رواية امرأة في عصمة صعيدي الفصل الثاني عشر 12 - بقلم سلسبيل

سارة خرجت من البيت وراحت لمكان قريب من البيت زي كوخ محدش بيروحه. سارة دخلت الكوخ وخلعت عبايتها. سارة: اتأخرت عليك؟ شخص: جوي جوي. سارة: وحشتني يا مازن. مازن: وأنتي أكتر يا قلب مازن. مازن قام وحضنها وهي بادلته الحضن. سارة: تعرف عمري ما حسيت بالأمان مع حد غيرك من ساعة ما عرفتك. مازن: طبعاً يا بنتي أنا الأصل. سارة: ربنا يخليك ليا يا حبيبي. مازن: الخطة ماشية تمام. سارة: آه جاسر الأاهبل فاكرني لسه بحبه.

مازن: محدش بيحبك غيري. سارة: وأنا مبحبش حد غيرك يا حبيبي. عند ديما وجاسر. جاسر: يلا. ديما: تمام. جاسر ركب الخيل وبعدها مد إيده لديما. ديما: أنت يعني بتقول يا أوزعة مثلاً؟ جاسر: ليه؟ ديما: أنت طويل أوي. جاسر: يا رب. أعمل إيه طيب أنتي اللي قصيرة. ديما: متقولش الكلمة دي تاني. جاسر: ديما انجزي الليل هيليل. ديما: اوف تمام. ديما مسكت إيد جاسر ومن غير مجهود كانت قاعدة على الخيل قدام جاسر بفضل جاسر طبعاً.

ديما: أنا عايزة أنام أوي. جاسر: لما نوصل. ديما: تمام. جاسر بدأ يمشي بالخيل وديما رجعت رأسها عليه وكانت مغمضة عينيها. جاسر لنفسه: محسساني إنك بنتي مش مراتي، الصبر يا رب. طفلة، أنا اتجوزت طفلة. وبعد فترة جاسر وصل البيت ولقى ديما نامت. جاسر نزل براحة وشالها ودخل البيت. فيروز: أه يا عم على الناس اللي بتخرج وبتتأخر. جاسر بابتسامة: فين ناس هنا بتغير؟ ديما: جاسر. جاسر: نعم. ديما: عايزة أكل. جاسر: تمام.

جاسر قعد ديما على الكنبة. فيروز: احكي احكي حصل إيه؟ دعاء: إيه ده أنتي جيتي؟ احكي يا بنتي عملتوا إيه؟ ديما: ولا أي حاجة، مستمتعتش خالص. جاسر: تصدقي إني غلطان إني عبرتك وقلت أركبك حصان، لأ ومش أي حصان، حصاني اللي مبخليش أختي تلمسه. ديما: فيه إيه يا ابني؟ روق. بهزر، أنا كنت مبسوطة أوي أوي لدرجة إني نفسي أجرب تاني. خالد: أهلاً بالناس اللي راجعة المغرب. جاسر: تعالي معايا يا خالد. خالد: تمام. جاسر وخالد بعدوا عن البنات.

ديما حكت للبنات اللي حصل. خالد: فيه إيه؟ جاسر: كانوا فين ناس ورانا راكبة أحصنة بس أنا هربت منهم عشان كان معايا ديما. خالد: تفتكر نفس الأشخاص؟ جاسر: ليه لأ؟ خالد: وليه أه؟ جاسر: أنت قاصد تتفلسف وخلاص. خالد: أنا واحد هيروح يجيب الأميرة من القاهرة، قال إيه مينفعش تقعد لوحدها. جاسر: متأكد إنه هيبقى على قلبك زي العسل. خالد: يا عم غور، دي ماشية مع طوب الأرض يا ابني.

