رواية المنتصف المميت الفصل السادس والأربعون 46 - بقلم ضاقت أنفاسي

اول ما دخلت نطقت بعجله: حياة لارا وينكم؟!
اسيل طلعت من المطبخ بابتسامة: هلا بالعروس!!
غسق اقتربت من امها وسلمت عليها بحراره ..رؤية امها بخير تفرحها وتشعرها بالأمان....
نطقت بتساؤل وهي تتلفت: وين ابوي
اسيل براحه وهي تناظرها للحين متغطيه: طلع للبقاله مع ايليف ...تعالي نجلس ..
غسق بعجله : مهاب ينتظرني مستعجله
اسيل هزت رأسها بتأكيد: لا تتاخرين عليه . .واسمعي كلام زوجك
غسق بطاعه وهي تكشف النقاب: ان شاء الله يمه ..وين حياة او لارا !!
اسيل رفعت حاجب: وش فيك معفوسه كذا!!
غسق بضجر: حظي الاغبر !!
مو متعوده على ذي الخرابيط ونسيت نفسي وفركت عيوني...ابغى اعدله مهاب ينتظرني!!!
التفتت على حياة الي تقدمت بابتسامة وهي تناظر شكلها: والله يلزمك صورة!!
وش هذا ؟!
غسق بعجله: والله ما هو وقته ..ابغى مكياج اعدله!!
حياة سحبتها لغرفتهم: تعالي اعدلك!!
لارا ضحكت بقوة اول ما شافتها: لا تقولين مهاب الي ضربك وحاسك!
غسق خزتها : ضربك قرد ان شاء الله!!
حياة وهي تمسح لها المكياج: مشكلة الي مو متعود على الكشخه!!
غسق هزت رأسها: ايه والله صادقه ...متعوده افرك عيوني بكل قوتي ...مو متعوده على ذي الخرابيط!!
اسيل جلست على السرير وهي تتاملها: لا تحطين على وجهك شيء ..بدون مكياج اجمل!!
حياة برفض: كيف ما تحط تراها عروس!!
غسق قلبها طق من مكياج حول العيون نطقت بموافقه لامها: مثل ما تقول امي ..ما له داعي!!
وقفت وتوجهت للحمام تغسل وجهها ..لارا بعدم رضا: عروس لزوم تحط!
اسيل بإصرار: اخاف احد يصكها عين!!
حياة خزتها : صدق لما قالوا القرد بعين أمه غزال!!
اسيل ابتسمت وهي تناظر غسق طلعت من الحمام وهي تنشف وجهها: ترى اسمعك يا قرده!!
حياة ضحكت بروقان: وكأني خايفه منك!!
تعالي اعدلك وغطي على رؤى الدبه!!
غسق ما تبغى تحوس نفسها مرة ثانية ... نطقت برفض: بس ابغى ألون شفايفي وبلاشر وبودره خفيفه ...ما ابغى شيء حول عيوني!!
حياة هزت رأسها: مثل ما تبغين!!
بعد وقت مطت شفتها غسق بملل : لو وضعتهم لحالي افضل ..عجلي تأخرت مهاب ينتظرني برا حتى ندخل مع بعض!!
حياة بضجر: اووووف منك ....الشغل المرتب يبغى له وقت!!
لحظات واكمل !!
وقفت غسق بضيق تاخرت على مهاب كثير ...قاطعتها حياة: لحظة اللمسات النهائية!!
غسق ناظرت نفسها بالمرآه : كذا ممتاز .. مشكورة
لارا بابتسامه: اذا تبغين اعملك تسريحه
غسق خزتها: علشان بعد العشاء نكمل؟!
اسيل واقفه تعدل لها شعرها وهي تهمس لها: لا تشيلين الطرحه ..اخاف احد يصيبك بالعين::
غسق قبلت رأس امها وبابتسامه عريضه نطقت: لا تخافين ما احد رح يصيبني بالعين!!
لارا وقفتها لما لبست غسق النقاب: ما شفنا فستانك!!
غسق جمعت اغراضها بعجله: بعدين بعدين ...
وتحركت للخارج وعيونها تبحث عن مهاب ...اخذت نفس عميق وهي تستند على الجدار القريب من الباب ..التفتت حولها ..غريب ما له أثر ...
فتحت حقيبتها تتصل تشوفه ..مستحيل تدخل كذا لوحدها ...ارتجفت لما وصلها صوت ابو مهاب القادم: يا هلا بالعروس!!
قفلت الجوال ووجهها صار بالألوان ... تقدمت منه وسلمت عليه بهدوء ...
ابو مهاب اشر للداخل: ادخلي ليش واقفه برا ...حياك حياك!!
مطت شفتها بسخرية كيف الايام تنقلب وتتغير الاحوال ....دخلت معه باحراج وبداخلها تتوعد بمهاب ...رفعت حاجب وهي تشوفه متوسط الجلسه وابتسامته شاقه حلقه!!
تقدم ابو مهاب وهو يرحب بالعرسان ويبارك لهم...تقدمت غسق وسلمت على الموجودين وهي تحس نظراتهم لها غريبه وكانها تفحص ...
اقتربت من رؤى ما هو باين منها شيء ...حسب علمها ما تتغطى عن مهاب.  وش فيها متغطيه الحين؟!
مهاب اشر لها: تعالي غسق هنا!!
اقتربت وجلست عنده وبهمس خافت نطقت: ليش تركتني!!
نطق بنفس الهمس:احترقت وانا انتظر ...سنه حتى ترجعين!!
غسق بتبرير: تاخرت بسبب حياة!!
هز رأسه وهو ينطق بخفوت وعيونه على عيونها: الكحل واضح بعيونك!
غسق باستنكار: والله مسحتها وما حطيت شيء على عيوني ... توبه احط
مط شفته بابتسامة: قلت لك تراك مو بحاجه لذي الخرابيط بس ما سمعت كلامي!!
هزت رأسها بعدم اقتناع: يوم الصباحيه الكل يتشيك الا انا؟!
مزنه عيونها عليهم وهم يتهامسون وصوتهم ما يوصل لأحد..نطقت تقطع هماستهم : وين امك يا غسق؟!
غسق من الربكه والعجله نسيت تسال امها متى رح تيجي: أمي بالملحق
ناظرت اخوات مهاب لما دخلوا يسلموا عليهم والفرح باين عليهم !!
ابو مهاب وقف: انا اقول نطلع للمجلس نترك البنات يأخذون راحتهم... الحين يوصل غياث واعمامك!!
همس لها مهاب بتنبيه وحرص: كيان بالبيت لا تأخذين راحتك والشيله ما تنزل عن راسك!!
هم يوقف مسكته من يده وهي تنطق باعتراض هامس: قالوا لك عجوز
زمت شفتها بقهر وتركت يده لما نطقت مزنه بانتقاد: وش فيك ماسكه الرجال كذا .. اتركيه يطلع للمجلس الحرمه اختنقت من الغطاء!!
بالرغم من ضيقها ما قدرت تمنع ابتسامتها لما اشرت على رؤى!!
مهاب بابتسامه لما نطقت رؤى بقهر: ما بقى تقولين عني غير عجوز!!
مزنه رفعت انفها بإصرار: الحين بعد الزواج صرت حرمه
رؤى بقهر: جددددددده وربي ازعل الحين !!
غسق نهضت بسرعه لما تحرك مهاب للخارج ..نطقت وهي تجاري خطواته: لحظه!!
مهاب التفت عليها بعد ما خرج من الصاله:  هلا
غسق بعبوس: رح انزل الشيله واجلس بالفستان ..الناس تنتقدني وتتكلم عليك انك ما اشتريت لي جهاز
قاطعها بحاجب مرفوع: يهمك كلام الناس كثير؟!
اعملي الي تبغينه بس ما تطلعين خارج الصالة بدون ما
قاطعته بابتسامة: ان شاء الله!!
عقد حواجبه وهو يشوف ايليف داخله تركض وصوت ضحكاتها بالمكان ....
غسق مسكت يدها ونطقت بتساؤل: وين جدك غياث ؟!
مهاب بمقاطعه: بعدين تشوفين ابوك يمكن يكون احد بالمجلس!!
