رواية اميرة القصر الصغيرة الفصل السادس عشر 16 - بقلم اسماعيل موسي

شيء مختلف. قالت أحبك، فقتلتها. كنت فاقدة الوعي عندما جرني شخص بعيد عن ساحة النزال، أخفاني في مغارة وأغلق بابها علي ثم هرب. المغارة مظلمة. لما كنت أفتح عيني كنت أفكر أني لسه محبوسة في مغارة الوادي الصامت، متكتفة بتعذب كل ليلة على يد شاب غريب.

كان بيغمى علي وأصحى والظلام يحيط بي، حرارتي كانت مرتفعة جداً، لكن جسمي كان بيقاوم. الأعشاب اللي تناولتها وقلب الحبار عملت تغييرات كبيرة في جسمي لدرجة أن جرحي بدأ يلتئم من تلقاء نفسه. كنت حاسة بالجوع والعطش لكن مش قادرة أتحرك، نزفت دم كتير وصحتي متدهورة. لما قدرت أنصب طولي فتحت باب المغارة اللي كانت قريبة من القلعة والقصر. بصيت من فوق الجبل، القلعة كانت خالية، القصر متحطم كأنه اترجم بالمنجانيق.

غربان مالية ساحة النزال بتاكل في جيف جثث ميتة، ريحة عفونتها كانت واصلة لحد عندي. نزلت من على الجبل ومشيت بين الجثث، ناس أعرفها وناس معرفهاش مقتولة بطريقة بشعة. مشفتش ولا شخص، محدش قابلني. قعدت على الأرض بحزن، فكرت في نفسي أنا خذلتهم مرة ثانية. صوفيا قضت عليهم وكل ده بسببى. كل فرقتي مختفية، فيه أطفال كتير ميتة، مدهوسة بالأقدام. رغم صدمتي إلا أني لاحظت حاجة غريبة، آثار أقدام حيوانية آثارها في الوحل. إيه اللي حصل هنا؟

اتحركت من مكاني ومشيت بين الأشجار أبحث عن أي شخص. مضى مدة طويلة قبل ما أسمع صوت أنين قادم من حفرة تحت شجرة. كانت ست عجوز رجلها مقطوعة والتعفن زحف في جسمها، قربت منها كانت بتفتح عينيها بصعوبة قالت: "أنتِ أرين؟ قلت: "أيوة أنا أرين، حصل إيه هنا؟ "مذبحة يا بنتي، خرجوا من بين الأشجار، حاصرونا وقتلوا كل الناس الموجودة." سألتها: "صوفيا؟ الست فقدت وعيها، فضلت جنبها لحد ما فتحت عينيها مرة ثانية. "مين عمل كده؟ صوفيا؟

الست عينيها ابيضت وروحها طلعت. صرخت: "صوفيا؟ إزاي فيه مخلوق مهما كان جبروته يقدر يقتل ناس أبرياء وأطفال ومسنين؟ دفنت الست العجوز، دورت على أكل كان فيه بقايا طعام في المطبخ أكلت وشربت، كنت بدأت أستعيد قوتي. لكن عقلي بيغلي، مش عارفة هعمل إيه ولا أتصرف إزاي، حياتي كانت رخيصة قوي عليا وقررت أني أهاجم صوفيا لوحدي أنا أستحق الموت.

خدت طريق الغابة لأنه الأقصر وبدأت في الركض، حسيت حد بيجري ورايا بيراقبني لكن من بعيد. اتأكدت من كده، كل ما كنت بقف في مكاني حركته بتتوقف، استدرت وصرخت: "أظهر نفسك قبل ما أقتلك." "أرين؟ " همس صوت ضعيف من بين الأشجار. صرخت: "مين؟ طلعت فنتا من بين الأشجار، كانت متبهدلة، جريت عليا وهي بتبكي ورمت نفسها في حضني. "أنتِ حية؟ كنت افتكرتك ميتة لما جريتك على المغارة، قفلت عليكِ ومشيت."

