رواية المنتصف المميت الفصل الخامس والأربعون 45 - بقلم ضاقت أنفاسي

مساء الخير للجميع.....كل عام وانتم بخير ..تقبل الله طاعتكم ....
مع ازمة العيد هذا الي قدرت اكتبه ...قراءة ممتعة 🌹

للحظة انهارت اعصابها لما حست انها رح تفقدها للابد ..بس مهاب التقطها لاخر لحظه ..تنفست الصعداء وهي تحس كل قوتها خارت ..ما فيها حيل تمشي!!
تناظر مهاب لما نزلها للارض وبدون تردد استقرت كفه على وجه ايليف وهو ينطق بغضب: ورب اذا شفتك طالعه هنا مرة ثانية الا ادفنك !!
تنهدت وصوت بكاء ايليف يتردد على اسماعها ... تحركت ايليف لها وحضنت رجولها وهي دافنه رأسها وتبكي ...نزلت غسق على مستواها وحضنتها بقوة ...مو مصدقه انها ايليف بحضنها ...لسانها عجز ينطق حرف واحد .....
مسحت على شعر ايليف الي تبكي بقوة .....رفعت نظرها لمهاب الي تحرك بوجه متجهم .....تجاوزها وتوجه للاسفل والصمت يخيم عليه!!
زفرت بضيق بعد نزوله...ما فيها حيل تقوم وتنزل ...استنزفت كل طاقتها!!!
ما تذكر طفولتها كانت شقيه ..ما تدري لمين هالبنت كذا طالعه ...دوبها كم سنه ورح تطلع الشيب براسها ..لما تكبر وش رح تعمل فيها!!
ابعدت ايليف عن حضنها بشويش ..ومسحت لها دموعها ..قبل ما تتكلم نقزت لما حست بيد على كتفها ...سرعان ما ارتاحت لما تكلم بنبره مريحه لقلبها وكأنه مهاب القديم الي يتكلم: لا تجهدي اعصابك مر الموقف بسلام ...
نزل لمستوى ايليف وحملها ...بالبرغم انه دوبه ضربها ما رفضته... دفنت راسها مباشره بكتفه بسكون ...رفعت غسق نظرها لما نطق: اعطيني يدك ..اسندك!!
هزت غسق رأسها بالرفض..وبخفوت نطقت: اقدر اقوم!!
ما اعطاها فرصه وسحبها من يدها  بشويش وهو يتوجه للأسفل ...
تسترق النظر له وهو يمسك يدها بإحكام ...ظنت إنه غادر ونزل ما تدري إنه كان خلفها ...
ما عادت تعرف حالهم مره قريب ومره بعيد ....ما تبغى تفقد اسرتها بلحظة طيش وعناد منها ..تبغى تكون اكثر وعي وتأني ...وتفكر ألف مرة قبل ما تتصرف اي تصرف. ...
ذي المرة ما رح تخسر هالفرصه ..ما تنكر انها تتضايق من بعض تصرفاته وتفكيره ..بس بنفس الوقت قلبها ما احب غيره ولا يفرح بشوفه احد غيره ...بالنهايه هي مو متزوجه ملاك ...اي زوج فيه حسنات وسيئات ..اذا قارنت حسناته بسيئاته ...حسانته هي الي ترجح على سيائته ...قابله فيه ورح تغض النظر عن الاشياء الي ما تعجبها وتحاول تغيرها بطريقتها ...العناد والشتم وتقليل الاحترام ما حل مشكلتها بالعكس كل مرة يزيد الفجوة بينهم ....
غمضت عيونها للحظات وهي تتمنى من ربنا يوفقها وتقدر تتعامل مع المواقف برزانه وبدون طيش ....
***
**
ام مهاب واقفه تناظر مهاب يحمل ايليف وبيده يمسك بيد غسق ..طار قلبها وشيء يدغدغ بداخلها ...وش اجمل من شعور تشوف ولدك مستقر ويكون له بيت وحياة واستقرار ....ناظرت زوجها الي نطق اول ما اقتربوا  يكلم ايليف: تعالي يا قرة عيني!!
ايليف اول ما اخذها جدها بحضنها بدأت تبكي وتشكي عن مهاب وتؤشر على خدها!!
أبو مهاب رفع حاجب وهو يشوف خدها فيه احمرار بسيط ..نطق بحاجب مرفوع: مهاب ضربتها؟!
مهاب ناظر غسق الي ضحكت بخفه ...ما قدر يمنع ابتسامته...نطق بهدوء: صفعه خفيفه حتى تتعلم ما تكررها!!
ام مهاب باستنكار: وانا أقول ليش البنت تبكي فوق ..توقعت انها خايفه ...طلعت ضاربها ...بدل ما تأخذها بحضنك تضربها!!
جواهر براحه بعد ما مر الموقف بسلام .... نطقت وهي محتضنه اسيل : ضربها من حبه وخوفه عليها.... احياناَ القسوة تكون نابعه من المحبه.....تستاهل ما حصلت!!
مهاب هز رأسه بتأكيد: الحمد لله في احد يفهمني هنا!!
التفتت غسق على صوت مزنه وهي تقترب منهم بتعب وحياة تسندها وهي تردد بنبره باكيه: صدق اسيل تكلمت!!
غسق حست وكأنها سمعت غلط ....ناظرت امها مستكينه بحضن جواهر ...
تركت يد مهاب وكل خليه بجسمها ترتجف من هذا الخبر الي صعقها .. أمها تكلمت؟! كيف ومتى؟ وليش ما احد خبرها !!