هزت رأسها وتركت يد ايليف الي انزعجت من مسكتها ...
**
**
**
رؤى وهي تعدل نفسها وهي تنطق بضجر: اختنقت!!
مزنه بانتقاد: وكأنك رايحه على زواج ...اخخخ لو يشوفك ابوك الا يكسر راسك!!
رؤى بدلع: عروس يا جده... وبعدين انا الحين متزوجه... أبوي ما رح يتدخل بحياتي ...وكيان قابل
جواهر كشت عليها وهي تقلدها: كيان قابل!!
ناظري غسق كيف ثقيله وما حطت مثلك الوان الطيف!!
رؤى ناظرت غسق الي اقتربت منهم وهي تفك الشاله ..نطقت بتساؤل: ما اشتريتِ مكياج!!
غسق باستغراب نطقت: اشتريت! ...ليش تسألين!!
رؤى بحاجب مرفوع: خايفه العلبة تخلص؟!
ليش مو حاطه مثلي حتى تكونين عروس بمعنى الكلمه!!
غسق بضجر: طيري اوانا على بالي عندك سالفه!!
ام مهاب تناظر غسق بميك اب خفيف ... اعطاها جاذبيه زياده ما هو مثل رؤى الي طمست ملامحها ....
وعد جلست وهي تنطق بانتقاد: ترى يا رؤى واضح خلص المكياج الي عندك ...لعنبو ابليسك ما تركت لون الا حطتيه بوجهك!
رؤى بحاجب مرفوع: مو حلو؟!
وعد بتأمل: حلو بس ثقيييييييل!!
رؤى نطقت بفزع لما غسق نزلت العبايه : لااااااااااااااااا
مزنه طاح قلبها نطقت برعب: وش صاير؟!
رؤى نطقت بقهر : يا زفته اتفقنا نلبس نفس الفستان يوم الصباحيه ...ليش اخلفت اتفاقنا؟!
غسق كشت عليها: استغفر الله ..قلنا تتزوج تعقل ؟!
ام سيف مطت شفتها: الله يعينك يا ام مهاب على بلواك!!
جواهر تشبر بيدينها: وربي يا رؤى اذا ما عقلت وصرت رزينه
رؤى بضحكه: رزينه والا درزينه؟!
ختمت كلامها بألم لما ضربتها جواهر بنعالها: لعنبووووو ابليسك ما تتوبين حركاتك ذي!!
رؤى بضجر: استغفر الله لزوم تنكدوا على الواحد ..وانت يا زفته ليه ما لبست نفس الفستان!!
غسق هزت كتوفها : انسكب عليه العصير قبل ما نطلع
رهف بروقان: مفشوحه!
بس تدرين حلو هذا الفستان .. احسن شيء ما لبستم نفس الشيء حتى الناس ما يقولوا اشتروا ٢ بسعر التخفيضات!!
رفيف خزتها: يا سخف تفكيرك!!
التفتت غسق وابتسمت على دخول أمها ..تقدمت اسيل سلمت وباركت لرؤى ...واقتربت من غسق وهي تناظرها وداخلها تحس الفرح يدغدغها ... وأخيراً ربنا اكرمها تشوف غسق عروس وتطمئن عليها ...
تشوفها بعيونها مثل الملاك ....نطقت بغصه فرح: عسى ربنا يجعل ايامك فرح وسرور!!
ام سيف تناظر الموقف بصمت ..ومنظر اسيل وغصه الفرح باينه عليها اوجعتها .... كيف كانت تحاول تضايق غسق وتؤذيها بدون ما تفكر بشعور أسيل ..كيف رح يكون وضعها لو صار شيء لوحيدتها؟!
تنهدت وهي تهمس بالاستغفار .... التفتت على ام مهاب الي سحبت اسيل واجلستها عند مزنه: ما في دموع اليوم ...ربنا تمم علينا فرحتنا وغسق بعيوني ما رح يصير لها شيء مثلها مثل بناتي!!
فرح بمزح: اكلت هواء اذا رح تعاملك مثلنا!!
ام مهاب خزتها : ملسونه ما رح ارد عليك!!
الحين جماعتنا على وصول يلا ابغى كل شيء جاهز ..تحركي اشوف حتى اراويك كيف الام تعامل عيالها!!
رفيف قرصت فرح: كله بسبب لسانك الطويل!!
رؤى جلست وعدلت جلستها وهي تنطق بشماته: أبغى كل شيء يلمع لمع والتجهيزات تكون على اتم وجه
قاطعتها وعد : اقول انكتمي مصدقه نفسها عروس..وربي الحين احفر براس جدتي واخليك قدامي على المطبخ يا عروس!!
غسق بابتسامة: تبغون مساعده!!
جواهر اشرت لها: ترى ما هو لايق عليك السناعه ..تعالي اجلسي هنا اشوف ...ويلا الباقي يروح يشوف شغله !!
**
**
**
مرت العزيمه على خير ....ناظرت مهاب لما حرك السيارة وخرج من البوابه ...ناظرت البوابه السوداء لما انفتحت وخرج منها مهاب .... وكأنها البوابه الي تجمعها بالماضي والحاضر ...
زمت شفتها لما مسك مهاب يدها ونطق باستغراب وهو يشوف سكونها: كيف كانت العزيمه؟!
ناظرته وعيونه على الطريق .. نطقت بهدوء: الحمد لله !!
شد على يدها بلطف: صدقيني اهلي ما هم سيئين ..وقلت لك من قبل لما تختفي كل الحواجز رح تكون علاقتك فيهم اجمل ...
هزت رأسها بتفهم ...اخواته والكل يتعامل معها طبيعي ولا كأنه بينهم شيء من قبل ....نطقت بهدوء: اهم شيء الانسان ما يكون حقود ..ويتعايش مع الحياة بتقلباتها
مط شفته بابتسامة ساخره واضح انها تقصده: لو كنت حقود ما كنا الحين مع بعض!!
ابتسمت : ما قصدتك انا اتكلم بشكل عام !!
توسعت ابتسامته: عيل عندك سالفه وجالسه تنغزين عليها ؟!
احد ضايقك ؟!
هزت رأسها بالنفي: ما احد ضايقني ...لاول مرة احس اني بين اهلي بدون نغزات ونظرات مبطنه ...حتى زوجات اخوالي ما شاء الله عليهم !!
نطق بحاجب مرفوع: خالتي ام سيف قالت لك شيء ؟!
غسق بنفي: ما قالت شيء وما وجهت لي كلام من الاصل بس احسها ما تطيقني ... بالرغم اني ما
قاطعها براحه على مرور العزيمه بدون مشاكل: دام ما تكلمت وش تبغين فيها ..حتى قلوب الناس تبغين تتدخلين فيها ؟؟ والا الحب عندك بالغصب؟!
كافي سرقت قلبي وما ارجعتيه!
ضحكت على تعليقه ونطقت بابتسامة عريضه وقلبها ينبض بقوة...ومن الربكه نطقت : سارقه قلوب الرجال
ختمت كلامها  وهي عافسه ملامحها بتورط ..ناظرته لما نطق بحاجب مرفوع: واضح العزيمه اثرت على عقلك
قاطعته بتبرير: ما هو قصدي ... أنا اقصد ابوي
قاطعها : لا تبررين. ....تراك جبت العيد بكلامك !!
ضحكت بقوة على ملامحه المنفعله ...سرعان ما قطعت ضحكتها ونطقت بتذكر: صحيح نسيت ايليف ؟؟
حك لحيته الخفيفة وهو ينطق بهدوء: اتركيها حتى نرجع من شهر العسل!!
##
##
##
##

من لما رجعت من شهر العسل وهي منشغله بالمواد وتنزيلهم ..زفرت بضجر اكره ما عليها تنزل مواد ...ارجعت شعرها للخلف بملل ...
رفعت نظرها لما تقدم منها مهاب ...جلس جنبها ونطق بتساؤل: وش فيك تنافخين؟!
غسق اشرت على الجوال: اكره تنزيل الجدول!!
مهاب وهو يسحب منها الجوال بشويش ويناظره: ذي المادة على الساعه ٨
مدت بوزها برفض: ما ابغى اصحى من الصباح
رفع حاجب من تفكيرها: طيب نزلي ذي الماده على الساعه ٩
نطقت برفض: لا سماء ما تحب هذا الدكتور
نطق باعتراض: والله؟!
