رواية امرأة في عصمة صعيدي الفصل الخامس عشر 15 - بقلم سلسبيل

ديما جريت بسرعة وحضنت حازم، والشخص ده لف بيها كتير تحت أنظار الكل. حازم: ازيك يا اوزعة. جاسر: لا ثانية بس كدة. جاسر زق ديما بعيد عن حازم وضرب حازم بوكس في وشه. دنيا: انت مجنون؟ خالد: انتوا اللي مجانين. ديما: انت عملت إيه؟ انت غبي. حازم: مين ده يا ديما؟ ديما: مش دلوقتي بعدين. انت المهم كويس. جاسر: والنبي ما تقوليله أنا مين يا هانم. ديما بصت لحازم بتوتر ونقلت نظرها بين جاسر وخالد وحازم ودنيا. حازم: انطقي يا ديما.

جاسر: أنا أبقى جوزها. حازم: نعم؟ انتي اتجوزتي إمتى وإزاي وفين وليه؟ دنيا: اهدي يا حازم وإحنا هنفهمك. خالد: ومين قال إنه الزفت حازم ده. عدى 15 سنة. حازم طلع سلسلة لديما وديما أول ما شافتها ضحكت. ديما: لا هو هو. ده حازم. دنيا: انت لسه شايل السلسلة دي. جاسر: المفروض يعني أعمل معاك إيه يعني؟ حازم: في إيه يا ابني أنا أخو مراتك. جملات: خلاص يا جاسر. فتحيّة: شرفت يا ابني. حازم: تسلمي يا طنط. عبير: طنط. حازم: مين دي؟

جاسر قرب من حازم وديما ومسك ديما ووقفها جنبه. جاسر: معلش راجل صعيدي بقي. دنيا: انت إيه اللي جابك دلوقتي؟ ديما: وفين خطيبتك؟ دنيا: انت قلت إنك هترجع بعد شهر ونص. ديما: هو انت اتخانقت مع تالين ولا إيه؟ حازم: بس بس. اللي جابني إني خلصت شغلي وخدت إجازة بدري. وتالين مجتش لأنها مش عايزة تنزل مصر. خالد: طيب. نورت مش هتمشي بقي. دعاء ضحكت بصوت ملفت غصب عنها. جاسر: دعاء. دعاء: آسفة.

أسماء: يا خالد عيب ده. مهما كان أخو اختك هو اللي رباها. حازم: شكراً يا طنط. جاسر: إيدك تقيلة يا غبي. حازم: بتقول حاجة؟ حازم: لا لا. دنيا: مش ملاحظة حاجة؟ ديما: إيه؟ دنيا: ج ح خ. ديما: مفهمتش. دنيا: جاسر حازم خالد. حروف الجيم والحاء والخاء. ديما: اه فهمت. تصدقي إنك تافهة. فيروز: طيب نسيتوا إننا ورانا حاجات كتير ولا إيه؟ فتحيّة: اه والله. جاسر خد أخو مراتك وضّيفه. حازم: لا أي حد تاني مش ده. ديما: استني تعالي معايا.

جاسر مسك ديما من كتفها وداس عليه جامد. جاسر: عن إذنكوا عايز مراتي. خالد روح معاه. جاسر مسك ديما وطلع على أوضته. خالد: امشي قدامي. حازم: في إيه يا دنيا؟ إيه المعاملة الناشفة دي. ده أنا أرجع سويسرا. دعاء: انت كنت في سويسرا؟ حازم: اه يا جميل. خالد: ما تحترم نفسك ياض انت. قدامي. جملات: خالد وجاسر مش هيعدوها بخير. فتحيّة: ربنا يستر. خالد خد حازم معاه على أوضة الضيوف. عند ديما وجاسر. جاسر: حلو أوي الحضن اللي كان تحت ده.

