رواية المنتصف المميت الفصل السادس عشر 16 - بقلم ضاقت أنفاسي

مساء الخير للجميع. ....هاد البارت إضافي يعني مو طويل ..اتمنى ما احد يحكي البارت قصير . ..انا نزلت الجمعه بارت واليوم الثلاثاء كمان واحد فلا تخربوا على نفسكم ونرجع لبارت واحد بالأسبوع ....اتمنى التفاعل حتى يستمر التنزيل....دمتم بخير

خفف السرعه لما رن جواله ...فتح خط وعيونه على الطريق ...وبنبره هادئة نطق: الو...وعليكم السلام ...
عقد حواجبه باستنكار من كلام العامل :صراخ؟! متأكد ؟!.....يمكن
سكت وهو يسمع صوت الصراخ ..وقف السيارة ونطق بعدم راحه : الحين أشوف وش صاير!!
قفل خط وناظر امه واضح عليها القلق لما سألته: وش صاير؟!
مهاب حرك وهو ناوي يرجع ..نطق : يقول يسمع صراخ من الطابق الثاني
ام مهاب وقع قلبها: وليه الصراخ ؟! معقول غسق؟!
مهاب زم شفته بضيق: اكيد ما في احد غيرها ..البنات بالدوام
ام مهاب بتوجس: معقول ابوك يكون
قاطعها باستبعاد: ما اتوقع أبوي من الصبح عند عمتي مع جدتي ما رح يترك العزاء..اتصلي بنيرا تطلع تتفقد الوضع فوق!!
هزت رأسها وعقلها يفكر وش صاير؟!
قاطعته بتوجس: أخاف موعد ولادتها
قاطعها باستبعاد: ما أتوقع قبل ما أطلع ما كان فيها شيء
أم مهاب  وعقلها انشغل بالتفكير: هذي ما ترد !!
لا حول ولا قوه الا بالله!!
زاد من سرعته وعقله يفكر وش الي يخليها تصرخ بهذا الشكل ؟!
من حسن الحظ ما كان بعيد عن البيت ... أول ما دخل البوابه ...ركن السيارة ونزل بخطوات سريعه للداخل وصوت صراخها يوصله لما اقترب من الجناح...
اول ما دخل الجناح..وقف متشنج وهو يشوفها جالسه على الارض وممسكه بحفه الشباك وتصرخ كأنها بعالم ثاني ...اقترب منها ..نزل على مستواها ...نطق بخوف من الحاله الي فيها: وش صاير؟! تعبانه؟!
ناظرته وهي تهز رأسها يمين يسار وشاده على شفتها بقوة!!
مسح وجهها وهو يبعد الشعر الملتصق من العرق والدموع ..وجهها أحمر ومنتفخ ..وعيونها رح تتفجر من شدة التعب!!
التفت لأمه الي دخلت وهي تلهث: وش صاير؟!
نطق بحيره: ما أدري وش فيها؟!
ام مهاب نطقت بعجله: احملها رح نأخذها للمستشفى وش تنتظر!!
طول الطريق أم مهاب تمسح على شعرها وتقرأ عليها بخفوت ..وبين كل لحظة ولحظة تصرخ غسق من شدة الألم !!
مهاب من صراخها يحس رح يفقد السيطره على السيارة ... أول مره يعيش مثل ذي اللحظات ...
ام مهاب من شدة وجع غسق خايفه تولد بالسيارة وتتوهق معها .. نطقت بخوف: لو طلبنا الاسعاف افضل
مهاب وهو يناظرها من المرايه ويحس بالحزن عليها من شدة التعب الي تجرعته : إن شاء الله كل شيء رح يكون بخير. ...توكلي على الله!!
غمضت عيونها غسق من شدة الألم وقلبها يردد يكون المولود " ولد"
**
**
**
مزنه جالسه بمجلس العزاء ..التفتت لأم سيف الي جلست جنبها وهمست بإذنها بخفوت: غسق دخلوها المستشفى عندها ولاده !
ناظرتها مزنه وتفاجأت: متى؟!
ام سيف بنفس الخفوت: الصبح أم مهاب معها ما رح تحضر هنا!!
هزت رأسها بتفهم: ولدت وإلا باقي!!
ام سيف حركت حواجبها بالنفي: للحين بعدها!!
