رواية الوصية الفصل الأول 1 - بقلم ايات الرحمن

جدي الله يرحمه ويغفر له ويسامحه كتب وصية قبل ما يموت. وقال فيها إن بعد وفاته بابا وأعمامي الأربعة يهدوا البيت اللي عايشين فيه كلنا، لأن تحته كنز كبير أوي وغالي جدًا. وبشرط إن مفيش حد يقرب من البيت ده غير بعد وفاته. كنت صغيرة لسه، بس كنت مدركة لكل حاجة حواليا وفاهمة كل حاجة. في وقت والدي وأعمامي بيقسموا في أملاك جدي وهو عايش، برغم إن البيت ده هو لوحده اللي تعب فيه.

واتغرب، ولا بابا ولا حد من أعمامي دفع جنيه واحد وساعده بيه. كنت بأسمع بابا وإخواته وهما بيقسموا، كل واحد هياخد مساحة من البيت ده قد إيه. وكنت بشوف جدي وهو حزين من أولاده ومن طمعهم. دا عايز ياخد حق دا، ودا عايز ياخد حق دا. ومفيش تراضي بينهم، مفيش قناعة. عمري ما شوفت حد فيهم مقتنع بأي حاجة اتعرضت عليه أو أي حاجة معاه. لحد ما جه يوم من الأيام وجدي قرر يخرج عن صمته ويبوح بالسر اللي مخبيه طول عمره عنهم.

وأمرني إني أطلب منهم يتجمعوا في غرفة كانت مخصصة لجلساتهم مع بعض، كلهم كأب وأولاده. بينهم شغل أو في تشاور في أي حاجة. كنت قاعدة بينهم وبتابع كلامهم. وهما بيسألوا ياترى هو عايز منهم إيه وليه مجمعهم كده؟ أكيد في حاجة مهمة جدًا. دخل جدي وقال السلام وقعد. وبعد كلمات كتيرة دارت بينهم، قال الكلمات دي: "البيت ده تحته كنز، وكنز كبير أوي. وعشان يخرج لازم البيت ده يتهد الأول. ولكن ده بعد وفاتي."

نظراتهم كانت مرعبة، كإنهم بيتفقوا على أمر خطير بنظراتهم دي. حسيت جدي كمان مش متطمن. رد والدي وقال: "طب ما نبدأ من دلوقتي وبلاش ننتظر سنين طويلة." الجد بضحكة غريبة: "لأ مش دلوقتي. قولت بعد وفاتي. ويا عالم مش ممكن أموت بعد دقايق. لله الأمر من قبل ومن بعد." وقام وسابهم. همس بصوت هادي جدًا ونظرات ما تطمنش أبدًا. الليل دخل وأنا في غرفتي. لمحت خيال من تحت الباب بيمر. وبعده خيال لحد ما مر والدي ومعاه أعمامي الأربعة.

وطبعًا دلوقتي الكل فهم إنهم دخلوا يتخلصوا من جدي. ولكن دي هتكون مفاجأة في نهاية القصة. تاني يوم صحيت على صوت صراخ وإن جدي اتوفى. بابا وإخواته ما كانش ظاهر عليهم أي صدمات ولا أي زعل على والدهم اللي يعتبر مات فجأة. جدو تم دفنه بأسرع وقت، والعزاء كان مقتصر على دفن جدي. مفيش أي حاجة اتعملت عشانه ولا حتى شغلوا قرآن. ولأن بيتنا كان بعيد عن البلد وفي مكان لوحده، كان سهل جدًا عليهم هده وترتيبهم.

لو حد سأل هيقولوا إنهم رجعوا من عزاء جدي ولقوا البيت بالشكل ده. المعدات كانت جاهزة، وفي وقت قليل جدًا كان البيت متساوي بالأرض. وبدأوا بالحفر عشان يوصلوا للكنز ده. وفعلًا بعد الحفر بكام متر ظهر تابوت كبير جدًا.