ليش تنزيل المواد عندكم على الحب؟!
وش ذي الخرابيط؟!
ضحكت غسق بخفه: ترى قصدي ما هو بالمفهوم الي بعقلك ...يعني بعض الدكاتره غثيث وما ينبلع ونقابل وجهه طول الترم
قاطعها : طيب نشوف اخرها معك !!
طيب الدكتور راشد
غسق بفزع: اعوذ بالله ...حلفنا ما ننزل عنده لو نتأخر سنوات !!
ينشف الريق
هز رأسه بضجر: لا حول ولا قوه الا بالله...طيب الدكتور محمد وش علته؟!
غسق بتفكير: اسلوبه يخليك تنام من كثر ما هو ممل!!
زم شفته وهو يقلب الجدول: عندك غير محدد نزلي انت وحظك!!
غسق ابتسمت بتورط: خايفه انزل غير محدد وتطلع انت!
فتح عيونه بصدمه ما توقع تفكيرها كذا ..نطق بعتب: لذي الدرجه مو طايقه تشوفيني
قاطعته بابتسامة واسعه: اسئلتك صعبه ... بعدين ما اضمن نفسي تسول لي واسرق الأسئلة ...
مد لها الجوال: صدق تفكير البنات غريب .... أنا ما ابغى تكونين طالبه عندي لأني رح اطلع عيونك واراويك
قاطعته بعبوس: شرير!!
ضحك بخفه: قومي نطلع نتمشى ونمر على اهلنا ..باكر لما يبدأ الدوام ما رح نلقى وقت نزور احد!!
وقفت وهي تنبه عليه: ذكرني نشتري لايليف هديه!!
مهاب : بالاول نزور اهلي ونأخذها وتشتري بنفسها ...خلاص يكفي لزوم ترجع هنا وتعيش معنا!!
هزت راسها بتاكيد: وهذا الي لزوم يصير!!!

**
**
**
ام مهاب عيونها تشع من الفرحه وهي تشوف عيالها حولها ....نطقت وهي تكلم ابو مهاب: انا اقول لو نجهز الدور الثالث ونقسمه لمهاب وكيان ويكون واسع ..باكر تكبر عائلتهم!!
ابو مهاب: جناح مهاب وش كبره ومع ذلك تركه واستاجر ...عيالك يبغون يستقرون بعيد عنا وهذا حقهم!!
مزنه رفعت حاجب:ليش فينا مرض معدي وخايفين على نفسهم ؟!
كيان وهو يمسك بيد رؤى ويرفعها: انا وزوجتي جالسين على قلبكم وما رح نتزحزح !!
ومتى ما تزوج المنتخب رح أوسع بالجناح!!
فرح رفعت حاجب:جالسين على قلبكم!!
رؤى بابتسامة: اذا ما شالك قلبنا تشيلك عيوننا !!
وعد مطت شفتها: بدأت رؤى بالنفاق!!
فرح بابتسامة: ادري بها هالكذابه جالسه بقلبها تدعي علينا!!
رؤى ضحكت بخفه: الله يسامحكم .اسألوا كيان كم امدحكم واحبكم ...ودوم أقوله بيتكم بدون اخواتك بدون طعم!!
رفيف رفعت حاجب وهي تخزها: لا اليوم شحن النفاق فل....دوبك قبل الزواج تقولين الله يعيني عليكم !!
رؤى ببراءه: انا
كيان : رؤى دوم تمزح معكم
ابو مهاب وهو يناظر مهاب وغسق والصمت غلفهم ويتابعوا بصمت .. نطق بحاجب مرفوع: وانتم وش فيكم ساكتين ؟!
مهاب هز كتوف: ولا شيء
مزنه بشك: لا تقول انكم متشاجرين؟! وانا اقول من اول ما جلسوا منكتمين؟!
دوبكم متزوجين ما امداكم تتذابحون ..يكون بعلمكم ترى ابوك حلف لو تشاجرتم ما يرجعكم لبعض لو تموتون ...اعقل انت واياها واحفظوا بيتكم افضل لكم ..تراها اخر فرصه لكم!!!
مهاب ما قدر يمسك نفسه من الضحك من اسلوب جدته بالكلام ....
ام مهاب خافت من موجه الضحك الي اجتاحت مهاب ..نطقت بخوف: بسم الله عليك !!
مزنه رفعت حاجب: وش الي يضحك!!
غسق ماسكه ضحكتها بصعوبه بسبب وجود كيان ...ما هي قادرة تكتم ضحكتها خاصه مع ضحكه مهاب ...
ابو مهاب ابتسم وهو يناظر مهاب يضحك بقوة : واخيرا شفنا ضحكتك يا مهاب...تعوذ من الشيطان!!
مهاب بصعوبه يحاول يسيطر على ضحكته ..تعوذ من الشيطان وتنحنح ...سرعان ما رجع يضحك لما نطقت جدته: تضحك علي يا مهاب؟!
نطق من بين ضحكاته: ما اضحك عليك يا جدة!!
غسق مطت شفتها لما دخلت ام سيف وهي تنطق بانتقاد: صوت الضحك واصل برا!!
رؤى : ليش قالوا لك ضحكة الرجل عورة .. وش فيها لو كان صوت ضحكه واصل برا؟!
ام سيف بجمود: لما اوجه الكلام لك وقتها تردين!!
تنهد مهاب بعد موجة الضحك الي اجتاحته ...يحس تعب من الضحك ..زمان ما ضحك كذا ....
ابو مهاب نطق بهدوء: وش رايك يا مهاب ترجع للجناح واسع وتكون قريب من أهلك ...بدل ما
قاطعه مهاب: الشقه قريبه من الجامعه ....رح اكون مرتاح وغسق مرتاحه من ناحية المواصلات ...
مزنه : من قبل كيف تروح للجامعه
مهاب قاطعها: قبل يختلف عن الحين ...ام مهاب كمحاوله اخيره: وايليف وين تشحطط وقت دوامكم!!
مهاب بهدوء: الحضانه بنفس الشارع من ذي الناحية كل شيء تمام!!
ام مهاب هزت رأسها: الله يوفقكم!!!
بدأت الأحاديث الجانبيه ...ورؤى جلست جنب غسق واندمجت معها السوالف ....لحظات وانضموا البنات معهم ....
ام مهاب تسللت الراحه لقلبها وهي تشوف اندماج رؤى وغسق مع بناتها ...ما في مشاحنات ولا نغزات ..سبحان الي غير القلوب وصارت غسق جزء من عائلتهم ... ابتسمت وهي تشوف مهاب يتسارق النظرات لغسق ....تتمنى من ربها يوفقهم ويجعل ايامهم كلها سعادة ....
بعد وقت قصير نطق مهاب: غسق ما تبغين تجلسين عند اهلك!!
غسق وقفت : انتظرك هناك!! وبعدها خرجت بخطوات هادئة....
ابو مهاب بتساؤل: خلاص نويتم تأخذون ايليف اليوم؟؟
مهاب ابتسم': ان شاء الله!!
مزنه باستبعاد: ما ظنيت يا ولدي تقبل...تراكض من الملحق لهنا ومن هنا للملحق..وغياث كل شوي ياخذها للبقاله ... الله يكون بعونك ..افرطوا بدلالها!!
ام سيف مطت شفتها: باكر يصير عندهم احفاد غيرها وتبور!!
ابو مهاب برفض: مستحيل احد ياخذ مكانة ايليف!!
رفيف بعبوس: وربي يفضلونها علينا!!
ام مهاب ضحكت بخفه: ما هو ذابحكم غير الغيره الي تاكل قلوبكم ..ذي طفله تقارنون نفسكم فيها!!
وعد باعتراض: ايه للحين بداخلنا روح الطفوله قتلتوها بأسلوبكم
قاطعها ابو مهاب : يمه اعطيني العصا علشان المرة الجايه ما تكون كذابه ام الطفوله!!
فزت وعد على حيلها وهي تنطق بضحكه: وربي امزح!!
رؤى بابتسامة: لو مكانك يا عمي اعطيها كم طراق يسنعها حتى ما تحرجك بهذا الكلام قدام الناس....
