رواية انتقام عاشقه الفصل الرابع عشر 14 - بقلم سلمى تامر

مدت نور إيديها لعلياء بسلسلة واتكلمت بدلع: _اديها لفيروز.. أصله كان معايا من شوية ونسيها عندي. _كان إيه يختي! نور بنفس النبرة: _كان عندي.. أصله بابا وماما مش هنا وناديته يقضي شوية وقت علشان كنت خايفة وأنا لوحدي.. قعدنا وشربنا وهزرنا و.. قطعت كلامها بضحكة مستفزة وهي بتقول: _أنتِ فاهمة الباقي بقى يا لولو. _علياء.. علياء استني متمشيش. بصيت وراها لقيت فارس.

بصتله بغضب ونفور وكملت نزولها ودموعها نازلة وفارس وراها بينادي عليها. مسك إيديها واتكلم بحدة: _اقفي بقى.. مش هفضل أجري وراكي طول الطريق يعني. شديت إيديها واتكلمت بعياط وعصبية: _عايز مني إيه تاني ها.. ابعد عني وملكش دعوة بيا وأنا هنفذ اللي قلتلي عليه ومش هتشوف وشي تاني. فارس بأسف وهو بيقرب منها: _علياء أنا آسف.. والله العظيم ما قصدت ولا كلمة من اللي قلتهم من شوية علشان خاطري سامحيني. اطلعي مش هينفع تمشي لوحدك دلوقتي.

زقته بعنف: _ابعد عني قلتلك. طول ما أنت مش راضي تحكيلي إيه اللي حصل وكنت عند البني آدمة دي ليه مش هرجعلك. نفخ بعنف واتكلم بنفاذ صبر: _حاضر يا علياء هقولك.. بس مش دلوقتي.. فيه حاجة في دماغي ومش هرتاح غير لو عملتها ومينفعش أقولك عليها لأن ممكن بغلطة منك كل حاجة تبوظ. اديني بس فرصة.. فرصة واحدة زي ما أنا عتيتك قبل كده. علياء برفض: _لأ يا فارس.. أنا مبقتش قادرة أستحمل أكتر من كده وكل اللي بيحصل فوق طاقتي.

سابته وركبت تاكسي واختفت من قدامه. اتنهد بحزن وتعب وقرر يسيبها يومين لحد ما يرتب أموره ويعرف خطوته الجاية. _دوري في اللعبة جه يا نور.. وأنا اللي هنهيها. استعاد قوته ورجع تاني البيت ودخل أوضة نور اللي كانت نايمة في حضن ميرفت وبتعيط ومش راضية تقول لميرفت على حاجة. فارس بهدوء: _ماما اطلعي وسبينا لوحدنا شوية. ميرفت بعياط وغضب: _علشان أرجع ألاقيك مموتهاش زي ما كنت هتعمل من شوية. فارس اتكلم بنفاذ صبر وحاول يمسك أعصابه:

_ماما لو سمحتي اطلعي. _مش طالعة قبل ما أفهم في إيه. _طب معلش يا حبيبتي اطلعي وأنا هاجي أفهمك كل حاجة. بصيت لريم اللي ساكتة بحزن وكسرة وطلعت من الأوضة بقلة حيلة. قعد فارس عالكرسي اللي جنب سرير ريم واتكلم بحزن: _ليه عملتي كده.. عملنا فيكي إيه علشان تكسرينا بالشكل ده. ريم ببكاء وندم: _عارفة إني غلطانة وأستاهل الدبح.. بس سامحني يا فارس.. علشان خاطري حاول تسامحني وتساعدني أنت أخويا الوحيد ومليش حد غيرك. فارس بسخرية:

_أسامحك! احمدي ربنا إني سايبك لسه عايشة أصلاً. المهم. قوليلي مين القذر ده ومتكدبيش في كلمة علشان ألحق أصلح اللي هببتيه. _شادي سلطان.. كان معايا في الكلية واتجوزنا عرفي. هزت دماغها بكسرة واتكلمت بقهر: _ومن ساعتها وهو مختفي ومعرفش عنه حاجة.. ومن شهر بعتلي فيديوهات وقالي أحوّل فلوس يا إما ينشرها في كل حتة. _ونور عرفت منين. _أنا اللي استنجدت بيها تساعدني.. أخدت مني تليفوني وقالتلي هتحل الموضوع. فارس بسخرية:

_هتحل الموضوع أه ومالو. الهانم بتهددني بيهم هي كمان. قوليلي أي زفت مكان كان بيروحه أو كنتي بتقابليه فيه. ريم عطته العناوين اللي تعرفها وفارس سابها ومشي من قدامها قبل ما يتجنن عليها تاني. عدت فترة وفارس مشغول جداً في محاولة إنه يلاقي شادي بمساعدة ظابط صاحبه. وفي يوم علياء كانت قاعدة في بيتهم القديم. لقيت الباب بيخبط وشافت آخر حد توقعت إنها تشوفه. _ريم! ريم وهي بتمد إيديها لعلياء بكارت وبتتكلم بحزن:

_نور بعتالك ده.. كارت دعوة على فرحها هي وفارس.