رواية امتلكني القمر الفصل الثاني 2 - بقلم يارا عبد العزيز

فهد بصدمة: بنت عامل في مصنع وكمان من الصعيد، الله يرحمك يا بابا ويسامحك بجد. فريدة: لازم تسافر سوهاج النهاردة وتتجوزها في أقرب وقت. فهد بتنهيدة: حاضر، بس سارة أنا بجد خايف أخسرها. فريدة: قولتلك ملكش دعوة بسارة أنا هتصرف، يلا روح وما تضيّعش وقت. فهد: تمام. على الناحية الأخرى في منزل صغير في محافظة سوهاج. قمر: صباح الخير على أجمل جدو. عاصم: صباح النور يا قمري. قمر: عامل إيه دلوقتي يا حبيبي؟

عاصم: كويس يا بنتي، هتروحي الكلية النهاردة؟ قمر: يعني عايزني أروح الكلية وأسيبك وأنت تعبان يا جدو؟ عاصم: قمر، قولي لي يا بنتي الدكتور قال لك أنا عندي إيه؟ قمر بزعل بتحاول تداريه: قال إن أنت كويس جدًا بس لازم تاكل كويس وتهتم بصحتك شوية. عاصم: ماشي يا بنتي. وقتها الجرس رن. سها: قولت أعدي عليكي قبل ما أروح الكلية نروح سوا. قمر: مش هروح النهاردة. سها: ليه؟ قمر: تعالي ندخل نتكلم جوا. سها: ماشي، إزيك يا جدو عامل إيه؟

عاصم: كويس يا بنتي. سها وقمر دخلوا أوضة قمر. سها: هاا فيه إيه؟ قمر: الدكتور قال إن جدو محتاج عملية زرع قلب. سها: يا لهوي! طب وهتعملي إيه دي أكيد غالية أوي. قمر: مش عارفة يا سها بجد. أنا مستعدة أعمل أي حاجة عشان جدو يعيش إن شاء الله حتى أتبرع بقلبي. سها: وهتعيشي إزاي أنتِ لو هتتبرعي بقلبك؟ أنتِ هبلة يا قمر! قمر: ما أنا مش عارفة أعمل إيه يا رب ساعدني. سها: أنا عارفة إنه مش وقته بس أنا لازم أقولك. قمر بخوف: فيه إيه؟

سها: إحنا هنسافر القاهرة وهنعيش هناك. قمر بزعل: إيه؟ سها: بابا جاله عقد عمل في شركة هناك ولازم نسافر معاه. قمر وهي بتحضنها وبدموع: هتوحشيني أوي يا سها. في المساء. فهد وقف قدام بيت قمر وخبط على الباب. قمر: حاضر جاية أهو. فهد: أنتِ قمر؟ قمر: آه، مين حضرتك؟ فهد: فهد كامل الناصراوي وكنت عايز أتكلم معاكي. قمر: معايا أنا؟ أنت جاي تخطفني؟ أنت من الحرامية اللي بيخطفوا الناس ويبيعوا أعضائهم؟ فهد وهو بيدخل وبيتجاهلها.

فهد قعد وحط رجل على رجل. قمر بعصبية ونرفزة: أنت مين يا عم أنت؟ هو إيه قلة الذوق دي؟ عاصم: مين يا قمر يا بنتي؟ قمر: مش عارفة مين ده يا جدي. عاصم: أنت مين يا ولدي؟ فهد بغرور: أعرفك بنفسي، أنا فهد كامل الناصراوي وجاي هنا طالب إيد الآنسة قمر. عاصم بهدوء: وأنت تعرف قمر بنت ابني منين يا ولدي؟ فهد: شفتها في الكلية. عاصم: والله يا ولدي هو الرأي رأيها هي. فهد: طب ممكن أتكلم معاها شوية لوحدنا؟ عاصم: آه طبعًا عن إذنكوا.

فهد بغرور: تعالي اقعدي. قمر وهي بتقعد وهي بتبص له بقرف: نزل رجلك، أنت مش قاعد في ريسبشن بيتكوا، المفروض إنك ضيف. فهد: آه أعمل إيه بقى؟ مضطر أستحملك، أنتِ عارفة إن اللي أنتِ بتتكبري عليه ده أوضة الخدم عندنا أحسن منه. قمر: أنت مين يا عم أنت ونافش ريشك علينا كده ليه؟ فهد بسخرية: نافش ريشي! ده إحنا هنشوف أيام عنب مع بعض، أنا جاي أعرض عليكي عرض. قمر: عرض إيه؟ فهد حكى لها موضوع الوصية.

قمر: أبوك عايزك تتجوزني أنا وكمان كاتب لي نص ثروته؟ فهد: تخيلي! قمر: أنا أصلًا ما أعرفش أبوك ولا أعرفك، أنا أول مرة أشوفك. فهد: ما علينا، تتجوزيني وتاخدي اللي أنتِ عايزاه. قمر: ...................