جاسر: طب ما أختك كانت تعرف ولاد قد إيه، ومع ذلك تقبلتها عادي يعني. خالد: ديما غير دنيا. جاسر: هنشوف. خالد: بس احكيلي عملتوا إيه؟ جاسر: أختك دي مسخرة يا ابني، تكون خايفة وبعدين تضحك، ومعاها مع كل حاجة ذكرى وحشة. خالد: أينعم أنا معرفهاش كويس بس ممكن فعلاً تكون عانت كتير. جاسر: ممكن. ديما بصوت عالي: عموووووووووو جااااااااسر خااااااااالد. جاسر: إيه صوتك عالي ليه؟ ديما: هتأكلوا؟ حسن: فيه إيه يا مجنونة؟

ديما: أنا غلطانة، كنت بعمل خير. خالد: بعد كده تقومي وتيجي تندهينا. ديما: والنبي؟ يا ابني ده أنا وحازم كنا نأكل ونخلص الأكل وبعدين نفتكر ننادي على بابا وماما. جاسر بهمساً: يادي حازم يا شيخة اللي طالع في البخت. ديما: تسلموا إيديكم، الأكل حلو أوي. أسماء: بالهنا والشفاء يا روحي. جملات: ده أنتي اللي قمر. دعاء: عن إذنكم هروح الدرس. سارة: ومن إمتى فيه بنت بتخرج في الوقت ده؟ ديما بصت على الساعة برفعة حاجب.

فيروز: إيه يا بنتي باصة كده ليه؟ ديما: هو كده وقت متأخر؟ فيروز: آه هنا. ديما: على كده أنا مشفتش ساعة واحدة تربية. أنا كنت برجع البيت الساعة واحدة اتنين بليل ومرة وصلت البيت الساعة 6 الصبح. أيمن: كنتي بتعملي إيه؟

ديما: مرة كنت راجعة من رحلة بس العربية اتعطلت ودنيا كانت سكرانة ومش مركزة معايا وأنا كنت واقفة في الشارع مستنية أي حد يعدي بس محدش عدى، وكان لازم حد يزق العربية وأنا كنت خايفة. وبعدين على الساعة خمسة الفجر كان النهار بدأ يطلع، في عربيات بدأت تظهر وزقت معايا العربية ودنيا كانت في دنيا غير الدنيا. وأنا وديت فلوس للناس وطلعت أجري بالعربية لغاية ما وصلت في ساعة وكنت بموت وأول ما دخلت بابا وماما وعمو محمد وطنط أولفت قعدوا يزعقوا ليا وأنا ساندة دنيا بين إيدي.

ديما بضحك: رميت دنيا على الأرض وطلعت جري على أوضتي وقفلّت الباب واترميت على السرير، صحيت تاني يوم. عبير: أنتي بتشربي خمرة؟ ديما: لأ عمري ما جربتها. بس... جاسر: إيه؟ ديما: ها، لأ خلاص خلاص. جاسر بحدة: قولي كملي. ديما: في واحد غصب عليا أشرب وساعتها سكرت جامد وخدني لأوضة الديسكو بس أمن المكان ودنيا لحقوني في آخر لحظة واغمي عليا وعملولي غسيل معدة. وفضلت في المستشفى يومين. جاسر: يا حلاوتك.

جاسر بعصبية: ولو كان حصلك حاجة كنتي هترتاحي. ما تردي. ديما: ده كان زمان وأنا عندي 18 سنة. جاسر: طفلة، طول عمرك طفلة. جاسر سابها وقام مشي. حسن: أنتي غلطانة برضو يا بنتي. ديما: كنت صغيرة. خالد: عنده حق، طول عمرك هتفضلي طفلة. كل الرجالة قامت كل واحد ورا التاني. ديما بدموع: هما بيحاسبوني على حاجة قديمة. ما أنا كان ممكن محكيش أي حاجة. دعاء: معلش يا حبيبتي. فيروز: ميقصدوش، هما خايفين عليكي.

ديما قامت بسرعة جري وطلعت على أوضتها. سارة: مش متربية. فتيحة: سارة ابعدي عن ديما عشان أنا هقفلك. عبير: هي سارة عملت حاجة؟ فتيحة: واضح واضح. ديما طلعت أوضتها غسلت وشها وخرجت لقت جاسر واقف في البلكونة. قربت منه وحضنته من ضهره. جاسر: سارة. ديما: أنا ديما. جاسر اتصدم جداً لأنه قال سارة ولأن ديما حضناه. ديما: آسفة. جاسر: ولا يهمك. ديما: مسامحني؟ عارفة إنك شخص صعيدي وفيه حاجات ممكن تضايقك وأنا مش واخدة بالي.

