هي غيرانة منك عشانك قمراية. فرح ضحكت. فارس: إيه اللي حصل يا ملك؟ ملك حكت لفارس على كلام زيزي وشيري. فارس: طب اجهزوا يلا عشان الناس شوية وهتبدأ توصل.

ملك: هروح أجيب البنت اللي هتعملنا الميكب. فارس لسه هيخرج من الأوضة. فرح: فارس. فارس لف ليها: نعم؟ فرح: بلاش تعمل مشاكل مع حد عشان خاطري. أنا مش زعلانة والله. فارس: متشغليش بالك يافرح. يلا اتجهزي. عايزك تنوري الحفلة. فرح ابتسمت وفارس خرج من الأوضة. فرح برقت: ده قال لي عايزك تنوري الحفلة؟ ده بجد؟ وملك جت معاها البنت وبدأوا يجهزوا. *** فارس نزل تحت. كانو فاطمة وزيزي وشيري قاعدين. قرب منهم.

فارس: مراتي خط أحمر. اللي يفكر بس اللي يقرب منها هيلاقيني في وشه. مفهوم؟ زيزي وشيري... فارس بصوت عالي: مفهوم؟ زيزي: مفهوم يا فارس. شيري: مفهوم. أكرم دخل القصر. فارس: أهلاً يا ابن عمي. نورتا. أكرم: ده نورك يا فارس بيه. عادل نازل من على السلم: حمدلله على سلامتك. عرفت طريق القصر لوحدك ولا حد قالك عليها؟ أكرم: الله يسلمك يا بابا.

فاطمة: خلاص يا عادل. اجلوا الخناق لبعدين. النهارده يوم مهم لفارس وفرح. وإنت يا فارس اطلع اجهز يلا. فارس: حاضر. سارة دخلت القصر وكانت لابسة فستان بلون الفضي وطرحة بنفس اللون. وكانت جميلة. سارة: السلام عليكم. فاطمة: وعليكم السلام يا حبيبتي. إيه الجمال ده؟ سارة: عيونك اللي حلوة يا فطوم. فارس: تعالي يا سارة. هوصلك لفرح. سارة: يلا. أكرم قرب من شيري. أكرم: مين المزة؟ شيري: صاحبة فرح هانم. أكرم: بس جامدة.

شيري: محجوزة يا حبيبي لعامر باشا. أكرم: صلاة النبي أحسن. ده حاجات كتير اتغيرت وأنا مش موجود. شيري: تعالي وأنا أحكيلك على كل الجديد. أكرم: يلا.