رواية انتقام يامن الفصل الرابع 4 - بقلم فرح القصاص

نور ونفس نبرة الخوف في صوتها: تعالي بسرعة يا يامن. وقبل ما تقفل، بيسمع صوت صراخ والخط بيقطع. يامن بخوف: الو.. نوررر.. الووو… وبيفضل ساكت شوية، بيستوعب. معقول في مشكلة ولا دي خطة تانية منها؟ طب هي ممكن تكون محتاجاني فعلاً؟ طب وأنا هعرف مكانها إزاي دلوقتي؟ زياد هو الوحيد اللي يقدر يساعدني في المشكلة دي. بيتصل بيه، وفي أقل من نص ساعة كان زياد وصل. زياد ويبان عليه الخوف وتوتر أكتر من يامن: هي نور اتصلت بيك تاني؟ يامن:

لا متصلتش، وبتصل مش بترد. زياد بعصبية: وأنت قاعد مستني إيه؟ يلا ندور عليها. يامن: ما أنا كنت مستنيك، بس هندور عليها فين؟ زياد: هتتبع الفون بتاعها، أنت عارف ده مجالي أصلاً. يامن: طب يلا. *** هند: حازم بقولك إيه، مترجعش يامن البيت تاني. حازم: بعد اللي عمله ده يا هند؟ هند: يمكن فعلاً مكنش في وعيه. أنا مش بدافع، لأن ده أكبر غلط يعمله، ومكنش ينفع. بس وهو بعيد عني كده حاسة في حاجة ناقصة في البيت. حازم بابتسامة:

رغم إنك مش أمه، لا وكمان اللي حصل ده كان مع نور. لو حد مكانك كان زمانه فضل يسخن فيا ويتكلم عليه. ممكن يخليني أكره ابني، بس أنتِ عكس كده خالص. وبدافعي عنه وبتحبيه، زي ما يكون إنك أمه. الحقيقة أنا اخترت صح فعلاً. هند بابتسامة: طب يلا اتصل بيه. حازم: لا مش دلوقتي، لازم يعرف غلطه. وبعدين سها لو عرفت ممكن تفشكل الخطوبة. وأنا بقول نسرع الجواز ونتجوزهم بسرعة بقى. هند: بمناسبة سها، اتصلت بيها كتير النهاردة ومردتش. حازم:

مش نور قالتلك راحة ليها؟ هند: أيوه، اللي خلاني أقلق أكتر إن نور كمان مش بترد. حازم: هتلاقيهم الكلام خدتهم ومش مركزين مع التليفون. وبعدين نور أول ما عرفت إن فكرت أجوزهم بسرعة، من الفرحة راحت ليها بسرعة. هند فضلت تضحك. حازم: المهم قومي حضري الغدا عشان أنا ميت من الجوع. هند بضحك: حاضر، وممكن تكون نور جت كمان. ***

بعد ما حددوا المكان اللي نور فيه، وبيروحولها، وبينزلوا من العربية، بيلاقوا نور قاعدة تصوت وتنادي على شخص في النيل، وبتعيط بانهيار، لدرجة كانت هتقع من كتر ما رامية نفسها. يامن وزياد بيجروا عليها وبيشدوها. يامن بخوف: نور.. نور في إيه؟ أنتِ كنتي بتنادي على مين؟ زياد: اهدي يا يامن، خليها تاخد نفسها. مش شايف هي عاملة إزاي؟ يامن بيتجاهل كلامه وبيكمل: نور ردي، في إيه؟ نور تنظر له بعيونها الحمراء مثل الدم:

أنت اتأخرت أوي يا يامن، اتأخرت أوي. يامن بدون فهم: اتأخرت على إيه؟ نور بعياط: س.. سها. يامن بتوتر: مالها سها؟ نور بعياط أكتر: انتحرت. يامن بصدمة: أنتِ بتقولي إيه؟ مين اللي انتحرت؟