مزنه هزت رأسها : على خير!!
هزت رأسها ام سيف وناظرت جواهر جالسه ولابسه الاسود جنب اهل زوجها تستقبل المعزيين ...تنهدت باختناق ..ما تحب تجلس بالعزاء وترجع لها ذكريات فقدان سيف ..للحين ما قدرت تتجاوزها !!
التفتت على اسراء الي جالسه جنبها وبلقافه سألتها: وش صاير!
أم سيف بهدوء نطقت بما إنهم بعزاء ما هو وقت السوالف احترام لأهل الميت: بعدين!!
عبست اسراء منها وش تخسر لو خبرتها ... اكيد صاير شيء ....
ا**
**
**
مهاب جالس على كراسي الانتظار ويحرك رجله بتوتر تأخر الوقت وللحين ما ولدت ..ناظر أمه بقلق: هالشيء الي صار معها طبيعي؟!
ام مهاب بهدوء: ايه طبيعي وفي حريم وضعهم أصعب من وضعها
عبس ملامحه ما يدري كيف تتحمل المرأه كل هذا الألم وترجع تحمل مرة ومرتين وعشره؟!
ام مهاب بنفس الهدوء: لأنها بكريه رح تتأخر ولادتها ...واضح ولادتها صعبه !!
الله يسهل عليها وتقوم بالسلامه...
وبتردد سألت: للحين عند كلامك إذا كان ولد
هز رأسه بتأكيد : ما رح أتراجع عن كلامي ...البنت ما لها ذنب بشيء ..حتى أخوها ما ننكر إنه ما كان يقصد يقتله ...
ام مهاب نطقت بخفوت وهي تترحم على سيف ...
ناظر ساعته : تأخرت كثير؟!
تحرك يسأل ويشوف وش صار ...زم شفته بضيق وهو يسمع صراخها داخل القسم ...ناظر امه بقلق لما خبروه رح يتم تنزيلها للعمليه ...ما تقدر تولد طبيعي ....
بدأت إجراءات التوقيع عليها وبداخله قهر من المستشفى دام إنه الحوض عندها صغير ومستحيل تولد طبيعي ليه يتركوها كل هالساعات تحت الألم والوجع ؟!
تندم ما أخذها لمستشفى خاص ... زم شفته بضيق وناظر أمه الي نطقت بقهر: حسبي الله ...كل الوجع الي تجرعته وبالنهاية عمليه؟!
مثل عمتك اسراء ولادتها عسيره يوم كامل وهي بالعذاب وبالنهاية نزلوها عمليه ...ليه من الأساس تتركوها تتجرع كل هذا الالم ؟!
**
**
**
ساعات مريره مرت عليها تجرعت كل أنواع الألم ...من كثر صراخها ما هي قادره تتكلم ... آخر شيء تتذكره لما نزلوها للعمليه بعد ما شافت الموت بعيونها..مب قادرة تتحرك ...قوتها خارت وما لها حيل تفتح عيونها ... فتحت عيونها بصعوبه وهي تسمع صوت من حولها ...ما ميزت الأشخاص من أثر المخدر ..للحين تحس ما استعادت وعيها ...غمضت عيونها وبدأ عقلها يستذكر شريط حياتها ..طفولتها ومراهقتها وشبابها ...تمنت للحين بعدها طفله وما كبرت ... نفسيتها محطمه بعد الولادة ...الحين عندها مسؤولية طفل وهي بهذا العمر ... فتحت عيونها لما تذكرت إنه جنس الطفل رح يريحها من هذا الجحيم ...حركت شفتها تسأل عن جنس الجنين..باءت محاولاتها بالفشل ما فيها طاقه تنطق شيء!!
مهاب التفت على الممرضه لما دخلت وهي تشتغل بمهنيه وتؤكد عليها لزوم تمشي بعد العمليه!!
بعد خروج الممرضه اقتربت ام مهاب منها وجلست على طرف السرير ..مسحت على شعرها : كيفك الحين؟!
بدون ما تشعر نزلت دموعها من لمساتها الحانيه ..وبصوت مبحوح نطقت: أبغى أمي
ام مهاب التفتت لمهاب واقف يناظرهم بصمت وما علق بشيء ...