ام سيف رفعت حاجب: لو الضرب يسنع كان تسنعت يا رؤى من كثر الطق الي حصلتيه من امك!!
رفيف بضحكه: بووووووووم!!
رؤى انجرحت من كلامها وخاصه قدام كيان ..هي تمزح مع وعد ليه تحشر نفسها بشيء ما يخصها ... نطقت بعبوس: انا اتكلم مع عمي لما اكلمك تردين
ام سيف ابتسمت وكانها ترد لها الحركه صدق إنها بزر: انا وعمك واحد ....
ام مهاب ما تبغى الأجواء تتكهرب ..ما تدري ليش ام سيف متسلطه على زوجات عيالها ...بالاول غسق والحين رؤى !!
نطقت بهدوء: متى راجع يا مهاب ...انا جهزت اغراض ايليف!
مهاب بهدوء: بعد ما تكمل غسق لزيارة اهلها رح نطلع!!
##
##
##

رفعت حاجب بعبوس : يبه تسمع وش تقول؟!
غياث ضحك : تمزح معك؟!
غسق بعبوس: والله ما تمزح دوم تضرب الكلام ضرب!!
جواهر ترتشف من القهوة ولا كأنها هببت بالكلام: ابغى مصلحتك ...ياجيل اليوم الي تنصحه يأخذك عدو!!
غسق بعبوس: النصيحه بالكلمة الطيبه ..بيني وبينك ما هو قدام العالم !!
ضحكت لارا : والله صادقه ...لما تبغين تنصحيها يمه ..بينك وبينها ؟!
غسق قاطعتها: ما ابغى نصيحتها لا بالسر ولا بالعلن!!!
فتحت جواهر عيونها باستنكار: سمعت يا غياث!!
غياث ابتسم وعيونه على ايليف الي طالعه على الشباك: اجلسي ايليف!!
حياة اقتربت من ايليف ونزلتها : متاكدين ما جبتوها من حديقة القرود!!
ابتسمت غسق: طول الحمل وانا ادعي تكون ولد ...واضح رح تأخذ طبع الاولاد!
اسيل بعبوس: ليش كذا ..البنات نعمه !!
مطت شفتها غسق وهي تناظر جواهر الي نطقت: لما اقولكم انها بحاجة لدروس  بالسناعه ما تسمعون كلامي!!
البنات نعمة نعمه من ربنا ...يونسونك لما تكبرين ويسعون الصدر بجلستهم  ... سبحان الله الا انت يا اسيل هالبنت ما تجيب الا المشاكل ووجع الراس!
غسق باستنكار: انا اعمل مشاكل؟!
جواهر خزتها: دوبنا رممنا الملحق !!
بضجر: الي يسمعك يقول انا الي تركت الاكل على النار ...ترى مهاب الي رمم الملحق على حسابه الخاص ..وقال لي الملحق والي فيه فداااااااك!!
ختمت كلامها بنبره فيها دلع!!
جواهر بانفعال: تخسيييين نكون فداك ....يا شين السرج على البقر!!
ضحكت غسق من انفعال جدتها : وليش
اسيل بعتب: غسق ذي جدتك
غسق هزت رأسها بتفهم: ان شاء الله يمه!!
تحركت أسيل تشوف الكيكه الي عملتها ...حياة جلست جنب امها وقبلتها : يا يمه تراها عسوله أعطيها فرصه تشوفينها سنعه
جواهر تنهدت : حنا نبغى مصلحتهم ..بس هي تغار مني لانه غياث
قاطعها غياث بملل: يمه لمتى حالكم هذا ؟!
ممكن نجلس جلسه بدون مناقره ونغزات؟!
لارا بابتسامه: والله احب اجلس واسمع مناقرتهم ...احب الآكشن!!
حياة هزت رأسها بالنفي: لزوم يكون التفاهم أكثر بينهم!!
جواهر مطت شفتها باستعلاء: والله ما ظنيت بيوم عقلي يوافق عقل بدر؟!!
غسق عبست ملامحها باستنكار: بدر؟! مين بدر؟!
جواهر بقرف: حتى جدك ما تعرفينه!! ..ناظر يا غياث وهي زامه شفتها نفس الشكل ..قطيعه!!
غياث عبس ملامحه من سيرة اهله: وش جاب الثرى للثريا!!
غسق مطت شفتها..وبلعانه نطقت : وش فيه جدي بدر؟! يا زينه اذا يشبه لي ...كل هالحقد عليه لأنه بغى يطق على أختك وحده ثانيه!!
جواهر كشت عليها: الحمد لله ظلت بنفسه وما تزوج قبل الملكه صار حادث وفطس!!
حياة فتحت عيونها باستنكار: يمه استغفري ..وش هالكلام ...هو الحين راح بخيره وشره ...وش تبغين فيه!!
جواهر بلامبالاة: كل يوم ادعي عليه هو ومنصور حسبي الله ولا كأنهم من البشر !!
غسق باعتراض على كلامها: بس تبغين ترمين الغلط على غيركم ...ترى الغلط ما هو من بدر الغلط كله من اهلك ...يشوفون ابنتهم تذبل وتحترق قدامهم ومكتفين يدهم علشان كلام الناس؟!
اهلك هم الي قتلوها وذلوها واهانوها ما هو بدر!!
بدر لو لقى احد يوقفه عند حده ما تمادى بالشكل الوحشي هذا ...
كم بنت احترقت روحها لأنه ما عندها سند يحميها
حياة نطقت وهي تشوف ملامح امها تغيرت: غسق خلاص قفلي الموضوع!!
غياث باختناق من الماضي ..وبنظره كلام غسق مضبوط ..خالته ميساء أهلها هم الي ذبحوها بصمتهم !!!
زم شفته لما نطقت جواهر باختناق: أول مرة تقولين شيء صحيح ...ااااااااه ليتني تعجلت بتهريبها كان الحين هي بيننا ....الي يطفي شوقي لها لما اشوف اسيل وكأنها صورة عنها .....
كان نفسي يكون عندي بنت ويكون اسمها ميساء بس أمي حلفت علي ما احد يسمي على اسمها ...ما تبغى صاحبة الاسم تاخذ اسمها وحياتها!!
غسق مطت شفتها بتعجب من تفكير بعض العقول: يعني اذا سميت بسم ميساء رح تكون حياتها بائسه على صاحبة الاسم؟! وش هذا التفكير ؟!
جواهر بنبره خافته حزينه نطقت: لما يكون القلب موجوع يخاف من نسمه الهواء ....هي تعرف إنه هذا الشيء ما له علاقه ....
سكتت وهي تزم شفتها ما في كلام تعبر فيه عن الي داخلها .....
لارا تغير الموضوع وهي تشوف الحزن اكتسى ملامح امها: خالتي لمى متى رح تزورنا؟!
حياة: صحيح نسيت اقولكم ...بعد المغرب ومعها خالتي اسراء... غسق اكيد رح تكونين موجوده!!
غياث ناظر غسق الي نطقت باعتذار: ما اتوقع ..شوي ورح نطلع انا ومهاب ونشتري هدية لأيليف!!
ايليف من لما سمعت كلامها ..تركت اللعبة الي بيدها واقتربت من غسق تسحبها :نروح مع بابا!!
غسق ابتسمت : مو الحين نأكل بالأول من الكيكه!!
ايليف برفض وعناد تسحب فيها : يلااااااااا
ضحكت غسق : سبحان الله على مصلحتها تعرفني ...من اول ما جيت متجاهله وجودي ولا اهتمت فيني ..والحين لمصلحتها ملتزقه فيني!!
حياة بابتسامة: روحي لمهاب وقولي له ماما تقولك جاهزه!!
ايليف عقدت حواجبها: ماما أسيل ؟!
حياة ضحكت من قلبها: ماما غسق!!
ايليف برطمت شفتها ما هو عاجبها: ودق. دبه!!
غسق ابتسمت على تعليقها: ذي الدبه رح تطلع عيونك بس اصبري علي!!
لارا سحبت ايليف  وأشرت على غسق: ذي ماما ...أسيل جدتك
ايليف برفض: ددتك انت!