ديما: اوف يا جاسر ده أخويا. جاسر: اسمعيني. مبدأياً اللي حصل لو اتكرر هندمك وأندمه يا ديما. ثانياً الكلام معاه بحدود وتقعدي بعيد عنه بكام متر. ومتقوليش كلمة أخويا دي تاني. ديما: انت رزل بس كده. جاسر: قلت اللي عندي عايز أشوف خلاف كده. جاسر سابها ومشي. وديما قعدت تدبدب في الأرض. ديما: رزل متملك. ديما نزلت وراه. حازم: ممكن سؤال؟ خالد: لا. حازم: في إيه يا ابني أنا قتلك قتيل؟

خالد: دي أوضتك وهنا صعيدة يعني الكلام مع الستات بحساب ويستحسن متتكلمش خالص. حازم: استني هنا فين دنيا وديما؟ خالد: ملكش دعوة بيهم. حازم: يا ابني انت مجنون. خالد: أنا قلت اللي عندي. خالد سابه ومشي. حازم: إيه المجانين دول؟ الصبر. حازم دخل خد هدوم ليه وخد دوش وخرج لبس بنطلون وتيشيرت. حازم: ممكن اقعد؟ ديما: اه طبعاً اتفضل. جاسر بص لها بنظرة مخيفة وهي وطت رأسها. حازم: أخبارك؟

درستي إيه وعملتي إيه وفين محسن وتسنين وأخبار محمد وأولفت ولسه الواد فارس بيضايقك ده. ديما بصت لدنيا عشان تنقذها من الموقف. دنيا: عمو وطنت بخير وبابا وماما بخير. وأنا وديما درسنا إدارة أعمال وفارس ده هو وأهله عزلوا من زمان. حازم: طيب الحمد لله. حازم: وأخبار ال... حازم لسه هيكمل كلامه بس لقي جاسر رمي الطبق على ترابيزة السفرة بحدة. جاسر: أعتقد إننا بناكل والأكل ليه آدابه. وانت أكتر واحد عارف عايش بره يعني.

دعاء: جاسر كنت عايزة أروح درس مستر بلال. خالد: لا يا دعاء سمعته وحشة. دعاء: بس ده بيودينا أسئلة بتيجي في الامتحان. جاسر: هو مش قالك سمعته وحشة يبقى خلاص يا دعاء مفيش نقاش. فتحيّة: جاسر خد معاك حازم عشان هنا هنبقى كلنا ستات وبنجهز البيت عشان بكرة الفرح. جاسر: ماشي. خالد: طب الحق أمشي أنا بقي. جاسر: خالد. وبعدين الكل لقي علاء قدامهم واقف مش مظبوط. علاء: أهلاً يا ابن عمي. أهلاً يا ديما. عبير: علاء انت شارب حاجة؟

جاسر قام ووقف قدام علاء ولقاه فعلاً سكران. جاسر ضرب علاء بالقلم على وشه. وعلاء خاف منه. سارة: جاسر انت إزاي تمد إيدك على علاء؟ جاسر: محدش يتدخل. جاسر مسك علاء من رقبته. جاسر: انت مش راجل ليه ها رد؟ انت ليه مش عايز تبقى راجل زي أبوك الحاج أيمن ما تتعدل ياض ولا هتفضل فاشل زي ما انت. ديما قامت بسرعة وحاولت تمسك جاسر. ديما: جاسر اهدي بس. جاسر: ابعدي يا ديما. ديما بعدت عنهم والكل واقف بيتفرج على جاسر وعلاء.

علاء: مراتك هتبقى في حضني قريب. وهيتقال عليك مش راجل. جاسر نزل ضرب في علاء بكل غل وعنف. وخالد وحازم بيبعدوا جاسر عن علاء بالعافية. حازم: خلاص يا ابني الواد بيموت في إيدك. جاسر: وربنا ما انت داخل البيت ده يا علاء طول ما الحاج حسن مش فيه. ولما الحاج حسن يرجع ساعتها يبقى هو يتصرف. جاسر مسك علاء من هدومه ورماه بره البيت. جاسر: لما تبقى راجل تبقى تخش البيت ده. البيت ده مش بيدخله غير رجالة. جاسر قفل الباب في وش علاء.

