رواية أرض الهلاك الفصل التاسع 9 - بقلم رشا منصور

كنت ببكي على حالي، أنا إيه اللي رماني هنا؟ كله بسببك يا كهرمان. لو ما كنتش سمعت كلامك، كان زماني مع ولدي السلطان. ياترى عامل إيه دلوقتي؟ بصيت على التنين ولقيته بص لي. سمعت صوت بيقول: "أهدي وما تبكيش". قلت له: "أنت بتتكلم ولا أنا بيتهيأ لي؟ وبتتكلم إزاي زينا كدا؟

استغربت لما قالي أنه جن مسحور وخادم للساحرة. وعايش هنا من فترة، ومقدرش أعمل حاجة غير إني أنفذ أمر الساحرة. ولكن بأيدك أنتِ تنهي الأمر ده لو عرفتي تفكي السحر. وقتها هرجعك المكان اللي تقوللي عليه. قلت له: "طب ما تساعدني وتعرفني مين السبب في وجودي هنا؟ قالي: "أنا خادم وليس لي حق أن أفصح عن شخصيتها". *** وردشان: "قلت لرسلان أنت بتدور على قمر الزمان؟ عاوز تتجوزها ولا عاوز ملك السلطان؟ لقيته قال: "رسلان...

مينفعش أكون سلطان إلا لما أتجوزها، لولا كدا ما كنتش دورت عليها. بس عاوز أعرف طريق نجم الدين، عاوز أخلص منه. ولو تدليني على طريقه، ليكِ كل اللي تطلبيه." وردشان: "لو ياسمين سمعتك، كانت هي اللي خلصت عليك." قلت له: "بس قمر الزمان اتخطفت، وهي في مكان ونجم الدين في مكان، ولازم تختار واحد من الاثنين." سرحان: "مكان الأميرة هو الأهم، من غيرها مش هتوصل لحاجة. وبعد كدا نجم الدين مسيره هيظهر ويبان يا أمير رسلان."

رسلان: "تمام، زي ما قال سرحان. عرفيني فين قمر الزمان ومين اللي خطفها؟ وعاوز منها إيه؟ وياترى هو عارف هي مين؟ وردشان: "اللي خطفها مش فارق معاه هي مين، لأنها اتطلبت من الجن وهم اللي خطفوها. هدلك على المكان ولازم أنت اللي تروح هناك لوحدك." *** وخدته وفضلت ماشية معاه لحد ما وصلت لبوابة جبل الظلام. وقلت له: "إيدك على الفلوس وأدخل البوابة، هتلاقي الأميرة عند الجبل التالت وهتطلع قدامها بطل. وأنا هنا دوري انتهى."

ده كان اتفاقي مع ياسمين عشان تخلص منه. لكن لقيته قال: صفوان: "من زمان وأنا أسمع عن جبل الظلام، أنه أرض الجن. هو أنا صحيح نفسي أخلص من رسلان، لكن بعد ما أضمن حياة الأميرة الأول. عشان كدا خدت الأمير على جنب وقولت له الست دي بتدلك على الهلاك. جبل الظلام ممنوع دخول فيه أي إنسان، لازم اللي يدخله يكون من الجن. ولو لازم تدخل، يبقى هي معاك."

رسلان: "فكرت في كلام صفوان. الست دي هي اللي نادت عليا وهي اللي قالت أنها هتساعدني. يمكن تكون متسلطة من نجم الدين، ويمكن بردو تكون صح. عشان كدا قلت لها: أنا هديكي فلوسك بزيادة بس بعد ما تجيبي لي قمر الزمان. أنا مش هتنقل ولا هروح في أي مكان." وردشان: "إيه المصيبة اللي وقعتيني فيها دي يا ياسمين؟ قلت له: "وأنا مالي؟ هو أنا اللي عاوزاها ولا أنت؟ ولو على الفلوس، خليهالك." واختفيت من قدامه ورحت على ياسمين. حكيت

لها اللي حصل وقولت لها: "أنا ماليش دعوة وهختفي من البيت كمان عشان ترتاحي. عفان لو عرف مش هيرحمني. دماغك هتودينا في داهية." ومشيت من قدامها وسيبتها. *** نجم الدين: "طلعت على الصخور وحاسس بسخونة كأن الحجارة من النار. وفجأة لقيت الحجارة بتوقع كلها، مبقاش فاضل غير جسر رفيع. فضلت أجري عليه وأطلع لحد آخر حجر. ببص لقيت نفسي على فوهة بركان، وكنت خلاص هقع. وفضلت أدور على طريقة توصلني للجهة الثانية عشان أكمل."