تحركت باتجاه امها جلست على الارض قدامها ونطقت باختناق وعدم تصديق: يمه صحيح
جواهر بهدوء : اتركيها غسق ولا تضغطين عليها الحين ....
غياث هز رأسه بتاكيد: اتركيها غسق على راحتها!!
بصعوبه حتى هدأت اعصابها 
غسق والدموع تلمع بعيونها والغصه تخنقها: كيف ...وش صار حتى
سكتت مو عارفه تجمع سؤال واحد ....رفعت نظرها لمهاب وهو واقف فوق راسها ويسند بيده مزنه: اجلسي هنا ياجدة!!
فسحت المجال غسق وهي تناظر نحيب مزنه وهي تمسك بيدين أسيل
جواهر بحرقه: يمه اتركيها ترتاح الحين
مزنه نطقت بانفعال: ما ابغى اتركها ...اه يا جمرة في قلبي هنا عيت تنطفي ...بس ابغى اعرف شيء واحد ميساء كيف ماتت؟!
ريحي قلبي كل يوم انام وقلبي محروق عليها ...لا تقولين انتحرت ...ادري بك تعرفين كيف ماتت ...ريحي قلبي وخوفي عليها تكون ماتت عاصيه!!
جواهر ذكرى ميساء تحرق قلبها ..نطقت بنحيب: يمه خلااااص!!
تناظر انهيارهم وخوفهم من سماع قصة الماضي الي ما احد يعرفها غير امها ...
تحس بثقل فوق صدرها مو قادرة تتنفس ... شدت على شفتها بقوة تمنع نزول الدموع ....انهارت حصونها وهي تشوف امها دخلت بنوبه بكاء ...الي يشوفهم يقول الحين دفنوا ميساء!!
ابو مهاب بضيق من المناحه الي عملوها : ليش كل هالبكاء؟!
اسيل دوبها ما استوعبت الوضع كذا تعملون ....ابعدوا عنها خليها ترتاح ...
**
**
**
لزوم تكون فرحانه بذي المناسبه بعد ما انفكت عقده الكلام عند امها ..الا انها حزينه بقوة ..ما هي قادرة تسيطر على دموعها ...وهي تسمع من أمها قصتها المؤلمه ...
وكأنه الرحمه انتزعت من قلب اهل ابوها ...اي حياة بائسه عاشتها وتجرعت مرارتها ...صدقوا لما قالوا الي يشوف مصيبة غيره تهون عليه مصيبته...
تتذمر من الحياة الي عاشتها .. بالمقابل حياتها لما تقارنها بميساء تحس بسخافه حزنها ووجعها ...
تحمد ربها وتشكره انه رزقها زوج مثل مهاب ..تعتبره جنه مقارنه بجدها بدر ...بدون ما تشوفه كرهت هالانسان وبداخلها حقد كبير عليه ...كيف هان عليه يدفن زهره بعز شبابها ....
بس الي يريح القلب إنها ما انتحرت ..ماتت مظلومه والظالم ينال الجزاء عند ربه ...
كتمت وجعها وهي تناظر امها تبكي بصمت .. متأكدة أحداث الماضي عباره عن شريط قدام عيونها ....شعور صعب لما تشوف امك تسقط من اعلى الشرفه وتخر جثه هامده بدون حراك ...
ما تدري كيف تحملت امها كل ذي المشاهد ...قلبها يتقطع لما تكلمت كيف رجولها تجمدت وما قدرت تقترب من امها ...كانت جالسه برا تراقب الباب حتى تضمن امها ما تهرب وتتركها ...حتى انصدمت وهي تشوفها تفقد توازنها وتسقط عن الشرفه .....
الي شافته امها ما هو قليل بعد ما انفزعت بموت امها ..ايام قليله وتشوف أبوها واخوانها جثث هامدة بدون حراك ...شعور ما تقدر توصفه لما تلقى نفسك وحيد بدون ام ولا اب ولا اخوانك الي كانوا سند وونس لك بالحياة ...تلقى نفسك عند الوحش منصور ....
اه من منصور ما تلقى كلمه توصف وحشيته ....ما ترك لهم ذكرى جميله يدعون له بالخير ....
ترك خلفه قلوب حاقده عليه وما تسامحه ليوم الدين بعد ما انهك روحهم ...
ما تبغى تكون مثل منصور وبدر الكل يدعي عليهم بعد ما ظلموا الناس ...تبغى تكون مثل النسمه الكل يدعي ويتذكرها بالخير ....
من ذي اللحظة نوت التغيير وتكون افضل ..وتترك اثر جميل بحياتها يتذكروه الناس ...تبغى يكون شعارها " اجعل من يراك يدعو لمن رباك"
الكلمه الحلوة طالعه والكلمه السيئة طالعه ليش ما نختار الكلمه الطيبه الي تطيب القلوب وتدواي الجروح ....همست بالحمد وهي تحس بعظم نعمة ربنا عليها ..بعد ما جمعها مع اهلها ..ورزقها بزوج وطفلة ودراسه ... ما ينقصها شيء ...ومع ذلك تتذمر وما تستشعر النعمه الي تعيش فيها ...
ما في حياة كاملة ... النقص موجود بكل مكان ....والرضا هو اساس الراحه للقلب والنفس!!
قطعت افكارها وناظرت حياة الي همست لها : يكفي دموع!!
مسحت دموعها بخفه ..وباختناق نطقت: مو بيدي !!
حياة مسكت يدها : تعالي!!