بعدها بكت فنتا: "قبضوا عليا أنا اتبهدلت يا أرين اتبهدلت." حاولت أهدى فنتا، "صوفيا عملت فيكي إيه؟

"مش صوفيا يا أرين، صوفيا مش عارفة حصل معاها إيه. أنا لما عرفت أن فيه حرب هتقوم بينك وبين صوفيا تركت الوادي الصامت أنا والبنات وركضنا بكل سرعة عشان نحارب معاكم. وصلنا متأخرين شوية، كانت حربك مع صوفيا تقريباً انتهت لما طعنك اليان في ضهرك. صوفيا كانت مستعدة لقتلك لما تعرضت مؤخرة حراسها للهجوم. حصلت لخبطة كبيرة، المستذئبين هجموا بكل قوتهم محدش كان منتبه ليهم، كانوا زي الريح، الناس هربت، حصلت لخبطة كبيرة. قدرت أني أوصلك المغارة قبل ما أهرب. قبضوا عليا زي كتير غيري. صوفيا كانت مصابة في قدمها رغم كده حاولت تصد الهجوم، عافرت لحد ما وفرت لما تبقى من حراسها فرصة للتجمع والانسحاب. لكن الباقي كله اتقتل. وأنا يا أرين."

عيطت فنتا: "اتخدت غصب، كانوا مجموعة من خمسة أشخاص وكانوا أقوياء جداً مقدرتش عليهم. سابوني مرمية بعد ما افتكروا أني ميتة. كان معاهم واحد قوي جداً يا أرين بيقتل بسرعة زي الوحش." "كل الناس اللي كانت هنا ماتت؟

"لأ مش كلهم، الباقي اتخد أسرى وعبيد، اتجروا على معقل الذئاب في الغابة الشرقية. أنا سابوني هناك قريب من المعقل بتاعهم وقدرت بالعافية أني أرجع هنا. روحت على المغارة ملقتكيش وفكرت أن وحش جبل أو ذئب قضى عليكِ وأكل جثتك." "قبل ما انتقم من صوفيا لازم أخلص الأسرى اللي وثقوا فيا واحتتموا بقصري." "طلبت من فنتا تحاول تلاقي أشخاص أحياء، تبحث في كل مكان."

"مفيش حد تاني يا أرين، كل اللي فضلو اتجمعوا في قلعة صوفيا. فيه مجلس حرب هناك بيخططوا هيردوا الهجوم ده إزاي." "دي حرب بين قطيعين عمرها آلاف السنين." "يعني إحنا لوحدنا صح؟ "للأسف أيوه يا أرين، إحنا لوحدنا ومش هنقدر نعمل حاجة، والأسري مش هنقدر نخلصهم إحنا مجرد شخصين."

"أنا مش هقف في مكاني من غير ما أعمل حاجة، كنت مقررة أنتقم من صوفيا. لكن الأول لازم أحرر الأسرى، أنا هتجه ناحية الشرق لازم أقابل زعيم المستذئبين وأتكلم معاه." "أنتِ اتجننتي يا أرين؟

دا بيقولوا أي ست بتعجبه بسيطر عليها وبياخدها غصب. دا متوحش بلاش عشان خاطري يا أرين بلاش، دا زير نساء، عارفة بيقولوا معاه ست بنات بيمشوا جنبه كلهم جواريه، أخذهم من حروب وقلاع مختلفة بنات ملوك وأمراء، دا حتى بعت لصوفيا بصفتها زعيمة القطيع الوحيدة أنها تجيله خاضعة ذليلة عشان يعفوا عنها." "وصوفيا عملت إيه؟ "صوفيا قطعت الرسالة اللي بعتها وقتلت الرسول وبعتتله راسه في جو."

"لأول مرة أحترم صوفيا، دايماً الرجالة بيبصوا لنا على إننا ضعفاء، أقل منهم لازم نقبل الفتات اللي بيرموه وراهم لا وكمان لازم نكون مبسوطين." "وكازانوفا دا شكله إيه؟ "محدش يعرف، مش بيتخلى عن صفته الحيوانية، لكن فيه إشاعات بتقول أنه وسيم جداً وبيعمل جواريه بطريقة استقراطية." "وإنتِ عرفتي كل ده منين يا فنتا؟ "من أول الهجوم بتاعه والناس كلها معندهاش كلام إلا سيرته، قوته، جبروته، وسامته. دا فيه ناس بتقول أنه ساحر كمان."

رغم أن الكلام كان عن موت واستغلال إلا أن فضولي شدني أشوف الشخص ده. قررت أني أتوجه لمعقل الذئاب وأتجسس عليه من بعيد.