عبير: منك لله يا شيخة منك لله. سارة: انتي إيه يا بت؟ كل مشكلة انتي السبب. ديما: أنا عملت إيه؟ فتحيّة: يا جاسر اللي عملته غلط. جاسر: خالد وانت يا زفت تعالوا ورايا. حازم: زفت ده أنا؟ دنيا: اه روح بقى عشان ميحولهوش شاورما. حازم: لا وعلى إيه؟ جاسر مشي ووراه خالد وحازم. ديما: هو عمل إيه؟ دعاء: مشفتيش عمل إيه يعني؟ سارة: وربنا ما هسيبك يا ديما. سارة قلعت شبشبها وقربت على ديما ولسه هتضربها الكل تدخل.

جملات: سيبي الشبشب انتي مجنونة يا بت. ديما: خليها توريني هتعمل إيه مثلاً. سارة: هأكلك علقة موت عشان تحرمي. دنيا: هي عملت إيه ابعدي عنها. فتحيّة: بس نزلي الشبشب يا سارة. عبير مسكت سارة وبعدتها عنهم. فتحيّة: دي آخرة تربيتك يا عبير. واحد سكرانجي والتانية قليلة الترباية. لمي عيالك وربيهم. فتحيّة: يلا كل واحد يشوف هيعمل إيه. دعاء وفيروز خدوا دنيا وديما وطلعوا على فوق. فتحيّة: خدي بنتك وعقليها يا عبير.

عبير خدت سارة وطلعوا على أوضتها. أسماء: اووووف إيه ده هم هم. جملات: سارة وديما مع بعض مشكلة. فتحيّة: أنا شايفة ديما مش غلطانة. أسماء: أيوه بس برضه سارة وعبير مش هيسكتوا دول راضعين شر. جملات: ربنا يستر. فتحيّة: يلا نشوف الأكل. عند جاسر. خالد: طب دلوقتي هنعمل إيه؟ انت مقتنع باللي عملته؟ جاسر: انت مش شفت هو عمل إيه خليه يتربي شوية. حازم: طب أنا قاعد بعمل إيه هنا؟ جاسر: ما تسكت شوية يا عم. خالد: إيه ده شخص حشري؟

حازم: انت اللي قلت خالد وانت والزفت ده تعالوا ورايا. خالد: كويس إنك عارف إنك زفت. حازم: أنا ساكت من الصبح ومحترم أختي ديما ودنيا أكتر من كده. ممكن أقل أدبي وإيدي تطول. جاسر: هنخاف مثلاً. حازم: في إيه عملت لكم إيه؟ خالد: مش طايقينك بس. حازم: هتأخدوا عليا متخافوش. جاسر: يا ريت تمشي في أسرع وقت. عند البنات. دنيا: ما تنجزي اتصلي بيه. ديما: لا متعودتش آخد الإذن من حد عشان أخرج. دعاء: بس ده مش حد يا ديما ده جوزك.

فيروز: أيوه اسمعي الكلام. ديما: لا لا. الباب خبط. ديما: ادخل. أسماء: يلا يا بنات. ملبستوش ليه؟ دنيا: إحنا لبسنا بس فاضل ديما. أسماء: طب يلا يا حبيبتي. ديما: بيقولوا لازم أتصل بجاسر أستأذنه وأنا متعودتش أستأذن من حد. أسماء: لا يا حبيبتي بس ده جوزك اتصلي بيه يلا. دعاء: هتلاقيها مكسوفة مننا هنمشي إحنا يا ستي. ديما: لا طبعاً عادي. فيروز: لا هنستناكي تحت يلا. دنيا وفيروز ودعاء نزلوا تحت.

ديما: اوف لا مش هتصل بيه. طب أتصل بيه. ديما: بصوا هعمل اللي عليا. ديما طلعت تليفونها واتصلت بجاسر. الخط اتفتح. جاسر: الو يا ديما. ديما: احم يعني بص. جاسر: انجزي يا ديما. ديما: بص أنا متعودتش على كده. جاسر: في إيه؟ ديما: هما بيقولوا إن لازم أستأذنك قبل ما أخرج. جاسر: اه طيب. إيه بقى؟ ديما: إيه مفهمتش؟ جاسر: إيه بقى عايزة إيه؟ ديما: رزل. ديما: هروح معاهم الحنة. جاسر: مع مين بالظبط؟

ديما: مامتك وطنط أسماء وطنط جملات ودنيا ودعاء وفيروز. جاسر: تمام. هتلبسي إيه؟ ديما: لسه معرفش هشوف. جاسر: قبل ما تنزلي بيه ابعتي الفستان. ديما: نعم؟ ديما: لا مش معنى إني احترمتك وقلتلك إني هخرج يبقى تزيد فيها بقى. جاسر: قلت كلمتي ملكيش خروج إلا لما أعرف انتي هتلبسي إيه وإلا مش هتروحي. ديما: مستفز مستفز. ديما قفلت في وشه وقعدت متعصبة. ديما: ربنا يأخدك. بكرة بس كده اهو.