غياث ضحك: مستحيل تقنعيها ..كم صار لنا نقول لها غسق ماما بس مو راضيه تقتنع!!
جواهر بهدوء: لو تهتمين فيها كان عرفت انك امها ..ترمينها هنا وهنا..كيف تعرفك؟!
غسق هزت رأسها تجاريها: صادقه يا جدة بس من اليوم وطالع رح تشوفون!!
أسيل دخلت ومعها الكيكه ..تحركت غسق تأخذ منها : يا قلبي ليش تعبت حالك يا روحي!!
اسيل بابتسامه: صحتين وعافيه!!
وضعت الكيكه وناظرت جوالها الي يرن ...فتحت خط ونطقت بهدوء: هلا مهاب؟!..بس اعطيني عشر دقائق... إن شاء الله..مع السلامه!!
اسيل : ليش ما قلت له ييجي يأكل!!
غسق برفض: وين ييجي ويضايق على البنات ..انا آخذ له قطعه!!
غياث بإصرار: اتصلي فيه يتفضل ونسلم عليه
غسق باعتراض: يعني اذا سلمت عليه يطول عمرك...
اسيل بإصرار: اتصلي فيه!!
غسق برفض: وش ذنب حياة ولارا يختنقون باللبس ...مرة ثانية ان شاء الله نزوركم!!
***
**
***
تتمشى بالحديقه وعيونها على ايليف تراكض امامهم وتلعب بالكرة ..نطق مهاب بابتسامة: أحيانا اشك انها بنت ...يعني توقعت تختار لعبة بنات ...ما هو كره وسيارة وخرابيط الأولاد!!
ابتسمت غسق وعيونها على ايليف: بسببك طلعت كذا!!
عقد حواجبه باستنكار: انا ؟!
وش دخلني؟!
غسق بابتسامة: نشفت ريقي وطول الحمل وانا ادعي انها تكون ولد !!
خزها بعيونه: الحق علي ما كنت ابغاك تتركينا!!
كنت ابغى اي تعجيز حتى ما ترجعين!
غسق ناظرته للحظات: احاول اصدق يعني ليش اخترتني انا والأوضاع بيننا كانت زفته ...وبنات العائلة اجمل!!
ابتسم : صحيح إنه بنات العائلة اجمل منك وخيار أفضل ...
قاطعته بانفعال: وتقولها قدامي!!
ضحك مهاب بخفه: حنا نتكلم بصراحه ..وبعدين ما تركتيني أكمل!!
غسق وقفت وهي تخزه: كمل!!
والا لحظة أبسألك وجاوب بكل صراحه ..وش كان انطباعك عني اول ما شفتني؟؟
مهاب تابع خطواته وهو يتكلم بهدوء: بصراحه ما كنت اشوف فيك شيء جميل باستثناء شعرك ...يمكن كانت مشاعر الكره والانتقام هي المسيطره !!
بس مع الايام بدأت مشاعر الشفقه وعقلي بدأ يستوعب إنك ما لك علاقه بالانتقام ...كنت ابغى ابعدك عن بطش اهلي وانتقامهم لقيت نفسي غارق وعقلي رافض فكرة ابتعادك .....كيف ومتى دخلت قلبي ما ادري بالضبط ..يمكن لأنك اول بنت بحياتي!!
غسق رفعت بشك: مستحيل
قاطعها مهاب: كنت دوم حريص احفظ بنات الناس حتى القى احد يخاف ويحفظ اخواتي ....وما هو سهل هذا الشيء ..وخاصه على مواقع التواصل
هزت رأسها : صحيح كثير ناس غرقت بهذا الوحل ..بدايته وسلام ونهايته حسره وندامه!!
مهاب ناظرها: ما قلت لي ..نفسي اعرف انطباعك عني اول ما شفتك!!
زمت شفتها بضيق: ما ابغى اتكلم بهذا الموضوع!!
رفع حاجب: ليش انا تكلمت
قاطعته: انا اتفهم الموضوع وما عندي مشكله ...بس انت ما اضمن ردات فعلك!!
قاطعها بإصرار: لك الامان وتكلمي بحريتك ...اتفقنا الماضي ما يؤثر على علاقتنا ...ومجرد ماضي ما رح يؤثر على شيء ...خذي راحتك بالكلام !
زمت شفتها.. والماضي يمر قدام عيونها مثل لمح البصر ما كأنها عاشت فيه سنين تجرعت العلقم فيها ...اختفى كل شيء وكأنها ما عاشت بذي الدنيا الا لحظات ...نطقت لما التقت عينها بعيونه الي تحثها تتكلم ...ما تدري من وين تبدأ وكيف ترتب الكلام ... نطقت بعد لحظات من الضجيج الي بداخلها : للحين اتذكر كلامك لما كنت توصف حياة غسق مطلق ...وقتها كان كلامك مثل الي يرش ملح على الجرح ...
حياتي كانت مغايره تماماً للحياة الي كنت توصفها ....كنت أعيش مع اهلي بسجن ..من لما وعيت على الدنيا وجدي عامل علينا حظر تجول ...تخيل الحديقه ممنوع اهلي يطلعون لها ...كان بداخلي كره عميق لجدي وانتظر لحظة موته حتى اعيش مع اهلي مثلي مثل باقي الأطفال ...لما سمعت يوم موته حسيت بمشاعر
غريبه واخيرا الوحش مات ...موته ما غير شيء بحياتنا ...امي وابوي دوم معتكفين بالملحق ويرفضون الخروج ....
شعور أبدا ما هو جميل تعيش مع ام واب من الاحتياجات الخاصه ..مجتمع مقرف يتنمرون عليك بشيء ما هو بيدك ...كنت اتمنى اطلع واتجول مع اهلي مثل باقي الأطفال..بس الوضع كان غير ...
عمي مطلق كان الشخص الي يحتويني مع عياله ..كان يدافع عني ويهتم فيني ويلبي كل احتياجاتنا ....كبرت وهو يردد على مسامع الكل غسق لعماد ...عماد كنت اعتبره اخ لي ...عشنا وتربينا مع بعض ... كانت علاقتنا اخويه ....بس عمي كان مصر يتمم علاقتنا بالزواج ..ما كنت اعرف سبب اصراره على هذا الزواج ...
جاء اليوم الي اعلن فيه عمي إنه خلال ايام رح يملك لنا ...حاولت بعمي يتريث على الاقل لبعد التخرج من الجامعه ..وكل واحد منا يقرر بدون ضغوط ...رفض عمي طلبي واصر على الملكه .. وكأنه كان خايف أطير ....لما اشتريت فستان الخطوبه تحمست للحفلة ..مثل تفكير اي بنت ...بس الخطوبه والارتباط كنت خايفه منه ومتردده ...بس كان عماد أفضل الخيارات حتى اكون عند أمي وأبوي وما ابعد عنهم وخاصه مع وضعهم الصحي!!
موت سيف قلب حياتنا فوق تحت!!
كنت رافضه فكرة إني اكون كبش الفداء ....بس مع ضغط عمي وافقت بالاحراج!
ما كان سهل علي ارد الشخص الي مد لنا يد العون ...ويصرف علينا ويهتم لامرنا ..وعدني يعالج امي وحتى ابوي مقابل موافقتي ...
ما كنت ابغى افقد امي الي صحتها تتدهور يوم بعد يوم ...ما كنت اتصور فكرة الاذى يصيب امي وأبوي وحتى عماد ....
كنت ما اتصور فراقهم ...وتانيب الضمير يذبحني اذا مات عماد وهو مظلوم وانا اقدر اساعده!!
ايام عصيبه مرت علي ..اتخذت قرار الموافقه وكان اغبى قرار اتخذته ...
زمت شفتها باختناق وتابعت كلامها: أحياناً افكر واقول كان افضل قرار اتخذته بحياتي لانه كشف لي الاقنعه واكتشفت الناس على حقيقتها ...
ما توقعت عمي مطلق كذا ...بس بنفس الوقت اعذر نفسي على الغباء الي فيها ...
طفلة عاشت معهم ما تعرف غيرهم ...من البيت للمدرسه ...ما اذكر اني زرت احد من اقاربنا او دخلت بيتهم ...حتى الأسواق نادرا ادخلها ...ما حضرت حفلات وخرابيط ....كانت حياتي منغلقه بالملحق واذا خرجت اروح لبيت عمي مطلق هو المتنفس الوحيد لي!!