تحركت معها لغرفتهم ..اول ما جلست على السرير انهارت وهي تبكي وتشاهق !!
حياة جلست جنبها ومسحت على شعرها بحنيه: امك بخير ليش كل هالبكاء ؟!
نطقت بنحيب: تعذبوا بحياتهم بدون ذنب ...
حياة هزت رأسها: ادري انهم عانوا بحياتهم ..بس بالنهاية ربنا عوضهم وجمعهم مع ناس تخاف عليهم من النسمه!!
لزوم الحين تفرحين ونحتفل بذي المناسبه!!
غسق تنفست بصعوبه وهي تمسح وجهها: ابغى أصل ركعتين شكر لله على ذي النعمه!!
حياة ابتسمت لها: افضل شيء تعملينه!!
**
**
**

اليوم الثاني غياث بضجر نطق: وبعدين معك غسق ؟!
خلاص تعبت امك
غسق برطمت: كم سنه انحرمت أسمع اسمي على لسانها!!
جواهر خزتها: امك ما هي متعوده على الكلام تتعب الحين ...باكر تنادي عليك الف مرة وتتجاهلينها!
غسق ابتسمت ابتسامه عريضه: مستحيل اتجاهل امي!
يلا يمه قولي اسمي!
اسيل ابتسمت لها ونطقت اسمها وفرحتها ما توصف بعد ما تحرروا من كل احزان الماضي وما بقى حبيس بصدرها ....
التفتت غسق على طرق الباب ودخول مهاب ...فزت على حيلها بحرج لما نطق: ذي للحين قدام خالتي أسيل!
جواهر هزت رأسها: جننتها مثل البزران جالسه قدامها !!
مهاب ابتسم وبعدها ناظر اسيل: كيفك خالتي اليوم ؟!
اسيل بابتسامة: الحمد لله!!
مهاب جلس جنب غياث وهو يناظر جواهر الي نطقت : لزوم دورنا واسطه وارجعناها للفصل نريح اسيل من ثرثرتها!!
غسق بابتسامة نطقت: قاعده على قلبك هنا!!
جواهر مطت شفتها: وين قاعده ما بقى وقت على زواجك ..ويا ويلك اذا شفتك كل شوي هنا ...التزمي في بيتك وكوني سنعه ما نبغى مهاب يشتكي ويقول متزوج رفله!!
اخذت نفس عميق غسق تتحكم باعصابها من يوم ما نوت تتغير  وجواهر جالسه لها على الحرف ..سبحان الله لما الشخص ينوي التغيير يلقى قدامه المستفزات بشكل مكبر وكأنه اختبار لصدق التغيير ...عزمت غسق على التغيير وما رح تتراجع ..رسمت على ملامحها ابتسامه جميله وهي تنطق: إن شاء الله يا جدتي !!
مط شفته مهاب بتعجب ما توقع منها هذا الرد ...ضحك غياث بخفه وهو يناظر امه الي انصعقت من  الجواب ... وكأنها كانت تنتظر رد ثاني حتى تثبت لهم إنه لسانها طويل!!
جواهر مطت شفتها: قهوي مهاب ..نبغى تطبيق ما هو بس كلام!!
تقدمت من مهاب تقهويه ...مهاب برفض: لا ما ابغى دوبني شربت ..
جيت اسلم على خالتي أسيل واتفقدها ..وبعدها اخذ زوجتي ونطلع علشان تشوف الاثاث ما بقى شيء على الزواج!!
غسق رفعت حاجب وعقلها ما استوعب انها المقصوده وهي تسأل نفسها " زوجته"
ارتخت ملامحها لما نطق ابوها: روحي غسق تجهزي
قاطعته جواهر: اذا تبغى نصيحتي وش تبغى بوجع الرأس الحريم ما يعجبهم شيء ..ورح تتعبك!!
غسق للحظه كانت رح  ترد بانفعال .. سرعان ما مسكت اعصابها ونطقت بهدوء: البيت الي كنا نسكن فيه اعتقد حياة ولارا اختاروا اثاثه
جواهر توهقت نطقت تغير الموضوع: ترى هم  عماتك احترميهم.....المفروض تقولين عمتي حياة وعمتي لارا!!
ضحك مهاب بخفه: ترى حاصرتك يا عمتي ؟!
جواهر مطت شفتها: خايف على ام لسان ما ترد !!
غسق ابتسمت ونطقت بهدوء: تقدر تأخذ خالتي ام مهاب .. أنا وعدت ايليف بعد ساعه نلعب بالحديقه
جواهر قاطعتها: متى تكبرين تراكضين مع البزران ..زوجك يقولك تعالي يعني تعالي ضروري تعاندين!
فتحت عيونها غسق باستنكار هي الي اعترضت على طلوعها ...ناظرت مهاب لما نطق : ايليف معنا وبعد ما نكمل نروح للحديقه وتلعب هناك!!
اسيل بهدوء: اتركوا ايليف هنا
مهاب برفض: ايليف معنا ..تعودوا على غيابها عنكم ..واعطونا المجال نربيها بطريقتنا!!
ابتسمت غسق وهي تناظره رائق ...بالرغم إنه كان زعلان منها من سالفه الاسقاط ...بس ما عاتبها ولا راجعها بالموضوع ....
سبحان الله أحياناً الخير يكمن بالشر ...لما تعرضت ايليف للسقوط كانت سبب بعد إذن الله انها أمها  ترجع تتكلم ..وسبب تتصالحها مع مهاب بدون  اي عتاب ولا مناقشه ولا اعتذار من اي طرف!!
