رواية ارهقني عشقها الفصل العاشر 10 - بقلم دينا عبدالله

ضحك ضحكة مليانة وجع وقال: والله... طيب منا استحملت إن مراتي تحب غيري وكانت هتهرب معاه وتسيبني ويعني مطلقتكيش بالعكس ده أنا كنت هموت وفضلت متمسك بيكي ومسبتكيش... وإنتي جايه دلوقتي عايزة تطلقي عشان اتجوزت تاني وعلى سنة الله ورسوله متجوزتهاش في الحرام؟ تسميه إيه ده؟ وجدان بدموع: انت ليه مصر إنك متفهمنيش؟ انت ليه مش فاهمني؟ سابها وقال: عشان إنتي عمرك ما فهمتيني. وجدان بدموع وحب: بس دلوقتي فهماك وبقيت عارفاك كويس.

معتز: وإنتي فاهمة إيه بقى؟ وجدان: انت بتعمل كده عشان توجعني صح؟ ابتسم بسخرية وقال: وأوجعك ليه وإنتي مبقتيش فارقة معايا أصلاً. انصدمت من كلامه وكان لسه هيدخل الأوضة عند رهف بس وقف لما سمعها بتقوله: معتز أنا بحبك. بصلها وقال بوش خالي من التعابير: مش قادر أصدقك مش عارف ليه. وجدان بدموع وغضب: لما إنت مش مصدقني ومش فارقة معاك طلقني. معتز: وأنا مش هطلق. *** شاف الحاج ناصر رهف وهي واقفة قدام باب الشقة

انصدم وقال بصوت عالي قوي: رهف. اتجمّدت مكانها لما سمعت صوته. نزلت ووقفت قدامه وقالت وهي بتبص في الأرض: نعم يا عمو. ناصر بصدمة: إنتي... إنتي البت اللي اتجوزها ولدي؟ طب كيف وليه؟ وأبوكي الأستاذ جمال يعرف بكدا؟ ولا متجوزة من وراه؟ لأن لو الأستاذ جمال كان عارف أكيد كان قالي، أنا كنت معاه في شغل الأسبوع اللي فات. رهف بدموع: بابا ميعرفش... أنا هقولك على كل حاجة بس متقولش لبابا على أي حاجة. ناصر بصدمة: مش مصدق...

مش مصدق إنك بنت الراجل المحترم الأستاذ جمال. رهف وهي تبكي: ولدك قالي إننا نمثل على مراته وجدان إننا متجوزين عشان ما بينهم خلاف. أنا والله ماليش دعوة. ناصر بصدمة أكبر: يعني إنتوا مش متجوزين؟ رهف بخوف: لأ مش متجوزين... بس والله مفيش حاجة حصلت بينا. ناصر بصوت قوي وغاضب: اطلعي من هنا على بيت أبوكي عدل وأنا هكلم أبوكي وأقوله على عمايل بتّه المحترمة. رهف وسط بكائها: أنا ماليش دعوة ابنك هو اللي وراه كل حاجة.

ناصر بصوت قوي: امشي من هنا ومشوفش وشك تاني وأنا حسابي مع ولدي. طلعت رهف بسرعة غيرت هدومها وطلعت برا السرايا بسرعة خوف من ناصر. نزلت وجدان ومكنتش عارفة إيه اللي بيحصل ورهف طلعت ليه بتجري كده. بصلها ناصر وقال بغضب: إيه اللي حصل بينك وبين معتز يخليه يعمل عملة سودا زي دي؟ وجدان بعدم فهم: قصد إيه؟ أنا مش فاهمة حاجة. دخل معتز ومعاه جاسم. بصله ناصر بغضب شديد. همس جاسم لمعتز وقال: هو إنت عملت مشكلة تانية ولا إيه؟

معتز: أنا معملتش حاجة. ناصر بغضب: طلقها. بصله الكل بدهشة وهما معتقدين إنه بيتكلم عن رهف. معتز: وأنا قولت مش هطلق. ناصر بصوت عالي: وجدان طلق وجدان ودلوقتي. الكل بصله بصدمة كبيرة وهما مش مستوعبين قال إيه. معتز: وأطلقها ليه؟ ناصر: إيه اللي حصل بينكم يخليك تجيب بنات الناس وتتظاهر إنك متجوزها تقعدها في شقتك وأوضة نومك وهي مش مراتك؟

