رواية الورث الفصل السابع 7 - بقلم صلاح الديب

فهد: ما أنا قولتلك هرجعلك كل حاجة. ويا ستي أنا مش مستعجل، فكري براحتك وخذي قرارك. ريم: بصراحة، أنا مش عايزة مشاكل. ومش عايزة أحس إنك بتعطف عليا أو صعبانة عليك. لما أقف على رجليا، لوحدي وبمجهودي، وقتها أقدر أقولك رأيي. إنما دلوقتي، ما فيش في دماغي حاجة غير شغلي ومستقبلي. فهد: وأنا هحترم رغبتك دي، مع إن كنت أتمنى إني أبدأ معاكي مشوارك وأنتِ في بيتي وأنتِ مراتي.

ريم: هههه، في بيتي ومراتك مرة واحدة. بص، أنا منكرش إني معجبة بيك وبشخصيتك، وبحس بوجودك بالأمان. ودي حاجة كويسة، وأي بنت تتمنى ترتبط بحد زيك. بس حقيقي، أنا مش بفكر في جواز ولا ارتباط دلوقتي.

فهد: طيب تمام، أنا هبتدي أشوف لك مكان كويس. هتعملي جنبه مكتب، والجنب التاني تعيشي فيه زي ما طلبتي. بس الأول، هنخلص حوار الورث ده، وتتنازلي لهم عن كل حاجة. أنا حددت معاهم معاد وهما وافقوا. كمان ساعتين هنكون هناك، والرجالة جاهزة بره ومنتظرين خروجنا. ريم: رجالة إيه؟ أنا مش عايزة مشاكل. إحنا هنروح في حضور المحامي ونخلص كل حاجة ونرجع.

فهد: ما فيش مشاكل ولا أي حاجة. أنا مش واخدهم أتخانق بيهم، دول بس حماية لينا من أي غدر من ولاد عمك. وأعتقد إنتي عارفة هما ممكن يعملوا إيه. ريم: عارفة، وعشان كده خايفة ومرعوبة. فهد: طول ما أنا جنبك، متخافيش. وأنا الحمد لله كفيل بجيش لوحدي. والأيام هتثبت لك ده. ريم: مش عارفة أقولك إيه بجد. متشكرة جداً، وجميلك ده هفضل مديونة بيه ليك طول حياتي. فهد: إيه اللي أنتِ بتقوليه ده؟ يعني أنا بقولك عايز أجوزك، وتقوليلي جميل؟

لا بقى مش كده، ارحميني. ريم: هههه. فهد: أيوه كده، خلي الدنيا تنور بضحكتك. يلا، هسيبك تجهزي، وأنا كمان هروح أجهز. ريم: تمام. متشكرة. فهد: مجنونة. وبعد أكتر من تلات ساعات، رجعنا الفيلا وكنا خلاص خلصنا كل حاجة. وريم تنازلت عن كل حاجة، حتى العربية خدوه منها. كنت هجنن، عايز أولع فيهم كلهم. بس ريم منعتني وقالت: "بلاش مشاكل، ربنا كبير، وحقي عند ربنا، وأنا مش مسامحاهم."

وابتدت ريم تشتغل على نفسها، وأنا ابتديت أشوف لها عملاء وناس صحابي يعملوا لهم شغل. وكل ده وهي متعرفش إني ببعت لها حد، عشان متحسش بأي حاجة. وتمر الأيام وتعدي سنة. وفي يوم من الأيام… كنت قاعد أنا وهي بنفطر في بيتها الجديد. ولقيتها ماسكة الجرنال وعنيها مليانة دموع. فهد: ريم، مالك؟ في إيه؟ ريم مش بترد عليا. ريم… ريم… ريم: أصل… أصل…