رواية الورث الفصل العاشر 10 - بقلم نورا سليمان

كريم: مكنش قدامي حل غير إني أسكت. علشان لو كنت اتكلمت محدش فيكم كان هيصدقني، وكلكم كنتوا هتصدقوا حاتم. لأنه أخوكم، في تفكيركم عمره ما هيأذيها. علشان كده أنا فضلت ساكت ومقولتش أي حاجة. جمال: هو أنت شايف إن ده مبرر للي حصل؟ نور كانت بين الحياة والموت، وكلنا كنا هنموت عليها، وأنت كنت عارف مين عمل كده وساكت. كريم: فكرت كذا مرة إني أتكلم وأثبتلكم إن كلامي صح، بس كنت خايف على نور. حاتم مبقاش يهمه حد، وكان ممكن يأذيها.

صدقوني والله أنا عملت كل ده عشان نور. زياد: عشان خاطر نور؟ هو أنت مصدق نفسك يا كريم؟ هو أنت كده فاكر إننا هنصدق كلامك ده؟ كريم: أنا عمري ما أذيت حد فيكم، بالذات نور يا زياد. فايز: مهو واضح يا كريم. أنا كنت فاكرك هتتغير للأحسن وتبقى بني آدم كويس، بس لأ. هتفضل طول عمرك شخص أناني ومبتفكرش غير في مصلحتك، حتى لو مصلحتك دي هتأذي غيرك. أنت مصلحتك كانت مع حاتم وداليدا، عشان كده سكت على اللي حاتم عملوه ومتكلمتش.

كريم: وأنا إيه مصلحتي في كده يا فايز؟ فايز: أنا وأنت عارفين كويس أوي مصلحتك معاه إيه يا كريم. أنت وهو مبتفكروش غير الفلوس، واللي كنتوا هتاخدوها لو نور كانت ماتت، بعد الشر، أو حصلها حاجة. كريم: ده على أساس إني الشيطان الوحيد اللي بينكم، وأنا الوحيد اللي بفكر التفكير ده هنا، مش كده؟ انتوا كلكم زيي، مفيش حد أحسن مني هنا. كلنا مبنفكرش غير في الفلوس وبس. رحمة: كفاية بقى، كفاية حرام عليكم. انتوا إيه معندكوش دم؟

هو ده وقت الخناق؟ ابن عمكم لسه دمه مبردش، ونور مش موجودة، ومحدش عارف عنها حاجة، وانتوا هنا قاعدين تتخانقوا. بدل ما انتوا قاعدين تتخانقوا كده، انزلوا دوروا على نور، وبعدها اعملوا اللي انتوا عايزينه. وانت يا كريم، نور لو حصلها حاجة، أنا مش هسكتلك، ولا أنت ولا إخواتها. اطلع برا، ومش عايزة أشوف وشك هنا غير لما نور ترجع. برا يا كريم بقولك. خرج من القصر وهو متعصب. قفل الباب وراه جامد. فضل واقف قدام القصر. حط إيده على راسه.

كان بيحاول يفكر يعمل إيه أو يتصرف إزاي عشان يلاقيها. فتحت الباب. دخلت وقفلت الباب وراها. بدأت تمشي بخطوات بطيئة. كانت بتبص على البيت بحزن. بيت صغير وبسيط وقديم. كان كله تراب، وباين إن محدش دخله من سنين. قعدت على الكرسي اللي قدامها وهي بتفتكر أول مرة دخلت فيها البيت ده معاه. نور: البيت ده شكله قديم أوي يا جدو. أنت تعرف أصحاب البيت ده ولا إيه؟ عبد الرحيم: طبعًا أعرفهم. أصحاب البيت ده يبقوا أنا وجدتك الله يرحمها يا نور.

بصتله بصدمة. اتكلمت وهي مش مصدقة. نور: بيتكم؟ أنا أول مرة أعرف إن كان ليكم بيت غير اللي إحنا عايشين فيه. عبد الرحيم: ده البيت اللي أنا وجدتك اتجوزنا فيه. ساعتها كنت لسه في بداية حياتي. تعبت كتير في شغلي، واطردت من كذا مكان كنت بشتغل فيه، وجدتك كانت واقفة جنبي وعمرها ما تخلت عني في يوم. قولت بعدها أبدأ أبني نفسي بنفسي. اشتغلت كتير لدرجة إني ساعات مكنتش بنام غير ساعتين تلاتة في اليوم.

عملت المستحيل عشان أكبر وأكبر اسمي معايا. وبعد تعب سنين وصلت للي أنت شايفاه ده. وكل ده كانت جدتك جنبي ومسبتنيش لحظة. كنا عايشين أسعد اتنين. عارفة يا نور؟ أنا كل ما أحس نفسي تعبان أو مخنوق من حاجة، باجي هنا وأقعد مع نفسي. بقعد أفتكر الأيام الحلوة اللي كنت بقضيها مع جدتك هنا. قربت منه حضنته، وبدأت تتكلم وهي مبتسمة. نور: يعني أفهم من كده إن ده مكانك السري اللي بتيجي فيه من ورايا؟

عبد الرحيم: أومال أنا جبتك هنا ليه يا حبيبة جدو؟ انتوا أول وآخر واحدة تعرف المكان ده. عمري ما قولت لحد على المكان ده نهائي. بس عشان أنا مليش غيرك. ودا يا ستي مفتاح الشقة أهو، عشان لما تكوني مدايقة من حاجة وعايزة تقعدي لوحدك، تيجي على هنا. نور: مع إني واثقة إني مش هحتاج المفتاح ده طول ما أنت معايا، بس ماشي هخليه معايا. عبد الرحيم: ربنا يخليكي ليا يا حبيبتي وتفضلي معايا وتكوني أجمل عروسة في الدنيا.