رجعت التفتت عليها ام مهاب: رح تشوفينها إن شاء الله ..بس لزوم تأكلين شيء وتمشين
هزت رأسها بالرفض ما لها نفس بشيء .. تبغى ترجع لأمها بأي ثمن ....
ام مهاب ناظرت ولدها برجاء يتصل بأهلها خليها تطفي شوقها بشوفتهم!!
تنهد والصمت يغلفه ..انسحب من المكان بهدوء ..ما يقدر يوعدها بشيء ويكذب عليها ...الاوضاع الحين متوتره بوفاه زوج عمته وبنفس الوقت في  أخبار عن خروج عماد بأقرب فرصه بالعفو العام !!
أبوه غاضب من ذي الاخبار وما يبغى يسمع اسم مطلق نهائيا...
غسق ناظرت ام مهاب بضعف وهي تسأل عن جنس الجنين...ام مهاب نطقت بهدوء: أهم شيء إنك بخير
هبط قلبها من ردها ..نطقت بملامح باهته: طفلي
قاطعتها ام مهاب: لا تخافين ..الحمد لله البنت بخير وصحه
عبست ملامحها من الصدمه " بنت" طول الفترة الماضية تدعي ربنا يكون ولد وكانت متأكده رح يكون ولد ..مستحيل يمكن خربطوا ...
غمضت عيونها ودموعها تنزل بانسياب وكل طموحاتها وآمالها تبخرت ...حريتها الي كانت على الابواب تبخرت ...ورح تقضي باقي حياتها هنا ...مستحيل ما رح ترضى بهذا الوضع أبد ..ما لهم حق يعملون فيها كذا ...بداخلها مشاعر كره وحقد على مهاب هو السبب بكل شيء يقدر يرجعها لأهلها ليه ما يرجعها ...ليه يتلاعب بأعصابها ...ما رح تكون لعبة تحت يدينهم ..رح ترجع غصب عنهم وما لهم حق يؤذون عماد دام انهم تنازلوا خلاص انتهى كل شيء ..
**
**

مزنه رجعت للبيت ما لها حيل تجلس بالعزاء ...ناظرت اسراء بعبوس: وكأنه تنقص العائلة بنات حتى يكون
قاطعتها اسراء: يا زين البنات بس انت يمه منحازه للعيال!!
ام سيف مطت شفتها بسخرية: على الاربعين رح تحمل على امل تجيب الفارس المقنع
لمى نطقت بانتقاد: وليه تتمسخرين؟! تراها زوجته مثلها مثل اي بنت تتزوج ..والا انتم محضرينها ديكور هنا ؟!
ومهاب عمل الصواب من الظلم توقفون حياة البنت وتتركوها معلقه لا متزوجه ولا مطلقه ...دام رح تبقى هنا مجبرون تعاملونها كنه في هذا البيت !!
مزنه مطت شفتها بعدم رضا: يا حبك للفلسفة ؟!
بنت مطلق ما تستحق الاحترام والتقدير..شغاله وكثير عليها!!
اسراء ناظرت امها متى ما كرهت احد تحرقه: طيب طلعتم شفتوها ؟!
ام سيف ببرود نطقت: البركة بأم مهاب معتكفه فوق هي ومهاب!!!
وقفت اسراء بحماس: تعالي لمى نشوفها ونشوف الحفيدة الجديده!
شفتيها يمه؟!
مزنه هزت رأسها بالرفض: ما ابغى اشوفها !
وقفت لمى بهدوء: تعالي نشوف الحفيدة الجديده ؟!
توجهوا لجناح مهاب ..
**
**
مر يومين على ولادتها ربنا يسر لها مهاب وام مهاب شالوها على كفوف الراحه ..ما رح تنسى معروف ام مهاب وكأنها بنت لها ..اهتمت بالبنت نيابه عنها لأنها بكل بساطه ما هي عارفه تتعامل مع هالكائن الصغير ......حنان ولطافه هالانسانه ما شافت مثلها ..ومهاب أخذ من امه كثير من صفاتها ... زمت شفتها  بعبوس من المغص ...
وضعت الكوب على الطاوله والصمت يغلفها ...من لما طلعت من المستشفى ما نطقت شيء ...فقدت شغفها بالكلام ..حتى النفس تحسه ثقيل عليها ...قلبها خاوي وما فيه حياة بعد ما تحطمت آمالها!
