رواية انا والشرير الفصل الثامن 8 - بقلم روما

قرب منها ومسك إيديها وقالها: _لو في حاجة عرفيني. أنا عايزة أعرف بس المسلسل اللي إحنا عاملينه ده هيخلص إمتى؟ _ورد: إحنا لسه بدأين، أنا لسه يدوب عرفتك على العيلة. مالك إيه اللي حصلك؟ بصتله وهي رافعة حاجبها وبتبتسم بسماجة: _لا عادي محصلش، بس عشان تعرف تكلمها براحتك وكده، أصل اللي قاعدة معاك دي كيس جوافة. عدي بضحك: _ورد، إنتي بتغيري! قطبت وشها وقالتله بإستهزاء ملحوظ: _أغير! إيه أغير دي! أغير على إيه يعني؟

قرب منها وهو بيبصلها: _عليا مثلاً. رجعت بضهرها لورا وهي بتقول: _وأغير عليك ليه إن شاء الله؟ قرب بجزعه أكتر فبعدت بضهرها وهو بيقولها: _عشان أنا قمر مثلاً. مثلاً... كانت بصاله بهيمان، رفع دراعه وقرب منها، مشي إيده على خدودها بحنان و..... سمع تخبيط على الباب فقالتله وهي بصاله: _الباب. رد بشرود: _ماله؟ زقته بعيد عنها وقالتله وهي بتقف: _بيسلم عليك. شدها من إيديها فوقعت في حضنه:

_أنا عايزك إنتي اللي تسلمي عليا هنا، قالها وهو بيشاور على خده. ملامح وشها اتبدلت وقامت من حضنه وهي بتقوله: _أستاذ عدي، متنساش اتفاقنا لإني مش هاسمح بأي تجاوزات، وياريت نخلص المسلسل ده قريب. قربت من الباب ولسه هتفتح وقفه صوته وهو بيقولها: _مش يمكن تحبيني! ووقتها متحبيش تمشي. عيونها وسعت وهي باصة الباب بحزن وبتقول في عقلها: _المشكلة إن شكلي هحبك وأنا متأكدة إنك مستحيل تحبني، أكيد البيه مش هيحب بياعة الورد. اتنفست بعمق

وبصتله وقالتله بإستهزاء: _أحبك إنت، ليه اتعميت؟ أنا يوم ما أحب تحب واحد من مستوايا عشان ما يعايرنيش بأصلي. سابته وخرجت برا الأوضة. لقت أمل واقفة على آخر الطرقة فراحت ناحيتها: _أمل! أمل: _أيوة يا سما! _فين جدو؟ أمل: _تحت مستنيكم من بدري. _طب تمام. نزلت ورد خطوات على السلم ووقفت لما سمعت أمل بتقولها: _سما، إنتي إزاي كنتي عايشة في أوروبا وبتتكلمي وتتعاملي كأنك معشتيش غير في مصر؟

علامات التوتر ظهرت على وش ورد اللي مكانتش عارفة ترد عليها. _أصل سما كانت بتحاول تحافظ على لغتها فعشان كده كانت بتتابع أفلام مصرية وبتكلم ناس مصريين.. كان صوت عدي اللي جاي من ورا أمل، فضحكت أمل وقالتلها: _ما تقولي كده يا بنتي، إنتي خوفتي كده ليه!