**
**
**
رفعت حاجب وهي تناظره يمشي قدام محلات الاثاث بدون ما يدخلون ...نطقت باستغراب: ما رح ندخل محلات الاثاث؟!
مهاب بهدوء نزل ايليف تمشي على الارض: في حديقه قريبه من هنا رح نجلس عندها!!
غسق عقدت حواجبها بعدم فهم: والاثاث ؟!
مهاب بابتسامة: الاثاث شفتيه ..انا قلت تطلع تشوف الاثاث ما تختار ... لأني خلال هاليومين رح أستاجر شقه مفروشه!!
وقفت وهي تحاول تهدي اعصابها ...وبعتب نطقت: انا بنظرك بزر تضحك علي ؟!
مهاب تحرك وهو ينطق: لو قلت لك نطلع للحديقه ما رح توافقين ..اما تشوفين الاثاث وافقت
غسق بدفاع: انا رفضت
قاطعها وهو يحمل ايليف الي بغت تنزل عن الرصيف: خفي علينا يا الثقيله!!
تابعت خطواتها وهي تناظر الحديقه بتعجب: كان توجهنا مباشره للحديقه وركنت السيارة قريب من الحديقه ليش نمشي كل هالمسافه!
رد بروقان : لزوم تشوفين الاثاث!!
تنهدت وما علقت وعيونها تتأمل الحديقه اول ما دخلوها....رفعت نظرها لسرب من العصافير طار من فوقها ...لحظات وتدعثرت وكانت على وجهها ...
نهضت نفسها وهي تشوف مهاب كاتم الضحكه بصعوبه..نفضت عباتها وهي تنطق بجمود: ما في شيء يضحك!
مهاب بابتسامة: ما ضحكت ..سلامات ما تشوفين شر ..خلي نظرك دوم قدامك ولا ترفعين سقف النظر حتى ما تسقطين فجأة ؟!
رفعت حاجب: يعني ؟!
هز كتوفه ببراءه: انا اعطيك حكمه!!
مطت شفتها وبهمس ما سمعه: خذ الحكمه من افواه المجانين!!
رفع حاجب ما وصله همسها: وش قلت ؟!
هزت رأسها بابتسامة: ولا شيء!!
نزل ايليف الي تبغى تلعب وهو ينطق بحرص: انتبهي لا تسقطين!!
ايليف بابتسامة عريضة: بابا سوف ألعب!!
هز رأسه وهو يناظر ايليف والبسمه تزين ثغرها ...ما ينكر ندمه على الفجوة الي سمح لها تفرق بينه وبين ايليف وغسق ...
سنوات راحت وكل شخص بعيد عن الثاني ... ايليف ما لها ذنب تعيش حياة اليتم والتشتت بين جدودها وامها وأبوها موجودين ...هم اولى الناس يحتونها...اشر لغسق على المقعد يجلسون عليه ...
جلس وهو يناظرها والسكون يحيط فيها ...اقتربت وجلست على نفس المقعد وعيونها تراقب ايليف وهي تلعب ...
مهاب يقطع الصمت الي بينهم : وش فيك ساكته؟!
غسق هزت كتوفها: وش اقول؟!
مهاب مط شفته بسخرية: من كبر الفجوة الي بيننا ما في مواضيع مشتركه نتكلم فيها ؟!
غسق تنهدت من الضيق الي اجتاحها بعد كلامه .. فعلاً الفجوة الي بينهم قطعت كل طرق التواصل بينهم..وبخفوت نطقت: انت إلي كبرت الفجوة وقطعت كل حبال الوصل بيننا!!
مط شفته بسخرية مستحيل انثى تحط على نفسها اللوم: انا الي قطعت حبال الوصل والا تصرفاتك الي تجلط!!
خزته : انتبه لا يطق لك عرق !!!
ابتسم بروقان: جيت هنا ما ابغى المشاكل .. لأني خلاص تعبت من التشتت الي نعيشه والمشاكل الي ما لها نهايه!!
قبل ما نكون انانيين خلينا نفكر بإيليف ...ما لها ذنب تعيش التشتت بسبب مشاكلنا .... أنا للحظة كنت رح افقدها...الموقف نبهني لأمور كثير كنت غافل عنها ....
قاطعته بحزن: لو صار لها شيء ما رح اسامح نفسي ... كيف افقدها وللحين ما نادتني ماما!!
ابتسم وهو يدفها بالخفيف: هذا الي يهمك تناديك ماما!! هزت رأسها بتأكيد: ايه ..انت وش يعرفك بامور الأمومة!!
مط شفته..وبمزح نطق: واضح جلستك بالبيت غيرتك ..وش رأيك تسحبين اوراقك كلها من الجامعه
قاطعته بفزع وانفعال: بأحلامك!!
استدركت نفسها ونطقت بنبره اخف: الجامعه خط احمر!!
رفع حاجب: الامتحانات النهائيه على الابواب كان الحين
قاطعته والندم يعصر قلبها: ما لي نصيب ادرس ذي المواد ...
هز رأسه بتفهم: صديقاتك نجحوا بالامتحان الثاني كانت الاسئلة شوربه!,
خزته بغيض: لو ما اسقطت المواد كان الحين اسئلتك من المريخ!!
ابتسم : ما انكر انها الاسئلة كانت صعبة ...واعترف اني ما توقعت مستواك كذا ... الاسئلة توقعت اعلى علامه تكون ٥ من صعوبتها ودقتها ... بس تفاجأت من علامتك كانت مرتفعه بالنسبة لصعوبه الاسئلة...