بذي اللحظات المريرة الي تجرعتها تمنت أمها وابوها معها...ما هو سهل عليها تعتمد على ام مهاب ..بذي الأوقات البنت ما تحب الا اهلها يكونوا معها ويساعدوها ....
قطع افكارها مهاب لما نطق بهدوء: لمتى هالسكوت؟!
ناظرته بالرغم من حنيته وطيب تعامله إلا إنها مقهورة منه يقدر يرجعها لأهلها ليه مانعها.. هزت رأسها بالنفي واكتفت بالصمت!
نطق بضيق وهو يشوف الحزن والبؤس يكسوها ما رح يكون اناني بالرغم انه المولود بنت رح يتنازل لها نطق بهدوء: تقدرين ترجعين  لأهلك بس اصبري لبعد الأربعين ..وانت بكيفك تبغين ترجعين او لا
قاطعته بغصه يلوي ذراعها بقوة: والبنت؟!
هز رأسه بتصميم : هذا الشيء ما أقدر أتنازل فيه ..لو كان ولد كان يمكن فيه مساومه بالموضوع أما بنت ما رح اسمح تطلع من هذا البيت نهائيا!!
مطت شفتها بابتسامة مقهورة: تشوف كلامك منطقي؟! أنا
قطعت كلامها ما لها قلب يتكلم!!
نطق يساومها حتى تبقى : كلامي عين الصواب ...هذي بنت وما أسمح إنها تعيش بعيد عن عيني!!
انت تقدرين تختارين بين أهلك وبين البنت !
والحل الوسط بيننا تختارين البقاء وما رح أمنعك من زيارة أهلك كل فترة أخذك ساعة تجلسين معهم وترجعين!!
بس البنت ما تطلع معك للزياره ..رح تكون عند أمي!!
مطت شفتها بوجع من حلوله تزيدها ألم بدل ما تفرحها !!
نطق وهو يشوف الاستياء يكسوها: الحين اتركي عنك التفكير لوقت تستعيدين صحتك وبعدها ربك يفرجها ..الحين الاوضاع متكركبه
توقعت يقصد بسبب وفاة زوج عمته ..وخاصه إنها رح تنتقل لهنا تعيش ...ما دققت على كلامه !!
ناظرته لما نطق يشاورها: رح أسجل البنت إذا تبغين تسمينها ما عندي مانع..عندك اسم
قاطعته بالنفي قلبها اخر شيء يفكر فيه الاسم : ما عندي اسماء
هز رأسه وهو يقاطعها: خلال هاليومين رح اختار لها اسم !
ما علقت لما وصلها دق على باب الجناح !!
مهاب وهو يسمع اصوات عماته ..نطق وهو يمد يده لها: هاتي يدك نجلس هناك
قاطعته برفض: ما ابغى أقابل احد
نطق بطول بال: ما يصير
دفنت راسها على الطاوله ..ونطقت بخفوت: اعتبروني رجعت لأهلي!!
أجبرها ترفع راسها بيده: أقول قومي وبلا كسل !!
وقف جنبها ..أسندها وهو ينطق بمزاح: وكأني متزوج عجوز !
زمت شفتها بعبوس: اتركني اقدر أمشي لوحدي!
تجاهلها وهو يمسك بيدها ويمشي معها : فكي هالكشرة !!
ناظرته بغيض وقهر فوق تعبها يتفلسف فوق رأسها بحلول مثل الزفت ويبغاها تبتسم !!
صدت عنه لما خفق قلبها لما ابتسم وهو ينطق: بشويش امشي!

**
**
**
جالسات بالصالة مع ام مهاب ..اسراء وعيونها على الصغيره بحضن ام مهاب ترضع فيها ..مدت يدها تحب الصغار: اعطيني احمل النتفه أنا أرضعها!
ام مهاب ناولتها بشويش وحرص!!
اسراء قلبها ينفطر لما تشوف الصغار: يا ربي أبغى أكلها صغيره حيل!!
لمى جلست جنبها وهي تناظر الصغيره بهدوء وهي ترضع ...ناظرت ام مهاب والهدوء يغلفها: غلبتكم الصغيره؟!
ام مهاب هزت رأسها بالنفي: لا عادي!