مطت شفتها بملامح بائسه: طلبت مني انطباعي اول ما شفتك وانا سردت لك قصص
قاطعها بهدوء: تكلمي كل الي بخاطرك وانا اسمعك ما في شيء عندنا!!
هزت رأسها وتابعت كلامها: اول لقاء لي معك كنت أكرهك بشكل ما هو طبيعي ...كنت احس كل شيء بسببك لو رفضت الزواج كان ما صار الي صار ....
كنت احس نفسي اعيش بين وحوش قلوبها من صخر ...نسخ متعدده من جدي منصور...
الإنسان مهما كان حزنه ما يبرر له يكسر غيره بدافع الحزن ....
للحين مواقف اهلك بقلبي مدفونه ..ما قدرت أتخطاها .. لانهم تعمدوا يذلوني ويكسروني ....
مهاب رفع حاجب بتساؤل: ما سامحتِ؟!
نطقت بنبره مخنوقه: انا اتجاوز المواقف حتى تمشي الحياة بس ما انسى حرف كسر خاطري !!
مهاب : ادري ابوي ما قصر فيك ..بس هو عرف غلطه ويحاول يعوضك
هزت رأسها بتسليك: الايام كفيله تداوي الجروح!!
مهاب هز راسه: كملي!!
غسق تابعت كلامها:كنت اكره بيتكم كره ما هو طبيعي ...وانت من ضمنهم ...
مع الايام بدأت نظرتي تتغير لك ...كنت اشوف فيك السند .. تمنيت يكون عندي اخ مثلك ...
كان يقف بيني وبين المشاعر الي احملها تجاهك " عماد"
دوم شيء يذكرني حتى ما انجرف اني وعدت عماد انتظره!!..وبنفس الوقت اتضايق من نفسي لأنه هذا شيء ما يصير بما إني على ذمتك...
مطت شفتها بسخريه: كنت مغفله بجداره ....يمكن كنت انانيه كنت متمسكه بعماد لأنه بنظري حلقة الربط بيني وبين اهلي؛!...كنت خايفه عليه مثل أي بنت تخاف على اخوها يصيبه اي أذى!!
بس مع الايام كنت متشتته بين ايليف وابوها وبين امي وأبوي!!
كنت اتمنى لو جمعتنا الايام بظروف أفضل من كذا ....
نطق بترقب: بس اكثر من مرة رددت قدامي عن تعلقك بعماد وانك تبغين
قاطعته بمراره: كنت ابغى اقهرك وأثبت لك انك ما تعني لي شيء!!...
فتح عيونه باستنكار: تقهريني ؟! وليش كل هذا؟!
غسق مطت شفتها: لأني كنت اعرف انك ما تبغاني ..يعني نرد بعض الكرامه .... وعماد كان مجرد اخ وانتهى كل شيء!...وحتى لما كنت اطلب الطلاق ..كنت خايفه ينكشف امر التزوير وانزل من عينك ..كنت ابغى اطلع من حياتك وانت تذكرني بالخير!!!
ختمت كلامها والغصه تخنقها ما تدري سببها!!
مهاب ابتسم سرعان ما ضحك : بصراحه احتاج وقت حتى استوعب كلامك!!
سرعان ما قرصها بكتفها بقوة: يا شريره تبغي تقهريني!!
غسق فركت مكان القرصه بعبوس: اوجعتني!!
مهاب بغل: تستاهلين!!
انا انتظر الايام تزين حياتنا وتتقبليني بحياتك ...صعبه علي اعيش مع انسانه قلبها وعقلها مع غيري!!
وبالنهاية كان كله كذب وتأليف من عندك!!...وانت ترددين عماد عماد
غسق بعبوس: بعد الزواج كنت ابغى اجلس معك جلسة مصارحه بس انت رفضت!
مهاب خزها بقوة: لو اذبحك ما احد يلومني يا ام الكرامه!!!
عبس ملامحه لما ضربت الكره برأسه ...نطق بغيض: الأم والبنت مستفزات بقوة!!
ضحكت غسق من قلبها لما بدأت ايليف تنادي على مهاب حتى يجلب لها الكره!!
**
**
**
**
مرت سنوات على زواجها حاولت قدر المستطاع تتأقلم مع مهاب ....ما تنكر انه نفس الشيء حاول يتأقلم مثلها ويحلون اي مشكله بدون ما تكبر وتطلع برا البيت ...تعلمت غسق اهم مبدأ بالحياة الزوجية " الاحترام" حريصه دوم تحترم مهاب وتحترم اي شيء يخصه ...ما كان سهل عليها تترك حركات الجنان عليها ..مع الايام تعودت وصار اسهل عليها ...
واحلى شيء إنها تعيش منفصله عن اهله. ... لأنها متاكده لو عاشت مع اهله رح تصير مشاكل ومناقرات ما لها اول ولا اخر ..واكبر دليل رؤى ..مشاكلها مع اهل مهاب ما تخلص ...ما تلومها ينرفزون بتدخلهم بتربية اطفالها  ...نفس المشكله مع ايليف ...بصعوبه حتى قدرت تضبطها وتعترف فيهم انهم اهلها!!
وضعت القلم وهي تحس بالضجر من التحضير ...مهمه التدريس صعبه وتحتاج لطاقه ..ناظرت اوراق الامتحانات للحين ما صحصحتها !!
حكت شعرها بإحباط وملل ..وقررت تعمل لها أي شيء تركز وتفتح عيونها!!
توجهت للمطبخ وعبست ملامحها بعجز ...نسيت تنظفه بعد الغداء ...ما تدري متى تكبر ايليف وترمي عليها حمل التنظيف ...
لحظة لحظة ايليف اعطتها تحل الواجب ..ما لها حس ولا خبر ..معقول نامت؟!
تركت الي بيدها وتوجهت لغرفة ايليف...فاضيه ما في احد ...وين طست ذي البنت؟!
توجهت مباشره لغرفتهم ...اول ما دخلت نطقت بغضب وهي تشوفها جالسه جنب اخوها وتمسك بخدوده وتشدهم: ايليف!!
تجمدت لما شافت امها ...غسق بقهر نطقت وهي تشوفه بدأ يتململ من الازعاج: كم مرة قلت لك تراه مو لعبه تلعبين بها ... اطلعي برا الغرفه قبل ما اكسر رأسك!!
مدت لسانها بغيض: من زين ولدك الغبي!!
اشرت لها غسق بقلة صبر: برا برا
تنهدت براحه انه ما صحي ...قفلت الباب خلفها بشويش ...اقتربت من ايليف الي فتحت التي في ...غسق نطقت بحاجب مرفوع: وين الواجب؟!
ايليف وعيونها على الشاشة: ماما ملل ما ابغى اكتب
غسق بتوعد: براحتك ..لما يرجع ابوك انا ما لي علاقه!!
رمت الريموت بضجر وتوجهت لغرفتها وهي تبرر... التقطت غسق جوالها الي يرن وهي تنطق: والله جيل اخر زمن!!
فتحت خط بهدوء: هلا رؤى!!
رؤى بضجر: وينك؟!
غسق وهي تحط السماعه بإذنها وتوجهت للمطبخ تكمل شغلها لانها متأكدة من ساعه ما بتفكها رؤى: وين رح اكون باسطنبول  والا
رؤى بإحباط قاطعتها: يا اختي على الاقل مصفيه رأسك!!
ضحكت غسق: عندك سالفه كالعاده ...مين ضايقك؟!
رؤى بقهر: هو في احد غيرها ... يا اختي انا ادوب ابتلش بحماة حتى تطلع لي حماة ثانيه ..والمشكله عايشه الدور إنها حماة علي؟!
غسق هزت رأسها: وش صار بينكم؟!
رؤى نطقت بغل وقهر: إلا قولي وش الي ما صار ... كالعادة بس اليوم كان مختلف وصلت السالفه لعمي ابو مهاب !!
غسق ابتسمت: وش قال؟!
رؤى نطقت بقهر: هذا الي قهرني ...والله ما همتني ام سيف بكبرها ..الي قهرني كلام عمي يقول" ما تبغين تكونين عاقله مثل سلفتك؟"
اخخخخخخخ قهرني!!!
