رواية انت قدري الفصل الثالث 3 - بقلم رحاب القاضي

ريم بتوتر انت بتعمل ايه يخربيتك اوعي كده.. احمد بغيظ بقي انا اتضرب واتهان واتخانق مع صاحب عمري واتدبس في واحدة زيك بسببك وبسبب حاجة ما عملتهاش.. ريم وشها قلب أحمر وقالت بتوتر لو سمحت اوعي كده غلط وبعدين انت جاي هنا عايز إيه أصلا؟ احمد قرب منها أكتر وقال هعمل اللي انتي قولتي عليه لأخوكي عشان يبقى معاهم حق واتعاقب بضمير مستريح.. برقت ريم بخوف وقالت انت اتجننت صح؟ لا لا انت متربي ومش هتعمل كده..

احمد وهو بيلمس حجابها بإيده ده أنا ما شوفتش دقيقة واحدة تربية يا ريم.. ريم ابتسمت وقالت انت متأكد إنك عايز تعمل كده؟ احمد بص لها بقلق وقال إيه ده إيه السهولة دي؟ لا أنا مش مطمن لك.. ريم ابتسمت بشر وقالت أنا ماحدش يجي عليا ويكسب أبداً.. خلصت كلامها وذقته جامد وقالت بصوت عالي وهي عاملة نفسها بتعيط ريم حرام عليك يا احمد ليه عايز تعمل كده عملك إيه ممدوح عشان تأذيه في أخته..

وقبل ما يرد عليها احمد بأي حاجة، فتح ممدوح الباب جامد ودخل وبصلهم بصدمة واحمد قال بخوف احمد والله العظيم هتجوزها بس اهدي بلاش النظرة دي وبعدين انت إيه اللي جابك من الشغل.. حضنت ريم ممدوح وقالت الحيوان ده كان عايز أااااه والله مش قادرة أقول لقد خدش حيائي يا أخي.. احمد بغيظ هو انتي تعرفيه الحياء ده ولا عمرك سمعتي عنه.. ممدوح قرب منه وقال بغضب انت يطلع منك كل ده ومع مين ما أختي يا حيوان..

خلص كلامه وضربه بالبوكس في وشه واحمد وشه بقى بينزف وقال بعصبية احمد جرا إيه يا ممدوح هي مش يعتبر خطيبتي ويا عم كنت بكلمها كلمتين وهي اللي كبرت الموضوع وبعدين ما هي قدامك أهي فيها حاجة تدل على كلامها.. بص ممدوح لريم اللي قالت لااا اوعي تصدقه ده كدااب طيب حتى اسأل عم عوض على اللي حصل.. قال عوض

أيوه يا أستاذ ممدوح الدكتور اداني 200 جنيه وقالي أخليها تنزل وأضحك عليها وأقولها إنك بتعت ليها حاجات، بس ما كنتش أعرف نيته من الموضوع كده.. ريم وهي عاملة نفسها زعلانة شوفت يا دوحة؟ مش بس اللي عملوا لا ده عايز يكذبني.. احمد بص لها بحقد وقال هتجوزها ودلوقتي أكتر من كده تاني مش ده اللي هيريحك.. ممدوح اتنهد وقال النهاردة بالليل يا احمد جيب أمك والمأذون وتعالى.. ريم

هطلع والله وأعملك كل اللي انت عايزه، بص شهر بحاله هسمع كلامك لا مش شهر كتير أسبوعين... برضه كتير... بص أنا تلات أيام هسمع كلامك بس والنبي بلاش جواز، هو أنا بتاعت الحاجات دي هو أنا بتاعت جواز أصلاً ما تقولوا حاجة يا عوضيكو.. عوض بسخرية يا شيخة وافقي على الأقل حتى العمارة تخلص منك.. ممدوح بغيظ حتى البواب مش طايقك.... احمد بضيق ماشي يا ممدوح وأنا آسف على الموقف ده بس والله أنا نيتي كانت اا.. ممدوح بحده