اسراء خزتها: ليه أحسك مو فرحانه بالبنت ؟! ترى ذول ارزاق من الله بغض النظر عن الام!
خزتها ام مهاب بتنبيه وهي تشوف غسق ومهاب طالعين من المطبخ!!
وقفت غسق للحظات ما تبغى تسلم على أحد وخاصه بوجود اسراء ..اضطرت تتقدم وتسلم لما حثها مهاب على المشي ...ونسيت سالفه أسراء كلها
ناظرت لمى لما وقفت وهيأت نفسها للسلام!!
رفعت نظرها اسراء وهي تتأملها متوجه لهم ..شعرها واضح طوله بالرغم انها جمعته بعشوائية ..غرتها نازله بإهمال ...وجهها شاحب متعب ومرهق ..لابسه بيجاما لونها مقرف ما تدري احد يشتري هذي الألوان الفاقعه ..كان وضعها مبهذل وواضح فيه التعب ...بس جميلة وملفته للنظر بقوة ...لما شافتها بالزواج كانت ملامحها ما هي واضحه مثل الحين ..تظلم نفسها بالمكياج على الطبيعه أجمل بكثير !!
اذا هي بنت وانبهرت فيها كيف بمهاب ..تسارقت نظرات خاطفه عليه وهو واقف جنبها يسندها من ذراعها ..معقول عنده ذي الفتنه وما يفتتن فيها !!
ناظرت الطفلة الي بحضنها ما تدري هالطفله ما اخذت جمال امها !!
سلمت غسق عليهم بشويش  والعبوس مرتسم على ملامحها من الألم ...
ام مهاب بحرص: روحي للغرفه ارتاحي !
هزت رأسها بالرفض بعبوس وجلست بصعوبه ..تنفست بعمق بعد ما جلست ...
لمى بملامح مريحه: الحمد لله على السلامه
هزت رأسها وبخفوت نطقت: الله يسلمك!
اسراء بعد ما انتهت من الرضاعه نطقت باستغراب: ليه ما ترضع من  أمها ؟!
ام مهاب ناظرت غسق الي ظهر على ملامحها الانزعاج ما تدري خجل وإلا تضايقت من تدخلها ..وبهدوء نطقت: ترضع بس علشانها تعبانه تستخدم الحليب
قاطعتها لمى: يومين ويتحسن الوضع اهم شيء تمشي
ام مهاب : تمشي بالصالة رايحه جايه بمرافقه مهاب غصب عنها تمشي!
تسمع كلامها وتحس بالتعب يهدها ...التفتت على مهاب الي اقترب منها ومد يده لها : تعالي ارتاحي بالغرفه!!
هزت رأسها بالرفض ما لها حيل تقوم: مرتاحه
مهاب بإصرار: جلوسك كذا غلط لزوم تنامين
لمى بتأييد: انت بفترة نفاس ولزوم ترتاحين !
ام مهاب هزت رأسها بقلة حيلة من عنادها : خلاص اتركها مهاب دامها مرتاحه!!
هز رأسه مهاب بتفهم . ..وتجاهل رفضها اعتدل بوقفته ..استأذن منهم وخرج !!
اسراء بعد خروجه نطقت بتساؤل: خرجت بنفس اليوم من المستشفى ؟!
ام مهاب ردت عنها: لا ثاني يوم تخرجت
لمى: أنا لما أنجبت ولدي سعد انجبته بمستشفى******* جلست ثلاث ايام فيه!
ام مهاب : كانت تعبانه كثير وهذا المستشفى كان اقرب ...والله خفت تولد بالسيارة ..لو شفتيها
اسراء عبست ملامحها: واضح ولادتها صعبه مثلي!!
لمى اخذت الصغيره بحضنها: اعطيني اتأملها!
اسراء بلقافه: ابو مهاب شاف الحفيده الاولى؛!
خزتها ام مهاب على هذا السؤال وكأنها ما تعرف اخوها...استرخت غسق وأرخت راسها على الكنبه من الارهاق....
وكانها تعيش بمتاهة ...اذا تبغى البنت مجبورة تكمل الحياة هنا ..وان بغت اهلها مجبورة تترك صغيرتها هنا ...عضت على شفتها بقوة من شدة العجز والقهر ..ما في حل وسط يريحها !!