ضحكت غسق من قلبها: صيري مثلي!!
رؤى نطقت بقهر: قلت له لو تسكن هنا بنفس البيت كان شفنا الثقل على أصوله!!
غسق بعبوس: قل اعوذ برب الفلق!!
رؤى بضجر: انكتمي ..انت تعرفين معزتك بقلبي ..وانت الوحيده الي اتصل وافضفض لها ...يا حظك بعيده وتركت عمتي جواهر وام سيف بحلقي ..جالسين لي على الدقه ...احس نفسي محاصرة ..شغل انتقادات وعادات هذا يصلح وهذا ما يصلح!!
يكتمون الواحد..انا ابغى اعيش براحتي!!
غسق بتساؤل: كيان وش قال؟!
رؤى بقهر: هذا الي رح يبط كبدي ...افضل شيء الواحد يتزوج بعيد عن اقاربه علشان أي مشكله يطلع الواحد كل الي بقلبه ويمسح فيهم الارض ..بس لما يكونوا اهلك ينمسح فيك الارض ...وجدتي ما شاء الله عليه نقلت السالفه للوالد العزيز وما قصر فيني ....رح انفجر اذا ما طلعت قهري اليوم؟!
غسق بتعاطف معها لأنها تعرف ثقل طينة جدتها وام سيف: وش رايك تيجي عندي تشربين قهوة وتروقين!!
رؤى مطت شفتها بسخرية: ومين يوصلني عندك ؟!
كيان ما هو موجود!!
وعمي زعلان مني ؟!
غسق رفعت حاجب: وليش زعلان منك ..المشكله مع ام سيف؟؛
رؤى بلامبالاة: لأني قلت عن ام سيف مريضه نفسي وتطلع عقدها فيني ...ولزوم تتعالج
غسق فتحت عيونها: قلت لها كذا بوجهها؟!
رؤى ضحكت بعباطه: قدام الكل قلت كذا!!
لو شفت كيف صار وجهها بالالوان ...يا بنت ما هي طبيعيه تأخذ ولدي مني وتبغاه طول الوقت معها ...اخخخخخ من كيان الي سماه سيف ..لو اختار اسم خنجر والا شبريه كان الحين مرتاحين ....تدرين لزوم نسميه عماد يمكن تفك عقدها عن هالولد
غسق بهتت ملامحها  من ذكر اسم عماد ...للحين عقلها ما استوعب انه مات ...نطقت بضيق : لا تلومينها ... الشبه بين ولدك وبين سيف ولدها كبير ..يعني تشوف ولدها فيها !!
رؤى هزت رأسها: ما اختلفنا ..بس هذا الشيء ما يسمح لها تتعدى علي!!
تحاسبني وكأني اشتغل عندها ....ليش ما عملت لسيف كذا وليش وليش...خلاص قرفت ... ولدي وأنا حر فيه ما ابغى أبدل له الحين؟!
وربي ام مهاب ما تعمل مثلها!!
غسق بنصيحه: شوفي لك وظيفه تشغلين وقتك فيها
رؤى بملل: ليش انا لقيت وظيفه وقلت لا ...يقولون الدراسه سلاح المراه ...تدرسين وتتعبين وما تلاقين احد يوظفك ..الكل يبغى خبره سنوات ....ما ادري من وين احصل خبره!!
استغفر الله احس كل شيء ضدي ...وين ايام العزوبيه يا جمالها ...كنت بنعيم وانا ما احس ....نفسي أشبع نوم ...طول الليل كل شوي واحد يصحى ولولو طول الليل تبكي ...والصبح كل شوي يرسلون مبعوث لي اصحي اصحي !!
اففففففف خلاص انفجرت ...اليوم قلت لكيان اذا ما انفصلت عنهم ما رح اجلس دقيقه وحده
ضحكت غسق: الي يسمعك يقول ابوك يستقبلك بالاحضان
رؤى بإحباط: هنا المشكله وكيان يعرف إنه ابوي ما رح يستقبلني !!
تدرين اتضايق بس بعدين اقول لعين كيان اتغاضى وابلع المر واسكت!
غسق بابتسامة عريضة: ما شاء الله عليك ..كذا تتغاضين وبالعه المر وساكته؟!
رؤى ضحكت بخفه وهي متجاهلة ولدها الي يبكي يبغى منها شيء: يعني وسط وسط !!
ابعدت السماعه غسق عن اذنها لما صرخت رؤى: إن شاء الله تدفنها أمك ..قلت لك لاااااااااااا... اففففففف رفع ضغطي!!
غسق بانزعاج من صوت البكاء: وش فيه يبكي؟!
رؤى بضجر: تخيلي من الصبح يبغى مثلجات؟!
حلقه يتحسس من ذي الاشياء!
اكل راسي وما عنده الا" توته توته"
احيانا افكر استأجر مترجم لهم...
غسق ابتسمت: تستاهلين لزوم تعملين تباعد حمل ...حشى وكانك قطوة ..صار لك متزوجة قريب ٤ سنوات ومعك ٣؟!
ارحمي جسدك!!
رؤى بتردد نطقت: والرابع على الطريق؟!
غسق نطقت باستنكار: لا تقولينها؟!!
مجنونه ترى البنت عمرها ٤ أشهر!!
ترى جسمك له حق عليك!!
رؤى بضجر: اسمعي تر كذا افضل انجب ٥ اطفال وبعدها اوقف كم سنه ويكبرون واتفرغ لنفسي ...بدل ما اقضي عمري بالحمل والولادة ..كذا اخلص من السالفه 
غسق بعبوس: ليش احسك آلة تفقيس!!
رؤى بانفعال: آلة بعينك يا زفتة!!
افضل منك ..من لما جيت على الدنيا وانت متزوجه مهاب وما عندك الا بنت وولد!!
غسق عقدت حواجبها: تبغين اكون بالجامعه مثلك وبطني مترين قدامي؟!
لا يا حلوة أنا ابغى اعيش حياتي وما هو كل وقتي واع ويع!!
شوفي ولدك الثاني يبكي!!
رؤى بضجر: انا الحين رح انزلهم لام سيف تشبع فيهم وارجعلك
غسق نطقت وهي تسمع صوت الباب: لا ترجعين مهاب رجع الحين!!
رؤى مطت شفتها بقرف: يا حبك للتقديس ..هذا أنا كثير اتصل معك وكيان يكون  عندي ...وش فيها لو كلمتك وحضرة الدكتور موجود!!
غسق ابتسمت وهي تشوف مهاب واقف عند باب المطبخ ويرد السلام بهدوء: وعليكم السلام ...اكلمك بعدين رؤى مع السلامه!!!
مهاب ابتسم: وش عندها المجنونه!!
غسق ضحكت بخفه: والله طافيه ذي البنت!!
كالعادة متشابكه مع ام سيف!!
مهاب زم شفته بملل: ما تملين وكل يوم تسمعين نفس الاسطوانه!!
غسق بابتسامة: خليها تفضفض احسن ما تنفجر!!
نطقت تغير موضوع رؤى: قلت رح تتأخر؟!
مهاب اشر لها يجلس بالصالة: قدرت اخلص نفسي وارجع الحين!!
مااحب اجلس برا البيت!!!
ناظر اوراقها على الطاوله: للحين ما انجزت شغلك!!
غسق جلست على الارض ترتب فيهم : اذا رح تساعدني اكيد رح انجز!!
ختمت كلامها بفيس بريء!!
ضحك بخفه على ملامحها:ترى اعطيتك وجه .. اعتمدي على نفسك
غسق عبست ملامحها: الله لا يحوجنا للبشر
قاطعها باستغراب: وين ايليف ما اشوفها!
ابتسمت : تحل الواجب!!
مهاب ينادي بصوت مرتفع:, ايليف يا ايليف!!
فتحت الباب ايليف وناظرتهم بعبوس: نعم!!
مهاب رفع حاجب: نعم؟!
كذا تستقبلين ابوك!
ايليف تقدمت: الصبح شفتك!!
فتح عيونه: يعني لزوم ابعد اسبوع علشان تسلمين علي وتستقبليني؟!