ديما: أنا آسفة. جاسر: خلاص ولا يهمك. جاسر باسها من راسها وديما حضنته. ديما لنفسها: إيه الإحراج ده؟ بس أنا مبسوطة. جاسر لنفسه: حضنها دافئ زي الأطفال. ديما: احم، آسفة، انفعلت. يعني اللي هو لما كنت بعتذر لحازم وكان يتقبل اعتذاري كنت بحضنه. جاسر بعصبية: رجعنا للزفت حازم تاني. ديما: ده أخويا. جاسر بعصبية: مش أخوكي يا ديما، هو بس متربي معاكي. انسى أي حاجة ليها علاقة بيه. ديما: بس... جاسر بعصبية: اسمها إيه يا ديما؟

ديما: معرفش ومش هقول. أنا بحب حازم وحازم أخويا. جاسر قعد يقرب من ديما وديما ترجع لورا بتوتر. جاسر: قولتي إيه يا ديما؟ اسمها إيه؟ ردي. ديما: معرفش. جاسر: برضو. ديما: كفاية بقى هقع. ديما فعلاً كانت هتقع بس مسكت في قميص جاسر جامد ومغمضة عينيها. جاسر: افتحي عينك. ديما: فتحتهم. جاسر: طيب. اسمها إيه بقى؟ ديما: معرفش. ديما بتجري عشان تهرب من قدامه، مسكها جامد وقربها منه أكتر. جاسر: مش هتعرفي تهربي.

ديما: اسمها حاضر خلاص، اسمها حاضر. جاسر: هو أنا كنت بقول إيه أصلاً؟ ديما: أنت مش عايزني أكلم حازم تاني، وأنا بقولك أهو حاضر بس ابعد بليز. جاسر يبعدها بعيد عنه ويضحك باستفزاز. ديما: يا مستفز يا رزل. جاسر: متشكر. ديما: ابقى قابلني لو سمعت كلامك. ديما سابته وجريت على الحمام وهو ملحقهاش. جاسر بصوت عالي: ما أنتي مش هتفضلي طول عمرك في الحمام يعني. عدى اليوم بدون أحداث مهمة. لما ديما خرجت ملقتش جاسر ونامت.

جاسر جه وراح نام جنبها. دعاء ذاكرت ونامت. وفيروز كانت قاعدة معاها. والباقي نام. في الصباح الباكر. خالد: مش عارف أنا أسافر القاهرة ليه، الخدام بتاعها. فيروز بضحك: يا ابني أنت قلت الجملة دي مية مرة. خالد بعصبية خفيفة: ابعدي عني يا فيروز، ابعدي عني. فيروز: خلاص خلاص، متزعلش. فتيحة: مالك متنرفز ليه؟ خالد: يا مرات عمي خليهم يبعدوا من وشي عشان مطلعش عصبيتي عليهم. دعاء: أنا عملتلك حاجة؟

فيروز بضحك: خالد متنرفز عشان هيروح يجيب دنيا من القاهرة. خالد بعصبية: أه طبعاً، ما أنا سواق الهانم. جملات: عشان خاطر أختك يا خالد. خالد: ما تتزفت تقعد لوحدها أو متقعدش، هي دي بتفهم في العيب أساساً. أسماء: خالد عيب نتكلم في أعراض الناس، ممكن تكون أحسن من مية واحدة محجبة. خالد: أنا غاير في داهية. خالد: يا رب أروح ألاقيها ماتت. دعاء بضحك: ده اتجنن. خالد مشي ركب عربيته وراح على القاهرة. حسن: فتحية، أسماء، عبير، جملات.

