رواية المراد الفصل الأول 1 - بقلم ملك بكر

دخلت الأوضة وهيا بتقول: يلا بقا يا ليلة هنتأخر. ليلة: أنا خلاص خلصت أهو. مليكة بصدمة: إيه ده... إنتي هتخرجي كده؟ ده مراد لو شافك كده هيقلبها علينا كلنا. وبعدين هو جايب لكل واحد فينا فستان. ليلة: والله أنا حرة، ألبس اللي أنا عايزاه، هو ملوش دعوة بيا. ومش هلبس حاجة هو جايبها، يروح يتشطر على حبيبة القلب. مليكة: يا ليلة، هتعملي مشكلة وإحنا متأخرين. قاطعها خبط الباب. ليلة: ادخل. دخل مراد وقال: إنتي هنا يا مليكة؟

وملك بتدور عليكي تحت. وبص لليلة ببرود وقالها: وإنتي لسه ملبستيش ليه؟ إحنا كده هنتأخر. بصتله ببرود: لا، أنا جهزت. مراد: هتروحي بقميص النوم؟! ليلة: قميص نوم؟! تابعت ببرود: آه، هروح بيه. أنا حرة. مراد: انزلي يا مليكة تحت. مليكة: يا مراد، مش وقته، هنتأخر. مراد بحده: قولتلك انزلي تحت. خرجت من الأوضة وهو قفل الباب ووقف قدام ليلة: قولتي إيه بقا؟ ليلة بخوف مزجته بشجاعة مزيفة: أنا كده... كده خلصت لبس.

شالها مرة واحدة ودخل بيها الحمام وحطها تحت الدش وفتحه عليها تحت صدمتها. ليلة: إنت عملت إيه؟! بص في ساعته وقالها: ربع ساعة بالظبط تكوني مسحتي القرف اللي في وشك وتلبسي الفستان اللي أنا بعته. ليلة: قولتلك قبل كده، ملكش دعوة بيااااااا... إنسان سمج. مراد: أنا عارف إنك تعبانة شوية، عشان كده هعديهالك. غير كده، إنتي عارفة أنا كنت هعمل إيه. خرج من الحمام وهيا تمتمت: بارد. مراد:

ربع ساعة يا ليلة، لو مجهزتيش هاجي أنا ألبسك بنفسي. خافت من تهديده ولبست الفستان بسرعة وصففت شعرها وهو قالها من برة. مراد: الربع ساعة عدت. ليلة: وأنا جهزت أساساً. ولو سمحت، متتعاملش معايا كده تاني، أنا مش عيلة صغيرة. مراد: لا، إنتي بالنسبالي لسه العيلة الصغيرة اللي أنا ربيتها بنفسي. نفخت بضيق وقالت: طيب، ممكن بقا تخرج من أوضتي على ما أكمل تجهيز نفسي. مراد: شعرك يتلم، ومتحطيش روج فاقع.

خرج من أوضتها وهيا حبت تخلف كلامه وجابت أكتر درجة روج فاقعة عندها وسابت لشعرها العنان. ليلة: كده فلة. وريني بقا هتعمل إيه يا أستاذ مراد. لتكون صدقت إننا إخوات بجد. نزلت تحت وكان مراد بيتكلم في الفون وواقف مع أخواته. مراد: أقفل دلوقتي، هكلمك بعدين. ملك: إيه يا ليلة، أخرتينا. ليلة: منا خلصت أهو. راح مراد ليها ومسك دراعها جامد وطلع منديل من جيبه وبدأ يمسحلها الميكب اللي هيا حطاه. ليلة: ليه كده يا مراد؟

أنا قعدت كتير أوي على ما أظبطه. مردش عليها وكمل مسح، وبعد ما خلص لفها وبدأ يضفر شعرها. مراد: يلا عشان منتأخرش أكتر من كده. سابقهم وخرج على بره. مليكة: على فكرة كده أحلى. ليلة: بلا أحلى بلا زفت... هو ماله بيا دلوقتي. ملك: مش إنتي اللي طلبتي منه يعاملك زي أخته؟ ليلة: ليه، هو هيصدق إننا إخوات ولا إيه؟ المهم، يلا عشان منتأخرش. خرجوا ورا مراد. مراد: اركبوا إنتوا التلاتة مع عم عبده، وأنا هروح أجيب تسنيم وأحصلكوا.

في العربية. ليلة: رايح يجيبها عشان بيخاف عليها وبيحبها. وقال إيه... بيعاملني زي أخته. ملك: يا بنتي، اومال لو مكنتيش إنتي اللي خرجتيه من حياتك من غير تردد. ليلة: كلنا عارفين السبب، خليها تنفعه. في الحفلة، ليلة مع مليكة. ليلة متابعة مراد وتسنيم بصمت. ليلة: المفروض أنا اللي أكون مكانها. مليكة: ما خلاص يا ليلة بقا... مش كنتي مش عايزاه؟ ليلة: أنا عمري ما كنت مش عايزاه، بس أنا برضه عندي كرامة. مليكة: جايين علينا. ليلة:

بصي اللي لابساه... وهو مبيكلمهاش وسايبها براحتها. مليكة: اسكتي، هيسمعوكي. ليلة: يا ريت. تسنيم: هاي. مليكة: أهلاً. مراد: خليكي هنا، هروح أستقبل الوفد الإيطالي. تسنيم: أوك حبيبي. تسنيم كانت ماسكة كوباية عصير وبتهزها بإيديها، فوقعت على ليلة. مليكة: مش تفتحي. تسنيم: سوري والله، ماكنتش أقصد. متزعليش مني يا ليلة. ليلة: هروح التويلت وهاجي بسرعة. دخلت التويلت نضفت فستانها، ولقيت تسنيم داخلة. تسنيم: جيت أظبط الميكب بتاعي.

ليلة: ... تسنيم: متزعليش أوي كده... مراد كان هيختار مننا واحدة بس، والواحدة دي كانت أكيد هتكون أنا. ليلة: لسه النهاية مجتش. تسنيم: حبيبتي... النهاية خلصت من زمان. رفعت إيديها في وش ليلة وكملت: من ساعة ما لبست ده... مراد بتاعي أنا وبس. ليلة: مراد معاكي بجسمه بس، قلبه معايا وقلبه ملكي طول العمر. تسنيم: غلطانة يا حبيبتي... مراد بيحبني، وإلا مكنش خطبني وسابك. وبعدين، ما إنتي كنتي قدامه، اختاركش ليه؟ ليلة: عشان...

عشان أنا اللي طلبت منه كده. قالت كلامها وخرجت. تاني يوم، كانت ليلة في أوضتها قدام المرايا ومعاها مقص. ليلة: أنا أه مبطلتش أحبك، بس أنا تعبت ولازم أتعامل معاك ببرود زي ما إنت بتعاملني. فلاش باك. مراد: إنتي عارفة يا ليلة إني محبتش غيرك في الدنيا دي كلها، ولا هحب بعدك. ليلة: وأنا كمان محبتش غيرك يا مراد. مراد: يبقى تسمعي كلامي بقا... وبعدين شعرك ده مش عايز أشوفه مفرود غير قدامي أنا وبس. ليلة: ده أنا أصلاً كنت بفكر أقصه.

مراد: نعم يختي... انسي الحوار ده. ليلة: أنا هقصه في حالة واحدة بس... ودي حاجة مستحيلة. مراد: إمتى بقا إن شاء الله؟ ليلة: لما أبطل أحبك... بس ده مستحيل. باااااك. ليلة بدموع: هه... عمري ما هبطل أحبك يا مراد... بس هقصه عشان أنتقم لكرامتي.