انتابها مشاعر ملخبطه .. نطقت بعدم ثقه بنفسها: جالس تطقطق على علامتي!!
ضحك مهاب من قلبه وهو يبرر لها: وربي ما اطقطق عليك ..ليش ما عندك ثقه بنفسك!!
زمت شفتها بحيره ما تدري تصدقه او لا .. نطقت بتسليك: على العموم الفصل الجاي لو اسقطه ما رح انزل مواد عندك!؛
ارخى ظهره للمقعد وهو يناظر ايليف: وهو الافضل ...تصرفاتك مستفزه بالجامعه وانا ما ابغى اخرب علاقتي فيك من جديد !!
قبل ما تنطق ناظرت ايليف الي تدعثرت على الارض وصوت صراخها بالمكان ..همت تقوم مسك يدها مهاب: اتركيها تعتمد على نفسها ..تراهم دلعوها بزياده ..
غسق بتردد: بس
مهاب بإصرار: اتركيها هذا انت تدعثرت الحين وش صار فيك ؟!
خزته بغيض ورجعت ناظرت ايليف الي تنتظر احد يقوم لها !!
**
**

يوم الزواج
ابتسمت وهي تناظر رؤى كل شوي يعدلون لها المكياج من البكاء ....
ام مهاب بنرفزه: وبعدين ؟!!
رؤى بنحيب: خايفه خلاص هونت
غسق ضحكت بخفه: وين الي مخططه وعامله حركات للحفلة
رؤى ناظرتها بعبوس: انكتمي !!
ام سراج بنرفزه: أكلتي راسنا وانت ترتبين للزواج والحين هونت!!
قالوا لك الزواج لعبه؟!
رؤى بتوتر وخوف: وش رايكم نكنسل الزفه والله خايفه اطلع قدام الناس ....
ام مهاب بملل: ما بقى وقت على الزفه ....لا تخربين علينا فرحتنا ...
اسيل وهي تعدل طرحة غسق ما قدرت تمسك دموعها ..ما هي مصدقه تشوف غسق بثوب الزفاف ...
غسق بابتسامة: يمه ليش كل الدموع ؟!
ام مهاب اقتربت بابتسامة: اكيد رح تبكي وهي تودع بعيونها اجمل عروس بالدنيا
رؤى رفعت حاجب: خالتي وكأنك تهيني فيني وتهملين وجودي ...وش اجمل عروس بالدنيا ؟!
أنا وين موقعي!!
ام مهاب خزتها: اشوف لسانك انطلق؟؛ خليك بخوفك افضل لك!!
اسيل مسحت دموعها بخفه: كلكم ما شاء الله عليكم!!
رؤى لوت بوزها: ليش احسك يا خالتي دفعت لهم زيادة حتى يطلعون غسق احلى مني .. والناس تقول شوفوا زوجه مهاب اجمل !!
ام مهاب هزت رأسها بضجر: ايوه بالضبط هذا الي صار ...لا حول ولا قوه الا بالله...
مو كأنك انت اخترت كل شيء بنفسك وما رضيت احد يتدخل او يشور عليك!
رفعت حاجب: تقصدين إنه اختياري كان سيء؟!  ...يعني مو حلوة ابد؟! ...يا خوفي كيان يهج لما يشوفني!!
ام سراج خزتها: اقول انكتمي افضل لك ...ما احد خرب مكياجك غير نفسك ...كل شوي تبكين
ناظري غسق مو مثلك!
رؤى بابتسامة: تراها متزوجه بس عملوا الحفله حتى تلبس فستان الزواج ما
قاطعتها غسق: اقول انكتمي يكون افضل!!
لو تحطون لاصق على فمها يا خالتي يكون افضل ... لأنها فضيحه!!
رؤى فتحت عيونها: انا فضيحه؟!
ام مهاب بملل: بدأت حرب السلفات!؟
رؤى تحركت من مكانها واقتربت من غسق: حرب باردة يا خالتي ...احد يعادي ذي القمر الا الغبي!!
بالله احد يصورنا علشان بعد الزواج نجلس نحلل ونشوف مين الاحلى!!
غسق ابعدتها بشويش: انت الاجمل ما ابغى صور جماعيه ...
ام مهاب هزت رأسها بتأكيد: كلامك مضبوط!!
رؤى بابتسامة: امزح معك ... أصلا كيان ما يقبل احد يحتفظ بصورتي ..فديته يغار علي!!
غسق لاعت كبدها: مو توك كنت رح تموتين علينا من الخوف والتوتر
رؤى ضحكت بخفه: مع الوقت الخوف يتلاشى ....
ام مهاب تناظر ساعتها: قرب موعد الزفه !!!
بلعت ريقها غسق وبداخلها توتر كيف تطلع للناس ويشوفونها !!!
*"
**
**
زينب جالسه على طاولة تنتظر زفة غسق ..نطقت بحماس: مو مصدقه اني رح أشوفها بفستان الزواج!!
سماء بابتسامه: ما توقعت يقبل الدكتور مهاب انها تعزمنا!!
زينب ابتسمت: قلت لها كذا لما عزمتني ...حلفت لي انه مهاب  ما تكلم وهي من نفسها قفلت خطها !!
سماء هزت رأسها: الله يوفقها ...تستاهل كل خير غسق ..شوفي ما شاء الله هالقاعه والحضور
زينب اشرت بعيونها: رح تنزف الحين !!
