رواية اميري المنقذ الفصل الرابع عشر 14 - بقلم جهاد صلاح

دخل حسام على أمير، أول ما شافه أمير حضنه. أمير: إيه يا عم، واحشني، كده متسألش على أخوك؟ حسام: يا عم والله غصب عني، والله واحشني أنت كمان. أمير: تعالى ساعدني يا با. حسام: إيه يا عم، أنا جاي عشان تشغلني؟ بقولك يا با، مين القمر اللي برا دي؟ وفين ملك؟ أمير بغيرة: أنت شوفتها؟ اتكلمت معاها؟ وقالتلك إيه؟ وقولتلها إيه؟ حسام: إيه يا عم كل ده؟ ومالك شكلك غيران كده ليه ها؟ أمير: أنا مش غيران ولا حاجة، ومتتهربش من أسئلتي، جاوب.

حسام: مفيش، أنا سألتها عليك وسألتني لو في ميعاد، ولما قولتلها إني أخوك، قالتلي اتفضل، بس كده. بس بصراحة قمر أوي. أمير: ما تتلم يااض، هتفضل طول عمرك كده. حسام: وفين البت لوكة؟ أمير: ملك واخدة إجازة يومين عشان تعبانة شوية، إيه يا ابني، لسه بتحبها؟ حسام: ملكش دعوة يااض أنت، هات المفتاح أروح أرتاح من السفر. أمير: أنا غلطان أصلًا، خد و يلا أمشي من هنا. حسام: خلاص، متزوقش. خرج حسام وذهب إلى بيته.

أمير خرج من مكتبه ليراها وصلت لفين. أمير: حور، وصلتي لحد فين؟ حور: رجعت الأوراق دي وقعدت ترجمت بعض الورق ورجعته. أمير: ما شاء الله، بس ممكن سؤال؟ حور: طبعًا، اتفضل. أمير: أنتِ إزاي عرفتي تترجمي ده كله، وإنتي حتى مكملتيش تعليمك؟ حور بحزن: بس وصلت لتالتة إعدادي، وكنت متفوقة جدًا، وخدت مركز أول، فأكيد هكون عارفة أترجم، ولو بسيط. أمير: بيان عليكي زعلتي، أوعي تكوني زعلتي من كلامي، أنا مقصدتش حاجة، بس استغربت من براعتك.

حور: لا عادي، ولا يهمك. أمير: طيب ممكن طلب؟ حور: اتفضل. أمير: أنا بعت أجيب دليفري، ممكن تتغدى معايا؟ ويا ريت بلاش تكسفيني. حور: ماشى. بعد دقائق وصل الدليفري، وكانت حور مكسوفة جدًا، وكانت تأكل ببطء. أمير: مالك مش بتاكلي ليه؟ حور: بأكل أهو. أمير: بقولك صح، أنتِ إيه حكايتك؟ حور: حكاية إيه؟ أمير: يعني مكملتيش تعليمك ليه؟ وبتشتغلي ليه في سنك الصغير ده؟

حور: أمي ماتت من سنتين، وبعدها بحوالي شهرين بابا اتجوز سماح، وساعتها هي أصرت إني مكملش تعليمي عشان أساعدها في شغل البيت، ومن كتر زنها بابا خلاني أسيب التعليم، ويشتغل ليه؟ ده بقى لأنها طلبت من بابا يشغلني، وكعادة بابا، خلاني أشتغل هنا. أمير: يااااه، كل ده؟ ربنا يكون في عونك. طب أنتِ المفروض تكوني في تانية ثانوي، صح؟ حور: آه. أمير: طب أنا عندي فكرة حلوة.