رواية امتلكني صعيدي الفصل السابع 7 - بقلم ندا سامي

زين جاب قهوة ورايح العربية. أول ما فتح العربية، رؤى اتصدمت. زين ضحك. رؤى بكسوف: أنا يعني قولت حرام الأكل يترمى، يعني وخسارة يبوظ وكدا، فقولت آكله وأمري لله. زين بضحك على شكل رؤى المصدوم: أنا فاهم، مفيش مشكلة. وركب العربية. رؤى كانت مكسوفة جداً، بس ضحكت هي كمان. زين شاف رؤى وهي بتضحك وسرح فيها وهي مش واخده بالها. رجع زين من شروده على صوت رنين التليفون. زين: ألو يا حياتي، وحشتيني أوي، طمنيني عليكي، عاملة إيه؟

زين: بإذن الله هجيلك يا روح قلبي قريب، متقلقيش. باي يا قمر. رؤى أول مرة تحس بالشعور دا، وكانت مضايقة جداً وبطلت أكل. وزين لاحظ. زين: إيه يا بنت الناس، مبتأكليش ليه؟ رؤى: شبعت الحمد لله، شكرا جدا ليك. زين: لا، مفيش داعي للشكر، اتفضل. زين مد إيده بشنطة من السوبر ماركت لرؤى. رؤى: إيه دا؟ زين: خدي افتحيها وشوفي فيها إيه. رؤى خدت الشنطة لقت فيها شيكولاتات كتير وعصاير وشيبسيات وكل حاجة هي بتحبها.

رؤى بابتسامة: مكنش ليه لزوم، شكرا جدا بجد. زين: العفو يا بنت عمتي. بعد نص ساعة، زين وصل عند قصر كبير جداً وفخم، والبواب فتح لزين. عم يونس: حمد الله على السلامة يا زين بيه. زين بابتسامة: الله يسلمك يا راجل يا طيب. زين دخل جنينة القصر، لقي العيلة كلها مستنياهم في البرندة. زين نزل ومخلاش حد يفتح الباب لرؤى، هو اللي فتح الباب. رؤى أول ما شافت مامتها جريت عليها وقعدت تحضن فيها وتبوسها، ومامتها كمان. وقعدوا يعيطوا.

بعد مدة ليست بقليلة، رؤى سلمت على كل العيلة واتعرفت عليهم. الهلالي: يلا يا جماعة عشان رؤى وميادة يرتاحوا ويقعدوا مع بعض. ميادة: قبل ما ندخل يا بابا، أنا عايزة أشكر زين أوي، شكرا ليك يا حبيبي إنك أنقذت بنتي وجبتها لحضني تاني. زين راح عند عمته وحضنها وباس دماغها وقال: زين: ده واجبي يا عمتي، أنتي متعرفيش إنك غالية عن زين وطلباتك كلها مجابة. ميادة: ربنا ميحرمني منك أبدا يا حبيبي، وأشوفك أسعد إنسان في الدنيا.

زين: حبيبتي يا عمتي، يلا عشان ترتاحي. ميادة: حاضر يا حبيبي، يلا يا رؤى. رؤى راحت مع مامتها وكلهم مشيوا يشوفوا اللي وراهم. الهلالي: استنى أنت يا زين، عايزك في موضوع. زين: نعم يا جدي. الهلالي: تعالي معايا على المكتب يا ولدي.