الكل: نعم يا حاج. حسن: النهاردة فيه قعدة نشوف الرصاص اللي اتضرب ده إيه. فتيحة: ماشي يا حاج. حسن: وأنتي يا سارة أنتي ودعاء وفيروز تشتغلوا معاهم وتساعدوهم. سارة: ويا ترى السنيورة ديما هتشتغل معانا ولا إيه؟ حسن: لما يقوم جاسر وهي تشوف احتياجاته وتفطر لو قدرت تبقى تعمل. عبير: هي دي أساساً ست بيت أو تعرف تشوف احتياجات زوجها. جملات: مليكيش فيه يا عبير طالما جاسر مرتاح خلاص. حسن: مش فاضي لكلام الستات. حسن: فين علي وأيمن؟

أسماء: علي راح هو والحاج أيمن للأرض. حسن: ماشي. جهزوا نفسكم. حسن مشي. فتيحة: سمعتوا؟ يلا كل واحدة تتولى حاجة تعملها. وخلوا الخدامين يعملوا معاكم. يلا. عند ديما وجاسر. جاسر كان نايم وديما نايمة على إيده. ديما بدأت تفوق وقامت من جنب جاسر ودخلت الحمام. غسلت وشها وخرجت دخلت أوضة الملابس. ديما لبست فستان أبيض قصير عند الركبة بحمالة عريضة ولبست صندل بكعب أحمر وحطت روج باللون الأحمر نفس لون الصندل وسابت شعرها.

ديما لسه جاية تخرج من الأوضة لقت جاسر بيدخل. ديما بخضة: أنت صحيت امتى؟ جاسر: مش وقته. وسعي يا ديما، متأخر. ديما: تمام ماشي. ديما خرجت وجاسر لبس عباية باللون الزيتي وخرج. جاسر: أنتي ناوية تنزلي كده؟ ديما: آه. جاسر: ماشي. بس متخرجيش بيه بره البيت ولا حتى الجنينة. ديما: اشمعنى؟ جاسر: في البيت علاء مش موجود اليومين دول. لكن بره البيت في الجنينة في غفر خلاص. ديما: تمام ماشي. جاسر نزل وديما وراه. جاسر: فين الفطار؟

فين الحاج؟ فين خالد؟ دعاء: إيه يا ابني نازل تسأل بس؟ جاسر: مليكيش دعوة يا لمضة. أسماء: الفطار أهو، كل أنت وديما. الحاج حسن راح الأرض وخالد راح يجيب صاحبة ديما. ديما: تمام. أنا جعانة أوي. جملات: جاسر الحاج بيقولك اجهز النهاردة القعدة. جاسر: تمام. كل واحد راح شاف شغله وجاسر وديما بيأكلوا. ديما: قعدة إيه؟ جاسر: بصي يا ستي، الحاج حسن هو يعتبر شيخ البلد هنا وهو اللي بيحل الأمور والمشاكل مبندخلش البوليس في الموضوع.

جاسر: لازم نعمل قعدة نشوف مين ضرب نار ولو لقيناه بيبقى فيه تعويض وطالما غلطوا في عيلة القاضي هتبقى العقوبة كبيرة شوية. ديما: زي إيه مثلاً؟ جاسر: ما تسيبيني آكل يا ديما. ديما: اوف حاضر. بحاول أعرف معلومات عن البلد عشان لو طولت في العيشة هنا. جاسر: بصي هبقى أقعد معاكي وقت ما أفضي وأحكيلك عن بلدنا. ديما بفرحة: أشطا، وأنا هكلمك عن القاهرة. جاسر: تمام، سيبيني آكل بقى. ديما: خلاص، كل. شكراً.

جاسر خلص أكل وقام باس رأس ديما وخرج على شغله. ديما اتصدمت من اللي هو عمله بس محطتش في دماغها. فيروز: ناس تقعد تأكل وتتباس وتسيبانا بنتزفت نروّق البيت. دعاء: آه، لولا إنك عروسة جديدة بس. ديما بضحك: أيوه اشتغلوا اشتغلوا. سارة: قومي يا أختي اشتغلي شوية. ديما قعدت وحطت رجل على رجل وبصت لسارة. ديما بتناكة: عروسة جديدة. سارة: وربي لأربيك يا بت انتي. ديما: روحي اتربي انتي الأول. سارة: مش دايمة يا ديما.