امشي يا احمد ولسانك ما يخاطبش لساني تاني... ريم بخوف يا ممدوح ما تهزرش قوله ما يجيبش حد وما يجيش أنا مش هتجوز أنا حد ما أعرفوش.. بص لها احمد بشماتة ومشي وراح المستشفى بتاعته وقعد في مكتبه بص لوشه اللي بقى فيه كدمات من ضرب ممدوح ليه واتنهد بضيق وقال احمد كله منك يا ماما مالقتيش غير دي تخليني اتجوزها، ودي هعيش معاها إزاي بس يا ربي.. دخلت عنده الممرضة وقالت يالهوي مالك يا دكتور احمد انتي في عربية بحمار عدت على وشك..

احمد بغيظ عربية بحمار تعدي عليكي وتخلصني منك يا رباب عايزة إيه؟ رباب ما فيش بس أستاذ ممدوح صاحبك بره عايزك.. احمد بقلق ممدوح، طيب دخله بسرعة يلاا.. طلعت الممرضة ودخل ممدوح وبص لأحمد وقال بحده ممدوح بعيد عن أختي خالص اهو، انت كنت جاي عايزها فأي؟ احمد بضيق ليك عين تكلمني بقيت مسخرة في المستشفى بسبب إيدك الطويلة.. ممدوح يا جدع حط نفسك مكاني هتعمل إيه؟ احمد بهدوء

كنت جاي أرخم عليها شوية والله العظيم ما حصلت حاجة وبعدين طيب ما أنا كنت ممكن أطلع فوق بأي طريقة لو عايز أعمل حاجة وحشة مش اختار أوضة عوضيكو.. يووووه قصدي عوض.. ضحك ممدوح غصب عنه وقال انت وصلت لعوضيكو، على العموم أنا جاي أقولك هي قالتلي كل حاجة بس خليك بعيد عنها بقي.. احمد أحلف قالتلك كل حاجة بجد حتى اللي حصل في المكتب؟ ممدوح

أيوه لما لقيت الموضوع هيقلب على جواز قالت الحقيقة، أنا بجد تعبت ريم مش هتكبر أبداً ولا هتتحمل المسئولية وفاكرة إن حياتها مسلسل تركي أو كوري من اللي بتشوفهم.. تخيل انت لو كان حد غيرك اللي عملت معاه كده.. احمد بسخرية لا اطمن اللي زي أختك دول مش بيجوا غير على الغلابة اللي زيي، قولي انت مش قولت إنها عملالك توكيل عام عشان المشاكل اللي في بلدكم وكده.. ممدوح أيوه بس انت ليه بتسأل؟ احمد بخبث

هجيبلك عقد عمل محترم وتمشي عليه بالنيابة عنها وأختك تيجي تشتغل هنا وأقسم بالله هتكون أختي هنا وأنا هعرف إزاي أخليها تقول حقي برقبتي.. ممدوح بتفكير لو عملتلك مصيبة في المستشفى أنا مش مسؤول ولا تقولي أدفع وأصلح والجو ده؟ احمد ضحك وقال أيوه انت بره الموضوع بس اللي أعمله فيها من حيث الشغل ما تجيش تقولي ارحمها.... ممدوح بهدوء لا يا صاحبي أنا عايزها تقول حقي برقبتي...

في مكان تاني إحدى القرى الصعيدية، في بيت كبير كان قاعد راجل كبير وهو بيضحك بشر وقال لابنه اللي قاعد جنبيه فتحي واخيراً بعد 15 سنة عرفت طريق عيال عمي.. كمال اللي وصلني إنه بقى مهندس ولد الحرام وجدتهم ماتت وهو ربى أخته وخلاها دكتورة وعايشين ولا على بالهم.. فتحي بجمود أنا عايز رقبة ممدوح مش هناخد حقنا من حريم حقنا عند ولد رشاد وقدام البلد كلها عشان نريح أبوك في قبره... كمال وأخته هتعملها إيه.. فتحي بخبث