سماء هزت رأسها  وهي تناظر بحرص خايفه تروح عليها لقطه وهي تشوف دخول العروستين !!
زينب صفرت بخفوت: ذي غسق!!!
سماء بخفوت : لو يشوفها اخوك رح تصيبه سكته قلبيه!!
زينب بتأكيد: اول مرة اشوفها بالميك اب...تبارك الرحمن ...
زينب بابتسامة: انا لو مكان سلفتها ما انزف معها ..فرق بينهم !!
سماء تتاملهم بدقه: بالعكس ملامح سلفتها حلوة
زينب مسكت يد سماء تجذب انتباهها: شوفي شوفي ذي القمر!!
سماء رفعت حاجب: ترى احسك تبالغين ..يعني حلوة بس مو بالوصف الي توصفينه دوم!!
زينب مطت شفتها: مالت عليك ما عندك نظر ..ما ادري وش حظ اخوي طارت من يده حياة ...تهببببببل!!
كشت عليها سماء: مالت عليك وعلى اخوك الي ذبحتونا فيه!!
شوي ونروح نسلم عليها ونبارك لها!!
**
**
**
مر الوقت والإبتسامة ما فارقت ملامحها وخاصه بعد حضور زينب وسماء ما توقعت حضورهم ....
القاعه ممتلئة بالحضور ...والحفلة مرت بسلام بدون اي مشاكل او اي شيء يعكر صفو الحفله ..
ختى رؤى الي كانوا خايفين تجيب العيد ..طول الوقت متجمده ومنحرجه والتوتر واضح وحتى رقص رفضت تنزل ترقص ....
انتابها الشعور بالضيق لما مر بخيالها زواجها بالديره ...وكيف تزوجت بدون أمها وأبوها ...هزت رأسها ما ترح تسمح للماضي يعكر عليها صفو حياتها ..كل شيء انتهى ورح تبدأ من جديد ...
ناظرت ام مهاب الي نطقت بضيق :يعني كيف ما احد ينزف؟!
ام هزاع: انا اقول ما له داعي احد يدخل ...وكل واحد ياخذ عروسته وانتهينا!!
رؤى انفعلت ونسيت انها عروس: لا والله!!
ام سراج صكت على اسنانها بقوة: انكتمي فضحتينا!!
عبست ملامحها رؤى بتورط ...وبنبره اخف نطقت: اذا عمي ابو مهاب ما يبغى وش دخلنا ..انا وكيان اتفقنا
اقتربت وعد وهي تنطق بخفوت: ابوي رفض يدخلون  نهائياً..يقول كل واحد يأخذ عروسته وانتهينا!!
ابتسمت غسق على رؤى الي بلعت القهر ما تقدر تجادل قرارات عمها ابو مهاب ....
حياة اقتربت بابتسامة: خلينا نسلم عليكم ..وحظ اوفر يا رؤى يا ام السلووووو!
خزتها رؤى بتوعد بدون ما تنطق!!
ام مهاب بخفوت: لا. والمشكلة خربت مكياجها من الخوف والبكاء ..اذا كذا خايفه ...
جواهر توصي فيهم: ازواجكم بعيونكم وخاصه انت يا مهبوله؛!
غسق رفعت حاجب ليه تقول عنها كذا ..حتى اخر لحظة لزوم تكون شوكه بحلقها ...ما قدرت تمنع ابتسامتها لما تابعت جواهر كلامها وهي تناظر رؤى: الحين انت متزوجه وحركات الهبل تتركينها
رؤى عبست ملامحها: وأنا ظنيتك تقصدين غسق بمهبوله!
جواهر : اقصدك انت ...غسق ذيك ما احد يقدر لها ولراسها اليابس!!
ام مهاب بهمس: ترى ما هو وقته هذا الكلام الناس تناظرنا!!
جواهر ابتسمت: انا اعطيهم وصايا من ذهب ...
ام مهاب بهدوء: ما شاء الله عليهم ما يحتاجون حكم !!
رؤى بخفوت: احس بدوار وكتمه ...معقول احد صكني عين!!
ام سراج مطت شفتها: على وش يصيبونك بالعين ؟! على الكحل الي يشوفك يظنك من زمن الفراعنه؟!
رؤى فتحت عيونها وبزعل : يمه!!
غسق ما قدرت تمسك ضحكتها...اقتربت جواهر منها وقرصتها بكتفها بقوة: انكتمي فضحتينا!!
حاولت تكتم ضحكتها غسق ما قدرت وهي تلمح اغلب الحضور يناظرونهم وصوت ضحكتها العالي!!
اسيل بهدوء:يمه ابلعيها الناس تناظرك!!
ام مهاب بخفوت: ربي اعطاني زوج كناين مهابيل!!
جواهر بنفس الخفوت: دوبك تقولين ما يحتاجون نصائح!!
رؤى ابتسمت على غسق الي قلب وجهها احمر مو قادرة تمسك نفسها من الضحك!!
ام مهاب: خلينا ننهي ذي المهزله. ...والمعازيم يتفضلون على العشاء!!

**
**
**
**
**
واقفه والتوتر يسيطر عليها  ...ما تدري من لما طلعت من القاعه وهي خايفه والهواجس تحاصرها من كل مكان ...معقول يبغى مهاب ينتقم منها ويطين عيشتها؟! ..الي مخوفها انه هو الي رجع لها وما فتح موضوع الدراسه وذيك الأمور.....يمكن يبغى يحاسبها الحين على كل تصرفاتها بالجامعه ...بلعت ريقها برعب من الورطه الي تورطتها ....وهي تناظر ابوها يتكلم مع مهاب ويوصيه عليه ..وايليف متعلقه برجل مهاب: بابا !!