ديما: تصدقي النغم حلو، مش دايمة يا ديما. سارة بصت ليها بغضب وفيروز ودعاء بيضحكوا. ديما: أنا قايمة وجاية تاني. ديما قامت وراحت على المطبخ. ديما: يا أهلين، أخباركم؟ جملات: حبيبتي، أخبارك أنتي؟ ديما: فل. قولولي بقى أنا أعمل إيه؟ فتيحة: ولا أي حاجة، روحي اقعدي، أنتي لسه جديدة، وصاحية كمان من النوم، وكمان أنتي لسه عروسة جديدة. ديما: لا لا، قولولي أعمل إيه؟ أسماء: ما تعملي بطة زي المرة اللي فاتت.

ديما: لا أنا كفاية إيد اتحرقت وإيد اتجرحت، حرام. جملات بضحك: عشان كده بنقولك روحي اقعدي. ديما: آه، قولولي بقى أعمل إيه؟ عبير: حد يلاقي دلع ومديتدلعش. ديما: آه، لأني مدلعة لوحدي. عبير: مش أنتي عايزة تعملي حاجة؟ تعالي احشي انتي الحمام. ديما: لا، يععع. أنا أدخل إيدي في الحمام وكده وهو كمان نيء، لا لا. أنا أروح أقعد بكرامتي أحسن. ديما سابتهم وطلعت أوضتها وقعدت على النت. والكل في البيت بيشتغل.

جاسر بيشتغل في الأرض وتعبان والكبار بيتكلموا. في مكان تاني. عند خالد. خالد وصل القاهرة بعد فترة وراح على بيت محسن. خالد لقي محسن وتسنيم واقفين في الجنينة. خالد: احم احم. محسن: أهلاً يا خالد. خالد: أهلاً يا أبوي. تسنيم: إزيك يا خالد. خالد: الحمد لله. محسن: ثانية دنيا هتيجي. محمد: جهزت يا محسن؟ محسن: أه، فين دنيا؟ أولفت: بتظبط لبسها. تسنيم: ماشي. محمد: أنت خالد؟ خالد: أه. محمد: بنتي في عينك يا خالد. خالد: أكيد يا عمي.

محمد: يلا، ميعاد الطيارة هنتأخر. تسنيم: هي ديما عاملة إيه يا خالد؟ خالد: كويسة الحمد لله. تسنيم: يعني عارفة تعيش هناك؟ خالد: آه، حتى جاسر خدها وركبها الحصان بتاعه. أولفت: ديما بتخاف من الأحصنة من ساعة ما وقعت اتكسرت. محسن: البركة في جاسر. يلا إحنا. محمد: دنيا زمانها جاية. خالد: تمام. محسن وتسنيم ومحمد وأولفت سافروا ألمانيا. خالد واقف مستني دنيا وعلى آخره.

خالد: طبعاً من حقها تتزفت وتتأخر، مش أنا السواق الخصوصي بتاع جنابها. دنيا: خالد. خالد: آه زفت. دنيا: كنت بتكلم نفسك؟ خالد: آه كنت بكلم نفسي. عندك اعتراض؟ دنيا: مالك يا ابني بتكلمني كده ليه؟ هو أنا عملت عملة؟ خالد: أنتي مالك؟ خشي العربية، انجزي. دنيا: ولو مدخلتش؟ خالد: هسيبك وأمشي وأنا أساساً مش عايز آخدك معايا. دنيا: يا رزل. خالد: هتركبي ولا أمشي؟ دنيا: لولا إنك أخو ديما بس. خد الشنطة.

خالد: مش الشيال بتاعك أنا. شيليها إيه بسكوتة. خالد سابها وراح ركب مكانه. ودنيا حاولت كتير تشيل الشنطة تحطها في العربية مش قادرة. خالد نزل تاني وخد الشنطة حطها في العربية. خالد: إيه جايبة برميل معاكي؟ دنيا: أفندم؟ خالد: مفيش. خالد راح ركب وهي ركبت جنبه وطول الطريق ساكتين. في الصعيد. ديما لقت تليفونها رن. مسكته واستغربت. الخط اتفتح. ديما: الو. جاسر: ديما أنا جاي كمان خمس دقايق ومتأخر، اختاري أي طقم بسرعة عقبال ما أجي.