نور: ممم. شكلك زهقت مني عايز تخلص مني بسرعة. عبد الرحيم: مقدرش أزهق منك يا حبيبتي، بس أنا نفسي أطمن عليكي وأفرح بيكي. نور: والله أنا مستعدة أتجوز، بس أتجوز واحد يكون قمر شبهك بالظبط، غير كده مش هقدر. عبد الرحيم: أما نشوف بكرة لما تحبي واحد مش شبهي، هتفضلي على نفس كلامك ده ولا إيه. نور: متخافش، القمر ده مفيش منه اتنين. اقفل بقى على الموضوع ده وتعالى وريني الشقة حتة حتة. عبد الرحيم: تعالي يا حبيبتي. تنهدت بحزن.

بدأت تتكلم وهي بتعيط. نور: أنا آسفة يا جدو. مقدرتش أحميك من أحفادك وخلّيتهم ياخدوك منك. لو كنت أعرف إن ده هيحصل، لا يمكن هسمح إنهم يعملوا كده. عمري ما كنت أتخيل إن إخواتي يعملوا كده. كانوا أكتر ناس بحبهم وبثق فيهم. بس مطلعوش قد الثقة دي. أنا محتاجة ليك أوي يا جدو. محتاجة تقف جنبي وتساعدني. أنا خسرت كل حاجة وبقيت لوحدي. مش عارفة أعمل إيه ولا أروح لمين. الباب خبط. بصت على الباب باستغراب.

مسحت دموعها بسرعة وقامت عشان تفتح الباب. فتحت الباب. اتصدمت أول ما شافتها قدامه. نور: أنتِ؟ أنتِ عرفتي مكاني منين؟ قاعد على الكرسي. بيهز رجله بعصبية. قاعد قدامه مبتسم. ماسك القلم وبيلعب بيه. حاتم: ممكن حضرتك تقولي أنا إيه تهمتي اللي تخليني قاعد هنا؟ سيف: هي مش تهمة واحدة يا حاتم بيه. دول تهم كتير. قتل وسرقة وتجارة مخدرات. حلو كده ولا تحب تسمع أكتر؟ حاتم: كل ده كدب ومفيش دليل عليه.

أنا عمري ما أقتل حد ولا أذي حد نهائي. ده أكيد طارق وشيماء اللي عملوا كده. عايزين يوقعوني ويدمروني بعد ما رفضت إني أعترف بابنها. بس كل اللي هما قالوه ده كذب ومحصلش. بس أنا مش هسكت. أنا عايز أقدم بلاغ فيهم هما الاتنين. سيف: اهدي بس يا حاتم بيه. أنا مقولتش إن شيماء وطارق هما اللي بلغوا عنك. ولا قولت كمان إني معيش دليل. أنا معايا دليل ضدك. واللي عمل كده أقرب حد ليك. أختك الآنسة داليدا. اتكلم بصدمة وهو مش مصدق.

حاتم: داليدا؟ علياء: أنتِ ليكي عين تيجي لحد هنا بعد اللي عملتيه في نور ده؟ داليدا: أنا مابقاش ليا مكان غير هنا عشان أجي فيه يا علياء. أنا بلغت عن حاتم، وخايفة أرجع البيت يأذيني. مليش مكان غير هنا عشان أجي عليه. علياء: كنتي تفكري في الكلام ده قبل ما تسكتي عن أخوكي بعد اللي عمله ده يا داليدا. لكن دلوقتي انتي مبقاش ليكي مكان هنا. داليدا: أيوه بس ده بيت أختي يا علياء، ومفيش حد يقدر يخرجني منه أبداً. زياد: أختك؟

دلوقتي بقيت أختك. وكانت فين أختي دي لما كانت في المستشفى بسببكم ومحدش فيكم فكر حتى إنه ييجي ويزورها مرة واحدة بس؟ كانت فين أختي دي لما كلنا كنا ضدها وكانت لوحدها ومحتاجة حد فيكم جنبها. جاية تفتكري أختك دلوقتي بعد ما دمرتي حياتها. إحنا آسفين يا داليدا، بس انتي ملكيش مكان بينا هنا. لحد ما نور ترجع وتكون بينا، وساعتها هي اللي تقرر إذا كنتي تيجي وتعيشي معانا هنا ولا لأ. داليدا: بس أنا كده هبات في الشارع. أنا...

أنا حتى معيش فلوس أروح أقعد في فندق. رحمة: كنتي تفكري في اللحظة دي قبل ما تأذي أختك يا داليدا. أنا كان نفسي أقف معاكي وأعارض كلام زياد. بس للأسف زياد عنده حق. أنتي متستحقيش تقعدي في البيت ده ولو للحظة واحدة طول ما صاحبته مش موجودة. أول ما نور ترجع بالسلامة هي اللي تقرر وجودك من عدمه يا داليدا.