رواية انت ام هو الفصل الخامس 5 - بقلم لجين جمال

انت اتجوزت؟ هشام بحزن: آه. -إزاي؟ • مقلتلكيش عشان وعد متزعلش. -اتجوزت منة صح؟ • اه،، الله يرحمها. بصتله بصدمة: هي ... -اتوفت وهي بتولد آدم اللي اتولد طفل مش طبيعي،، أنا كل اللي عملته فيكي بيتردلي يا هيام بجد أنا ندمان على اللي عملته معاكي. • الله يرحمها،، عن إذنك. أخدت وعد وطلعنا، برغم انه نده عليا أكتر من مرة بس مردتش عليه، واخدتها وطلعت. دخلت أوضتي قعدت اعيط وأنا

بفتكر بسمة وهي بتقولي: "هتفضلي كده لحد ما يجيلك خبر جوازه ولا ساعتها برضه هتدوريله على حجج؟ كنت مخنوقة جدا، قلت اتصل عليها أحكيلها. مفيش غيرها ممكن يهون عليا اللي أنا فيه. -هيام إزيك؟ • إزيك يا بسمة؟ -مال صوتك؟ • هشام... -هشام؟؟! ماله هشام انتي شفتيه؟ • هشام اتجوز وخلف يا بسمة. -يخبر أسود !! ازاي وامتى وعرفتي منين؟ حكيتلها اللي حصل من أول ما خبطنا بالعربية لحد اللي حصل من شوية. -كل ده يا هيام؟؟

أنا بجد مش عارفة أقولك إيه، بس اللي أقدر أقولهولك إنه هيبتدي يستغلك ويقرب منك الفترة دي عشان ترجعيله، أوعي تضعفي. • أضعف؟ فين المشكلة لما أرجعله؟ انتي مشفتيش نظرة الندم والدموع اللي كانت في عينيه وهو بيتكلم معايا. -انتي بتتكلمي بجد يا هيام؟ • أومال بهزر؟ بس طبعًا مش هرجعله دلوقتي، هسيبه يتعذب من غيري الأول زي ما سابني أتعذب من غيره. -يعني هو معرفش قيمتك غير بعد ما مراته ماتت؟

هونتي عليه انتي وبنتك وسابكوا واتجوز وخلف، ولما مراته ماتت افتكرك؟ كل ده وهتآمنيه عليكوا تاني !! • بسمة انتي متعرفيهوش عشان تتكلمي عليه كده، هشام بيحبني وغلط، وربنا عاقبه على غلطه ده، يعني خلاص كفر عن اللي هو عمله. وبعدين ربنا بيسامح، أنا مين عشان مسامحش؟ -يعني انتي مصممة؟ • اه مصممة وملكيش انتي دعوة. -خلاص يا هيام اللي تشوفيه صح اعمليه، بس حطي بنتك قدامك وانتي بتقرري يا هيام. • متقلقيش يا بسمة، يلا سلام. -سلام.

عند بسمة، قفلت مع هيام وبعتت ماسدج لمحمد: "محمد أنا عايزة أقابلك ضروري". بعد شوية كانوا واقفين في مكان بعيد عن بيتهم شوية. محمد: خير يا بسمة؟ بسمة: هيام يا محمد... محمد: هيام؟ مالها كويسة؟؟ بسمة: كويسة، بس للأسف حصل اللي أنا كنت خايفة منه. محمد: أوعي تقولي إنها هترجع لطليقها؟ بسمة: شكلها كده. وحكتله اللي حصل. محمد: إيه التهريج ده؟؟ ترجعله إزاي بعد اللي عمله؟

بسمة: أرجوك تساعدني يا محمد وتبعدها عنه، انت متعرفش هيام بتبقى باهتة ودبلانة إزاي لما بتبقى معاه، هيام هتتدمر لو رجعت لهشام تاني. محمد بحزن: طب أنا ممكن أعمل إيه؟ بسمة: اظهر في حياتها أكتر من كده، حاول تبينلها إنك بتحبها وخد خطوة واتكلم معاها، مش إحنا قاعدين نخطط إزاي نخليها تحبك وهي أصلًا بتفكر في طليقها. محمد بعصبية: إيه الأنانية اللي انتي فيها دي انتي وأختك؟

أنا آه حبيتها، بس لما كنت عارف إنها كرهت طليقها، مش لسه بتحبه !! بسمة: يا محمد حتى لو مش هتتجوزها، بس أرجوك ساعدني أبعدها عنه، وبعدين ابعد. محمد: بسمة لو سمحتي، موضوع هيام اتقفل بالنسبة لي، أنا آسف، عن إذنكم. مشي محمد وهو متضايق ومخنوق ورجع بيته. تاني يوم نزل يجيب سيف من الحضانة، ولسة طالع لقى هيام ووعد بيقربوا عليه. وهيام بتقوله: محمد إزيك؟ محمد: الحمد لله، انتوا عاملين إيه؟

هيام: الحمد لله، ممكن تاخد انت وعد المرة دي توديها لأختي عشان عندي مشوار؟ واسفة لو هتقل عليكم. محمد: لا مفيش مشاكل، تعالي يا وعد. وعد بصت لهيام: هتروحي فين يا مامي؟ هيام: هروح لبابي يا حبيبتي. محمد بصدمة: .......