لما إنتوا مش فاهمين بعض والخلافات وصلت بينكم لحد كده يبقى تنفصلوا أحسن وبلاش مسخرة وفضايح أكتر من كده. جاسم: كل الحكايا يا ابوي... قاطعه ناصر وهو بيقول بغضب شديد: إنت اسكت خالص مسمعش نفسك... وإنتوا هتقولوا حصل إيه ولا لأ. بصت وجدان لمعتز اللي كان برضه بيبصلها وساكتين ومحدش فيهم رد. هز ناصر راسه وقال بغضب: طيب براحتكم... يلااا طلقها. معتز: بس أنا مش هطلقها. وجدان بدموع وغضب: بس أنا عايزة أطلق.

جاسم بغضب: ما خلاص إنتوا الاتنين كفايا لحد كده... وإنت يا أخويا كفايا لو كل واحد فيكم مش مستحمل تصرفات التاني يبقى خلاص أبوي معاه حق. ناصر بص لمعتز بغضب عارم وقال: خلص طلقها... تعيش في بيت أبوها معزة مكرمة أحسن ما تعيش معاه وإنت بتهينها بالشكل ده. بص معتز لوجدان اللي كانت بتبصله بنظرات هو مش فاهمها. ناصر بغضب: أنا مش هكرر كلامي تاني. معتز: إنتي طالق. أول ما سمعتها طلعت فوق وهي بتجري وبتعيط.

بصله ناصر وقال: من هنا ورايح لا هتطلع ولا هدخل البيت إلا بإذني لحد ما تعقل. *** بعد فترة. عرفت رقيه بكل اللي حصل وعن موضوع رهف. كانت لابسة الفستان لأن ده يوم دخلتها مع جاسم. قعدت أمها جنبها وقالت: هو ده اللي إنتي كنتي بتحبيه؟ شوفتي عمايله... ربنا كرمك بجاسم بيحبك وعاقل عن أخوه. حافظي على جوزك يا بتي واللي فات انسيه وابدأي مع جوزك حياة جديدة وفرحيه وابسطيه. ارفعي راسنا بدل ما تحطي راسنا في الطين.

هزت رقيه راسها وقالت: حاضر ياما متخافيش مش هعمل حاجة تكسركم قدام حد. هخليكم طول عمركم رافعين راسكم بيا. *** دخل جاسم شقته وهو شايل رقيه وقفل الباب برجله. دخل أوضة النوم وقفل الباب. حطها على السرير برفق وهو بيبصلها بحب وعشق. جاسم بتوهان: حد قالك قبل كده إنك حلوة قوي قوي قوي قوي؟ ابتسمت بخجل شديد وقالت: انت بتحبني قوي يا جاسم. جاسم وهو بيلمس شفايفها بشفايفه: حب إيه؟ ده أنا بعشقك يا بت.

حس بابتسامتها على شفايفه ومقدرش يقاوم وباسها بحب وعشق وهو بيحسسها قد إيه هو بيحبها... وهي استسلمت ليه بين لمساته... وجمعهم لحظات جميلة. *** حس معتز بغلطه وقد إيه كان غبي لما مشي ورا قلبه. كان من الأول اختار صح، اختار واحدة بتحبه هو وبس ومبتحبش غيره. بس قلبه اللي ودّاه في ستين داهية. وقرر بعد كده إنه مش هيمشي ورا قلبه تاني ويمشي بعقله.

حتى وجدان عرفت غلطها كويس وإن أول شخص حبته في حياتها كان غلط وكان لازم تختار صح. تختار واحد زي معتز يحبها بجد مش يستغلها. كل واحد اتعلم من تجربته بحاجة مختلفة واتعلم درس عمره ما هينساه. واتمسك أدهم على كمين على الطريق وهو معاه كمية مخدرات واتسجن بعدها. ورهف اللي لما أبوها عرف حبسها في البيت واتبرى منها ومن عمايلها بعد ما كسرته وحطت راسه في الطين.

عاشت رقيه مع جاسم وهي شايفة منه كل حب ومودة ورحمة وبيعاملها بما يرضي الله وهي كانت معاه زوجة صالحة وربنا كرمهم بزرية صالحة وفرحت وداد بأحفادها.