اسيل نزلت لمستواها تحملها: تعالي معنا!
ايليف برفض وهي متعلقه بمهاب: بابا!!
حملها مهاب وقبلها بخفه: عيون بابا!!
غياث مد يده ياخذها: تعالي
قاطعته وهي تدفن راسها بصدر مهاب:لا
ابو مهاب اقترب منهم وهو يحاول ياخذ ايليف: تعالي نروح للبقالة!!
ايليف هزت راسها بالرفض : الوح بابا!!
مهاب بهدوء: اتركوهها معنا
غسق ارتاحت لتواجد ايليف معهم ...سرعان ما عبست ملامحها لما نطق ابو مهاب برفض: لا
مهاب قاطعه بإصرار : يبه قلت لك نأخذها معنا !!
خذيها غسق حتى اسوق السيارة!!
ايليف برفض: ودق لا لا
مهاب ابتسم: ما ادري الحب لي نازل عليها...
ابو مهاب بهدوء أشر لهم: ادخلوا السيارة وانا اسوق السيارة!!
حرك شفته غياث يتكلم ..قاطعه ابو مهاب: كافي وصايا ..ترى الاثنين مو مقصرين كل واحد راسه اعند من الثاني!!
حنا عملنا الي علينا ..جمعنا راسهم من جديد والباقي عليهم!،
يلا يبه ترى ما بقى لي حيل اسند ظهري طول اليوم واقفين!!
مهاب برفض: لا تتعب نفسك يبه انا اتدبر امري ...فتح الباب لغسق: تفضلي
غسق تحس نفسها مثل اللعبه مسيره على قراراتهم
تحركت تركب سرعان ما وقفت لما صرخت ايليف ما تبغاها تركب معهم!!
مهاب ابتسم: لا كذا زودتيها وانا محترمك ..وما ابغى اكسر خاطرك!!
ناولها لابوه: تفضل
ايليف ترافس ما تبغى تروح مع جدها ...ضحك مهاب وأخذها وهو يتوعد فيها: غسق معنا!!
هزت رأسها برضوخ: معنا!!
غسق بتوعد: ليش حاسه إني زوجه ابوها...خليني اتخلص من هذا الفستان وذي الكتمه واتفضى لك يا دبه!!
غياث بابتسامة يعدل لها الفستان حتى تركب السياره: اذا لي خاطر عندك لا تزعلينها!!
غسق حضنت ابوها بقوة ما تبغى تبتعد عنهم ..وبغصه نطقت: رح اشتاقلك
ابو مهاب: يا حب الحريم للدراما ..ترى باكر الصبح رح تكونين بوجهه ..لا تنسى مهاب الغداء في بيتنا !!
مهاب هز راسه: ان شاء الله يبه!!
غسق سلمت على امها ودموعها تلمع بالدموع ...اسيل بابتسامة عريضة والفرحه واضحه على ملامحها: ربي يجعل ايامك سعاده وفرح!!
غسق هزت رأسها وبغصه نطقت: امين امين!!
ركبت السيارة والتفتت على مهاب الي فتح الباب من جهته يدخل ...نقز قلبها لما بدأت ايليف تبكي تبغى اسيل ..زفرت بضجر من ذي البنت جالسه تلعب فيهم ...مهاب توجه لاسيل وناولها لها وهو ينطق بتوعد: خلي الزواج ينتهي على خير وربي الا
قاطعها ابو مهاب: توكل على الله!!
هز رأسه وتوجه للسيارة ركب وحرك بهدوء وهو ينطق: اعطيناها وجه زياده!!
غسق تنفست بعمق وما ردت!!
مهاب رفع حاجب وبتوجس نطق: وش فيك ساكته لا تقولين رجعنا للطير يلي!!
ضحكت غسق بخفه على تعليقه بالرغم من الضيق الي بداخلها: ما رح نرجع للطير يلي...
بعد وقت وصلوا الشقة ...نقزت وهي تشوف ام سيف وجواهر بالشقه...
مهاب ابتسم وهو يسلم عليهم ... جواهر بابتسامة: عسى ربي يهنيك يا مهاب ويجعل ايامك سعاده!!
واقتربت من غسق وكشفت عنها وهي تنطق بابتسامه: رح تأخذ لكم رهف كم صورة!...
وبصوت مرتفع نادت: يا رهف تعالي
طلعت رهف من المطبخ وهي تنطق: الاكل جاهز بالمطبخ..رتبتلكم عشاء رومانسي !!
ام سيف بملل : تعالي خذي كم صورة ..تاخرنا نبغى نرجع !!
رهف هزت راسها بحماس: دقيقه اجهز الكام
قاطعتها غسق برفض وعدم الراحه رافقتها من تواجد ام سيف وجواهر: ما له داعي ..ما احب الصور!!
مهاب عيونه متعلقه على غسق..والانبهار واضح بعيونه ..نطق بهدوء: نأخذ كم صورة!!
غسق برفض: ما احب اتصور ..والصور تكون
قاطعها بتفهم: مثل ما تبغين ..رهف خذي لي صورة مع عمتي جواهر وخالتي ام سيف!!
رهف هزت راسها بحماس وبدات تصور ... مطت شفتها غسق وهي تناظرهم يتصورون اكثر من صوره ...