ديما بصدمة: ها؟ جاسر: انجزي، القعدة فاضل عليها عشر دقايق، انجزي. ديما: طيب طيب. هتلبس إيه بالظبط؟ جاسر: عباية، انجزي أنا قربت أوصل. ديما: اوف، إيه ده؟ اختار له أنا إيه بقى؟ ديما قامت ودخلت أوضة الملابس وقعدت تدور بين الهدوم. لقت إن العبايات نوعها غالي ونضيفة. ولقيت ساعات وأطقم شيك أوي وبدل وجزم وحاجات كتير. ديما اختارت لجاسر عباية باللون الأبيض وشال أسود فوقها (اللي هو بيبقى حاجة كده طويلة زي الشال)

وجزمة سوداء وساعة شيك باللون الأسود. ديما بابتسامة: كده تمام. الله عليا. جاسر: اخترتي؟ ديما: آه آه. ديما لقت جاسر بيبدأ يقلع عبايته. ديما بصدمة: إيه؟ لا، أهدي. لما أطلع. جاسر: ما تخرجي، انجزي، متأخر. ديما: ماشي. ديما خرجت. وجاسر لبس الهدوم اللي ديما طلعتها وعجبه ذوقها وتنسيقها. جاسر: عايزة حاجة؟ ديما: أي حاجة، أي حاجة؟ جاسر: قولي، انجزي، متأخر. ديما: كيس مارشميلو. جاسر بكذب: اسمه إيه؟ ديما: مارشميلو.

ديما: استني هكتبهولك في ورقة. جاسر: هبقى أبعتلك الولد أقول له اسمه باي. جاسر سابها ونزل. وديما قعدت على السرير. ديما: يعني لو كان متعلم ده مش كنت حبيته. ديما: أنتي غبية، تحبي صعيدي ليه؟ اتجننتي. ديما: هو أنا أساساً لما أحبه هحبه عشان تعليمه؟ إيه الهبل ده؟ ديما: أنا أساساً مستحيل أحبه لأن عيشته غير عيشتي، عاداته غير عاداتي. ديما نزلت للستات تحت. دعاء: الله عليكي يا جميل. ديما: فيه إيه؟ فيروز: ذوقك حلو يا قمر أنتي.

ديما: حصل إيه؟ حد يفهمني. دعاء: يا بنتي ده أول ما جاسر نزل أمي قالتله إيه الشياكة دي يا جاسر. جاسر: قالها ذوق ديما. ديما: آه، طب فيها إيه؟ فيروز: عبير بقى قعدت تقول الطقم وحش أوي عليك، إيه الذوق ده. ديما: نفسي أعرف بتكرهني ليه؟ دعاء: سيبك منها. بس أخويا كان مز... ديما: طب حلي عني، أنا هموت من الجوع. طفل: أبلة ديما، أبلة ديما. ديما باستغراب: أبلة؟ إيه يا ابني؟ طفل: أنتي أبلة ديما؟ ديما: آه.

طفل: أبيه جاسر بعتلك الشنطة دي. ديما: إيه دي؟ طفل: خدي. ديما مسكت منه الشنطة والطفل طلع يجري. دعاء: فيها إيه ها؟ فيها إيه؟ ديما: هشوف. ديما فتحت الشنطة لقت أكياس مارشميلو كتير. ديما بفرحة: إيه ده؟ ده جابهم. الله. فيروز: آه يا قلبي. يا رب جوزني واحد زي جاسر. دعاء: ده أنا أخته ومعبرنيش. دعاء: هاتي يا بت الكيس ده. دعاء خدت الكيس من ديما وطلعت تجري. ديما بصوت عالي: دعاااااء، وربي لو مسكتك هنفخك. هاتي الكيس ده بتاعي.

دعاء: لا، ابقي خليه يجيب تاني ليكي. باي، أنا بذاكر. دعاء دخلت أوضتها وقفلّت الباب. ديما: أنا عايزة المارشميلو بتاعي. فيروز: ده دخل في حجر الحكومة، باي. اطلع آكل مع دعاء. فيروز طلعت جري وديما وراها. فيروز: افتحي يا دعاء، دي جاية. دعاء فتحت بسرعة وفيروز ودعاء دخلوا الأوضة وقفلوا الباب. ديما: وربي لو مفتحتوش لتاخدوا مني علقة. دعاء: الله، المارشميلو طعمه جميل أوي. فيروز: هاتي واحد كده، اللي لونها أبيض حلوة أوي.