**
**
**
جواهر بعد رجوعها لبيت اهلها مع بناتها قررت تستقر فيه لوقت تضبط أمورها...ناظرت امها الي بدأت تدعي من قلبها: حسبي الله عليهم ... أنا من زمان عيال زوجك قلبي ما هو مرتاح لهم !
جواهر مطت شفتها بملل: عاد الي يسمع من كبر ورثة أبوهم ...ما أدري كيف يفكرون ترى هالبنات أخواتهم كيف تسول لهم نفسهم يحرمونهم من الورث...انا متنازله وما ابغى شيء منهم بس
قاطعتها مزنه بقوة: ما رح تتنازلي لو يطلع لك فلس واحد رح تأخذينه من عيونهم !!
أخوك أبو مهاب وقف محامي لك ..كل إخوانك معك وما رح يتركونك!!
جواهر هزت رأسها بهدوء ...تحس جسمها تعبان من يوم وفاة زوجها ما ارتاحت وهي تقابل المعزيين..تبغى تنام وقت طويل تريح جسدها!!
دخل أبو مهاب وهو يرد السلام ...جلس جنب أمه وعيونه على اخته: كيف وضعك اليوم ارتحت بالنومه البارحه!
هزت رأسها : ربي يسعدك يا اخوي ..الحمد لله !!
ابو مهاب وهو يلتفت: وين البنات ما أشوفهم؟!
جواهر بحزن: عند البنات فوق ..نفسيتهم للحين تعبانه بعد وفاه أبوهم
ابو مهاب هز رأسه: ربي يصبرهن ....اي شيء تحتاجونه ما يردكم لسانكم
قاطعته بامتنان: ما تقصر ..وجهك أبيض!!
قاطعهم دخول أم مهاب ومعها القهوة ..ردت السلام ..قهوتهم وجلست والهدوء يغلفها ...
مزنه بعدم رضا : تراك ذابحه حالك وانت تخدمين تحت رجولها !!
ام مهاب بقلة صبر: يا خالتي تراها وحيده ولادتها قيصيريه تبغى أحد حولها
مزنه : وانا ما قلت شيء ..نيرا تجلس عندها وتقوم فيها
ام مهاب كتمت ضيقها: حفيدتي وأنا أولى فيها ..تراها حفيده لنا ما هي لبيت مطلق !!
عبست ملامحها جواهر من سيرتهم ... وبهدوء نطقت: ام مهاب صادقه البنت حفيدتكم ما هو منطق تتركيها عند الشغالات !!
بغض نظر عن ام البنت تراها حفيدتكم!!
ابو مهاب بعبوس: امحق حفيده ...والله مب طايق اشوفها وخاصه مع إشاعه خروج عماد من السجن !!
جواهر بمنطقيه: انتم تنازلتم اليوم وإلا باكر رح يطلع وما رح يقضي حياته بالسجن ...ليه ما ترجعونها لأهلها وتقطعون هالعلاقه بين ذي العائلة !!
حفيده وحده ولا درزن احفاد يحملون دمهم وصفاتهم !!
نصيحة مني الطلاق هو الأفضل!!
ام مهاب صحيح تبغى تزوج مهاب بنت ثانيه وما رح تقبل بزواجه هذا ..بس بنفس الوقت ما رح تتخلى عن حفيدتها: البنت ما تطلع من هذا البيت!!
جواهرمطت شفتها بعدم رضا: تبغين تقهرين قلب الام على ابنتها !!
تراها أمها
ام مهاب : اكيد رح تتزوج وتنساها مع الايام!!
ابو مهاب : مهاب خبرني إنه رح يرجعها لأهلها بعد الأربعين والبنت هنا!!
مزنه توقعت مهاب متعلق فيها : رح يطلقها؟!
ابو مهاب بعبوس: اكيد رح يطلقها ..بس انا رح احاول ما يطلقها وتبقى هنا تحت عيوني شغاله
قاطعته جواهر : إلا اذلال الناس يا أخوي اذا لي خاطر عندك اترك البنت بحال سبيلها !!
ودام مهاب رح يطلقها بعد الاربعين خلي معاملتكم معها دافيه على الاقل تتذكركم بالخير!!
هز راسه ما رح يتجادل مع أخته الكبيرة كل شيء بوقته حلو...

انتهى البارت...دمتم بخير 🌹