ديما دخلت أوضة الملابس بدأت تدور على طقم يليق بالصعيد بالنسبة ليها. ديما لبست فستان طويل مفتوح من الجنب ومن قدام باللون الأحمر وبنطلون رمادي واسع ومش باين إنه بنطلون باين إنه قطعة تبع الفستان والفستان بحمالة عريضة وسابت شعرها وحطت مكياج خفيف ولبست صندل باللون الأسود. وبعدين ديما راحت وقفت قدام المراية وبدأت تأخد وضعية الصورة واتصورت صورة ليها بشياكة وبعتتها لجاسر. عند جاسر. حازم: انت بتمشي كلامك على ديما؟

جاسر: طبعاً. حازم: شابوه ليك. دي صعبة في الموضوع ده. خالد: شكلك تعرف عن ديما كتير. حازم: أختي وأنا اللي مربيها. وبعدين جت ماسدج على تليفون جاسر وجاسر ابتسم بانتصار. وفتح التليفون. جاسر أول ما شاف الصورة ركز في وش ديما وابتسم. وبعدين بص على الفستان ولقاه محترم نوعاً ما. جاسر بعت لها ماسدج: ماشي مش بطال متتأخريش ولما تيجوا تمشوا ابعتي رسالة. ديما: والنبي. عيل رخيم وزبالة ورزل.

ديما بعتت ليه ماسدج: تؤمر بحاجة تاني يا سي السيد؟ جاسر شاف رسالتها وضحك. جاسر بعت ماسدج: ابقي جهزي الماية السخنة عشان لما أرجع تغسليلي رجلي يا أمينة. ديما: رزل. ديما بعتت ماسدج: غور في داهية. ديما نزلت لتحت عند الباقي وجاسر قفل تليفونه وقعد يضحك وخالد وحازم باصين ليه باستغراب. فتحيّة: إيه الجمال ده؟ ديما: شكراً يا طنط. عبير: يلا بينا. دنيا: هنروح بالحنطور صح؟ أسماء: حنطور إيه بس. هنركب عربية. جملات: يلا يا بنات.

ديما: مين هيسوق؟ دعاء: السواق. هيكون مين؟ فيروز: يلا بقى نحضر الحنة من أولها. ديما: هي سارة وطنت عبير مش جايين؟ دعاء: طلعت قلت لهم مردوش عليا. ديما: اه تمام طب يلا بينا. وكلهم ركبوا عربيتين ووصلوا للبيت اللي فيه الحنة. وبدأوا ينزلوا. ست: اتفضلي يا ست فتحية اتفضلي. فتحيّة: ربنا يخليكي يا أم سعاد. ست: اتفضلوا يا هوانم اتفضلوا. دنيا: أهلاً يا طنط. ست: أهلاً يا حبيبتي. ادخلوا يلا.

وبدأوا الكبار الأول يدخلوا وبعدين وراهم البنات. ست: اتفضلي اقعدوا هنا. أسماء: اقعدي يا ديما. واقفة ليه؟ ديما: معرفش بس حاسة إني اتخنقت فجأة. جملات: طب تحبي تطلعي بره شوية؟ ديما: ماشي. فتحيّة: يا أم سعاد. أم سعاد: نعم. فتحيّة: معلش وصلي ديما لبره تشم نفسها عشان مخنوقة. أم سعاد: اتفضلي يا هانم معايا. أم سعاد طلعت ديما بره المكان. وديما خدت نفسها بحرية لأنها كانت مخنوقة. ديما طلعت تليفونها واتصلت بوالدها. الخط اتفتح.