مكانها بيت عمها بس نخلص من أخوها الأول.. في الوقت ده كانت الشغالة اللي عمرها 50 سنة واقفة بتسمع كلامهم من ورا حيطة المطبخ، ومشيت بسرعة ودخلت أوضتها وقالت لنفسها سعدية بخوف أنا لازم أمشي من هنا عشان أعرف أكلم ممدوح وأحذره من شرهم.. في بيت ممدوح وريم كان ممدوح قاعد بيتفرج على التلفزيون وقربت منه ريم وقالت ريم بص ما هو انت يا تصالحني يا تصالحني ما عنديش خيار تالت.. ممدوح

أنا اللي صالحك يا ريم ليه إن شاء الله هو أنا زعلتك من الباب للطاق.. ريم بغيظ عشان انت فرضت عليا أشتغل وانت عارف أنا ما بحبش القيود وإني ألتزم بحاجة ولازم أعملها.. ممدوح بس انتي لازم تعملي كده يا ريم، افرض أنا خلصتلي حاجة مش لازم تكوني قوية وتعرفي تاخدي حقك وتعيشي.. حضنته ريم وقالت انت معايا وأنا قوية بأخويا وبس.. اتنهد ممدوح بضيق وقال

هو أنا ضامن عمري وانتي عارفة اللي فيها كويس يا ريم، أنا لو بقول ما تخصليش حاجة فعشانك انتي مش خايف منهم قد ما خايف عليكي... ريم بدموع وليه السيرة الغم دي؟ ما هما خلاص مش قادرين يوصلولنا، ولو كانوا هيوصلوا كان وصلوا زمان.. ممدوح بهدوء طيب عايزاني ما أبقاش زعلان منك؟ ريم أيوه طبعاً.. ممدوح بكرة أول يوم شغل ليكي عند احمد أنا مضيت عقد العمل بالتوكيل اللي انتي عملاه.. ريم بغيظ

لا انت ازعل مني أحسن، أنا مستحيل أروح عند صاحبك ده ولا أشتغل عنده أبداً.. تاني يوم كانت ريم قاعدة قدام احمد في المكتب بتاعه، وقالها احمد بخبث احمد جو لعب العيال مش عندي في المستشفى، هنا شغل وبس. ريم أنا هتنيل أبدأ شغل امتى وهعمل إيه بالظبط أنا أول مرة أشتغل و... احمد بحد لما أكون بتكلم ما تقطعنيش وإلا والله هاخد جزاء ومش زي أي موظف لا انتي هتاخدي ساعات عمل إضافية. ريم ابتسمت وقالت طيب ما تخصملي أحسن.. أحمد بحده

أنا هنا اللي أقرر أنا أعمل إيه وما أعملش إيه.. ريم تنهدت وقالت ماشي قرر بقى وخلصني.. أحمد قام وقف قدامها وقال هو أنا بلعب معاكي في الشارع؟ تتكلمي معايا بأدب فاهمة ولا لأ.. ريم بغيظ إنت إزاي تكلمني كده أنا لو قلت لممدوح آآ.. ضحك أحمد وقال هو ممدوح ممكن يصدقك تاني بعد اللي إنتي عملتيه قبل كده أصلاً؟ ريم وقفت وقالت طيب حفاظًا على كرامتك وكرامة اللي جابك قصد سيادتك أنا عايزة أعرف أنا هشتغل إيه هنا؟ أحمد بخبث

هيكون هتشتغلي إيه سمكري دكتورة أكيد... ريم بغيظ أضحك ولا أبين سناني ولا أعملك إيه... أحمد بصوت عالي يا رباااااااب... ريم اتخضت وقالت يخربيتك اديني إشارة إنك هتنده على حد فزعتني.. أحمد اخرسي خالص وحاجة كمان لو إيه حصل أنا مش عايزك تتعاملي مع أمي أبداً.. ريم بسخرية والله أنا نفسي بجد ما أتعاملش مع أمك... بصلها بحدة ودخلت رباب وقالت تحت أمرك يا دكتور أحمد... أحمد

خدي الدكتورة ريم وديها لأوضة المتدربات اللي تحت إشرافي أنا والدكتورة سارة واديها قايمة الشروط والالتزمات... رباب حاضر.. اتفضلي يا دكتورة ريم.. ريم حطت إيدها في إيد رباب وقالت يلا بينا يا أوختشي الا قوليلي هو الكريم اللي أنا حاطاه في وشك ده اسمه إيه ولو أغلى من 100 جنيه ما تقوليش اسمه عشان مش معايا غير 90... طلعوا وأحمد غصب عنه ضحك وقال يا بنت المجنونة..

