رواية انتقام إمرأة الفصل الخامس عشر 15 - بقلم مريم اشرف

بصلهم حسام بابتسامة خبيثة وطلع ورا سارة. خبط على الباب وفتحته له سارة. سارة بذهول: عاوز إيه يا حسام؟ بص جوه ولقاها بتجمع أغراضها. حسام: متقوليش إنك هتمشي. سارة بسخرية: أمال هفضل قاعدة هنا أتعرض للذل. أنا مقهورة يا حسام والله مقهورة! حسام قرب منها: ولو قلتلك إني محضر مفاجأة حلوة ليهم كلهم هتقعدي؟ سارة: مفاجأة إيه دي؟ حسام بص في عيونها بهيام: مفاجأة هتغير حياتنا للأبد. سارة: م.. مش فاهمة؟ حسام، أنت بتستعبط عليا؟

حسام اتنهد: انتي فاكرة إني واحد ميستاهلش يتحب وواحد ابن أمه وملوش كلمة قدامهم، مش كده؟ سارة بتعلثم: ح.. حسام.. حسام بضيق: لازم تعرفي إني كنت بكتم كل اللي بيتقال عليكي وكل المعاملة الوحشة اللي بشوفها جوايا. كل يوم بتحرق من جوايا يا سارة! أنا آسف.. بس متقلقيش.. بوعدك إنك مش هتشوفي وشهم تاني والفرح ده هيتقلب حزن وهم. كانت مستغربة من كلامه اللي بيطلع من قلبه. سارة: بس يا حسام.. مينفعش كده.. أنا همشي.. مقدرش استح..

حط سبابته على بقها: ثقي فيا يا سارة.. وأنا هنتقم لك والبت اللي بتتنطط تحت دي.. هتتمسح بكرامتها الأرض زي ما ذلتك.. صدقيني أنا بحبك يا سارة وعمري ما هتجوز غيرك. سارة بدموع بصتله بحب: طب والجنين ده؟ اتنهد: محلولة إن شاء الله.. أنا هوديكي أحسن وأشهر دكتور.. عشان ننزله.. ولو كتبله ربنا يعيش.. وقتها هنتصرف.. متعيطيش يا سارة.. كفاية عياط! حضنته بحب وكانت بتعيط بشدة. كانت بتخرج كل اللي جواها لحد ما ارتاحت وبعدت عن صدره.

ابتسم: خلاص ارتحتي. سارة: بحبك يا حسام! حسام وهو بيطلع من الأوضة: وأنا أكتر يا سارة.. أكتر مما تتوقعي! مر كام يوم على أبطالنا ونيجي ليوم قبل الفرح. كانت سارة قاعدة في الجنينة وبتبص للشغالين اللي داخلين خارجين بحاجات الفرح. ابتسمت بشماتة. قربت منها ليلى بخطوات سريعة. ليلى بغل: انتي يا بت انتي.. مش قلتلك أرجع ملقيكيش في البيت ده؟ ربعت سارة إيديها: ليه.. كان بيتك؟ ليلى ابتسمت: بيت جوزي.. يعني هيبقى بيتي أنا كمان!

سارة اتضايقت من كلمة جوزي: بس جوزك ده هو اللي طلب مني أقعد عشان أحضر فرحكم ولا أنا غريبة؟ ليلى باندهاش: هتحضري؟ .. احم.. لأ طبعاً!! انتي عاوزة الناس تاكل بوشنا؟ سارة: ولا يفرق معايا.. لو قلتلهم ولا لأ.. أنا كده كده بريئة غصب عن الكل! ليلى ضربت برجليها الأرض ودخلت الفيلا: ماشي يا سارة الزفت.. أما ندمتكيش متتسميش ليلى! بالليل وفي مكتب حسام. كان قاعد بيعمل حاجة على اللاب وقدامه صاحبه إياد.

إياد بقلق: متأكد من اللي ناوي تعمله يا حسام؟ اتكلم حسام من غير ما يشيل عينيه عن الجهاز: وهو حسام بيتراجع في كلامه يا إياد.. إياد.. انت عارف إن أعدى حاجة عندي الخيانة والغدر.. في النقطتين دول مبرحمش!! .. وهي تستاهل اللي هيحصلها. إياد: طيب وأمها وعيلتها.. وأمك؟ .. دي ممكن تروح فيها!

