رواية المراهقة والثلاثيني الفصل الثامن 8 - بقلم اسماعيل موسي

مالك مش ملاحظ إن البنت اللي في الفيديو تشبهك؟ أروي وعينيها على الفيديو: تقصد إيه يا مالك؟ مالك، لاحظ إن أروي منزعجة ووشها مخطوف، قال: انتي مكشرة كده ليه؟ أروي بزعل: أصلي مش فاهمة إيه المناسبة اللي تخليك تفرجني على فيديو زي ده؟ مالك: أصل بصراحة السدال عاجبني، أعتقد كان فيه واحد معاكي نفس لونه. أروي بخضة لكن حاولت تتماسك نفسها: آه شبهه فعلاً. مالك: هو فين السدال ده دلوقتي؟

أروي: مش فاكرة، بطلت ألبسه من مدة طويلة، أعتقد ممكن ماما تبرعت بيه لجمعية خيرية. مالك: مش عارف إيه الحكمة اللي في الفيديو ده؟ ليه حد بعته لي؟ أروي: تلاقيه واحد صاحبك بيهزر معاك، أو واحدة صاحبتك من بتوع زمان. مالك: قلتلك أكتر من مرة مفيش غيرك في حياتي يا أروى. أروي وهي بتبعد التليفون قعدت في حضن مالك وباسته. تلت دقايق بالظبط ومالك كان ناسي حتى آكل إيه.

أروي الليل كله عمالة تفكر تتخلص من أحمد إزاي، المرة دي عدت على خير، لكن مش عارفة إيه ممكن يحصل تاني. الكلب خد الفلوس وفي نفس الوقت عامل لي كمين؟ تاني يوم انتظرت لحد ما مالك خرج وكلمت أحمد. أحمد: أهلاً بروحي الجميلة. أروي: اخرس يا كداب. أحمد: روّقي يا روحي. أروي: أنا مش روحك، أنا هكون موتك. أحمد وهو بيضحك: للدرجة متعصبة من حتة فيديو مش مبين وش كام؟ أروي: لو طلعت الدفاتر القديمة؟

أروي: انت حقير وكداب، مش عندك أي حاجة، أنا عارفة إنك واطي ولو كنت تملك حاجة ضدي كان زمانها دلوقتي على تليفون مالك. أحمد بغضب: انتي بتشتمني يا أروى؟ أروي: وأكسر دماغك دماغك كمان، لو حاولت إنك تضايقني تاني هعمل لك مصيبة. أحمد: عايزك مرة أخيرة في حضني، بعدها أوعدك متشوفيش وشي تاني. أروي: انت كلب وهتفضل كلب. وقفت الخط. كان مظبط كل حاجة، لكن مين كان بيصورني؟ هدي عرفت إزاي إن أحمد صورني؟

اتصلت بهدي تستفسر منها، هدي قالت إنها شافت الفيديو بالصدفة وحاولت تحذرها مش أكتر من كده. فجأة وصلتها رسالة تانية من أحمد، صورة قديمة ليها بشعرها كانت واخدها بلبس البيت. تحتها رسالة: هتيجي بمزاجك لشقتي وإلا أجيبك غصب؟ أروي وهي بتشتم في سرها: لا طبعًا هكون عندك يا حب. أحمد: أنا قلت كده برضو، كنت عارف إنك مش هتقدري تستغني عني. أستناكي بكرة لما مالك يسيب الشقة. أروي: حاضر.