رواية امرأة صنعتها الحياة الفصل الثاني 2 - بقلم موني وسكر

طلعت سيلين الأوضة عشان تجهز. وفضلت ليلي تجهز الفيلا مع الدادة. وقبل المعاد بساعة، طلعت لسيلين. ليلي: سيلين، انتي فين يا سيلين؟ سيلين طلعت من ورا الباب: ايه رأيك؟ ليلي: قمر يا سيلين. سيلين بسعادة: بجد؟ ليلي: جد جداً. سيلين: ربنا يخليكي ليا يا لولا. ليلي: ويخليكي ليا يا بكاشة. قوليلي بقى ألبس إيه؟ سيلين: الفستان الرصاصي تحفة. ليلي: خلاص، أنا هروح ألبسه بسرعة قبل ما يجوا. لو احتاجتي حاجة، ناديني. سيلين: تمام.

طلعت ليلي من الأوضة وراحت تلبس. ليلي لبست فستان رصاصي ضيق وقصير عند الركبة، وحطت ميك أب هادي، وأطلقت لشعرها العنان. ولبست شوز كعب، وحطت مجوهرات رقيقة. وسيلين لبست فستان منفوش شوية من بعد الوسط، ولونه بينك. ولبست شوز كعب ولبست مجوهرات رقيقة. ليلي كانت بتلبس المجوهرات في الأوضة. دخلت سيلين عليها فجأة. سيلين: لولا! ليلي بخضة: فيه إيه يا هبلة؟ خوفتيني. سيلين: الدادة فتحت لآدم وأهله تحت.

ليلي: حاضر، أنا خلصت أهوه ونازلة. دقايق وهنزل، تمام؟ سيلين: حاضر يا لولا. نزلت ليلي تحت ورحبت بيهم. قعدوا يتكلموا شوية، وليلي اتعرفت عليهم. الام منيرة: أمال فين عروستنا؟ ليلي: حالا تنزل. أكملت بصوت أعلى نسبياً: يا سعاد، نادي لسيلين. ودخلت سيلين وقدمتلهم الحاجة وقعدت جنب ليلي. الام: بسم الله، ما شاء الله. عروستنا زي القمر. سيلين بكسوف: ميرسي يا طنط. آدم بصوت منخفض مسمعهوش غير الأب: ما تتكلم بقى يا بابا.

الأب: آنسة ليلي، أنا يسعدني ويشرفني أطلب إيد أختك سيلين لآدم ابني. ليلي: يزيدنا شرف يا باشا. أنا عن نفسي موافقة مبدئية، بس في الأول والآخر ده رأي سيلين أهم. وبصت لسيلين: وانتي إيه رأيك يا سيلين؟ سيلين بخجل: اديني فرصة أفكر الأول. آدم بتلقائية: نعم يا ختي! آدم انعدل: احم احم. أقصد يعني، هتاخدي وقت طويل؟ سيلين هتموت من الضحك على منظر آدم: يعني مش أوي. ليلي فهمت سيلين: اللي يريحك يا حبيبتي.

الام لاحظت إن سيلين ماسكة نفسها من الضحك وفهمت إنه مقلب في آدم وحبت تجاريها. الام: حقك يا بنتي، دي جوازة مش لعب عيال. آدم جز على سنانه: والله! الام: هههههههه، خلاص كفاية كده يا سيلين. الواد شوية ويطق. سيلين: ههههه، حبيبتي يا طنط، فهمتيني من أول نظرة. ليلي: هههههههه. الأب وآدم قاعدين مش فاهمين حاجة. الأب: هو في إيه يا جماعة؟ إحنا مش فاهمينه. الام: سيلين حبت تزهق آدم يا سيدي، وهي موافقة. آدم: بجد؟

مش مشكلة، طالما هزار. نقرأ الفاتحة بقى. الكل: هههههههههه. وبدأوا يقرأوا الفاتحة. وحددوا معاد الخطوبة يوم الخميس اللي جاي. وقضوا وقت ظريف مع بعض، والام نيرة حبت سيلين وليلي جداً. وخلص اليوم بسعادة ومشوا الناس. ليلي: مبسوطة يا سيلين؟ سيلين: مبسوطة جداً جداً يا لولا. ليلي: بتحبيه؟ سيلين: جداً يا ليلي. بحب كل حاجة فيه، حتى عصبيته. ليلي: الله الله الله. امتى اتعصب عليكي بقى يا ست سيلين ومقلتيليش؟

سيلين: يلا يا لولا، دي كانت عصبية بغيره حبتين. ليلي: ههههه، ماشي يا ست سيلين. أنا هطلع أنا بقى لأني تعبت جامد انهاردة. سيلين: ماشي يا لولا. تصبحي على خير. ليلي: وانتي من أهله. طلعت ليلي لأوضتها وخدت دش وغيرت هدومها وقعدت على السرير. Flash back علاء: قولت تتجوزيني؟ ليلي: أكيد لأ طبعاً، إنت أكيد راجل مجنون. اختشي على سنك. علاء: أنا مش بعمل حاجة غلط، ده أنا هتجوزك على سنة الله ورسوله. ليلي: أكيد مش موافقة طبعاً.

علاء: اممم، أبقى كده؟ طيب ابقي خلي بالك من أختك الصغيرة الحلوة دي. كان اسمها إيه؟ آه، سيلين. ليلي بصدمة: إيه؟ سيلين؟ علاء: أيوه. ليلي بخوف: لا لا لا، أنا ممكن أعمل أي حاجة بس متأذيش أختي. علاء: قدامك يومين تفكري، ومتحوليش تهربي لأني هجيبك هجيبك. ليلي: حاضر. علاء: اتفضلي على شغلك. خلصت ليلي شغلها وروحت البيت. سيلين: لولا، اتأخرتي ليه؟ ليلي: معلش يا سيلين. سيلين: حصل حتة موقف انهاردة في المدرسة.

ليلي: بعدين يا سيلين، أنا تعبانة دلوقتي. أنا هدخل أريح شوية. سيلين: ماشى. دخلت ليلي أوضتها وكانت مدايقة أوي ومش عارفة تتصرف إزاي. وعدى اليومين وليلي بتفكر، لحد ما خدت قرار. Back فاقت ليلي من شرودها وطفت النور ونامت.