قفل حسام اللاب وانتبه له: ماما عبيطة أوي يا إياد.. أجيبهالك من الآخر.. كل حاجة كانت واضحة قدامها بس هي اللي دماغها مش شغالة.. أما عن أهلها فلازم يعرفوا حقيقة بنتهم وياخدوا بالهم منها بعد كده. وكمل بضيق: هو أنا ناقص بقى؟ قام إياد وحضنه: أنا فرحان ليك أوي يا حسام.. بكده ربنا هيعوضك كل اللي شفته بخير.. بتمنى إنك تنجح في ده.. سارة بتحبك يا حسام.. متخذلهاش.

هز حسام راسه: وهو أنا أقدر.. بحمد ربنا إنها رجعتلي.. مش ممكن أسيبها تضيع مني تاني ولو اتهدوا جبال. واقفة قدام المراية وبتغني. بعدها وقفت بتفكير: يا ترى حسام بيجهز لإيه؟ .. وهينتقم ليا إزاي؟ .. ياااه أنا متشوقة أوي لبكره. في أوضة مروة. قعدت جمب خالتها بضيق: ابنك ده يا خالتي هيجنني.. قال إيه البنت دي هتقعد هنا وهتحضر الفرح كمان!! مروة: يووه.. وانتي مزعله نفسك ليه؟

.. مش خلاص هتتجوزي.. خليها تتفقع بقى.. انتي أحسن منها يا ليلى يا بنتي.. متخليهاش تأثر عليكي.. دي واحدة رخ..يصة!! حضنتها ليلى. بعدها استأذنت تمشي. ليلى بخفوت: ولو مش هتمر مرور الكرام يا سارة.. وأنا هربيكي إزاي تكلمي اللي أعلى منك!! في اليوم التالي. الكل واقف بيجهز وبيحضر.. والغريبة إن سارة كمان بتساعد. قربت منها ليلى بضيق: سيبي اللي فايدك يا زفتة واطلعي أوضتك!! .. ربنا يبعد عنا الحساد يا رب.

ابتسمت سارة: آمين يا أختي.. عالعموم.. هروح أحضر نفسي. قلدتها ليلى بعصبية وراحت مع الميكاب أرتست تتجهز هي كمان. مروة: إيه يا بنتي مالك؟ ليلى: وهو في غيرها؟ بصتلها مروة وهي طالعة عالسلم: خليها.. كلها يومين وهتمشي لحال سبيلها وتسيبنا. أما في أوضة حسام. كان بيجهز نفسه وعقله وكل تفكيره.. على المفاجأة اللي هيعملها. ضحك باستهزاء. بعدها خرج.. ولقى سارة لسه هتدخل أوضتها. غمزلها بعدها نزل. ابتسمت سارة بخجل ودخلت أوضتها.

كان بينزل السلم بهيبة زي عادته. دخل الأوضة اللي فيها الميكاب أرتست ولقى ليلى وأمه وأمها وصاحباتها. مروة بابتسامة: منور يا عريس!! رد عليها ببرود: بنورك يا ماما.. ها يا عروسة خلصتي؟ .. الناس بدأت تيجي. منال: ربنا يخليكم لبعض يا ولاد.. يلا يا بنات خلو العرسان شوية مع بعض. زفر حسام بخفوت وكلهم خرجوا. ليلى: طالع بتجنن يا حسام. هز راسه: وانتي كمان.. مش يلا؟ ليلى بتوتر: حاضر... أنا.. أنا هطلع بعد شوية.

خرج من الأوضة وراح قعد مع المعازيم. مسكت تليفونها واتكلمت بسرعة. ليلى: الخطه ماشية كويس يا (مجهول) مجهول: طب ماشي... خدي بالك من نفسك وابقي طبيعية مش عاوزين نتكشف. ليلى: طبعاً متخافش... هو مش حاسس بحاجة أبداً. بعد مدة. الكل متجهز... والكل بالحفلة. نزلت سارة وكانت زي القمر بفستان موڤي طويل وشعرها متسرح ورا ضهرها ولابسة تاج أبيض فوق راسها. الكل بص لها بإعجاب من جمالها. أما ليلى وأهلها وخالتها كانوا هيموتوا من الغيظ.

فضل حسام متنح عليها شوية وبيوصلها من وقت للتاني ليكلمها حد أو يقرب عليها. مر وقت.. والكارسون بدأ يلف بكوبايات العصير. وقفته ليلى: اسمع يله أقولك.. وخرجت بودرة من جيبها وسكبت منها على واحدة من الكوبايات. ليلى: ملكش دعوة باللي هيحصل ولا كأنك شفت حاجة وأنا هدفعلك بعدين.. شايف البت اللي واقفة هناك دي. كارسون: أيوه مالها. ليلى: روح اعطيها الكوبايه دي.