ياسمين: "طلعت البلورة وطلبت التنين وشوفته، وشوفت قمر الزمان وكانت قاعدة تبكي. وطلبت أشوف نجم الدين، ولقيته قرب لها. لآ مش بعد كل ده. مش ممكن. وطلبت من التنين ينقلها. بس المرة دي لأرض الهلاك. أنا زهقت منها ولازم أرتاح وأخلص من وجودها. والمرة دي مش هتقدر توصلها يا نجم الدين. آه." عفان: "كنت حاسس إنك ورا كل اللي بيحصل. أنتِ يا ياسمين؟ ليه كل ده؟ عشان ابن عمك؟

أنتِ عارفة أنه عمره ما هيتجوزك بسبب أعمالك دي. ودلوقتي أنتِ هتكوني سبب في موته. مافيش حد رجع من جبل الظلام. ليه تعملي كدا؟ هتستفادي إيه؟ *** قمر الزمان: "كنت ببكي على حالي، وحشني أوي السلطان. ياترى عامل إيه في بعدي؟ ويارتري يا نجم الدين بتدور عليا ولا خلاص زهقت وهتنساني؟ وببص

لقيت التنين وقف وقالي: "جاتلي أوامر جديدة. استعدي يا أميرة." ولقيته شالني برجله وفرد جناحه وبيطير فوق البركان. صرخت ومسكت في رجله وخفت. ببص لقيت نجم الدين. ناديت عليه. نجم الدين: "وأنا واقف والحجارة مولعة نار وأي حركة ممكن توقعني في البركان. ببص لقيت التنين بيطير وشايل قمر الزمان. وشافتني وفضلت تنادي عليا وقالت لي: أعرف مين اللي سحرني وقتها هو هيرجعني. أتصرف بسرعة قبل ما يموتني."

نزلت جري على الحجارة وعديت الجسر وفضلت أنزل لحد ما لقيت نفسي واقف قدام الحيطة. ومرة واحدة اتفتحت البوابة ولقيت الخادم بيقولي: "أنا شوفت التنين ومعاه الإنسية وطار. هتعمل إيه؟ قلت له: "رجعني لأصحابي، عاوزين نخرج قوام. لازم أرجع للغابة السوداء عند عمي عفان." خادم الجن: "هوصلك لأصحابك، لكن عندي أمر من عفان إني أحميك. وفي ع بوابة الخروج ناس عاوزة تخلص عليك." نجم الدين: "طب مينفعشي تخرجني من مكان تاني؟

قالي: "ممكن أوديك ع سكة بس آخرتها بالقرب من شمال الغابة السوداء عند الشط." *** رسلان: "بعد اختفاء الساحرة وردشان، شكرت صفوان. قولت له: لولاك كان زماني انتهيت. بس دلوقتي هنعمل إيه؟ ولقيت سرحان قالي: "مش هنسيب نفسنا للساحرات يلعبوا بينا. أكيد نجم الدين هيرجع لسفينته. تعالى ندور عليها وننتظره هناك." ولقيت صفوان قالي: "فكر سليم. ننتظره اليوم ولو مرجعش نرجع الجزيرة. أكيد هو خاطفها عشان عاوز فدية." وهنا

افتكرت الرسالة وقولت لهم: "يلا بينا." وسألنا على البحر منين وبدأنا نتجه هناك وأنا عمال أرتب هعمل إيه مع السلطان. سرحان: "كنت عاوز أبعد رسلان بأي شكل عن هناك. وبالذات من بيت عم عفان. مدام في حماية حوالين البيت، يبقى أكيد نجم الدين وقمر الزمان هناك. وعشان نوصل للشط فيها مشي لحد الليل يكون نجم الدين قدر يهرب لأي مكان." *** نجم الدين: "لقيت خادم الجن قالي: يلا بسرعة. وأخدت البحارة وطلعنا عند البحر.