ايليف اقتربت وقبلت رأسه وجلست جنبه  بعبوس
مهاب ابتسم وهو يحضنها: وش فيك زعلانه!
ايليف بعبوس: ماما كل شوي واجب واجب واجب ملل!!
غسق رفعت حاجب والاوراق بيدها: الي يشوف هالملامح البريئة يقول مظلومه!!
مهاب بروقان: لزوم تدرسين حتى تصيرين دكتورة حلوة!!
ايليف بطفوله: حلوة مثلك يا بابا !!
غسق رفعت حاجب : حلوة مثلك!!
البنت تطلع حلوة مثل امها!!
ايليف : بس بابا احلى منك!
فتحت عيونها باستنكار: صدق ما فيك خير!!
ناظرت مهاب بغيض وهو يضحك: تراها تكذب ...المعلمات معي بالمدرسه يقولون لي ايليف نسخه مني!!
مهاب بابتسامة: انت ليش محتره هالكثر!!
غسق مطت شفتها وهي تناظر الاوراق: وليش احتر ...كل هذا قهرها لأني قلت لها تكتب الواجب!!!
كملتِ كتابه الواجب!!
ايليف بضجر: ما اعرف !!
مهاب : تحتاج متابعه
غسق وهي منشغله بالاوراق: تابعها انت انا يا دوب اكمل تحضير والحين يصحى ادم!!
ما ختمت كلامها الا صوت بكاء ادم يوصل لها ..نطقت بضجر: لو طريت مليون!!
ابتسم لما تحركت للغرفه...ناظر ايليف : يلا بابا جيبي الواجب نحل مع بعض!!
ايليف : ماما تقول ممنوع احد يساعدك اعتمدي على نفسك!!
مهاب اشرلها: ما عليك جيبي الواجب وتعالي هنا اكتبي!!
احضرت ايليف الواجب وجلست عند ابوها وهي تنطق :صعب!!
ابتسم وهو يشوف الواجب تلوين ونسخ كم كلمه: باكر لما تكبرين رح تقولين يا زين التلوين!!
بدأ يساعدها بعد وقت رجعت غسق وهي تحمل ادم بحضنها ..نطقت بعدم رضا: اتركها تعتمد على نفسه!!
مهاب وهو يتثاوب: تدرين احس بالنعاس بس اليوم قلت لأمي نازل عليهم!
غسق جلست على الارض والصغير بحضنها : ما قلت لي اتجهز؛!!
مهاب كلها نص ساعه وراجع عندي شغل للجامعه ولزوم انجزه!!
وبعدين عندك شغل كملي الأوراق الي قدامك!!
غسق زمت شفتها: يعني نص ساعه رح اكمل تصحيح؟!
ايليف برجاء: يا بابا ننزل معك
مهاب بابتسامة: اكيد رح آخذك ابوي اتصل مخصوص يبغى يشوفك !
غسق باعتراض: والله ؟
وانا اجلس بالبيت لوحدي!!
مهاب ابتسم : لا تخافين حجزت لك المقعد الاول ...يلا تجهزي!!
نهضت نفسها سرعان ما عبست ملامحها لما رن جرس البيت ...استغربت مين يزورهم بهذا الوقت ....
ناظرت مهاب الي توجه للباب وهو ينطق : مين!!
غسق عبست ملامحها لما وصلها صوت جارتهم ..الحين تذكرت خبرتها رح تمر عليها اليوم ونسيت امرها ....
تقدمت من الباب لما اشر لها مهاب تشوفها !!
زمت شفتها بضيق واقتربت لما دخل مهاب لغرفتهم ...نفسها تضربه على راسه لما حرك حواجبه يغيضها ...لولا انها متفقه مع الحرمه كان قالت هو الي دازها حتى ما تنزل معه!!
**
**
**
مجتمعه بحديقه بيت عمها والإبتسامة تزين ثغرها وهي تناظر حياة بشهرها الاخير وتنافخ ..مو قادرة لا تجلس ولا تمشي !!
حياة اشرت عليها : انت بالذات انكتمي!
قبل كم شهر كنت مثلي!!
غسق احتضنت ادم برفق: حبيب امه ما تعبني !!
رؤى دفتها على كتفها بخفه: اشوف فيك يوم يا غسق ..ويكون حولك عشرين بزر ماما ماما!!
لارا بابتسامه: ليش احسك حاقده عليها وبقوة!!
رؤى براحه بنات ابو مهاب ما احد موجود الكل تزوج: والله ماني حاقده الا على الي معكم خبرها!!
ناظرت لارا جهة الحريم: انكتمي لا يسمعك احد!!
حياة نطقت برجاء وهي تشوف ابنتها متوجه لها وتبكي: يا لارا شفيها والله مو قادرة اتحرك!!
لارا عبست ملامحها: اسوأ شيء لما تكونين الخالة!
ندمت إني اجلت الزواج!!
رؤى بابتسامة: تاخذين اجر ..بالله بطريقك شوفي سف
سيف!!
لارا كشت عليها: باحلامك!!
رؤى عدلت جلستها بحماس: بنات ما قلت لكم!!
غسق ابتسمت على حماسها: وش صاير؟؟
رؤى تناظر من حولها  حتى تضمن ما في احد: خالتي ام سيف رح تروح زياره لاهلها شهر واخيرا ارتاح!!
حياة مطت شفتها: على الاقل ام سيف تحبك وتبغى مصلحتك ..ما هو مثل حظي بالحماة ...بس جالسه تحفر علي!!
اقول لامي من كثر ما حفرت وانتقدت غسق طلعت حوبتها فيني!!
امسكي بأم سيف ترى تبغى مصلحتك ما هو مثل الي عندي واضح الكره لي!
غسق تنهدت براحه ..مرتاحه من ذي الناحيه .. متأكدة لو عايشه مع اهل مهاب كان وضعها مثلها ...حمدت ربها على نعمة الراحه الي حصلت عليها بعد عناء ....
ناظرت مهاب الي جالس مع ابوها وعمها ابو مهاب وكيان والإبتسامة مرسومه على ملامحها وهو يستمع لابوها...قبلت ابنها الي بدأ يتململ بحضنها !!
ورجعت تبتسم وهي تستمع لسوالف رؤى الطافيه!!!

**
**
**
**
**
**
النهاية
وهيك وصلنا لآخر محطة في هذه الرواية ...بطلة الرواية شخصية خياليه تتسم بالواقعية...تصرفت تصرفات طبيعية وتصرفات مستفزه لأنها تنتمي لعالم البشر والغلط اكثر من الصواب وما تنتمي لعالم الملائكة....
واجهت مشاكل في بداية حياتها لكن بالنهاية تغلبت على مشاكلها وانفتحت لها الدنيا من جديد ..وعاشت مع الشخص الي تمنته من قلبها ....
بالنهاية أنا بشر والخطأ وارد بالرواية...فإذا غفلت عن بعض النقاط الي كان عندكم شغف تعرفوها او تشوفوها فسامحوني ...فعدم ذكري لها إما نسيان أو لأني اكتفيت بالمقاطع الي نزلتها ...
بالنسبة لبعض التعليقات السابقه ..انها الرواية طول الوقت حزينه وبآخر بارت سعادة ....هذا نمطي بالكتابة لما تنحل المشكلة وترجع الأمور لمجاريها تتوقف الرواية بعد ما اكون طمنتكم إنها البطله تزينت حياتها 😜
لفت نظري للصدفة  إني بدات الرواية ٢٥/٦/٢٠٢٣ والآن تم ختامها ٢٥/٦/٢٠٢٤...مرت سنة وانا اكتب هسا دوركم تكتبوا ردودكم وتعليقكم على الرواية ....اتقبل النقد بأسلوب راقي .....
بالنهاية عشت معكم خلال هالسنة وسعدت بتعليقاتكم ومروركم الجميل ..والكثير منكم ترك اثر جميل بقلبي من رقة اسلوبهم ....تمنيت إني ارد عليكم جميعاً بس يستنزف مني وقت كثير ... فسامحوني اذا قصرت معكم او رديت على بعضكم رد ازعجكم .....
لا تنسوني من الدعاء وانتظروني بالرواية القادمة بإذن الله ...دمتم بخير 🌹