محسن: خلاص افتكرتي دلوقتي إنه ليكي أب. ديما: آسفة يا بابا حصلت مشاكل كده. محسن: حصل إيه؟ ديما: خالد عمل حادثة هو ودنيا وحازم رجع كده يعني. محسن: وانتي كويسة؟ ديما: اه الحمد لله. جهزتوا ميعاد العملية؟ محسن: لسه. ديما: طيب. أخبار ماما إيه وطنت وعمتو؟ محسن: كلنا كويسين يا حبيبتي. ديما: بابا في حاجة عايز تقولها؟ محسن: طول عمرك لماحة يا ديما. ديما: في إيه؟ محسن: ممكن أطلب طلب؟ ديما: اتفضل يا حبيبي.

محسن: لو حصلي حاجة يا ديما متسبينيش وجايه منه. ديما: بعد الشر عليك يا حبيبي. أهم حاجة انت تبقي بخير. محسن: توعديني؟ ديما: حاضر يا بابا. محسن: بحبك يا روحي خلي بالك من نفسك ومن كل اللي حواليكي. ديما: وأنا بحبك أكتر سلملي على كل اللي عندك. باي. محسن: باي. ديما خلصت مكالمة ودخلت تاني البيت. بنت: مالك يا شابة داخلة خارجة يعني؟ ديما: أفندم؟ بنت: إيه يا حبيبتي؟ مالك كده ما تفهمينا. ديما: طب حقيقي أنا مش فايقة.

بنت: إيه شكلك طلعتي ما زي ما بيقولوا. ديما: أولاً معرفش مين بيقول عليا إيه ولا مش بيقول إيه ولا يهمني ولا يفرق معايا أصلاً. وابعدي عني. بنت: لا طلعتي مغرورة زي ما بيقولوا. ديما: مش فايقة. ديما سابتهم ومشيت. وراحت قعدت عند الباقي. فتحيّة: إيه اللي أخرك؟ ديما: بنات كده بيضايقوا في الواحد. فيروز: معلش دول صحاب سارة. ديما: يا ستي ميهمنيش. دعاء: بنات رزلين. دنيا: اطمنتي عليهم؟ ديما: اه.

جملات: طب اطلعوا يا بنات للعروسة انتوا. دنيا: الله ماشي. دعاء: تعالوا معايا. والبنات طلعوا وراحوا للعروسة. ديما: اهلين. سعاد: انتي العروسة الجديدة؟ ديما: إيه ده طلعت مشهورة بقى. سعاد: انتي طلعتي قمر أوي. دنيا: ماشي يا ست سعاد. سعاد: لا والله مش قصدي. فيروز: ألف مبروك يا سعاد. سعاد: الله يبارك فيكي. ديما: مجبورة على الجواز ولا؟ سعاد: لا مش مجبورة الحمد لله. دنيا: الحمد لله.

والبنات قعدوا يتكلموا ورسموا حنة بس ديما رفضت ترسم. وعدى الوقت والبنات مبسوطين أوي وبيضحكوا. أسماء: يلا يا بنات بينا. ديما: يا خسارة. سعاد: ما أنا جايلك بكرة. دنيا: اشطا يلا. والبنات نزلوا والستات ولقوا خالد وجاسر وحازم واقفين. جاسر: اركبوا. جاسر ركب وجنبه ديما. وورا دعاء ودنيا وفيروز. خالد ركب وجنبه حازم وورا فتحية وأسماء وجملات. جاسر: انبسطوا يا بنات؟ دعاء وفيروز ودنيا: اه. جاسر: إيه هو انتي مش بنت ولا إيه؟

ديما: هو فعلاً في ناس بتتكلم عليا. جاسر: مين قال كده؟ دنيا: يا ديما انسى دول من طرف سارة خلاص. جاسر: حصل إيه؟ ديما: في بنات وقفوني وقعدوا يضايقوني وهما صحاب سارة وشكل سارة مسلطاهم يضايقوني. مع إني معملتش ليها حاجة. جاسر: خلاص معلش. دعاء: بس مشفتش ديما بتعرف ترقص إيه. أكيد شوفتها يعني انتوا متجوزين. ديما: اخرسي يا دعاء. وفجأة بدون مقدمات صوت رصاصة دوت في المكان.