كانت مخططه مهاب يرفع الطرحه عن وجهها حتى تشوف من عيونه اذا انبهر فيها او لا ...
بتواجدهم ما اخذت راحتها ولا ناظرته زين!!
جلست على الكنبه بملل واضح رح تأخذ لهم رهف ألبوم صور ...رفعت حاجب لما مدت لها رهف بابتسامة: صوريني معهم!!
هزت راسها بهدوء ووقفت تلتقط لهم صور!!
ام سيف بهدوء: خلاص يكفي ... تأخرنا !!
جواهر وهي تعدل نفسها: من الصبح وحنا واقفين!!
مهاب بابتسامة: الله يعطيكم العافيه ...خليكم تتعشون معنا!!
رهف بحماسه: يا ليت والله!!
خزتها جواهر: وجهك مغسول بمرق .. اقول تحركي اشوف!!

**
**
**
في اليوم الثاني
مزنه جالسه بالصالة نطقت بتساؤل: كأنهم العرسان تأخروا!!
جواهر ناظرت ساعتها: لا يمه الحين يوصلون!!
مزنه هزت رأسها: كان ودي احضر الزواج بس ما قدرت ..كيف كان الزواج!!
جواهر نطقت بعد ما لمحت ام مهاب تقدمت لهم: كان الوضع ممتاز بس بالنهاية لولا ضحك غسق!!
مزنه رفعت حاجب بانتقاد: عروس وتضحك!!
ام مهاب بترقيع : الضحك ما نقدر نتحكم فيه يا خالتي!!
مزنه زمت شفتها بعدم رضا: الناس تنتقد وتتكلم ..يا جيل اليوم ما يقدر يمثل قدام الناس السناعه ...احد انتبه عليها؟!
ام سيف تقدمت وبيدها القهوة: الحريم تكلمت تقول وش هالعروس المطفوقه الي زوجتوها للدكتور مهاب!!
ام مهاب خزتها تحسها بس تبغى تحط نقطه على غسق: بالعكس الكل مبهور فيها ويقول يا حظ مهاب فيها!!
ام سيف جلست وهي تنطق بهدوء: بس حياة غطت على الكل ...وسمعت الحريم يقولون وين ام مهاب عن ذي القمر!!
مزنه بخفوت : اقول ابلعي لسانك لا يسمعك ابو مهاب!!
ام سيف رفعت حاجب: انا ما تكلمت عن غسق ..قصدت مهاب وكيان!!
مزنه تقفل الموضوع: هذا نصيب وزوجاتهم ما ينقصهم شيء من الزين ....اهم شيء الوفق...بناتي كانوا ملكات بالجمال وهذا الشيء ما شفع لهم حياة سعيدة...هذا انت وام مهاب مو بجمال جواهر وعشتم افضل منها!!
فتحت عيونها ام مهاب بصدمه وهي تناظر ام سيف: كانها قصفتنا!!
ام سيف ابتسمت: والله اشوف واضح خالتي ما هو عاجبها ..وش رايك تشوفين له الثالثه!!
مزنه بترقيع : ءء
سكتت لما دخل كيان ومعه رؤى .. وبدون تردد بدأت تزغرد؟
ام سيف اشرت بعيونها وهي تكلم جواهر: غيرت الموضوع!!
جواهر اكتفت بابتسامة وهي تناظر كيان ورؤى الي تقدموا  منهم ...
ام مهاب قلبها يرفرف من الفرحه وهي تشوف ولدها عريس ...
سلموا عليهم وجلست رؤى جنب كيان والإبتسامة مرسومه على ملامحها....
جواهر بانتقاد: ما ادري عنك ليش حاطه كل الوان الطيف بوجهك ..الحين يوصل مهاب
كيان قاطعها: يا عمتي تراها عروس تبغين تدخل وكأنها بعزاء ؟!
متى ما جاء مهاب تتغطى وانتهينا!!
رؤى بابتسامة عريضة: ويلوموني فيك!!
مزنه رفعت عصاها: اقول اهجدي يا بنت وخليك ثقيله ..جمال البنت بثقلها ...لا يغرك الحين بعده عريس ..باكر ينقدك ويقول خفيفه!
رؤى بضجر: الحين يا جدة لأني متزينه خلتيني خفيفه؟
جواهر رفعت انفها: والله بناتي لا يمكن يحطون مكياج ويفتشون قدام احد مو محرم لهم
رؤى قاطعتها بضجر: بناتك يا عمتي ملكات جمال العالم مو بحاجه للمكياج...اما انا وسلفتي جواكر نحتاج نحط مكياج حتى ما نفجعهم!!
جواهر : قولي هذا الكلام عن نفسك ... غسق ما هي خفيفه ..الحين تشوفينها وجهها بدون خرابيط وعلى طبيعتها!!
ام مهاب خزتها: ما عرفنا لك ..ساعة تاكلين غسق بقشورها وساعه محامي دفاع!!
تراها عروسه ولزوم تكون انيقه وغير عن الكل !!
ام سيف بهدوء: اتوقع إنه مهاب وصل
جواهر بأمر: غطي غطي اشوف كم تتحملين ..
رؤى بضجر: لا حول ولا قوه الا بالله!!
....الحين نشوف حفيدتك الثقيله وش عامله بنفسها!!
استاذن مهاب ودخل والعيون خلفه تنتظر دخول غسق بترقب ....
سلمت ام مهاب عليه وباركت له وهي تنطق بتوجس: وين غسق ما اشوفها معك؟!
انتهى البارت....دمتم بخير 🌹