ديما: طب هاتوا واحدة طيب. دعاء: ابداً. ديما قعدت جنب الباب مستنياهم يفتحوا. وهما خايفين يخرجوا. ودعاء ذاكرت وفيروز قاعدة على السرير. فتيحة: يلا يا تهاني ودي الأكل للرجالة. تهاني: حاضر يا ستي. عند الرجالة. محروس: أنت كده بتغلط يا حسن. محروس: يعني إيه؟ إحنا اللي ممكن نكون عملناها. حسن: يعني أنا شاكك فيك يا محروس. محروس: اشهدوا يا رجالة، الحاج حسن بيشك فيا. جاسر: إيه؟ هو أنت ملاك يعني؟ مازن: لا، مراتك هي اللي ملاك.

جاسر بعصبية: أنت بتقول إيه يا مازن؟ أنت اتجننت. مازن: أنا بقول الحقيقة، هو فيه إيه؟ حسن بحدة: خلاص. أي حد هنا يسمع الكلمتين دول، مش عيلة القاضي اللي بتخاف ورجالتها تسد عين الشمس. وسواء كان اللي عمل كده، هعرفه وساعتها ميلومش غير نفسه. علي: سمعتوا، وأي شخص عارف حاجة وخايف يتكلم ميخافش، هبقى في حماية كبيرنا. أيمن: وليه فلوس؟ لأن الموضوع مش هيعدي بسهولة. حسن: خلاص، كله على بيته. والكل كان قايم. جاسر بعصبية: مازن.

مازن: نعم، خير؟ جاسر ضربه بوكس في وشه ومسكه من عبايته. جاسر: قسماً بربي تجيب سيرة مراتي على لسانك لأكون قاطعهولك. فاهم؟ مازن: ابعد. علي: خلاص يا جاسر. حسن: خلاص يا ولدي. جاسر زق مازن في الأرض ومشي جنب أبوه وأعمامه. وراحوا البيت وكل واحد طلع على أوضته. وجاسر طلع لسه هيروح على أوضته. جاسر: قاعدة عندك ليه؟ ديما بحزن: دعاء وفيروز خدوا المارشميلو مني. جاسر: طب أنتي ليه زعلانة؟

ديما بحزن: ما أنا قولتلك أول ما فتحت الكيس وعرفوا إنك جايب حاجة ليا خدوه وجروا وقفلوا الباب عليهم ومش عايزين يودوها ليا. جاسر: طب خلاص متزعليش، هجبلك غيرهم. ديما بحزن: أنت كنت جايب كتير، أنا عايزة دلوقتي بس. جاسر: ديما خلاص، بكرة هجبلك. ديما بحزن: لا. جاسر: عن ما قومتي، ده إيه القرف ده؟ اتجوزت طفلة أنا. بدل ما تبقي ست بيت تشيل مسئول. جاسر ساب ديما ودخل أوضته وديما دمعت. سارة بشماتة: إيه؟ زهق منك ولا إيه؟

ديما: ابعدي عني يا سارة، مش طايقاكي. سارة: أنتي مكانك في الأرض زي ما أنتي قاعدة. ديما: ماشي، شكراً. سارة سابتها ومشيت. وبعدين ديما لقت اللي بيقعد جنبها في الأرض. ديما: خير؟ جاسر: عايزة إيه؟ ديما: شكراً، مش عايزة منك حاجة. ديما قامت وسابت جاسر قاعد مكانه في الأرض. عند خالد ودنيا. دنيا: ما تشغل أي حاجة كده. خالد: بايظ. دنيا: طب اعمل أي حاجة. خالد: تحبي أرقصلك؟ دنيا بضحك: بتعرف يا بيضة. خالد: رزلة.

دنيا: يا ابني أنا عملتلك إيه؟ خالد: أهو كيفي كده. دنيا: عيل رزل. خالد من غير ما ياخد باله خبط في عمود.