وقولت له: ليا عندك طلب." خادم الجن: "لو طلبك إني أوديك للتنين، يبقى الطلب مرفوض." نجم الدين: "لآ. أنا رشا منصور. عاوز منك تجيب لي صديقي علاء الدين. محتاجه معايا." وقالي: "طلبك مجاب. وفي أقل من دقيقة لقيت علاء قدامي. وبعدها قالي: أنا دوري هنا انتهى واختفى." طلبت من حمدان ياخد البحارة ويطلع بهم السفينة. ولقيت سفروت وصابرينا، قولتلهم: "يلا بسرعة اطلعوا من هنا وأنا هعرف أوصلكم." علاء الدين: "أنا إيه اللي جابني هنا؟

مين نجم الدين؟ هو إيه اللي حصل؟ وأنا هنا بعمل إيه؟ نجم الدين: "عاوز منك خدمة يا صاحبي. الأول قولي فين البساط السحري؟ ولقيته قالي: "أنا كنت نايم لقيت اللي شالني وجابني هنا. بس سهل أجيبه. لكن عاوز منه إيه؟ قولي الأول وفهمني." وبدأت أحكي له الموضوع. *** عفان: "اتفضلي. أمري الخادم بتاعك يجيب قمر الزمان هنا قبل ما نجم الدين ما يوصل ويعرف حاجة. وأنا هعرفه إنك ساعدتي في إنقاذها."

ياسمين: "كنت عارفة إن كل اللي يهم أبويا حياة الأميرة. لكن مش فارق معاه حبي لنجم الدين وإني عاوزاه ليا. عشان كدا قولت له: أنا عملت السحر إن هي بس اللي هتقدر تفكه وأنا ماليش سلطة عليه. كنت عاملة حساب إنك ممكن تعرف الحقيقة وتحاول ترجعها. لكن دلوقتي ولا أنت ولا غيرك هيقدر يعمل لها حاجة. أنا أخري أراقبها وبس ومافيش في إيدي حاجة تنقذها." عفان: "مكنتش عارف إني مخلف شيطانة مش بتفكر غير في نفسها وبس.

وفضلت أضرب فيها وقولت لها: حتى لو نجم الدين طلب يتجوزك أنا اللي هرفض، فاهمة؟ تبقي خلي السحر بقي ينفعك. واحدة غيرك كانت اتعلمت من اللي حصل لأمها. لكن أنتِ الغيرة هتدمرك." ودخلت حجرتي ووقفت قدام المرايا المسحورة. كنت عاوز أطمن على نجم الدين ولقيته واقف عند أول الغابة السوداء. اطمنت أنه خرج بسلام من جبل الظلام. علاء الدين: "أنا بردو مفهمتش إيه المطلوب مني."

نجم الدين: "ابدأ. مش مطلوب منك غير أننا نطلع رحلة بسيطة بالبساط السحري. وبما أنه مش بينفذ غير أوامرك أنت وبس، اتفضل بقي هاته. عاوزين نلحق التنين بسرعة." علاء الدين: "هو أنت متخيل إني هروح وراء التنين ليه؟ هو أنا لقيت عمري؟ بص يا نجم الدين، أنت صاحبي وحبيبي ونفسي أخدمك. لكن بعيد عن التنين. واطلب ده ممكن بنفخة واحدة منه يحرق ليا البساط. تقدر تقولي ساعتها هنرجع إزاي؟

ده لو فضلت وقتها سليم. وبدل ما تبقي واحدة بس اللي معاه، هيبقي إحنا التلاتة." *** رسلان: "فضلت ماشي السكة بعيدة. قولت لهم: مش قادر، خلينا نرتاح. ولقيت صفوان قالي: الليل قرب، تعالي نرجع لطريق أرض النعمان ومنه للجزيرة. إحنا ممكن نكون هنا وهو سافر لهناك." فكرت في كلامه وقولت: "عنده حق. الأيام عمالة تعدي وقربت المدة تنتهي. وأكيد هيروح للسلطان زي ما قال وهيطلب المال. يبقى أكيد فعلا هو في طريقه للجزيرة."

قولت لهم: "تمام، نرتاح ومن أول النهار نرجع لأرض النعمان. بس نسأل أكيد في طريق تاني مختصر." *** نجم الدين: "لقيت كلام علاء الدين منطقي. وبدل ما ننقذ قمر الزمان، نتحجز معاها. وقعدت على الشط. وعلاء الدين قالي: عاوزين نراجع كل حاجة حصلت معاك من أول ما وصلت للغابة السوداء. وقتها هنقدر نعرف مين اللي عمل السحر. وأكيد ساعتها هنلاقي اللي يقدر يساعدنا." ***

قمر الزمان: "التنين فضل طاير بيا مسافة طويلة. وفجأة نزلني. إيه ده اللي أنا شايفاه؟