وبعد شوية في مكتب المتدربات كانت ريم قاعدة بتبص على الدكاترة اللي قاعدين كل واحد وواحدة فيهم ماسكين ورق وباصين فيه.. وقرب منها ولد وقال.. الولد حضرتك جديدة معانا يا دكتورة مش كده.. ريم أيوه اهو زي ما إنت شايف.. الولد طيب أعرفك بيا أنا طارق الشيخ آآ.. ريم بصدمة أحلف إنت طارق الشيخ بنفسه بس إنت طويل واللي بنشوفه في التلفزيون قصير ودوكا مطرب إنت دكتور تقريبًا؟ طارق

تقريبًا كمان يا بنتي عادي تشابه أسماء وبعدين أنا أيوه دكتور متدرب هنا.. ريم وأنا ريم دكتورة لسه هتدرب معاكم هنا.. طارق على فكرة الدكتور أحمد والدكتورة سارة متساهلين جدا معانا والتدريب ساهل جدا وكمان هينزلونا عملي بسرعة.. ريم لا لا أنا جاية أفشل فيه.. أنا واحدة عايزة أتجوز وأقعد في البيت مش وش شغل أنا... طارق وربنا مش لوحدك اللي عايزة كده.. كل اللي موجودين هنا..

ضحكوا هما الاتنين ودخل في الوقت ده أحمد والكل سكت وبص أحمد بضيق لريم وقال بصوت عالي.. أحمد دكتورة ريم اتفضلي اقعدي قدام هنا.. ريم بصوت واطي إيه الجو ده هو إحنا في درس عربي... قامت ريم وقعدت قدام بعيد عن طارق.. وأحمد قال بكل هدوء.. أحمد النهاردة هيبقى عندنا اختبار بسيط هيكون نظري وبعدين هنطبق عملي جاهزين..

الكل قاله أيوه وفعلاً بدأ أحمد يختبر فيهم بأسئلة صعبة.. واستغرب جدا إن ريم فعلاً شاطرة جدا وجاوبت على الأسئلة بتاعتها بكل ذكاء.. لحد ما جه وقت التطبيق العملي.. أحمد دكتورة ريم جوه في طفل عنده جفاف في حقن لازم ياخدها وعايز تشخيص لحالته كويس.. ريم بقلق أنا أدي حقن أومال فين الممرضين.. أحمد أنا لو عايز الممرضة هي اللي تعمل كده كنت هقولها بس أنا عايزك إنتي اللي تنفذي ده.. ريم بقلق

طيب سؤال بس هو الطفل اللي جوه ده عنده كام سنة.. أحمد بسخرية هما الأطفال بيكون عندهم جفاف حاد وهما عندهم كام سنة يا دكتورة؟ ريم عادي ممكن يكون طفل عنده عشرين سنة وعنده جفاف عاطفي.. أحمد بحدة ادخلي جوه شوفي شغلك وبلاش تخلي صوتي يعلي هنا أنا دكتور محترم.. ريم بسخرية محترم على مين يا سكر أفتكرك باللي كنت ناوي تعمله فيا في أوضة البواب اخص.. وسابته ودخلت الأوضة وأحمد ضرب كف بالتاني وقال لنفسه.. أحمد والله هتشلني والله..

وبعد شوية كان أحمد قاعد في مكتبه وفجأة سمع صوت دوشة ولسه كان هيطلع لقي ريم داخلة عنده بتغيط وقالت.. ريم أحمد في واحدة حرمبوءة بره قالتلي يا فاشلة... دخلت في الوقت ده بنت حلوة أوي وقالت وهي متعصبة جدا.. سارة أحمد لو سمحت البنت دي لازم تمشي من هنا حالا..