رواية الوصية الفصل الثاني 2 - بقلم ايات الرحمن

بابا و أعمامي في أقرب وقت كانوا جهزوا المعدات اللي هيتزال بيها البيت. اللي اتزال في وقت قليل جداً. وبالفعل بعد الحفر اتفاجئوا بتابوت كبير تحت البيت. ابتسامات كلها غدر، كأنهم متفقين مع بعض، هيتعاونوا لحد ما ينفذوا الوصية وبعد كده يقتلوا في بعض. مابقاش في أمان في عيونهم. كل أم خافت على أولادها وقررت تاخد أولادها لمكان بعيد لحد ما كل واحد ياخد نصيبه من الكنز ده ويرجع الأمان بينهم تاني. فنرجع تاني للبيت.

التابوت كان ثقيل جداً جداً جداً بمعنى الكلمة. لدرجة إن مش قادرين هما الخمسة على رفعه. وده طبعاً بعد ما طلبوا من العمال يرجعوا لبيوتهم وهما هيكملوا في وقت تاني. بصعوبة كبيرة جداً على ما قدروا يخرجوه. "بصوا بقى، إحنا هنقسم الكنز ده علينا إحنا الخمسة بالتساوي." "كده؟ لا طبعاً، إنت بتقول إيه؟ تساوي إيه؟ اللي نقسم بيه إحنا نفتح التابوت ده واللي يخرج حاجة منه تبقى من نصيبه."

"طب افرض إن واحد فينا لحق جزء قليل وفي واحد خد جزء كبير، تبقى دي قسمة إزاي يعني؟ "نصيبك كده، هتعترض أحسن ما تلحقش خالص." وبدأ بينهم خلاف كبير لدرجة إنهم اتعدوا على بعض بالضرب وضربوا بعض ضرب مبرح هما الخمسة. وهنا بدأت زوجاتهم يشعروا بالخوف. "إحنا لازم نمشي من هنا بأسرع وقت، دول بيقتلوا في بعض بره." "نستنى إيه لما يدخلوا يقتلونا إحنا كمان؟ "لا، أنا هاخد أولادي وهرب من هنا، يلا يا أولاد بسرعة."

كل أم فيهم أخدت أولادها وبعدت عن المكان تماماً. وأخيراً انتهى الجدال بينهم بإصابات فظيعة. وقرروا يفتحوا التابوت ده خلاص. رفعوا غطاء التابوت، ظهر صندوق. رفعوا غطاء الصندوق، ظهر صندوق آخر. خمس صناديق قوية داخل التابوت بأحجام مختلفة وهما في حيرة وتعجب لكل الصناديق دي. لحد ما وصلوا لآخر صندوق وهم بيفتحوه كانوا مترددين شوية، ليكون في صندوق آخر. ولكن العجيب لما فتحوه كان ممتلئ بسبائك الذهب. كنز عجيب وكثير أوي.

قدروا يشتروا مكان البيت ده خمسة وبقوا من أكبر الأثرياء في البلد. أولادهم وزوجاتهم رجعوا وكل يوم عن يوم الرزق بيزيد والحياة بتكون أحلى قدامهم. مفيش توبة ولا ندم على أفعالهم. شركات بتتقام وعمارات بتتبني وتعليم في مدارس خاصة لأولادهم. الثراء في أبهى صورة. لحد ما ييجي اليوم اللي يظهر فيه قوة "كما تدين تدان" وإن ربنا يمهل ولا يهمل. ويترد ليهم اللي حصل ده أضعاف ونهايات بقصص مختلفة.